ກອງທຶນ Temasek ມອບເຄື່ອງຊ່ວຍຫາຍໃຈ ແລະ ອຸປະກອນປ້ອງກັນໃຫ້ແກ່ຫວຽດນາມ

	ຮັບປະກັນການຮຽນ-ການສອນທີ່ເອື້ອອຳນວຍໃນສະພາບການລະບາດຂອງພະຍາດ COVID-19
	ຮ່າໂນ້ຍຈັດບັນຊີລາຍຊື່ສາຍດ່ວນພະຍາດ COVID-19 ຢ່າງເປັນທາງການ

ພິທີມອບອຸປະກອນການແພດຂອງກອງທຶນ Tamasek ໄດ້ຈັດຂຶ້ນທີ່ສໍານັກງານໃຫຍ່ຂອງສະຖານທູດຫວຽດນາມ ປະຈໍາ ສິງກະໂປ ໂດຍມີການເຂົ້າຮ່ວມຂອງທ່ານ Benedict Cheong, ຜູ້ອໍານວຍການບໍລິຫານຂອງກອງທຶນ Temasek ແລະ ເອກອັກຄະລັດຖະທູດຫວຽດນາມ ປະຈໍາ ສິງກະໂປ ມ່າຍເຝຶອກຢູ໋ງ.

ງວດເຄື່ອງຊ່ວຍເຫຼືອດັ່ງກ່າວ ລວມມີເຄື່ອງຊ່ວຍຫາຍໃຈປະເພດຕ່າງໆ 16 ເຄື່ອງ, ໜ້າກາກທາງການແພດລຸ້ນດີ 250,000 ອັນ (FFP2 ແລະ KN95), ໜ້າກາກແຜ່ນຢາງ 200,000 ແຜ່ນ, ຊຸດເຄື່ອງນຸ່ງປ້ອງກັນພະຍາດ 100,000 ຊຸດ, ແວ່ນຕາປ້ອງກັນ 5,000 ແວ່ນ ແລະ ຖົງມື 4,500 ຄູ່.

ກ່າວຄຳເຫັນທີ່ພິທີຕ້ອນຮັບ, ທ່ານເອກອັກຄະລັດຖະທູດ ມ່າຍເຝຶອກຢູ໋ງ ໄດ້ສະແດງຄວາມຂອບໃຈ ກອງທຶນ Temasek ແລະ ລັດຖະບານສິງກະໂປ ທີ່ໄດ້ໃຫ້ການສະໜັບສະໜູນເປັນພິເສດ ແລະ ລ້ຳຄ່າ, ໂດຍສະເພາະແມ່ນໃນສະພາບທີ່ສິງກະໂປຍັງຢູ່ໃນໄລຍະທີ່ມີການເພີ່ມຂຶ້ນຂອງກໍລະນີຕິດພະຍາດ COVID-19. ນີ້ແມ່ນຄວາມຮັກແພງຂອງລັດຖະບານ ແລະ ປະຊາຊົນສິງກະໂປ ທີ່ມີຕໍ່ຫວຽດນາມ, ສະແດງໃຫ້ເຫັນເຖິງການເປັນຄູ່ຮ່ວມມືຍຸດທະສາດອັນໃກ້ຊິດ ລະຫວ່າງສອງປະເທດ, ເຊິ່ງຈະປະກອບສ່ວນອັນສໍາຄັນເຂົ້າໃນການຊ່ວຍເຫຼືອລັດຖະບານ ແລະ ປະຊາຊົນຫວຽດນາມ ໃຫ້ເອົາຊະນະການລະບາດພະຍາດໂຄວິດ -19.

