| ທ່ານພົນເອກ ໂຕເລີມ ຕ້ອນຮັບ ທ່ານລັດຖະມົນຕີກະຊວງຍຸຕິທຳ ຍີ່ປຸ່ນ | |
| ທ່ານພົນເອກ ຟານວັນຢາງ ສົນທະນາທາງໄກກັບລັດຖະມົນຕີປ້ອງກັນປະເທດອົດສະຕາລີ |
 |
| ທ່ານຄຳໝ້ວຍ ແກ້ວມະນີ ໄດ້ພົບປະທ່ານພົນເອກ ຫວໍງວຽນຢາບ ຢູ່ເຮືອນຂອງທ່ານ |
ໃນຖານະເປັນຜູ້ອາໄສຢູ່ຕ່າງປະເທດລາວ, ຄວາມສຸກທີ່ສຸດ ແລະ ເອກອ້າງທະນົງໃຈທີ່ສຸດຂອງຂ້າພະເຈົ້າແມ່ນໄດ້ພົບທ່ານພົນເອກ ຫວໍງວຽນຢາບ, ໄດ້ຟັງທ່ານພົນເອກໂອ້ລົມ ແລະ ຢືນຢູ່ໃກ້ໆທ່ານເພື່ອຖ່າຍຮູບ. ໂອກາດທີ່ຫາຍາກນັ້ນແມ່ນເກີດຂຶ້ນໃນປີ 2008, ເມື່ອລາວສົ່ງຄະນະປະຕິບັດງານ 2 ຄະນະໄປຮ່ຳຮຽນເອົາປະສົບການຢູ່ໄທ ແລະ ຫວຽດນາມ ເພື່ອກະກຽມງານ SEA Games 25 ທີ່ຈະຈັດໃນເດືອນທັນວາ ປີ 2009.
ໃນເວລານັ້ນ, ຂ້າພະເຈົ້າເປັນຜູ້ຮັບຜິດຊອບຄະນະອຸປະຖໍາ ແລະ ຮັບຜິດຊອບ 2 ປະເພດກິລາທີ່ຈະແຂ່ງຂັນ ນັ້ນແມ່ນ ບານເຕະ ແລະ ເປຕັງ. ຄະນະຂອງຂ້າພະເຈົ້າໄປຫວຽດນາມ ລວມມີ 3 ທ່ານຄື: ທ່ານລັດຖະມົນຕີກະຊວງສຶກສາທິການ ແລະ ກິລາລາວ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ, ປະທານໂອລິມປິກລາວ ພູທອງ ແສງອາຄົມ; ທ່ານ ສົມພູ ພົນສາ, ຮອງປະທານ ໂອລິມປິກລາວ ແລະ ຂ້າພະເຈົ້າ.
ເມື່ອໄປຫວຽດນາມ, ຄະນະຂອງຂ້າພະເຈົ້າມີຄວາມເປັນກຽດຫຼາຍທີ່ໄດ້ພົບປະທ່ານພົນເອກ ຫວໍງວຽນຢາບ ຢູ່ເຮືອນຂອງທ່ານໃນເວລາ 4 ໂມງແລງ. ໃນເວລານັ້ນ, ທ່ານນຸ່ງຊຸດທະຫານ, ອາຍຸ 95 ປີ ແຕ່ທ່ານຍັງຮັບຮູ້ ແລະ ຈົດຈຳເລື່ອງເກົ່າໆໄດ້ດີ.
ເມື່ອໄດ້ພົບກັບທ່ານພົນເອກ ຫວໍງວຽນຢາບ, ທຸກຄົນໃນກຄະນະກໍຮູ້ສຶກດີໃຈ ແລະ ຕື້ນຕັນໃຈຫຼາຍ. ພິເສດ, ທຸກຄົນນັບຖືຄວາມຈື່ຈໍາດີຂອງທ່ານພົນເອກ. ທ່ານເລົ່າໃຫ້ທຸກຄົນຟັງກ່ຽວກັບບັ້ນຮົບໂຮ່ຈີມິນ ເຊິ່ງເປັນແຕ່ລະໄລຍະທີ່ລະອິດລະອ້ຽວ. ແລ້ວທ່ານກໍຖາມຄະນະພວກຂ້າພະເຈົ້າວ່າຈະກັບໄປລາວມື້ໃດ.
