| ງານຕະຫຼາດນັດການທ່ອງທ່ຽວ ແລະບໍລິການຈັດຈອງສາກົນຢູ່ ການາດາ ແລະ “ຈຸດພົ້ນເດັ່ນ” ຫວຽດນາມ | |
| ປີທ່ອງທ່ຽວແຫ່ງຊາດ 2023 - ມຸ່ງສູ່ການທ່ອງທ່ຽວສີຂຽວ |
ຂະແໜງການທ່ອງທ່ຽວ ວາງເປົ້າໝາຍວ່າຈະຮັບໃຊ້ນັກທ່ອງທ່ຽວພາຍໃນປະເທດ ຈຳນວນ 60 ລ້ານເທື່ອຄົນ ແລະ ນັກທ່ອງທ່ຽວສາກົນ 5 ລ້ານເທື່ອຄົນໃນປີ 2022.
ກັບຄືນສູ່ຄວາມປະທັບໃຈ, ການທ່ອງທ່ຽວພາຍໃນ ໄດ້ "ຂະຫຍາຍຕົວ"
ພາຍຫຼັງ 2 ປີແຫ່ງການຢຸດສະງັກ, ນັບແຕ່ໄລຍະເປີດປະຕູຄືນໃໝ່ (15 ມີນາ 2022), ການທ່ອງທ່ຽວຫວຽດນາມ ກັບຄືນສູ່ຄວາມປະທັບໃຈ, ໄດ້ເກັບກ່ຽວຜົນດີຢ່າງວ່ອງໄວ. ການທ່ອງທ່ຽວພາຍໃນ ໄດ້ຟື້ນຕົວຢ່າງເຂັ້ມແຂງໃນເດືອນພຶດສະພາ 2022 ດ້ວຍນັກທ່ອງທ່ຽວ ຈຳນວນ 12 ລ້ານເທື່ອຄົນ; ເດືອນມິຖຸນາ ມີຈຳນວນ 12,2 ລ້ານເທື່ອຄົນ. ພາຍຫຼັງ 6 ເດືອນ, ນັກທ່ອງທ່ຽວພາຍໃນບັນລຸ 60,6 ລ້ານເທື່ອຄົນ, ລື່ນຄາດໝາຍ 60 ລ້ານເທື່ອຄົນ ສຳລັບການວາງແຜນພາຍໃນປີ 2022. ແລະ ໄລ່ໝົດ 11 ເດືອນປີ 2022, ນັກທ່ອງທ່ຽວພາຍໃນປະເທດບັນລຸ 96,3 ລ້ານເທື່ອຄົນ, ລື່ນກາຍທັງໝົດການຄາດຄະເນ ແລະ ລື່ນກາຍຫຼາຍກວ່າ 85 ລ້ານເທື່ອຄົນ ໃນປີ 2019 - ເມື່ອຍັງບໍ່ທັນມີພະຍາດແຜ່ລະບາດ.
ແງ່ຫວັງການຟື້ນຕົວຂອງວິສາຫະກິດໃນຂະແໜງທ່ອງທ່ຽວ ແມ່ນຈະແຈ້ງກວ່າ ຍ້ອນຈຳນວນວິສາຫະກິດກັບຄືນສູ່ການເຄື່ອນໄຫວເພີ່ມຂຶ້ນຢ່າງໄວ, ດ້ວຍຈຳນວນວິສາຫະກິດ 2.362 ແຫ່ງ ໃນຂະແໜງບໍລິການທີ່ພັກ ແລະ ອາຫານ; ບໍລິການວຽກເຮັດງານທຳ ແລະ ການບໍລິການການທ່ອງທ່ຽວບັນລຸ 2.215 ວິສາຫະກິດ. ປີ 2022, ບັນດາສະຖານທີ່ທ່ອງທ່ຽວຊັ້ນສູງ ແລະ ບັນດາສະຖານທີ່ບັນເທິງທັນສະໄໝໄດ້ຮັບການຜັນຂະຫຍາຍຢ່າງເປັນທາງການ, ໄດ້ສະແດງໃຫ້ເຫັນຄວາມສາມາດຜ່ານຜ່າຄວາມຫຍຸ້ງຍາກ ແລະ ຄວາມເຊື່ອໝັ້ນໃນການຟື້ນຟູຢ່າງວ່ອງໄວຂອງວິສາຫະກິດທ່ອງທ່ຽວ ຫວຽດນາມ.
