 |
ທ່ານ ຮອງນາຍົກລັດຖະມົນຕີ ລົງກວດກາຄວາມເສຍຫາຍ ຂອງຝຸງບົ້ງທໍາລາຍສວນສາລີ
ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ແຫ່ງ ສປປລາວ ພ້ອມຄະນະ ໄດ້ລົງເຄື່ອນໄຫວ ເບິ່ງຄວາມເສຍຫາຍສວນສາລີຂອງປະຊາຊົນເມືອງ ປາກລາຍ, ແຂວງ ໄຊຍະບູລີ ທີ່ຖືກຝຸງບົ້ງທໍາລາຍ, ໃນວັນທີ 11 ກໍລະກົດ 2019 ນີ້, ໃຫ້ການຕ້ອນຮັບໂດຍ ທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາພັກແຂວງ, ເຈົ້າແຂວງ ໄຊຍະບູລີ, ມີເຈົ້າເມືອງ ປາກລາຍ ແລະ ພະນັກງານຫຼັກແຫຼ່ງຂອງແຂວງໃຫ້ການຕ້ອນຮັບ ແລະ ນໍາພາລົງເບິ່ງຜົນເສຍຫາຍຂອງຝຸງບົ້ງທໍາລາຍສວນສາລີ ໃນເຂດກຸ່ມບ້ານຜາແກ້ວປ່າໄລ່ ເມືອງ ປາກລາຍ, ກ່ອນອື່ນ ທີມງານຂອງທ່ານຮອງນາຍົກລັດຖະມົນຕີແມ່ນໄດ້ຮັບຟັງການລາຍງານຜົນເສຍຫາຍຂອງຝຸງບົ້ງທໍາລາຍສວນສາລີຈາກວິຊາການ ຂະແໜງປູກຝັງ ພະແນກ ກະສິກໍາ ແລະ ປ່າໄມ້ແຂວງ ໄຊຍະບູລີ, ເຊິ່ງໃນລະຫວ່າງວັນທີ 20 ພືດສະພາ 2019 ໄດ້ເກີດມີການລະບາດຂອງບົ້ງຝູງສາລີ ຢູ່ເມືອງປາກລາຍ, ພົບການລະບາດເບື້ອງຕົ້ນ ຈຳນວນ 7 ບ້ານ, ມີເນື້ອທີ່ຖືກບົ້ງຝູງທຳລາຍຈຳນວນ 2.732,10 ເຮັກຕາ, ມາຮອດວັນທີ 24 ມີຖຸນາ 2019 ບົ້ງດັ່ງກ່າວກໍ່ໄດ້ແຜ່ລາມອອກເປັນວົງກວ້າງ ໃນຂອບເຂດທົ່ວແຂວງ ທີ່ມີການປູກສາລີໃນເນື້ອທີ່ 35,192.87 ເຮັກຕາ, ມີເນື້ອທີ່ສາລີຖືກຜົນກະທົບຈາກບົ້ງຝູງທຳລາຍ ຈຳນວນ 15,340.91 ເຮັກຕາ, ຄາດຄະເນຄວາມເສຍຫາຍໃນປັດຈຸບັນປະມານ 30% ຂອງເນື້ອທີ່ຖືກຜົນກະທົບ ເທົ່າກັບ 4,602.27 ເຮັກຕາ, ຄິດເປັນຜົນຜະລິດເສຍຫາຍປະມານ 24,852.258 ໂຕນ, ມີ 168 ບ້ານ, ມີ 7,058 ຄອບຄົວ, ຕໍ່ກັບເຫດການດັ່ງກ່າວພາກສ່ວນກ່ຽວຂ້ອງແມ່ນໄດ້ເອົາໃຈໃສ່ໃນການປ້ອງກັນ ແລະ ກຳຈັດບົ້ງຝຸງສາລີແບບປະສົມປະສານ ເຊັ່ນ: ໃຊ້ມືເກັບບົ້ງ, ເກັບກຸ່ມໄຂ່ບົ້ງ, ໃຊ້ກັບດັກແມ່ບົ້ງມາທຳລາຍ, ກຳຈັດວັດສະພືດທີ່ເປັນແຫຼ່ງອາໄສຂອງບົ້ງ, ທົດລອງໃຊ້ຂີ້ກະເດືອນຝອຍ ໃນອັດ 4 ຖົງ/ນໍ້າ 20 