 |
| ຫ້ອງທົດລອງຂອງ IAEA |
ໃນການເຮັດວຽກມາເປັນເວລາ 3 ວັນ (24 – 26 ພະຈິກ), BoG IAEA ໄດ້ສຸມໃສ່ປຶກສາຫາລືກ່ຽວກັບໂຄງການຮ່ວມມືດ້ານເຕັກນິກ (TC) ໃນໄລຍະ 2022 – 2023, ບັນຫານິວເຄຼຍ ອີຣານ ແລະ ໂຄງການເຄື່ອນໄຫວຂອງສະພາໃນໄລຍະຈະມາເຖິງ.
ເຂົ້າຮ່ວມເຫດການມີທ່ານ Rafael Grossi ຜູ້ອຳນວຍການໃຫຍ່ IAEA ພ້ອມກັບ 35 ສະມາຊິກ BoG IAEA ແລະ ເອກອັກຄະລັດຖະທູດ, ຜູ້ຕາງໜ້າບັນດາປະເທດສະມາຊິກ IAEA. ທ່ານເອກອັກຄະລັດຖະທູດ ຫງວຽນຈຸງກຽນ, ຜູ້ຕາງໜ້າຫວຽດນາມ ປະຈຳ IAEA ເຂົ້າຮ່ວມໃນຖານະເປັນສະມາຊິກຂອງ Bog IAEA ອາຍຸການ 2021 – 2023.
ກ່າວຄຳເຫັນທີ່ການປຶກສາຫາລືກ່ຽວກັບ TC ໄລຍະ 2022 – 2023, ທ່ານເອກອັກຄະລັດຖະທູດ ຫງວຽນຈຸງກຽນ ຕີລາຄາສູງໝາກຜົນຂອງການຮ່ວມມືລະຫວ່າງ ຫວຽດນາມ ແລະ IAEA ກ່ຽວກັບການພັດທະນາ ແລະ ນຳໃຊ້ເຕັກໂນໂລຢີນິວເຄຼຍ ເພື່ອເປົ້າໝາຍສັນຕິພາບ ໃນໄລຍະຜ່ານມາ. IAEA ໄດ້ໜູນຊ່ວຍຫວຽດນາມ ປະຕິບັດສຳເລັດບັນດາໂຄງການຮ່ວມມືໃນຂອບເຂດ TC ໄລຍະ 2020 – 2021 ກໍ່ຄືໃນບັນດາການເຄື່ອນໄຫວຖ່າຍທອດເຕັກໂນໂລຢີນິວເຄຼຍຕ່າງໆ.
ທ່ານເອກອັກຄະລັດຖະທູດ ສະແດງຄວາມຂອບອົກຂອບໃຈ IAEA ທີ່ໄດ້ຮ່ວມເດີນທາງກັບ ຫວຽດນາມ ໃນວິວັດການຮັບມືກັບໂລກລະບາດໂຄວິດ - 19, ພ້ອມທັງເນັ້ນໜັກເຖິງເລື່ອງ IAEA ສະໜອງອຸປະກອນ, ຜະລິດຕະພັນທາງຊີວະວິທະຍາ ແລະ ຈັດຕັ້ງບັນດາຊຸດບຳລຸງສ້າງກ່ຽວກັບການນຳໃຊ້ເຕັກໂນໂລຊີນິວເຄຼຍ ເພື່ອປະຕິບັດການກວດວິໄຈແບບ RT-PCR ເຊິ່ງໄດ້ຊ່ວຍໃຫ້ ຫວຽດນາມ ບົ່ງມະຕິ ແລະ ກວດພົບ ໄວຣັດ SARS-CoV-2 ໂດຍໄວ.
