| ເສີມຂະຫຍາຍແຫຼ່ງກຳລັງ, ນ້ຳໃຈຮັກຊາດຂອງຊາວຫວຽດນາມ ອາໄສຢູ່ຕ່າງປະເທດ ມຸ່ງສູ່ບ້ານເກີດເມືອງນອນ, ປະເທດຊາດ | |
| ເຊື່ອມຕໍ່ນັກຊ່ຽວຊານຊາວຫວຽດນາມ ອາໄສຢູ່ຕ່າງປະເທດກັບລະບົບນິເວດປ່ຽນແປງໃໝ່ປະດິດສ້າງແຫ່ງຊາດ |
ໃນຂອບເຂດໂຄງການຂໍ້ມູນຂ່າວສານ ກ່ຽວກັບສະຖານະການປະຊາຄົມຊາວຫວຽດນາມຢູ່ຕ່າງປະເທດ, ໝາກຜົນການເຮັດວຽກຂອງຄະນະກຳມະການລັດ ກ່ຽວກັບຊາວຫວຽດນາມຢູ່ຕ່າງປະເທດປີ 2021 ແລະ ທິດທາງການເຄື່ອນໄຫວໃນປີ 2022, ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຝ້າມກ່ວາງຮ້ຽວ, ປະທານຄະນະກຳມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ຖືວ່າ: ການພາຊາວຫວຽດນາມຢູ່ຕ່າງປະເທດ ກັບບ້ານໃນສະພາບໂລກລະບາດໂຄວິດ-19 ແມ່ນແຜນນະໂຍບາຍອັນໃຫຍ່ຫຼວງຂອງການນຳພັກ, ລັດ.
ຜ່ານການຢ້ຽມຢາມຕ່າງປະເທດ ຂອງບັນດາການນຳຂັ້ນສູງ, ຊາວຫວຽດນາມອາໄສຢູ່ຕ່າງປະເທດ ໄດ້ສະແດງໃຫ້ເຫັນຄວາມມຸ່ງມາດປາດຖະໜາອັນຊອບທຳ ທີ່ຈະກັບຄືນເມືອຢາມບ້ານເກີດເມືອງນອນ ແລະ ປະເທດຕົນ. ສະນັ້ນ, ການນຳຂອງພັກ ແລະ ລັດ ລ້ວນແຕ່ເອົາໃຈໃສ່ ແລະ ຊີ້ນຳສ້າງເງື່ອນໄຂສູງສຸດໃຫ້ປະຊາຊົນໄປກັບເມືອຢາມບ້ານເກີດເມືອງນອນ.
 |
| ທ່ານຮອງລັດຖະມົນຕີກະຊວງການຕ່າງປະເທດຫວຽດນາມ ຝ້າມກ່ວາງຮ້ຽວ, ປະທານຄະນະກຳມະການແຫ່ງລັດ ກ່ຽວກັບຊາວຫວຽດນາມ ອາໄສຢູ່ຕ່າງປະເທດ. ພາບ: baoquocte.vn |
ໃນປີ 2021, ກະຊວງການຕ່າງປະເທດ ປະສານສົມທົບກັບ ກະຊວງປ້ອງກັນປະເທດ, ກະຊວງສາທາລະນະສຸກ, ກະຊວງຕຳຫຼວດ ແລະ ກະຊວງຄົມມະນາຄົມຂົນສົ່ງ (ຄະນະເຮັດວຽກ 5 ກະຊວງ) ໄດ້ຈັດຕັ້ງປະມານ 173 ຖ້ຽວບິນ ເພື່ອຕ້ອນຮັບຜູ້ມີບຸລິມະສິດ 50.000 ກວ່າຄົນ ກັບຄືນປະເທດ, ຈຳກັດບໍລິເວນຢູ່ບັນດາສະຖານທີ່ຄຸ້ມຄອງໂດຍທະຫານ; 400 ຖ້ຽວບິນເພື່ອຮັບເອົາປະມານ 70,000 ຄົນ ມາຈຳກັດບໍລິເວນຢູ່ສະຖານທີ່ພົນລະເຮືອນ ໃນຮູບແບບສະຫມັກໃຈ ແລະ ຈ່າຍຄ່າທໍານຽມ.
