| Samsung ຮ່ວມມືພັດທະນາໂຮງງານອັດສະລິຍະ ຢູ່ ຫວຽດນາມ | |
| ອົດສະຕາລີ ລົງທຶນໜູນຊ່ວຍວິສາຫະກິດ ຫວຽດນາມ ເລີ່ມຕົ້ນທຸລະກິດ |
 |
| ທ່ານເອກອັກຄະລັດຖະທູດຫວຽດນາມ ປະຈຳ ອົດສະຕາລີ ຫງວຽນເຕິດແທ່ງ ຖ່າຍຮູບເປັນທີລະນຶກຢູ່ງານວາງສະແດງ (ພາບ: TTXVN) |
ງານວາງສະແດງດ້ວຍຫົວຂໍ້ວ່າ “ສະບາຍດີປີໃໝ່” ໂດຍສູນຫວຽດນາມ ປະຈຳ ອົດສະຕາລີ ຈັດຕັ້ງ, ມີບັນດາຜົນງານສິລະປະທີ່ເປັນເອກະລັກສະເພາະ ດ້ວຍຫົວຂໍ້ ແລະ ເນື້ອໃນທີ່ເປັນມູນເຊື້ອ, ໃນນັ້ນມີຮູບທີ່ພິມດ້ວຍໄມ້ ແລະ ຜະລິດຕະພັນວາງສະແດງ ດ້ວຍຫົວຂໍ້ກ່ຽວກັບເສືອ.
ມາຢ້ຽມຊົມງານວາງສະແດງ, ທ່ານເອກອັກຄະລັດຖະທູດຫວຽດນາມ ປະຈຳ ອົດສະຕາລີ ຫງວຽນເຕິດແທ່ງ ໄດ້ຕີລາຄາສູງບັນດາຄວາມມານະພະຍາຍາມ ແລະ ຄວາມເມົາມົວຂອງບັນດາສະມາຊິກສູນຫວຽດນາມ ໃນການສະແດງໃຫ້ເຫັນຄຸນຄ່າວັດທະນະທຳຫວຽດນາມ ຢູ່ ອົດສະຕາລີ.
ທ່ານເອກອັກຄະລັດຖະທູດ ຫງວຽນເຕິດແທ່ງ ຖືວ່າ: ເພື່ອ “ພັດທະນາບັນດາຄຸນຄ່າວັດທະນະທຳຫວຽດນາມຢູ່ ອົດສະຕາລີຢ່າງເລິກເຊິ່ງ ແລະ ກວ້າງໄກກ່ວາອີກ”, ສູນ ຫວຽດນາມ ຕ້ອງສືບຕໍ່ຜັນຂະຫຍາຍການຫັນເປັນຫຼາຍຮູບແບບ ແລະ ເປີດກວ້າງຂົງເຂດກໍ່ຄືການເຄື່ອນໄຫວຕາມທິດທັນສະໄໝກ່ວາອີກ, ສົ່ງເສີມຄວາມຕ້ອງການຊອກຮູ້ຂອງປະຊາຊົນ, ພິເສດແມ່ນຊາວຫນຸ່ມອົດສະຕາລີ.
ທ່ານເອກອັກຄະລັດຖະທູດ ຫງວຽນເຕິດແທ່ງ ສະແດງຄວາມສະໜັບສະໜູນ ແລະ ພ້ອມແລ້ວທີ່ຈະໜູນຊ່ວຍສູນ ຫວຽດນາມ ໃນບັນດາການເຄື່ອນໄຫວໂຄສະນາວັດທະນະທຳ ຫວຽດນາມ ຢູ່ ອົດສະຕາລີ ກໍ່ຄືບັນດາການເຄື່ອນໄຫວເຊື່ອມຕໍ່ອື່ນໆ, ພິເສດແມ່ນເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງສະຖານທູດ ຫວຽດນາມ ປະຈຳ ອົດສະຕາລີ.
ທ່ານນາງ ແຮງຫງວຽນ, ຮອງປະທານສາຂາສູນ ຫວຽດນາມ ປະຈຳ ອົດສະຕາລີ ໃຫ້ຮູ້ວ່າ: ງານວາງສະແດງໄດ້ດຶງດູດຄວາມສົນໃຈຈາກຊາວ ອົດສະຕາລີ ຢູ່ Canberra ເປັນຈຳນວນຫຼວງຫຼາຍ, ພິເສດແມ່ນບັນດາຜູ້ທີ່ມີໂອກາດມາຢ້ຽມຢາມ ແລະ ມີປະສົບການຕົວຈິງດ້ານວັດທະນະທຳ ຫວຽດນາມ.
ງານວາງສະແດງຄັ້ງນີ້ແມ່ນສ່ວນໜຶ່ງໃນແຜນການໂຄສະນາບັນດາຄຸນຄ່າວັດທະນະທຳຫວຽດນາມ ຢູ່ ອົດສະຕາລີຂອງສູນຫວຽດນາມ. ສູນດັ່ງກ່າວຍັງມີແຜນການຜັນຂະຫຍາຍບັນດາການເຄື່ອນໄຫວໄປຍັງຂົງເຂດອື່ນ ເພື່ອເຊື່ອມຕໍ່ປະຊາຊົນໃນທົ່ວປະເທດ ອົດສະຕາລີ ທີ່ປາດຖະໜາຢາກຊອກຮູ້ກ່ຽວກັບ ຫວຽດນາມ ເວົ້າລວມ ແລະ ວັດທະນະທຳ ຫວຽດນາມ ເວົ້າສະເພາະ. ສູນພ້ອມແລ້ວທີ່ຈະສົມທົບກັບສະຖານທູດຫວຽດນາມ ໃນການຈັດຕັ້ງບັນດາເຫດການວັດທະນະທຳເນື່ອງໃນໂອກາດສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນຫວຽດນາມ - ອົດສະຕາລີ.
ບຸນຄົງ