ທ່ານເອກອັກຄະລັດຖະທູດ ສະແດງຄວາມຊົມເຊີຍ ແລະ ຕີລາຄາສູງ IAEA ໃນການສ້າງ ແລະ ສະເໜີ 5 ໂຄງການຮ່ວມມືກັບ ຫວຽດນາມ ໃນຂອບເຂດ TC ໄລຍະ 2022 – 2023, ສຸມໃສ່ບັນດາໂຄງການຮັບມືກັບໂລກລະບາດ, ປິ່ນປົວໂລກມະເຮັງ, ພັດທະນາກະສິກຳແບບຍືນຍົງ, ຍູ້ແຮງຄວາມປອດໄພ, ຄວາມໝັ້ນຄົງ ແລະ ຮັບມືກັບບັນຫານິວເຄຼຍ. ຫວຽດນາມ ໃຫ້ຄຳໝັ້ນສັນຍາ ຈະຕັ້ງໜ້າສົມທົບກັບ IAEA ໃນວິວັດການຜັນຂະຫຍາຍໂຄງການນີ້.
ຫວຽດນາມ ເຂົ້າຮ່ວມກອງປະຊຸມນັດສາມັນຂອງ Bog IAEA ໃນຖານະເປັນສະມາຊິກ, ສືບຕໍ່ປະກອບສ່ວນຍົກສູງທີ່ຕັ້ງສາກົນຂອງ ຫວຽດນາມ ໂດຍຜ່ານການສະແດງໃຫ້ເຫັນບົດບາດເປັນເຈົ້າການ, ຕັ້ງໜ້າໃນການຊຸກຍູ້ເປົ້າໝາຍໝູນໃຊ້ເຕັກໂນໂລຢີນິວເຄຼຍ ເພື່ອເປົ້າໝາຍສັນຕິພາບ, ຍາດແຍ່ງການສະໜັບສະໜູນ ແລະ ໜູນຊ່ວຍຂອງບັນດາບັນດາປະເທດສະມາຊິກ ກໍ່ຄືຄະນະການນຳ IAEA ໃນຮັບມືກັບບັນດາສິ່ງທ້າທາຍ ເຊິ່ງປະເທດເຮົາຕ້ອງປະເຊີນໜ້າ, ເປັນຕົ້ນແມ່ນບັນຫາໂລກລະບາດໂຄວິດ - 19 ແລະ ການປ່ຽນແປງຂອງດິນຟ້າອາກາດ.
ພ້ອມກັບສະມັດຊາໃຫຍ່ IAEA, Bog IAEA ແມ່ນກົນໄກວາງແຜນກຳນົດກ່ຽວກັບການພັດທະນານິວເຄຼຍ ເພື່ອເປົ້າໝາຍສັນຕິພາບ. ສະພາກໍ່ປະຕິບັດໜ້າທີ່ຕິດຕາມກວດກາ ແລະ ສະເໜີແນະສະມັດຊາໃຫຍ່ IAEA ກ່ຽວກັບໂຄງການເຄື່ອນໄຫວ, ການເງິນ ແລະ ງົບປະມານ, ພິຈາລະນາກ່ຽວກັບການຮັບສະມາຊິກໃໝ່ຂອງ IAEA.
ສະພາມີສິດອະນຸມັດບັນດາສົນທິສັນຍາກ່ຽວກັບການກວດກາ ລະຫວ່າງ IAEA ແລະ ບັນດາສະມາຊິກ ກໍ່ຄືບັນດາຂໍ້ກຳນົດ ແລະ ມາດຖານຂອງ IAEA ກ່ຽວກັບຄວາມປອດໄພ ແລະ ຄວາມໝັ້ນຄົງດ້ານນິວເຄຼຍ. BoG IAEA ລວມມີ 35 ສະມາຊິກ, ໃນນັ້ນມີ 22 ປະເທດທີ່ສະມັດຊາໃຫຍ່ IAEA ເລືອກຕັ້ງດ້ວຍອາຍຸການ 2 ປີ.
ເດືອນກັນຍາ 2021, ບັນດາປະເທດສະມາຊິກ IAEA ໄດ້ເຫັນດີເປັນເອກະພາບເລືອກເອົາ ຫວຽດນາມ ເຂົ້າ BoG IAEA ອາຍຸ 2021 – 2023.
ບຸນຄົງ
