| ຫວຽດນາມ ຖືເປັນສຳຄັນການຮ່ວມມືກັບ ສປຊ ແລະ ອົງການຈັດຕັ້ງສາກົນ ໃນການຮັບມືກັບໂລກລະບາດໂຄວິດ - 19 | |
| ຫວຽດນາມ ຮ່ວມມືກັບປະຊາຄົມສາກົນ ພ້ອມກັນຊຸກຍູ້ການຄ້າ ແລະ ການພັດທະນາ |
 |
| ການຕ້ອນຮັບທ່ານຮອງລັດຖະມົນຕີກະຊວງພັດທະນາເສດຖະກິດ ອີຕາລີ Gilberto Pichetto Fratin (ພາບ: baoquocte.vn) |
ວັນທີ 13 ຕຸລາ, ກ່າວຄຳເຫັນໃນຂະນະໄປຢ້ຽມຢາມສະຖານທູດ ຫວຽດນາມ ປະຈຳ ອີຕາລີ, ທ່ານຮອງລັດຖະມົນຕີກະຊວງພັດທະນາເສດຖະກິດ ອີຕາລີ Gilberto Pichetto Fratin ໄດ້ສະແດງຄວາມປິຕິຊົມຊື່ນຕໍ່ການພົວພັນຄູ່ຮ່ວມມືຍຸດທະສາດ ຫວຽດນາມ - ອີຕາລີ ພວມພັດທະນາຢ່າງດີງາມ, ພ້ອມທັງຢັ້ງຢືນວ່າ ອີຕາລີ ປາດຖະໜາຢາກຊຸກຍູ້ການພົວພັນກັບ ຫວຽດນາມຫຼາຍກວ່າອີກ - ໜຶ່ງໃນບັນດາຕະຫຼາດສຳຄັນຂອງປະເທດນີ້ໃນພາກພື້ນ ອາຊີ - ປາຊີຟິກ.
ທ່ານຮອງລັດຖະມົນຕີ Gilberto Pichetto Fratin ຢັ້ງຢືນວ່າຈະສະໜັບສະໜູນ ແລະຈະຊຸກຍູ້ຢ່າງແຮງ ເພື່ອໃຫ້ສະພາແຫ່ງຊາດ ອີຕາລີ ໃຫ້ສັດຕະຍາບັນສັນຍາ ອາລັກຂາການລົງທຶນ ລະຫວ່າງ ສະຫະພາບເອີຣົບ ກັບ ຫວຽດນາມ (EVIPA), ພ້ອມທັງສະແດງຄວາມປາດຖະໜາຢາກເຊື່ອມຕໍ່ການທ່ອງທ່ຽວໃນໄວໆນີ້, ເຫັນດີສົມທົບກັນຈັດຕັ້ງກອງປະຊຸມຄະນະກຳມະການປະສົມ ກ່ຽວກັບການຮ່ວມມືທາງດ້ານເສດຖະກິດ ຄັ້ງທີ 8.
ທີ່ການຕ້ອນຮັບ, ທ່ານນາງເອກອັກຄະລັດຖະທູດ ຫວຽດນາມ ປະຈຳ ອີຕາລີ ຫງວຽນທິບິກເຫວ້ ປາດຖະໜາວ່າ ສະພາແຫ່ງຊາດ ອີຕາລີ ຈະໃຫ້ສັດຕະຍາບັນສັນຍາ EVIPA ໂດຍໄວ ເພື່ອຊຸກຍູ້ການພົວພັນເສດຖະກິດລະຫວ່າງສອງປະເທດໃນໄລຍະຈະມາເຖິງ. ທ່ານນາງເອກອັກຄະລັດຖະທູດ ຫງວຽນທິບິກເຫ້ວ ກໍຕີລາຄາສູງຕໍ່ບັນດາຄຳໝັ້ນສັນຍາຂອງ ອີຕາລີ ດ້ວຍຖານະເປັນສະມາຊິກຂອງກຸ່ມ 7 ປະເທດອຸດສາຫະກຳພັດທະນາ (G7), ເຈົ້າພາບຂອງກຸ່ມບັນດາພື້ນຖານເສດຖະກິດພັດທະນາ ແລະ ຫາກໍພົ້ນເດັ່ນແຖວໜ້າໂລກ (G20) ໃນບັນຫາທົ່ວໂລກ ເປັນຕົ້ນແມ່ນ ສາທາລະນະສຸກ, ການປ່ຽນແປງຂອງດິນຟ້າອາກາດ ແລະ ສະແດງຄວາມສົນໃຈຂອງ ຫວຽດນາມ ຕໍ່ຂະບວນວິວັດຟື້ນຟູ ແລະ ຫັນປ່ຽນເສດຖະກິດ, ຖືນີ້ແມ່ນໂອກາດເພື່ອໃຫ້ສອງຝ່າຍເພີ່ມທະວີຄຸນນະພາບການພົວພັນ.
vovworld.vn
