| ທ່ານປະທານປະເທດ ຫງວຽນຊວັນຟຸກ, ຢ້ຽມຢາມ, ມອບຂອງຂວັນໃຫ້ຄູອາຈານຢູ່ນະຄອນ ໂຮ່ຈີມິນ | |
| ທ່ານປະທານປະເທດ ຫວຽດນາມ ຫງວຽນຊວນຟຸກ ແລະ ການນຳບັນດາປະເທດເຫັນດີເປັນເອກະພາບເພີ່ມທະວີການຮ່ວມມືສອງຝ່າຍ |
 |
| ທ່ານປະທານປະເທດ ຫວຽດນາມ ຫງວຽນຊວັນຟຸກ ແລະ ທ່ານປະທານາທິບໍດີ ສະວິດ Guy Parmelin. ພາບ: TTXVN |
ທ່ານປະທານປະເທດ ຫວຽດນາມ ຫງວຽນຊວັນຟຸກ ສະເໜີໃຫ້ລັດຖະບານ ສະວິດ ສົ່ງເສີມວິສາຫະກິດ ສະວິດ ມາລົງທຶນຢູ່ ຫວຽດນາມ ແລະ ຢືນຢັນວ່າ ຫວຽດນາມ ພວມມານະພະຍາຍາມປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດໃຫ້ໂປ່ງໃສ, ອຳນວຍຄວາມສະດວກໃຫ້ວິສາຫະກິດຕ່າງປະເທດ.
ສອງຝ່າຍເຫັນດີເປັນເອກະພາບຈະມານະພະຍາຍາມເຈລະຈາ ສັນຍາການຄ້າເສລີ ລະຫວ່າງ ຫວຽດນາມ ກັບກຸ່ມການຄ້າເສລີ ເອີລົບ (EFTA) ໃຫ້ສຳເລັດໂດຍໄວ. ນອກຈາກນັ້ນ, ສອງຝ່າຍກໍໄດ້ເປັນເອກະພາບກັນ ເພີ່ມທະວີການຮ່ວມມືໃນຂົງເຂດວິທະຍາສາດເຕັກໂນໂລຢີ, ການສຶກສາ - ກໍ່ສ້າງໃຫ້ຫຼາຍກວ່າອີກ, ມຸ່ງໄປເຖິງການສ້າງຂອບການພົວພັນຄູ່ຮ່ວມກ່ຽວກັບການປ່ຽນແປງໃໝ່ປະດິດຄິດສ້າງ.
ທ່ານປະທານປະເທດ ຫວຽດນາມ ຫງວຽນຊວັນຟຸກ ໄດ້ສະເໜີໃຫ້ 2 ຝ່າຍຈົ່ງຊຸກຍູ້ບັນດາວິສາຫະກິດ, ຮາກຖານຄົ້ນຄວ້າຂອງສອງປະເທດຮ່ວມມືກັນພັດທະນາ, ຜະລິດ ແລະ ແຈກຢາຍວັກຊິນ ແລະ ຢາປິ່ນປົວໂຄວິດ-19.
ທ່ານປະທານປະເທດ ຫວຽດນາມ ຫງວຽນຊວັນຟຸກ ກໍ່ປາດຖະໜາວ່າ ລັດຖະບານ ສະວິດ ຈະສືບຕໍ່ສ້າງເງື່ອນໄຂສະດວກໃຫ້ປະຊາຄົມຊາວ ຫວຽດນາມ ອາໄສຢູ່ ສະວິດ ເຊື່ອມໂຍງເປັນຢ່າງດີ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາຂອງ ສະວິດ, ກໍຄື ເພີ່ມທະວີການພົວພັນມິດຕະພາບລະຫວ່າງ 2 ປະເທດ.
ທ່ານປະທານາທິບໍດີ ສະວິດ Guy Parmelin ໃຫ້ຮູ້ວ່າ ລັດຖະບານ ສະວິດ ຕົກລົງສືບຕໍ່ໃຫ້ບຸລິມະສິດສະໜອງທຶນ ODA ຈຳນວນເງິນກວ່າ 75,6 ລ້ານ USD ໃຫ້ແກ່ ຫວຽດນາມ ໃນໄລຍະ 2021 – 2024, ສຸມໃສ່ຂົງເຂດປົກປັກຮັກສາສິ່ງແວດລ້ອມ ແລະ ປະຕິຮູບເສດຖະກິດ.
ສອງຝ່າຍເຫັນດີເພີ່ມທະວີການຮ່ວມມື ແລະ ສະໜັບສະໜູນເຊິ່ງກັນ ແລະ ກັນຢູ່ບັນດາເວທີປາໄສຫຼາຍຝ່າຍ ແລະ ບັນດາອົງການສາກົນຄື ສະຫະປະຊາຊາດ, ກົນໄກຮ່ວມມື ອາຊີ - ເອີລົບ ແລະ ອື່ນໆ, ຫວຽດນາມ ເຫັນດີສະໜັບສະໜູນ ແລະ ພ້ອມແລ້ວທີ່ຈະເປັນຂົວເຊື່ອມຕໍ່ເພື່ອໃຫ້ ສະວິດ ເພີ່ມທະວີການພົວພັນຮ່ວມມືກັບ ສະມາຄົມບັນດາປະເທດອາຊີຕາເວັນອອກສ່ຽງໃຕ້ (ອາຊຽນ).
ກ່ຽວກັບບັນຫາທະເລຕາເວັນອອກ, ສະວິດ ເນັ້ນໜັກເຖິງຄວາມສຳຄັນຂອງເລື່ອງຮັບປະກັນຄວາມເສລີໃນການເດີນເຮືອ, ເຄົາລົບກົດໝາຍສາກົນ, ແກ້ໄຂການຂັດແຍ້ງກັນຜ່ານການເຈລະຈາທີ່ໂປ່ງໃສ ແລະ ສ້າງຄວາມໄວ້ເນື້ອເຊື່ອໃຈ.
ໄຊພອນ