 |
| ການທ່ອງທ່ຽວຫວຽດນາມ ກົບມາສ້າງຄວາມປະທັບໃຈ, ຊອກຫາບັນດາບາດກ້າວກະໂດດຂັ້ນຄືນໃໝ່. (ພາບ: nhandan) |
ເຖິງຢ່າງໃດກໍຕາມ, ຍັງຕ້ອງຮັບຮູ້ເຖິງຈິດຈິດຕະສາດທີ່ສະກັດກັ້ນໃນໄລຍະເກີດພະຍາດລະບາດ ແລະ ການເກີດຄວາມຕ້ອງການຢາກໄປທ່ອງທ່ຽວ ພາຍຫຼັງການລະບາດແມ່ນໜຶ່ງໃນບັນດາສາຍເຫດຕົ້ນຕໍທີ່ເຮັດໃຫ້ການທ່ອງທ່ຽວພາຍໃນປະເທດ “ຂະຫຍາຍຕົວ”. ຖ້າຄິດໄລ່ແບບງ່າຍໆຄືການບວກຈໍານວນນັກທ່ອງທ່ຽວພາຍໃນ ໃນສາມປີແຕ່ 2020 ຫາ 2022 (55 ລ້ານເທື່ອຄົນໃນປີ 2020; 40 ລ້ານເທື່ອຄົນໃນປີ 2021; ປະມານ 100 ລ້ານເທື່ອຄົນໃນປີ 2022) ແລ້ວຫານໃຫ້ເທົ່າກັນ, ຈາກນັ້ນ, ຈຳນວນນັກທ່ອງທ່ຽວພາຍໃນປະເທດສະເລ່ຍຕໍ່ປີແມ່ນ 85 ລ້ານເທື່ອຄົນ, ຕ່ຳກວ່າຕົວເລກຂອງປີ 2019 ເຊິ່ງແມ່ນເວລາກ່ອນການແຜ່ລະບາດພະຍາດ. ດັ່ງນັ້ນ, ຖ້າບໍ່ມີຄວາມກົດດັນອັນເນື່ອງມາຈາກການລະບາດພະຍາດ, ກໍ່ບໍ່ແນ່ວ່າຈະສາມາດບັນລຸໄດ້ຈໍານວນນັກທ່ອງທ່ຽວຄືໃນປະຈຸບັນ.
ຄາດຄະເນ ແລະ ຊອກຫາບາດກ້າວ ເພື່ອໃຫ້ການທ່ອງທ່ຽວຟື້ນຕົວຢ່າງສົມບູນແບບ
ຄຽງຄູ່ກັບການເປີດປະຕູການທ່ອງທ່ຽວຄືນໃໝ່, ປີ 2022 ໄດ້ມີກອງປະຊຸມ ແລະ ສຳມະນາກ່ຽວກັບການພັດທະນາການທ່ອງທ່ຽວພາຍຫຼັງ Covid – 19 ຫຼາຍຄັ້ງ ດ້ວຍການຄາດຄະເນ ແລະ ການຄິດໄລ່ກ່ຽວກັບອັດຕາຟື້ນຕົວ ແລະ ສະພາບການພັດທະນາການທ່ອງທ່ຽວຂອງຫວຽດນາມ. ການຕີລາຄາໂດຍລວມໄດ້ຢືນຢັນວ່າ ການແຜ່ລະບາດຢູ່ຫວຽດນາມ ໄດ້ຮັບການຄວບຄຸມເປັນຢ່າງດີ, ເສດຖະກິດ - ສັງຄົມພວມຟື້ນຟູ ແລະ ພັດທະນາຢ່າງວ່ອງໄວ, ໃນນັ້ນມີເສດຖະກິດການທ່ອງທ່ຽວ. ແຕ່ວ່າ ການທ່ອງທ່ຽວ ຫວຽດນາມ ຍັງປະສົບກັບຄວາມຫຍຸ້ງຍາກ ແລະ ສິ່ງທ້າທາຍຫຼາຍຢ່າງ.