ທ່ານຍັງສັ່ງໄວ້ວ່າ ລາວ ແລະ ຫວຽດນາມ ແມ່ນສອງປະເທດອ້າຍນ້ອງ, ເຄີຍມີຄວາມຜູກພັນເປັນຕາຍຮ່ວມກັນ. ພວກເຮົາໜູນຊ່ວຍ, ຊ່ວຍເຫຼືອເຊິ່ງກັນ ແລະ ກັນ ເພື່ອພ້ອມກັນກ້າວຂຶ້ນ. ເພາະສະນັ້ນ, ລຸ້ນຄົນໃນຊຸມວັນນີ້ຕ້ອງເຮັດແນວໃດເພື່ອເພີ່ມພູນຄູນສ້າງ, ຮັກສາ ແລະ ພັດທະນານໍ້າໃຈມິດຕະພາບ, ຄວາມສາມັກຄີພິເສດຫວຽດນາມ - ລາວໃຫ້ໝັ້ນຄົງທະນົງແກ່ນ.
ຂ້າພະເຈົ້າຮູ້ສຶກຕື້ນຕັນໃຈຕໍ່ຄວາມເອົາໃຈໃສ່ຂອງທ່ານພົນເອກທີ່ມີຕໍ່ພວກຂ້າພະເຈົ້າ ແລະ ມີຕໍ່ນໍ້າໃຈມິດຕະພາບລະຫວ່າງປະຊາຊົນສອງປະເທດ.
ຫຼັງຈາກການໂອ້ລົມສົນທະນາກັນເປັນເວລາ 1 ຊົ່ວໂມງ, ທ່ານພົນເອກໄດ້ເຊື້ອເຊີນຄະນະ ພວກຂ້າພະເຈົ້າຖ່າຍຮູບນໍາເພື່ອເປັນທີ່ລະນຶກ. ຂ້າພະເຈົ້າມີຄວາມເປັນກຽດທີ່ໄດ້ຖ່າຍຮູບຕ່າງຫາກກັບທ່ານພົນເອກ. ຈົນມາຮອດມື້ນີ້, ຂ້າພະເຈົ້າກໍຍັງບໍ່ສາມາດລືມເວລານາທີທີ່ສຳຄັນນັ້ນ.
ບໍ່ພຽງແຕ່ສຳລັບຂ້າພະເຈົ້າເທົ່ານັ້ນ, ຮູບພາບຂອງທ່ານພົນເອກ ຫວໍງວຽນຢາບ ຍັງໄດ້ຝັງເລິກຢູ່ໃນໃຈຂອງຊາວລາວທຸກຄົນ ແລະ ປະເທດລາວຈະບໍ່ມີວັນລືມຄຸນງາມຄວາມດີຂອງທ່ານພົນເອກ. ທ່ານພົນເອກ ຫວໍງວຽນຢາບ ແມ່ນທ່ານພົນເອກຄົນໜຶ່ງທີ່ດີເດັ່ນ ແລະ ເປັນຄົນທີ່ມີທັງຄວາມສັນທັດ ແລະ ຄຸນນະທໍາ. ທ່ານພົນເອກເປັນຄົນທີ່ສຸຂຸມ.
ໂດຍຜ່ານການຊອກຮູ້ໃນບັນດາເອກະສານ, ຂ້າພະເຈົ້າໄດ້ຮູ້ວ່າ ທ່ານແມ່ນໜຶ່ງໃນບັນດາລູກສິດທີ່ດີເດັ່ນທີ່ສຸດຂອງປະທານ ໂຮ່ຈີມິນ. ທ່ານໄດ້ກາຍເປັນພົນເອກຜູ້ທຳອິດຂອງກອງທັບປະຊາຊົນຫວຽດນາມ ໃນຕອນອາຍຸ 37 ປີ. ດ້ວຍການຮ່ຳຮຽນ, ຝຶກຝົນຫຼໍ່ຫຼອມ ແລະ ພະຍາຍາມຢ່າງບໍ່ຢຸດຢັ້ງ, ທ່ານພົນເອກ ຫວໍງວຽນຢາບ ໄດ້ປະຕິບັດສຳເລັດໜ້າທີ່ທີ່ພັກ, ລັດ ແລະ ປະຊາຊົນຫວຽດນາມ ມອບໝາຍໃຫ້ຢ່າງດີເລີດ, ກາຍເປັນນາຍພົນທະຫານອອກສະໜາມຮົບຄັ້ງໃດກໍໄດ້ໄຊຊະນະຄັ້ງນັ້ນ, ທ່ານພົນເອກໃນຕຳນານຂອງຊາດ, ໄດ້ຮັບຄວາມເຄົາລົບນັບຖືຈາກປະຊາຊົນ ແລະ ໄດ້ເຊີດຊູເປັນ "ທ່ານພົນເອກຂອງປະຊາຊົນ"; ໄດ້ຮັບການເຄົາລົບນັບຖືຈາກທົ່ວໂລກ, ເຊີດຊູເປັນວິລະຊົນແຫ່ງຊາດຂອງປະຊາຊົນຫວຽດນາມ, ແມ່ນໜຶ່ງໃນ 10 ຜູ້ບັນຊາການທະຫານທີ່ດີເດັ່ນທີສຸດໃນປະຫວັດສາດຂອງມວນມະນຸດ.
