 |
ທ່ານ ທອງລຸນ ສີສຸລິດ ນາຍົກລັດຖະມົນຕີ ກ່າວຄຳເຫັນຕໍ່ກອງປະຊຸມ.
ໃນໂອກາດດັ່ງກ່າວ, ທ່ານ ທອງລຸນ ສີສຸລິດ ໄດ້ກ່າວສະແດງ ຄວາມຍິນດີຕ້ອນຮັບ ແລະ ຕີລາຄາສູງ ຕໍ່ຄະນະຜູ້ແທນ ຂອງຄູ່ຮ່ວມພັດທະນາ ທີ່ໄດ້ເດີນທາງມາຢ້ຽມຢາມ ແລະ ເຂົ້າຮ່ວມກອງປະ ຊຸມໂຕະມົນ ປະຈຳປີ 2018, ເຊິ່ງເປັນການປະກອບສ່ວນອັນສຳຄັນ ເຂົ້າໃນການຊຸກຍູ້ ແລະ ສົ່ງເສີມຂະຫຍາຍ ການຮ່ວມມືພົວພັນ ລະຫວ່າງ ສປປ ລາວ ແລະ ຄູ່ຮ່ວມພັດທະນາ, ໂດຍສະເພາະແມ່ນການ ສະໜັບ ສະໜູນ ແລະ ຊ່ວຍເຫລືອ ສປປ ລາວ ໃນການບັນລຸຕາມຈຸດປະສົງ ທີ່ໄດ້ປຶກສາຫາລືກັນໃນ 4 ຫົວຂໍ້ ຄື: ດ້ານເສດຖະກິດ; ການພັດທະນາ ຊັບພະຍາກອນມະນຸດ ແລະ ສັງຄົມ; ການນຳໃຊ້ຊັບພະຍາກອນ ທຳມະຊາດ ແລະ ປົກປັກຮັກສາສິ່ງແວດລ້ອມ, ການກຽມຄວາມພ້ອມ ໃນການຮັບມືກັບໄພພິບັດ ທາງທຳມະຊາດ ແລະ ການປ່ຽນດິນຟ້າອາກາດ ທີ່ອາດຈະເກີດຂຶ້ນ ແລະ ວຽກງານຈຸດສຸມປິ່ນອ້ອມ ທີ່ຕິດພັນກັບ ຫລາຍຂະແໜງການ.
 |
ບັນຍາກາດກອງປະຊຸມ.
ໃນໂອກາດດຽວກັນນີ້, ທ່ານ ນາງ ຄາລິນາ ອີມໂມເນັນ ໄດ້ຕາງໜ້າໃຫ້ບັນດາ ຄະນະຜູ້ແທນຂອງຄູ່ຮ່ວມພັດທະນາ ສະແດງຄວາມຂອບໃຈ ຕໍ່ທ່ານນາຍົກລັດຖະມົນຕີ ທີ່ໄດ້ສະຫລະເວລາ ອັນມີຄ່າ ໃຫ້ການຕ້ອນຮັບ ອັນອົບອຸ່ນໃນຄັ້ງນີ້, ພ້ອມທັງລາຍງານ ຜົນກອງປະຊຸມໂຕະມົນ ປະຈຳປີ 2018ໃຫ້ທ່ານນາຍົກລັດຖະມົນຕີ ໄດ້ຮັບຊາບຕື່ມອີກ.
（ແຫຼ່ງຂໍ້ມູນ： ຂປລ）
