| ການພົວພັນດ້ານການຄ້າ ຫວຽດນາມ - ອາເມລິກາ ບັນລຸສະຖິຕິໃຫມ່ | |
| ການບິນ ຫວຽດນາມ ແລະ ອາເມລິກາ ເພີ່ມທະວີການຮ່ວມມື |
 |
| ທ່ານນາຍົກລັດຖະມົນຕີ ຟ້າມມິງຈິງ ກ່າວຄຳເຫັນທີ່ກອງປະຊຸມ (ພາບ: baochinhphu.vn) |
ທ່ານນາຍົກລັດຖະມົນຕີ ເນັ້ນໜັກວ່າ: ຄຽງຄູ່ກັບການພັດທະນາຢ່າງເຂັ້ມແຂງຂອງຫວຽດນາມ, ພາຍຫຼັງກວ່າ 26 ປີແຫ່ງການພົວພັນເປັນປົກກະຕິ (ນັບແຕ່ປີ 1995), ການພົວພັນສອງປະເທດຫວຽດນາມ - ອາເມລິກາ ໄດ້ພັດທະນາຢ່າງວ່ອງໄວ, ບັນລຸໄດ້ຫລາຍຜົນງານອັນດີງາມໃນບັນດາຂົງເຂດ.
ພິເສດ, ການພົວພັນລະຫວ່າງສອງປະເທດ ໄດ້ມີບາດກ້າວພັດທະນາທີ່ສຳຄັນ ໃນຂົງເຂດເສດຖະກິດ ດ້ວຍການລົງນາມໃນສັນຍາການຄ້າສອງຝ່າຍ (ປີ 2000); ອາເມລິກາໄດ້ຮັບຮອງເອົາຂໍ້ກຳນົດການຄ້າປົກກະຕິຖາວອນ ໃຫ້ແກ່ຫວຽດນາມ (2006); ສອງປະເທດໄດ້ເຊັນສັນຍາຂອບການຄ້າ ແລະ ການລົງທຶນ (2007); ສ້າງຕັ້ງການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ (ໃນປີ 2013)…
ວົງເງິນການຄ້າສອງຝ່າຍ ລະຫວ່າງຫວຽດນາມ ແລະ ອາເມລິກາ ໄດ້ເພີ່ມຂຶ້ນປະມານ 250 ເທົ່າ, ຈາກ 450 ລ້ານ USD ໃນປີ 1995 ຂຶ້ນເປັນ 111 ຕື້ USD ໃນປີ 2021 (ເພີ່ມຂຶ້ນເກືອບ 21 ຕື້ USD ເມື່ອທຽບໃສ່ປີ 2020), ໂດຍບໍ່ຫົວຊາວ່າໂລກລະບາດໂຄວິດ-19 ຈະແກ່ຍາວ ແລະ ການພັດຜັນແປອັນສັບສົນ ທີ່ມີຜົນກະທົບຕ່ອງໂສ້ການສະຫນອງໃນທົ່ວໂລກ. ອາເມລິກາ ໄດ້ກາຍເປັນຄູ່ຮ່ວມມືການຄ້າອັນດັບ 2 ດ້ວຍວົງເງິນການຄ້າກັບຫວຽດນາມ ເກີນກວ່າ 100 ຕື້ USD. ອາເມລິກາແມ່ນຕະຫຼາດສົ່ງອອກໃຫຍ່ທີ່ສຸດຂອງຫວຽດນາມ, ໃນຂະນະທີ່ຫວຽດນາມ ກາຍເປັນຄູ່ການຄ້າໃຫຍ່ອັນດັບ 9 ຂອງອາເມລິກາ.
ໃນຫຼາຍປີມານີ້, ອາເມລິກາ ຍາມໃດກໍ່ແມ່ນໜຶ່ງໃນບັນດາຄູ່ຮ່ວມມືລົງທຶນໃຫຍ່ກວ່າໝູ່ຢູ່ ຫວຽດນາມ ດ້ວຍເກືອບ 1.150 ໂຄງການດຳເນີນງານ, ດ້ວຍຍອດຈຳນວນທຶນຈົດທະບຽນກວ່າ 10,3 ຕື້ USD, ຢືນອັນດັບທີ 11/141 ພື້ນຖານເສດຖະກິດທີ່ລົງທຶນຢູ່ ຫວຽດນາມ.
ທ່ານນາຍົກລັດຖະມົນຕີ ເນັ້ນໜັກວ່າ: “ຂ້າພະເຈົ້າດີໃຈ ຕໍ່ຜົນການສຳຫຼວດການລົງທຶນດຳເນີນທຸລະກິດປີ 2021 ຂອງ Amcham, ຕາມນັ້ນແລ້ວ, ເກືອບ 80% ສະມາຊິກ AmCham ຫວຽດນາມ ທີ່ເຂົ້າຮ່ວມການສຳຫຼວດ ໄດ້ຕີລາຄາສູງ ເລື່ອງແງ່ຫວັງການພັດທະນາທຸລະກິດໄລຍະກາງ ແລະ ຍາວ ຂອງຕະຫຼາດຫວຽດນາມ, ໃນໄລຍະມໍ່ໆມານີ້ ໄດ້ຢືນຢັນອີກເທື່ອໜຶ່ງການເພີ່ມທະວີ ການຮ່ວມມືລະຫວ່າງສອງປະເທດຫວຽດນາມ - ອາເມລິກາ ແລະ ທ່າແຮງຂອງວິສາຫະກິດຂອງສອງປະເທດ”.
ຄຳຮຸ່ງ