ໃນນັ້ນ, ບັນດາວິສາຫະກິດຍັງຂາດເຂີນແຫຼ່ງທຶນເພື່ອຟື້ນຟູ, ຜັນຂະຫຍາຍ ແລະ ພັດທະນາພື້ນຖານໂຄງລ່າງດ້ານວັດຖຸ, ເຕັກນິກ ແລະ ພື້ນຖານໂຄງລ່າງການທ່ອງທ່ຽວຢູ່ບັນດາທ້ອງຖິ່ນ ແລະ ສະຖານທີ່ທ່ອງທ່ຽວ. ການຜັນແປ ແລະ ການເຄື່ອນຍ້າຍຊັບພະຍາກອນມະນຸດ ໃນໄລຍະການແຜ່ລະບາດໄດ້ເຮັດໃຫ້ບັນດາວິສາຫະກິດທ່ອງທ່ຽວ ທັງຂາດຊັບພະຍາກອນມະນຸດທີ່ມີຄຸນນະພາບສູງ ແລະ ແຮງງານທົ່ວໄປ...
ໃນປີ 2023 ຍັງຄົງຈະປະສົບກັບຄວາມຫຍຸ້ງຍາກ ຍ້ອນສິ່ງທ້າທາຍໃໝ່ ເຊັ່ນ: ການປະທະກັນຢູ່ ຢູແກຼນ - ຣັດເຊຍ, ຜົນສະທ້ອນຈາກສະພາບເສດຖະກິດໂລກຊຸດໂຊມ, ການແກ່ງແຍ່ງທີ່ນັບມື້ນັບຮ້າຍແຮງຂຶ້ນ ລະຫວ່າງບັນດາຈຸດໝາຍປາຍທາງໃນພາກພື້ນດຽວກັນ, ຕະຫຼາດທີ່ສຳຄັນຈຳນວນໜຶ່ງຂອງການທ່ອງທ່ຽວຫວຽດນາມ ຍັງບໍ່ພ້ອມທີ່ຈະເປີດ… ຈະສົ່ງຜົນກະທົບຢ່າງຫຼວງຫຼາຍຕໍ່ຂະແໜງການທ່ອງທ່ຽວ. ຕາມການຄາດກະຂອງກົມໃຫຍ່ການທ່ອງທ່ຽວຫວຽດນາມແລ້ວ, ໃນປີ 2022, ສະເລ່ຍແຕ່ລະນັກທ່ອງທ່ຽວສາກົນ ຈະໃຊ້ຈ່າຍປະມານ 2,9 ລ້ານດົ່ງ/ວັນ; ນັກທ່ອງທ່ຽວພາຍໃນປະເທດໃຊ້ຈ່າຍ 1,2 ລ້ານດົ່ງ/ວັນ. ໃນຫຼາຍປີຂ້າງໜ້າ, ຄວາມສາມາດການໃຊ້ຈ່າຍຂອງນັກທ່ອງທ່ຽວ (ທັງຢູ່ພາຍໃນ ແລະ ຕ່າງປະເທດ) ຈະບໍ່ເພີ່ມຂຶ້ນ ຍ້ອນພາຍຫຼັງໂຄວິດ-19, ເຖິງຢ່າງໃດກໍຕາມ, ຄວາມສາມາດການໃຊ້ຈ່າຍຈະຄ່ອຍໆເພີ່ມຂຶ້ນເມື່ອເສດຖະກິດຟື້ນຟູ, ລາຍຮັບຂອງປະຊາຊົນເພີ່ມຂຶ້ນ, ເມື່ອການບໍລິການທ່ອງທ່ຽວມີຄວາມຫຼາກຫຼາຍ, ມີຄຸນນະພາບສູງກວ່າ…
