ຈັດຕັ້ງປະຕິບັດການຊ່ວຍເຫຼືອສຸກເສີນໃຫ້ກັບປະຊາຊົນທີ່ປະສົບກັບຄວາມຫຍຸ້ງຍາກເນື່ອງຈາກການລະບາດຂອງພະຍາດ COVID-19

15:51 | 18/08/2021

ຍສໝ - ກະຊວງແຮງງານ-ທະຫານເສຍອົງຄະ ແລະສັງຄົມຫາກໍ່ສົ່ງເອກະສານໄປຍັງບັນດາແຂວງ ແລະເມືອງທີ່ຂຶ້ນກັບສູນກາງ ທີ່ພວມປະຕິບັດການແຍກຫ່າງໃນສັງຄົມກ່ຽວກັບການຈັດຕັ້ງປະຕິບັດມາດຕະການຊ່ວຍເຫຼືອສຸກເສີນໃຫ້ກັບປະຊາຊົນທີ່ປະສົບກັບຄວາມຫຍຸ້ງຍາກເນື່ອງຈາກການລະບາດຂອງພະຍາດ COVID-19...

	ສາທາລະນະລັດເຊັກ ໂອນວັກຊີນກັນ COVID -19 500,000 ໂດສ ໃຫ້ແກ່ຫວຽດນາມ
	ປະເທດລາວ ໄດ້ເລີ່ມຕົ້ົ້ນທົດລອງການສັກວັກຊິນ ຕ້ານພະຍາດ COVID – 19

ພາບປະກອບ

ປະຈຸບັນ, ມີ 23/63 ແຂວງ, ນະຄອນໃນທົ່ວປະເທດພວມປະຕິບັດແຍກຫ່າງໃນສັງຄົມຕາມຄຳສັ່ງ 16/CT-TTg. ເພື່ອຮັບປະກັນຄວາມປອດໄພທາງສັງຄົມໃຫ້ກັບປະຊາຊົນ ແລະຜູ້ອອກແຮງງານ, ໂດຍສະເພາະແມ່ນຜູ້ອອກແຮງງານທີ່ມາຈາກຕ່າງແຂວງ, ກະຊວງແຮງງານ, ທະຫານເສຍອົງຄະ ແລະສັງຄົມ ສະເໜີ ໃຫ້ປະທານຄະນະກໍາມະການປະຊາຊົນບັນດາແຂວງ, ນະຄອນທີ່ພວມປະຕິບັດການແຍກຫ່າງໃນສັງຄົມຕາມຄຳສັ່ງ 16/CT-TTg ຊີ້ນຳ ແລະຈັດຕັ້ງປະຕິບັດດ້ວຍວິທີການແກ້ໄຂຈຳນວນໜຶ່ງດັ່ງນີ້:

ບັນດາທ້ອງຖິ່ນກວດກາຄືນ ແລະກຳແໜ້ນສະພາບການດຳລົງຊີວິດຂອງປະຊາຊົນ ແລະຜູ້ອອກແຮງງານ ທີ່ປະສົບຄວາມຫຍຸ້ງຍາກຢູ່ທ້ອງຖິ່ນຂອງຕົນ; ຈັດຕັ້ງປະຕິບັດນະໂຍບາຍໜູນຊ່ວຍສໍາລັບບັນດາເປົ້າໝາຍຕາມທີ່ໄດ້ກໍານົດໄວ້ໃນມະຕິເລກທີ 68/NQ-CP ແລະຂໍ້ຕົກລົງເລກທີ 23/2021/QD-TTg ຂອງນາຍົກລັດຖະມົນຕີ; ມອບໝາຍໃຫ້ຜູ້ນຳໜ້າຄະນະພັກ, ອຳນາດການປົກຄອງທ້ອງຖິ່ນໃນການຮັບປະກັນຊີວິດການເປັນຢູ່ທາງສັງຄົມ; ບໍ່ປະໃຫ້ປະຊາຊົນຂາດອາຫານ, ເຄື່ອງນຸ່ງຫົ່ມ, ຫຼື ເຄື່ອງໃຊ້ທີ່ຈຳເປັນ.

