 |
ກອງປະຊຸມໜ່ວຍງານວິຊາການຮ່ວມດ້ານການທູດ ແມ່ນໍ້າຂອງ-ແມ່ນ້ຳລ້ານຊ້າງ ຄັ້ງທີ 8.
ຈຸດປະສົງ ຂອງກອງປະຊຸມຄັ້ງນີ້ ແມ່ນເພື່ອປຶກສາຫາລື ດ້ານເນື້ອໃນ ແລະ ພາລາທິການ ໂດຍສະເພາະການປຶກສາຫາລື ກ່ຽວກັບ ຮ່າງຖະແຫລງຂ່າວຮ່ວມ ຂອງກອງປະຊຸມລັດຖະມົນຕີຕ່າງປະເທດ ແລະ ຮ່າງບົດລາຍງານຄວາມຄືບໜ້າ ການຈັດຕັ້ງປະຕິບັດແຜນປະຕິບັດງານ 5 ປີ ຂອງແຕ່ລະປະເທດສະມາຊິກ, ເພື່ອຈະໄດ້ນຳໄປພິຈາລະນາ ໃນກອງປະຊຸມເຈົ້າໜ້າທີ່ອາວຸໂສ ແລະ ກອງປະຊຸມລັດຖະມົນຕີຕ່າງປະເທດ ແມ່ນ້ຳຂອງ-ແມ່ນ້ຳນລ້ານຊ້າງ ຄັ້ງທີ 4 ທີ່ຈະຈັດຂຶ້ນ ໃນລະ ຫວ່າງວັນທີ 16-17 ທັນວາ 2018 ທີ່ ແຂວງຫລວງພະບາງ. ພ້ອມກັນນັ້ນ, ກອງປະຊຸມຍັງຈະໄດ້ຮ່ວມກັນທົບທວນຄວາມຄືບໜ້າ ຂອງການຈັດຕັ້ງປະຕິບັດ ບັນດາໂຄງການຕ່າງໆ ຂອງຂອບການຮ່ວມມືດັ່ງກ່າວ ໃນໄລຍະຜ່ານມາ ແລະ ແຜນ ການຈັດຕັ້ງປະຕິບັດໂຄງການໃນຕໍ່ໜ້າ. ຜ່ານມາ ສປປ ລາວ ກໍມີໂຄງການຈັດຕັ້ງປະຕິບັດຢູ່ ສປປ ລາວ ມູນຄ່າປະມານ 8 ລ້ານໂດລາ ໂດຍໄດ້ຮັບການສະໜັບສະໜູນ ຈາກ ສປ ຈີນ ກໍຄື ກອງທຶນພິເສດ ແມ່ນ້ຳຂອງ-ແມ່ນ້ຳລ້ານຊ້າງ.
ຂອບການຮ່ວມມືແມ່ນໍ້າຂອງ-ແມ່ນໍ້າລ້ານຊ້າງ ສ້າງຕັ້ງຂຶ້ນໃນປີ 2016, ເຊິ່ງປະກອບດ້ວຍ 5 ປະເທດສະມາຊິກແມ່ນໍ້າຂອງ ແລະ ສປ ຈີນ. ມີກົນໄກຈັດກອງປະຊຸມສຸດຍອດທຸກໆ 2 ປີ. ໃນນັ້ນປະເທດສະມາຊິກແມ່ນ້ຳຂອງ ຈະໄດ້ຜັດປ່ຽນ ກັນເປັນ ປະທານຮ່ວມ, ສຳລັບ ສປປ ລາວ ແມ່ນໄດ້ຮັບໜ້າທີ່ເປັນປະທານຮ່ວມ ກັບ ສປ ຈີນ ຕໍ່ຈາກກຳປູເຈຍ ແຕ່ໄລຍະປີ 2018-2020 ແລະ ໃນໄລຍະດັ່ງກ່າວ ສປປ ລາວ ຈະໄດ້ເປັນເຈົ້າພາບຈັດກອງປະຊຸມທີ່ສຳຄັນຄື: ກອງປະຊຸມລັດ ຖະມົນ ຕີຕ່າງ ປະເທດ ແມ່ນ້ຳຂອງ -ແມ່ນ້ຳລ້ານຊ້າງ ຄັ້ງທີ 4, ກອງປະຊຸມຜູ້ນຳແມ່ນໍ້າຂອງ-ແມ່ນ້ຳລ້ານຊ້າງ ຄັ້ງທີ 3.
（ແຫຼ່ງຂໍ້ມູນ： ຂປລ）