ກ່ຽວກັບຄວາມຮຽກຮ້ອງຕ້ອງການອັນຊອບທຳ ຂອງຊາວຫວຽດນາມ ທີ່ຢາກກັບຄືນເມືອບ້ານເກີດເມືອງນອນ ໃນໂອກາດບຸນປີໃໝ່ປະຈຳຊາດ, ທ່ານຮອງລັດຖະມົນຕີການຕ່າງປະເທດ ໃຫ້ຮູ້ວ່າ: ກະຊວງການຕ່າງປະເທດ ໄດ້ສົມທົບກັບບັນດາກະຊວງ, ຂະແໜງການທີ່ກ່ຽວຂ້ອງ ຈັດຕັ້ງປະຕິບັດທິດທາງຂອງທ່ານຮອງນາຍົກລັດຖະມົນຕີຜູ້ປະຈຳການ ຟ້າມບິ່ງມິງ, ຕົກລົງຈະຟື້ນຟູຖ້ຽວບິນໂດຍສານສາກົນປົກກະຕິກັບເຂດທີ່ມີຄວາມປອດໄພສູງ ຄື: ປັກກິ່ງ/ກວາງໂຈ່ວ (ຈີນ), ໂຕກຽວ (ຍີ່ປຸ່ນ), ເຊອຸນ (ສ.ເກົາຫຼີ), ໄທເປ (ໄຕ້ຫວັນ-ຈີນ), ບາງກອກ (ໄທ), ສິງກະໂປ, ວຽງຈັນ (ລາວ), ພະນົມເປັນ (ກຳປູເຈຍ), ຊານຟານຊິດໂກ/ລອສແອງເຈລີສ (ສະຫະລັດອາເມລິກາ) ໂດຍປະຕິບັດຕາມຄຳແນະນຳຂອງກະຊວງສາທາລະນະສຸກ ກ່ຽວກັບມາດຕະການການແພດ ເພື່ອປ້ອງກັນການລະບາດຂອງພະຍາດສຳລັບຄົນເຂົ້າ-ອອກເມືອງ, ຮັບປະກັນຄວາມປອດໄພ, ປະສິດທິພາບ ແລະ ລຸລ່ວງຕະຫຼອດ. ໄລຍະເວລາທົດລອງເລີ່ມແຕ່ວັນທີ 1 ມັງກອນ 2022.
ວັນທີ 16 ທັນວາ 2021, ກະຊວງສາທາລະນະສຸກ ໄດ້ອອກຈົດໝາຍທາງການເລກທີ 10688/BYT-MT ວ່າດ້ວຍການປ້ອງກັນ ແລະ ຄວບຄຸມພະຍາດໂຄວິດ-19 ສຳລັບຄົນເຂົ້າເມືອງ, ໃນນັ້ນມີລະບຽບການ ໃນກໍລະນີທີ່ຄົນເຂົ້າຫວຽດນາມ ທີ່ໄດ້ຮັບການສັກຢາວັກແຊງຢ່າງຄົບຖ້ວນ, ຕ້ອງຈຳກັດບໍລິເວນຢູ່ໃນບ້ານ 3 ວັນ; ສໍາລັບຜູ້ທີ່ຍັງບໍ່ໄດ້ສັກຢາປ້ອງກັນ, ພວກເຂົາຕ້ອງໄດ້ຈຳກັດບໍລິເວນເປັນເວລາດົນກວ່າ. ນອກນີ້, ກະຊວງການຕ່າງປະເທດ ຍັງປຶກສາຫາລືກັບບັນດາປະເທດກ່ຽວກັບຮູບແບບການຮັບຮູ້ “ໜັງສືຜ່ານແດນວັກແຊງ” ເພື່ອສ້າງເງື່ອນໄຂສະດວກໃຫ້ປະຊາຊົນໃນການເດີນທາງ.
ຄຳຮຸ່ງ