ກອງທຶນ Tamasek (ສິງກະໂປ) ໄດ້ມອບເຄື່ອງຊ່ວຍຫາຍໃຈ 16 ເຄື່ອງ ແລະ ອຸປະກອນການແພດນັບແສນຢ່າງ ໃຫ້ຫວຽດນາມເພື່ອຊ່ວຍຫວຽດນາມຮັບມືກັບໂລກລະບາດ COVID-19. ພາບ: TTXVN

ທ່ານເອກອັກຄະລັດຖະທູດ ມ່າຍເຝຶອກຢູ໋ງ ໄດ້ສະເໜີວ່າ ກອງທຶນ Temasek ແລະ ລັດຖະບານສິງກະໂປ ຈະສືບຕໍ່ສະໜັບສະໜູນຫວຽດນາມ ໃນການຕໍ່ສູ້ກັບການລະບາດຂອງພະຍາດໂຄວິດ -19 ໃນໄລຍະຈະມາເຖິງນີ້, ໂດຍສະເພາະແມ່ນ ຊອກຫາຄວາມເປັນໄປໄດ້ໃນການຊ່ວຍເຫຼືອ ຫຼື ແລກປ່ຽນວັກຊີນ COVID-19 ກັບຫວຽດນາມ ຕາມຮູບການທີ່ເໝາະສົມ.

ຕາງໜ້າໃຫ້ກອງທຶນ Tamasek, ຜູ້ອໍານວຍການບໍລິຫານ Benedict Cheong ກ່າວວ່າ ການແຜ່ລະບາດຂອງພະຍາດ COVID-19 ໄດ້ສົ່ງຜົນກະທົບຢ່າງໜັກໜ່ວງ ຕໍ່ທຸກປະເທດໃນອາຊຽນ. ດຽວນີ້ອາຊີຕາເວັນອອກສ່ຽງໃຕ້ ກໍ່ໄດ້ມີການເຊື່ອມຕໍ່ກັນຢ່າງແໜ້ນແຟ້ນ, ແຕ່ລະປະເທດທີ່ຖືກໂຄວິດ -19 ບຸກເຂົ້າ ຕ່າງກໍ່ສົ່ງຜົນກະທົບເຖິງການຮ່ວມມືໂດຍລວມຂອງທັງພາກພື້ນ. ສະນັ້ນ, ເມື່ອມີອຸປະກອນປ້ອງກັນການລະບາດ, ສິງກະໂປ ພ້ອມແລ້ວທີ່ຈະແບ່ງປັນກັບຫວຽດນາມ ແລະ ບັນດາປະເທດອາຊຽນ ເພື່ອຜ່ານຜ່າການແຜ່ລະບາດຂອງພະຍາດໂຄວິດ -19 ຮ່ວມກັນໄດ້ໂດຍໄວ. ເມື່ອຂົນສົ່ງເຄື່ອງຊ່ວຍເຫຼືອຂ້າງເທິງຮອດຫວຽດນາມ, ສິງກະໂປ ຈະສົ່ງພະນັກງານວິຊາການ (ທີ່ກຳລັງອາໄສຢູ່ຫວຽດນາມ) ໄປຊ່ວຍໃນການຕິດຕັ້ງອຸປະກອນເຫຼົ່ານີ້.

ໂດຍສ້າງຕັ້ງຂຶ້ນໃນປີ 2007, ກອງທຶນ Temasek ແມ່ນອົງການບໍ່ຂຶ້ນກັບລັດຖະບານຂອງສິງກະໂປ, ປັດຈຸບັນໄດ້ມີຫຼາຍໂຄງການຮ່ວມມື ແລະ ຊ່ວຍເຫຼືອຢູ່ຫວຽດນາມ ໃນດ້ານຕ່າງໆ, ເຊັ່ນ: ການບຳລຸງສ້າງຊັບພະຍາກອນມະນຸດ, ສາທາລະນະສຸກ ແລະ ການສຶກສາ. ໃນຕົ້ນປີ 2020, ກອງທຶນ Temasek ຍັງໄດ້ສະໜັບສະໜູນເຄື່ອງຊ່ວຍຫາຍໃຈ 10 ເຄື່ອງໃຫ້ກັບຫວຽດນາມ.