ລິດ, ທົດລອງໃຊ້ກັບດັກກາກນ້ຳຕານລໍ້ແມ່ບົ້ງ, ໃຊ້ກັບດັກແສງໄຟລໍ້ແມ່ບົ້ງ, ໃຊ້ສານເຄມີຊີດພົ່ນເຊັ່ນ: ເຊື້້ອ Bt ໃນອັດຕາ 80 g/ນໍ້າ 20 ລິດ, Metarhizium sp ໃນ ອັດຕາ 1 kg/ນໍ້າ 20 ລິດ, ໃຊ້ຢາ Emamectin benzoate ໃນອັດຕາ 10-15 g/ນໍ້າ 20 ລິດສີດໃນຕອນເຊົ້າ ແລະ ຕອນແລງ, ຜ່ານການປ້ອງກັນ ແລະ ທໍາລາຍບົ້ງຝຸງດັ່ງກ່າວແມ່ນສາມາດຄວບຄຸມໄດ້ 20% ຂອງເນື້ອທີ່-ທີ່ຖືກກທໍາລາຍທັງໝົດ, ຈາກນັ້ນທີມງານດັ່ງກ່າວກໍ່ໄດ້ຢ້ຽມຢາມດ່ານສາກົນພູດູ່,
ຮັບຟັງສະພາບການປະຕິບັດໜ້າທີ່່ວຽກງານວິຊາສິເພາະຂອງແຕ່ລະຂະແໜງການພາຍໃນດ່ານ, ໂອກາດດັ່ງກ່າວ ທ່ານ ສອນໄຊ ສີພັນດອນ ກໍາມະການກົມການເມືອງສູນກາງພັກ, ຮອງນາຍົກລັດຖະມົນຕີ ກໍ່ໄດ້ເນັ້ນໜັກໃຫ້ພະນັກງານແຕ່ລະສະຫາຍໃນດ່ານສາກົນພູດູ່ຈົ່ງສືບຕໍ່ປະຕິບັດໜ້າທີ່ວິຊາສິເພາະໃຫ້ດີ, ໃຫ້ການບໍລິການ ແລະ ອໍານວຍຄວາມສະດວກແກ່ປະຊາຊົນໃນການເຂົ້າ-ອອກດ່ານ, ຕໍ່ກັບບັນຫາບົ້ງຝຸງສາລີທໍາລາຍສາລີ ແມ່ນໃຫະວິຊາການສືບຕໍ່ຊ່ວຍປະຊາຊົນໃນການປາບ ແລະ ປ້ອງກັນຝຸງບົ້ງບໍ່ໃຫ້ຂະຫຍາຍ ແລະ ລະບາດສູ່ຂົງເຂດອື່ນດ້ວຍວິທີການຕ່າງໆຕາມເຕັກນິກວິຊາການ, ສືບຕໍ່ຟື້້ນຟູສວນສາລີທີ່ຍັງເຫຼືອໃຫ້ໄດ້ຮັບຜົນຜະລິດ, ຊຸກຍູ້ປະຊາຊົນປູກພືດອື່ນທົດແທນສາລີທີ່ຖືກບົ້ງທໍາລາຍ, ເປັນຕົ້ນແມ່ນພືດອາຍຸສັ້ນທີ່ໃຊ້ນໍ້ານ້ອຍທີ່ສຸດ, ນອກນີ້ກໍ່ສົ່ງເສີມໃຫ້ປະຊາຊົນປູກຫຍ້າລ້ຽງສັດໃຫຍ່ໃຫ້ຫຼາຍ, ໂອກາດດຽວກັນ ທ່ານຮອງນາຍົກກໍ່ໄດ້ມອບເງິນຈໍານວນ 30 ລ້ານກີບໃຫ້ປະຊາຊົນຊາວສວນສາລີທີ່ຖືກບົ້ງທໍາລາຍ ເພື່ອເປັນທືນຮອນໃນການຈັດຊື້ອຸປະກອນ ແລະ ຢາປາບບົ້ງ, ວັນດຽວກັນກໍ່ໄດ້ຢ້ຽມຢາມໂຮງງານແປ້ງມັນຕົ້ນ, ໂຄງການຂຸດຄົ້ນບໍ່ຄໍາ ຂອງບໍລິສັດ MPG ມາຍນິ່ງ ທີ່ເມືອງປາກລາຍ, ເບິ່ງສວນສາລີ, ສວນໝາກຜຸກ ຢູ່ບ້ານ ໂພນສັກ ເມືອງ ພຽງ ແລະ ຢ້ຽມຢາມ ກອງພັນໃຫຍ່ 202 ພ້ອມທັງມອບເງິນ ຈໍານວນ 30 ລ້ານ ເພື່ອປະກອບສ່ວນເຂົ້າໃນການສ້າງຫ້ອງການຕື່ມອີກ.
（ແຫຼ່ງຂໍ້ມູນ： Lao National Radio）