ທ່ານກໍຍັງແມ່ນພົນເອກທີ່ໄດ້ສ້າງຄວາມປະທັບໃຈທີ່ສຸດ ດ້ວຍສອງບັ້ນຮົບສຳຄັນທີ່ສຸດໃນ ສົງຄາມເພື່ອຍາດເອົາເອກະລາດຂອງປະຊາຊົນຫວຽດນາມ ສອງຄັ້ງຄື: ບັ້ນຮົບ ດ້ຽນບຽນຝູ ປີ 1954 ແລະ ບັ້ນຮົບ ໂຮ່ຈິມິນ ປີ 1975.
ບັນດານັກປະຫວັດສາດ ແລະ ນັກຄົ້ນຄ້ວາການທະຫານໂລກ ກໍໄດ້ເອີ້ນທ່ານເປັນບັນດາຖານະນາມທີ່ສະຫງ່າຜ່າເຜີຍເຊັ່ນ: "ຜູ້ທີ່ຫັນປ່ຽນກະແສປະຫວັດສາດໃນສະຕະວັດທີ 20", "ຫນຶ່ງໃນບັນດາຜູ້ມີຄວາມປີຊາສາມາດຫຼາຍທີ່ສຸດຂອງທຸກສະໄໝ".
ໃນຕະຫຼອດຊີວິດຂອງຕົນ, ທ່ານພົນເອກ ຫວໍງວຽນຢາບ ໄດ້ດຳລົງຊີວິດເປັນແບບຢ່າງ, ຮັບໃຊ້ປະຊາຊົນ, ພັກ, ປະຊາຊົນ ແລະ ປະເທດຊາດຢ່າງສຸດຈິດສຸດໃຈ, ດຳລົງຊີວິດແບບມີນ້ຳໃຈຮັກແພງ, ປະຊາທິປະໄຕ, ສະເໝີພາບ , ຮັກແພງພະນັກງານ ແລະ ນັກຮົບ, ໃກ້ຊິດ ແລະ ເຄົາລົບນັບຖືປະຊາຊົນ.
ດ້ວຍອາຍຸ 102 ປີ, ອາຍຸພັກ 70 ກວ່າປີ, ທ່ານພົນເອກ ຫວໍງວຽນຢາບ ໄດ້ມີບັນດາການປະກອບສ່ວນອັນໃຫຍ່ຫຼວງ, ພິເສດພົ້ນເດັ່ນໃນພາລະກິດການປະຕິວັດຂອງພັກ ແລະ ປະເທດຊາດ.
ໃນຊຸມປີຜ່ານມາ, ຂ້າພະເຈົ້າເມື່ອໃດກໍຈື່ຈຳ ແລະ ປະຕິບັດຕາມຄຳຕັກເຕືອນຂອງທ່ານ, ໃນທຸກໆວັນຂ້າພະເຈົ້າກໍພະຍາຍາມປັບປຸງຕົນເອງໃຫ້ດີກວ່າເກົ່າ ແລະ ປາດຖະໜາຢາກປະກອບສ່ວນເລັກໜ້ອຍເພື່ອແນໃສ່ເພີ່ມທະວີຄວາມສາມັກຄີລະຫວ່າງຫວຽດນາມ - ລາວ.
