 |
ປະທານປະເທດ ບຸນຍັງ ວໍລະຈິດ ຕ້ອນຮັບ ທ່ານ ເຈີ່ນກ໋ວກ ເວື້ອງ ກຳມະການກົມການເມືອງ ຜູ້ປະຈຳການຄະນະເລຂາທິການສູນກາງພັກກອມມູນິດ ຫວຽດນາມ.(ພາບ: ເກດສະໜາ)
ໂອກາດດັ່ງກ່າວ, ສະຫາຍ ບຸນຍັງ ວໍລະຈິດ ໄດ້ສະແດງຄວາມຊົມເຊີຍ ແລະ ຕີລາຄາສູງຕໍ່ການເດີນທາງມາຢ້ຽມຢາມ ສປປ ລາວ ຢ່າງເປັນທາງການຂອງສະຫາຍ ເຈິ່ນກວັກ ເວືອງ ໃນຄັ້ງນີ້, ເຊິ່ງເປັນການຢ້ຽມຢາມຄັ້ງທຳອິດ ໃນຕຳແໜ່ງເປັນຜູ້ປະຈຳການ ຄະນະເລຂາທິການສູນກາງພັກກອມມູນິດຫວຽດນາມ ແລະ ຖືວ່າການຢ້ຽມຢາມຄັ້ງນີ້ ເປັນການປະກອບສ່ວນອັນສຳຄັນເຂົ້າໃນການເພີ່ມທະວີ ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ລາວ-ຫວຽດນາມ ໃຫ້ນັບມື້ນັບແໜ້ນແຟ້ນ, ເລິກເຊິ່ງ ແລະ ຂະຫຍາຍຕົວຢ່າງບໍ່ຢຸດຢັ້ງ. ພ້ອມດຽວກັນນັ້ນ, ສະຫາຍ ບຸນຍັງ ວໍລະຈິດ ຍັງໄດ້ສະແດງຄວາມເສົ້າໂສກເສຍດາຍຢ່າງສຸດຊຶ້ງ ຕໍ່ການຈາກໄປຂອງ ສະຫາຍ ອາດີດເລຂາທິການໃຫຍ່ ໂດ໊ເມື່ອຍ ແລະ ສະຫາຍ ປະທານປະເທດ ເຈິ່ນດາຍກວາງ ທີ່ຜ່ານມາ. ພ້ອມທັງ ສະແດງຄວາມຊົມເຊີຍຢ່າງສຸດອົກສຸດໃຈ ຕໍ່ບັນດາຜົນສຳເລັດອັນໃຫຍ່ຫລວງ, ຮອບດ້ານ ທີ່ປະຊາຊົນຫວຽດນາມອ້າຍນ້ອງຍາດມາໄດ້ ໃນຊຸມປີຜ່ານມາ, ພິເສດແມ່ນຜົນສຳເລັດໃນໄລຍະ 2 ປີກວ່າ ໃນການຜັນຂະຫຍາຍມະຕິກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ແລະ ສະແດງຄວາມພາກພູມໃຈຕໍ່ ໝາກຜົນຂອງການຮ່ວມມືສອງຝ່າຍ ບົນພື້ນຖານຂໍ້ຕົກລົງ ຂອງການນຳຂັ້ນສູງຂອງ 2 ພັກ, 2 ລັດ ລາວ-ຫວຽດນາມ. ພ້ອມນັ້ນ, ສະຫາຍ ບຸນຍັງ ວໍລະຈິດ ຍັງໄດ້ສະແດງຄວາມຂອບໃຈ ແລະ ຮູ້ບຸນຄຸນຢ່າງສູງຕໍ່ພັກ, ລັດ ແລະ ປະຊາຊົນຫວຽດນາມອ້າຍນ້ອງ ທີ່ໄດ້ໃຫ້ການສະໜັບສະໜູນຊ່ວຍເຫລືອພັກ, ລັດ ແລະ ປະຊາຊົນລາວ ມາໂດຍຕະຫລອດ, ໂດຍສະເພາະແມ່ນການຊ່ວຍເຫລືອຢ່າງທັນການ ໃຫ້ຊາວເມືອງສະໜາມໄຊ ແຂວງອັດຕະປື ໃນເດືອນກໍລະກົດ 2018 ທີ່ຜ່ານມາ, ທັ້ງໆທີ່ຫລາຍແຂວງຢູ່ໃນຫວຽດນາມ ກໍພວມປະສົບກັບໄພພິບັດເຊັ່ນກັນ ແຕ່ຍັງໄດ້ບິແບ່ງການຊ່ວຍເຫລືອໃຫ້ແກ່ ປະຊາຊົນລາວ.
ສະຫາຍ ເຈິ່ນກວັກ ເວື້ອງ ກໍໄດ້ສະແດງຄວາມຂອບໃຈ ຕໍ່ສະຫາຍ ບຸນຍັງ ວໍລະຈິດ ທີ່ໃຫ້ກຽດຕ້ອນຮັບຢ່າງອົບອຸ່ນໃນຄັ້ງນີ້. ພ້ອມທັງ ຕີລາຄາສູງຕໍ່ການພົວພັນຮ່ວມມື ລະຫວ່າງສອງພັກ, ສອງລັດ ແລະ ປະຊາຊົນ ສອງຊາດ ຫວຽດນາມ-ລາວ ຕະຫລອດໄລຍະທີ່ຜ່ານມາ ແລະ ລາຍງານ ກ່ຽວກັບສະພາບການພົ້ນເດັ່ນ ຂອງຫວຽດນາມ ໂດຍສະເພາະແມ່ນຜົນສຳເລັດ ໃນການຈັດຕັ້ງຜັນຂະຫຍາຍມະຕິກອງ ປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ ໃຫ້ທ່ານ ປະທານ ປະເທດຮັບຊາບ.
（ແຫຼ່ງຂໍ້ມູນ： ຂປລ）