ລະດົມແນວໂຮມປະເທດຊາດ, ບັນດາອົງການຈັດຕັ້ງການເມືອງ-ສັງຄົມ ແລະປະຊາຊົນຈັດຕັ້ງບັນດາຊ່ອງທາງໃນການສະ ໜອງອາຫານການກິນ ແລະເຄື່ອງໃຊ້ທີ່ຈຳເປັນໃຫ້ກັບປະຊາຊົນໃນເຂດທີ່ພວມປະຕິບັດການແຍກຫ່າງໃນສັງຄົມ.

ບັນດາທ້ອງຖິ່ນ ໄດ້ຮັບການຍົກເວັ້ນ, ຫຼຸດຄ່າໄຟຟ້າ, ຄ່ານ້ຳປະປາ ແລະ ຂົນຂວາຍໃຫ້ເຈົ້າຂອງເຮືອນໃຫ້ການຍົກເວັ້ນຫຼືຫຼຸດຜ່ອນຄ່າເຊົ່າເຮືອນ; ໃຫ້ການຊ່ວຍເຫຼືອສຸກເສີນຢ່າງທັນການ ແລະຄົບຖ້ວນຕາມທີ່ໄດ້ກໍານົດໄວ້ໃນມະຕິ ເລກທີ 20/2021/ND-CP ວັນທີ 15 ມີນາ 2021 ຂອງລັດຖະບານວ່າດ້ວຍການກໍານົດນະໂຍບາຍໜູນຊ່ວຍສັງຄົມສໍາລັບເປົ້າໝາຍທີ່ໄດ້ຮັບການໝູນຊ່ວຍຈາກສັງຄົມ.

ບັນດາທ້ອງຖິ່ນ ອີງຕາມການຄາດຄະເນການຜັນແປຂອງການລະບາດພະຍາດ, ເປັນເຈົ້າການໃນການວາງແຜນນະໂຍບາຍໜຸນຊ່ວຍເງິນຊື້ອາຫານ (ລະດັບຕໍ່າສຸດ 50,000 ດົ່ງ/ຄົນ/ມື້) ອີງຕາມມະຕິເລກທີ 68/NQ-CP ຂອງລັດຖະບານ ແລະໜູນຊ່ວຍການສະໜອງເຄື່ອງໃຊ້ທີ່ຈໍາເປັນຕາມຂໍ້ກໍານົດຂອງຂໍ້ກໍານົດໃນຂໍ້ 2 ມາດຕາ 12 ຂອງດໍາລັດສະບັບເລກທີ 20/2021/ND-CP ລົງວັນທີ 15 ມີນາ 2021 ຂອງລັດຖະບານວ່າດ້ວຍການກໍານົດນະໂຍບາຍໜູນຊ່ວຍສັງຄົມສໍາລັບເປົ້າໝາຍທີ່ໄດ້ຮັບການໝູນຊ່ວຍຈາກສັງຄົມ.

ສໍາລັບບັນດາເຫດສຸດວິໄສ, ປະຊາຊົນຕ້ອງໄດ້ຍ້າຍກັບຄືນບ້ານເກີດເມືອງນອນ, ກະຊວງແຮງງານ, ທະຫານເສຍອົງຄະ ແລະສັງຄົມ ສະເໜີໃຫ້ອົງການ, ໝູ່ຄະນະ ເຊິ່ງເປັນບ່ອນທີ່ເຂົາເຈົ້າພັກພາອາໄສ ປະສານສົມທົບກັບອຳນາດການປົກຄອງທ້ອງຖິ່ນໃນບ້ານເກີດເມືອງນອນເພື່ອຊ່ວຍເຫຼືອດ້ານສະບຽງອາຫານ, ນໍ້າດື່ມ ແລະ ການຈັດພາຫະນະເພື່ອສົ່ງກັບຄືນບ້ານເກີດເມືອງນອນ; ຈັດຕັ້ງການແຍກປ່ຽວ, ຮັບປະກັນການປະຕິບັດຕາມຂໍ້ກຳນົດໃນການປ້ອງກັນ ແລະຄວບຄຸມການລະບາດຂອງພະຍາດ COVID-19.

ໄຊພອນ