 |
ກອງປະຊຸມຄົ້ນຄວ້າປຶກສາຫາລື ແລະ ປັບປຸງລະບຽບ ວ່າດ້ວຍການຄຸ້ມຄອງ ຜູ້ປະກອບການ ຕາມມາດຕະຖານ ຫລື AEO ແລະ ລະບຽບ ການຄຸ້ມຄອງຜູ້ບໍລິການແຈ້ງພາສີ
ກອງປະຊຸມຄັ້ງນີ້ເພື່ອສະໜອງຂໍ້ມູນ ແລະ ຄຳແນະນຳ ກ່ຽວກັບຮ່າງບົດແນະນຳຂອງ ກະຊວງການເງິນ ວ່າດ້ວຍການຄຸ້ມຄອງຜູ້ປະກອບການຕາມມາດຕະຖານ ແລະ ວ່າດ້ວຍການຄຸ້ມຄອງຜູ້ບໍລິການແຈ້ງພາສີ. ພ້ອມນີ້, ຜູ້ເຂົ້າຮ່ວມຍັງໄດ້ຊ່ວຍປະກອບຂໍ້ມູນເຂົ້າໃນການປັບປຸງຮ່າງບົດແນະນຳດັ່ງກ່າວທາງດ້ານຫລັກການ, ຂໍ້ບັງຄົບ ແລະ ເງື່ອນໄຂ ຕາມທີ່ໄດ້ລະບຸ ໄວ້ໃນກອບມາດຕະຖານ ເພື່ອຄວາມປອດໄພ ແລະ ອຳນວນຄວາມສະດວກ ໃຫ້ແກ່ການຄ້າໂລກຂອງອົງການພາສີໂລກແລະ ໃນຂໍ້ຕົກລົງວ່າດ້ວຍການອຳນວຍ ຄວາມສະດວກດ້ານການຄ້າ ຂອງອົງການການຄ້າໂລກ.
ທ່ານ ວົງຄຳແຫງ ວົງທະຈັກ ຮອງຫົວໜ້າກົມພາສີ ກ່າວວ່າ: ແຜນງານວ່າດ້ວຍການຄຸ້ມຄອງຜູ້ປະກອບການຕາມມາດຕະຖານ ຫລື AEO ແມ່ນກອບວຽກອັນໃໝ່ ສຳລັບບັນດາເຈົ້າໜ້າທີ່ພາສີ ແລະ ຜູ້ປະກອບການ ເຊິ່ງກອງປະຊຸມໃນຄັ້ງນີ້ແມ່ນບາດກ້າວທີ່ສຳຄັນໜຶ່ງ ສຳລັບພາສີລາວເພື່ອຍັບໃກ້ເຂົ້າໄປສູ່ການຈັດຕັ້ງປະຕິບັດແຜນງານດັ່ງກ່າວເຊິ່ງຈະຊ່ວຍປັງປຸງສະພາບແວດລ້ອມ ແລະ ເອື້ອອຳນວຍ ທາງດ້ານການຄ້າຢູ່ ສປປ ລາວ ໃຫ້ສອດຄ່ອງກັບສະພາບຕົວຈິງຫລາຍຂຶ້ນກວ່າເກົ່າ.
（ແຫຼ່ງຂໍ້ມູນ： ຂປລ）
