 |
ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ, ຮອງຫົວໜ້າຫ້ອງວ່າການປະທານປະເທດ ໄດ້ຜ່ານລາຍງານບົດສະຫລຸບປະຈຳປີ 2018
ໃນວັນທີ 31 ມັງກອນ 2019, ຫ້ອງວ່າການປະທານປະເທດໄດ້ຈັດກອງປະຊຸມສະຫລຸບ ການເຄື່ອນໄຫວວຽກງານປະຈຳປີ 2018 ເຊິ່ງມີຜົນສຳເລັດຫລາຍເປັນຕົ້ນໄດ້ກຽມສະຖານທີ່ຫໍຄຳ ໃຫ້ທ່ານປະທານປະເທດ ແລະ ຮອງປະທານປະເທດຕ້ອນຮັບການເຂົ້າຢ້ຽມຂ່ຳນັບຂອງຄະນະຜູ້ແທນຕ່າງປະເທດ ຈຳນວນ 19 ຄັ້ງ; ໄດ້ເຂົ້າຮ່ວມງານຊຸມນຸມມິດຕິງ ແລະ ການສຳມະນາ, ຮ່ວມງານລ້ຽງສະເຫລີມສະຫລອງວັນຊາດ ແລະ ວັນສຳຄັນຕ່າງໆ ຕາມການເຊື້ອເຊີນ ຂອງອົງການຈັດຕັ້ງຕ່າງໆ ແລະ ເຂົ້າຮ່ວມຂະບວນອອກແຮງງານ ແລະ ກິລາເນື່ອງໃນໂອກາດວັນສຳຄັນຕ່າງໆ. ໃຫ້ກຽດເປັນປະທານຂອງທ່ານ ຄຳເມິງ ພົງທະດີ ລັດຖະມົນຕີ, ຫົວໜ໊າຫ້ອງວ່າການປະທານປະເທດ, ມີບັນດາພະນັກງານ-ລັດຖະກອນພາຍໃນຫ້ອງວ່າການປະທານປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ.
 |
ບັນດາຜູ້ແທນເຂົ້າຮ່ວມກອງປະຊຸມ
ທ່ານ ກິ່ງມະໂນ ພົມມະຫາໄຊ ຮອງລັດຖະມົນຕີ, ຮອງຫົວໜ້າຫ້ອງວ່າການປະທານປະເທດ ໄດ້ຜ່ານລາຍງານບົດສະຫລຸບປະຈຳປີ 2018 ຂອງຫ້ອງວ່າການປະທານປະເທດໂດຍໃຫ້ຮູ້ວ່າ: ໃນໜຶ່ງປີຜ່ານມາໄດ້ຮັບອະນຸມັດໂຄງການລົງທຶນຂອງລັດທັງໝົດ 6 ໂຄງການ ມີ 11 ກິດຈະກຳ ດ້ວຍງົບປະມານລົງທຶນທັງໝົດ 4 ຕື້ກວ່າກີບ. ໃນນັ້ນ, ມີທຶນສົມທົບໂຄງການສ້າງຫໍຮັບແຂກປະມຸກລັດ 2 ໂຄງການ ມີ 5 ກິດຈະກຳ ມູນຄ່າ 2 ຕື້ກວ່າກີບ, ໂຄງການຊຳລະໜີ້ ມີ 2 ໂຄງການໄດ້ຮັບງົບປະມານ 950 ລ້ານກວ່າກີບ, ໂຄງການສະເໜີໃໝ່ 2 ໂຄງການ ມີ 4 ກິດຈະກຳໄດ້ຮັບງົບປະມານ 1 ຕື້ກວ່າກີບ ແລະ ສາມາດຈັດຕັ້ງປະຕິບັດຕົວຈິງໄດ້ທັງໝົດ 4 ຕື້ກວ່າກີບເທົ່າກັບ 99,99% ຂອງແຜນການປີ. ທັງເອົາໃຈໃສ່ປະສານງານຕອບສະໜອງໃຫ້ແກ່ການເຄື່ອນໄຫວລັດຖະກິດຂອງປະທານປະເທດ, ຮອງປະທານປະເທດໄດ້ທັນເວລາ. ສຳລັບວຽກງານຄົ້ນຄວ້າສັງລວມໄດ້ຄົ້ນຄວ້ານຳສະເໜີປະທານປະເທດອອກຖະດຳລັດກ່ຽວກັບການຍ້ອງຍໍຫລຽນໄຊປະເພດຕ່າງໆຈຳນວນ 224 ສະບັບ, ມີ 3.583 ໜ່ວຍ ແລະ ປະທັບຂອງປະທານປະເທດ ໃສ່ໃບຮັບປະກັນຫລຽນໄຊປະເພດຕ່າງໆຈຳນວນ 719 ໃບ ແລະ ໃບຢັ້ງຢືນນາມມະຍົດຈຳນວນ 4 ທ່ານ.
（ແຫຼ່ງຂໍ້ມູນ： ຂປລ）