ບົນພື້ນຖານການວິເຄາະສະພາບການພາຍໃນ ແລະ ຕ່າງປະເທດ, ກົມໃຫຍ່ການທ່ອງທ່ຽວ ຫວຽດນາມ ໄດ້ຍົກອອກ 3 ວິທີການ (ແຜນງານ) ພັດທະນາຂອງການທ່ອງທ່ຽວຫວຽດນາມ, ປະກອບມີ: ການເຕີບໂຕຕ່ຳ; ການເຕີບໂຕລະດັບກາງ ແລະ ການເຕີບໂຕສູງ. ໃນນັ້ນ, ວິທີການເຕີບໂຕລະດັບກາງ ແມ່ນໄດ້ບູລິມະສິດເລືອກເຟັ້ນ ຍ້ອນມີຄວາມເປັນໄປໄດ້ສູງທີ່ສຸດ. ຕາມນັ້ນແລ້ວ, ເປົ້າໝາຍແມ່ນຮອດປີ 2025, ການທ່ອງທ່ຽວຫວຽດນາມຈະຟື້ນຕົວຢ່າງສົມບູນແບບຄືໄລຍະກ່ອນເກີດໂລກລະບາດ (ໄດ້ຮັບນັກທ່ອງທ່ຽວສາກົນ 18 ລ້ານເທື່ອຄົນ, ນັກທ່ອງທ່ຽວພາຍໃນບັນລຸ 116 ລ້ານເທື່ອຄົນ). ຍ້ອນການແກ່ງແຍ່ງລະຫວ່າງບັນດາປະເທດໃນຂົງເຂດທ່ອງທ່ຽວທີ່ນັບມື້ນັບເພີ່ມຂຶ້ນ, ຂະແໜງການທ່ອງທ່ຽວຕ້ອງມີຍຸດທະສາດດຶງດູດນັກທ່ອງທ່ຽວຄື: ຜ່ອນຜັນນະໂຍບາຍວິຊາ, ໂຄສະນາສະຖານທີ່ທ່ອງທ່ຽວສູ່ເພື່ອນມິດສາກົນ, ຄຸ້ມຄອງແຫຼ່ງທ່ອງທ່ຽວເພື່ອສ້າງພາບພົດອັນດີງາມຂອງຫວຽດນາມ.
ຄາດຄະເນວ່າ ໃນປີ 2023 ແລະ ຊຸມປີຕໍ່ໄປ, ການເຄື່ອນໄຫວທ່ອງທ່ຽວໃນໂລກ ແລະ ໃນທົ່ວປະເທດຈະຄ່ອຍໆໄດ້ຮັບການຟື້ນຟູ ແລະ ພັດທະນາເປັນເທື່ອລະກ້າວ. ເຖິງວ່າກາລະໂອກາດສຳລັບກະແສນັກທ່ອງທ່ຽວສາກົນໄດ້ມາເຖິງ, ການເດີນທາງກໍ່ສະດວກສະບາຍ, ແຕ່ເສດຖະກິດໂລກພວມປະສົບກັບວິກິດການຫຼາຍຢ່າງ, ລາຍຮັບຂອງປະຊາຊົນຖືກກະທົບ, ຄວາມຢ້ານກົວພະຍາດລະບາດຍັງມີຢູ່, ສະນັ້ນ ຄວາມສາມາດໃນການເດີນທາງທ່ອງທ່ຽວຂອງປະຊາຊົນກໍຍັງຖືກຈຳກັດຢູ່, ໃນຂະນະທີ່ການແກ່ງແຍ້ງຈຸດໝາຍປາຍທາງລະຫວ່າງບັນດາປະເທດໃນພາກພື້ນ ນັບມື້ນັບດຸເດືອດຂຶ້ນ. ປີ 2023, ນັກທ່ອງທ່ຽວສາກົນມາຢ້ຽມຢາມຫວຽດນາມຈະເພີ່ມຂຶ້ນ, ຍິ່ງໄປກວ່ານັ້ນ ອັດຕາການເຕີບໂຕອາດຈະສູງຫຼາຍ, ແຕ່ຈຳນວນນັກທ່ອງທ່ຽວຈະບໍ່ທັນສາມາດຟື້ນຟູ ແລະ ບັນລຸໄດ້ເທົ່າໃນປີ 2019.