ປີ 2014, ພາຍຫຼັງໜຶ່ງປີທີ່ທ່ານພົນເອກ ຫວໍງວຽນຢາບ ເສຍຊີວິດ, ຂ້າພະເຈົ້າ ແລະ ທ່ານລັດຖະມົນຕີກະຊວງສຶກສາທິການ ແລະ ກິລາລາວ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ພູທອງ ແສງອາຄົມ ໄດ້ໄປຫວຽດນາມ ເພື່ອວາງພວງມາລາອາໄລເຖິງດວງສິນຍານຂອງທ່ານພົນເອກ ຢູ່ ກ໊ວາງບິງ.
ປີນີ້ກໍແມ່ນປີສາມັກຄີມິດຕະພາບຫວຽດນາມ - ລາວ, ລາວ - ຫວຽດນາມ 2022, ສະເຫຼີມສະຫຼອງຄົບຮອບ 60 ປີແຫ່ງວັນສ້າງຕັ້ງການພົວພັນທາງການທູດ (5 ກັນຍາ1962 – 5 ກັນຍາ 2022) ແລະ ຄົບຮອບ 45 ປີແຫ່ງວັນເຊັນສົນທິສັນຍາມິດຕະພາບ ແລະ ການຮ່ວມມື ຫວຽດນາມ-ລາວ (18 ກໍລະກົດ 1977 - 18 ກໍລະກົດ 2022), ຂ້າພະເຈົ້າເອງກໍໄດ້ເຂົ້າຮ່ວມຫຼາຍກິດຈະກຳສະເຫຼີມສະຫຼອງຂອງສອງປະເທດ. ບັນດາເຫດການກໍມີຄວາມໝາຍສະແດງໃຫ້ເຫັນນໍ້າໃຈມິດຕະພາບລະຫວ່າງສອງປະເທດໄດ້ຮັບການເພີ່ມພູນຄູນສ້າງຈາກແຫຼ່ງວັດທະນະທໍາ ແລະ ໄດ້ຮັບການຫຼໍ່ລ້ຽງແຕ່ອະດີດຈົນເຖິງປະຈຸບັນ.
ໃນໄລຍະຈະມາເຖິງ, ເພື່ອແນໃສ່ເພີ່ມທະວີການຮ່ວມມືລະຫວ່າງສອງປະເທດ, ຕາມຄວາມຄິດເຫັນຂອງຂ້າພະເຈົ້າ ແມ່ນຕ້ອງເຂົ້າສູ່ລວງເລິກ, ແທດຈິງ ແລະ ມີປະສິດທິຜົນ. ກ່ອນອື່ນໝົດ, ຕາມຄວາມຄິດເຫັນຂອງຂ້າພະເຈົ້າແລ້ວ, ຕ້ອງແກ້ໄຂບັນຫາພື້ນຖານໂຄງລ່າງຄົມມະນາຄົມ, ສ້າງເງື່ອນໄຂສະດວກໃຫ້ແກ່ການລົງທຶນ, ການຄ້າ ແລະ ການທ່ອງທ່ຽວລະຫວ່າງສອງ ປະເທດ.
ຕໍ່ມາແມ່ນບັນຫາການບຳລຸງສ້າງຊັບພະຍາກອນມະນຸດ. ປະຈຸບັນ, ຫວຽດນາມ ໄດ້ລົງທຶນຫຼາຍຢ່າງໃນການບຳລຸງສ້າງຊັບພະຍາກອນມະນຸດໃຫ້ແກ່ລາວ ເພາະວ່າກໍາລັງຊັບພະຍາກອນມະນຸດຂອງລາວເຖິງວ່າມີລາຄາຖືກແຕ່ຄຸນນະພາບຍັງບໍ່ສູງ. ສະນັ້ນ, ພວກຂ້າພະເຈົ້າຫວັງວ່າ ຫວຽດນາມ ຈະຍູ້ແຮງການລົງທຶນບຳລຸງສ້າງຊັບພະຍາກອນມະນຸດລາວໃຫ້ຫຼາຍກ່ວາອີກ. ນອກຈາກນັ້ນ, ບັນດາວິສາຫະກິດຫວຽດນາມ ກໍ່ອາດສາມາດລົງທຶນເຂົ້າໂຮງຮຽນວິຊາຊີບ, ສູນຝຶກອົບຮົມວິຊາຊີບ ເພື່ອປັບປຸງທັກສະໃຫ້ແກ່ແຮງງານຢູ່ລາວ.
ຫອມມາລາ