ສະນັ້ນ, ສຳລັບຕະຫຼາດນັກທ່ອງທ່ຽວສາກົນ, ຫວຽດນາມ ຕ້ອງສຸມໃສ່ຂຸດຄົ້ນຕະຫລາດທີ່ໄດ້ເປີດປະຕູແລ້ວ, ຕະຫຼາດທ່ອງທ່ຽວທີ່ໄດ້ຟື້ນຟູການເຊື່ອມຕໍ່ກັບການເດີນອາກາດ. ນອກຈາກນັ້ນ, ການລົງທຶນທີ່ເຂັ້ມແຂງໄດ້ດຶງດູດບັນດາຕະຫຼາດທີ່ຫາກໍ່ພົ້ນເດັ່ນ, ມີທ່າແຮງ ແລະ ມີຄວາມສາມາດບົ່ມຊ້ອນຫຼາຍຢ່າງເຊັ່ນ: ອິນເດຍ, ຕາເວັນອອກກາງ; ພ້ອມກັນນັ້ນ ກໍປະຕິບັດການຍົກເວັ້ນວີຊາທ່ອງທ່ຽວບັນດາປະເທດເອີລົບ, ອົດສະຕາລີ, ນິວຊີແລນ, ການາດາ, ອາເມລິກາ; ເພີ່ມກຳນົດເວລາພັກເຊົາໃຫ້ນັກທ່ອງທ່ຽວທີ່ໄດ້ຮັບການຍົກເວັ້ນວີຊາຂຶ້ນເປັນ 30 ວັນ.
ສຳລັບຕະຫຼາດທ່ອງທ່ຽວພາຍໃນປະເທດ, ຫວຽດນາມ ໄດ້ຄວບຄຸມໂລກລະບາດເປັນຢ່າງດີ, ກຳນົດຕະຫຼາດທ່ອງທ່ຽວພາຍໃນເປັນຈຸດສຸມ ແລະ ສຸມໃສ່ຂຸດຄົ້ນຕະຫຼາດນີ້, ແນ່ນອນວ່າ ໃນປີ 2023, ການທ່ອງທ່ຽວພາຍໃນປະເທດ ຈະເຕີບໂຕຄືນໃໝ່ຢ່າງວ່ອງໄວ. ຢ່າງໃດກໍ່ຕາມ, ມັນຍັງມີຄວາມຈໍາເປັນທີ່ຈະເບິ່ງດ້ວຍຈິນຕະນາການໃຫມ່ວ່າ ມັນບໍ່ມີຄວາມສໍາຄັນຫຼາຍທີ່ຈະກໍານົດຈໍານວນນັກທ່ອງທ່ຽວຢ່າງ ແຕ່ຄວນຈະອີງໃສ່ລະດັບການໃຊ້ຈ່າຍ.
ການຄາດຄະເນ ແລະ ການກຳນົດຈຸດພົ້ນເດັ່ນດັ່ງກ່າວ ຕ້ອງມີຄວາມມານະພະຍາຍາມຂອງລັດຖະບານ ແລະ ທ້ອງຖິ່ນໃນການຊຸກຍູ້ການພັດທະນາພື້ນຖານໂຄງລ່າງການຄົມມະນາຄົມ, ສະຖານທີ່ພັກອາໄສ, ເຂດລະຫຼິ້ນບັນເທີງ, ກໍ່ສ້າງ ແລະ ພັດທະນາບັນດາຜະລິດຕະພັນທ່ອງທ່ຽວໃໝ່ຕາມທ່າອ່ຽງ; ພ້ອມກັນນັ້ນ, ກໍຍູ້ແຮງການໂຄສະນາ ແລະ ສື່ມວນຊົນກ່ຽວກັບການບໍລິການທ່ອງທ່ຽວ... ຫວັງວ່າດ້ວຍຄວາມຕັດສິນໃຈ ແລະ ຄວາມເຫັນດີເຫັນພ້ອມຂອງບັນດາວິສາຫະກິດ ແລະ ການໜູນຊ່ວຍຂອງບັນດາອົງການຄຸ້ມຄອງ, ອຳນາດການປົກຄອງທ້ອງຖິ່ນ, ການທ່ອງທ່ຽວ ຫວຽດນາມ ຈະຟື້ນຕົວຢ່າງເຕັມສ່ວນ.
ຄຳຮຸ່ງ
