ເລັ່ງລັດການຄົ້ນຫາ ແລະ ກູ້ເອົາອັດຖິນັກຮົບຜູ້ເສຍສະລະຊີວິດເພື່ອຊາດຢູ່ ລາວ

ທ່ານ ພົນໂທ ຫງວຽນວັນເກົາ (ຂວາ), ຮອງລັດຖະມົນຕີກະຊວງປ້ອງກັນຊາດ, ຫົວໜ້າຄະນະວຽກງານພິເສດລັດຖະບານຫວຽດນາມ ແລະ ທ່ານ ພົນໂທ ວົງສອນ ອິນປັນພິມ (ຊ້າຍ), ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນຊາດ, ຫົວໜ້າກົມໃຫຍ່ການເມືອງ ກອງທັບປະຊາຊົນລາວ, ຫົວໜ້າຄະນະວຽກງານພິເສດລັດຖະບານລາວ ລົງນາມໃນບົດບັນທຶກກອງປະຊຸມ. (ພາບ: ຊວນຄູ)

ວັນທີ 27 ກໍລະກົດ, ຢູ່ນະຄອນໂຮ່ຈີມິນ ໄດ້ຈັດກອງປະຊຸມຄັ້ງທີ 31 ລະຫວ່າງຄະນະວຽກງານພິເສດລັດຖະບານຫວຽດນາມ ແລະ ຄະນະວຽກງານພິເສດລັດຖະບານລາວ ກ່ຽວກັບການສືບຕໍ່ຄົ້ນຫາ, ກູ້ເອົາອັດຖິ ແລະ ສົ່ງອັດຖິກັບຄືນປະເທດ ຂອງນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ ໃນຊ່ວງສົງຄາມຕ່າງໆ ສຳລັບລະດູແລ້ງ 2026-2027.

ຄະນະຜູ້ແທນຂອງຄະນະວຽກງານພິເສດລັດຖະບານຫວຽດນາມ ນຳໂດຍ ພົນໂທ ຫງວຽນວັນເກົາ, ຮອງລັດຖະມົນຕີກະຊວງປ້ອງກັນຊາດ, ຫົວໜ້າຄະນະວຽກງານພິເສດລັດຖະບານຫວຽດນາມ ເປັນຫົວໜ້າຄະນະຜູ້ແທນ.

ຄະນະຜູ້ແທນຂອງຄະນະວຽກງານພິເສດລັດຖະບານລາວ ນຳໂດຍ ພົນໂທ ວົງສອນ ອິນປັນພິມ, ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນຊາດ, ຫົວໜ້າກົມໃຫຍ່ການເມືອງ ກອງທັບປະຊາຊົນລາວ, ຫົວໜ້າຄະນະວຽກງານພິເສດລັດຖະບານລາວ ເປັນຫົວໜ້າຄະນະຜູ້ແທນ.

ທ່ານ ພົນໂທ ຫງວຽນວັນເກົາ, ຮອງລັດຖະມົນຕີກະຊວງປ້ອງກັນຊາດ, ຫົວໜ້າຄະນະວຽກງານພິເສດລັດຖະບານຫວຽດນາມ ເຂົ້າຮ່ວມກອງປະຊຸມ. (ພາບ: ຊວນຄູ)

ໂດຍແບ່ງປັນສະພາບການພັດທະນາເສດຖະກິດ-ສັງຄົມຂອງ ລາວ ໃນໄລຍະຜ່ານມາ, ພົນໂທ ວົງສອນ ອິນປັນພິມ ໄດ້ສະແດງຄວາມຂອບໃຈຢ່າງຈິງໃຈຕໍ່ພັກ, ລັດ, ກອງທັບ ແລະ ປະຊາຊົນຫວຽດນາມ ທີ່ໄດ້ໃຫ້ການຊ່ວຍເຫຼືອ ແລະ ສະໜັບສະໜູນພັກ, ລັດ, ກອງທັບ ແລະ ປະຊາຊົນລາວ ຢ່າງສຸດໃຈ ໃນການພັດທະນາເສດຖະກິດ-ສັງຄົມ ແລະ ການຝຶກອົບຮົມຊັບພະຍາກອນມະນຸດ.

ສອງຝ່າຍໄດ້ຕີລາຄາສູງບັນດາຜົນສຳເລັດທີ່ບັນລຸໄດ້ຕາມເນື້ອໃນຂອງບົດບັນທຶກກອງປະຊຸມຄັ້ງທີ 30. ເຖິງແມ່ນວ່າ ຂໍ້ມູນກ່ຽວກັບສະຖານທີ່ຝັງສົບນັກຮົບຜູ້ເສຍສະລະຊີວິດເພື່ອຊາດ ນັບມື້ນັບຫາໄດ້ຍາກ, ແຕ່ວຽກງານຄົ້ນຫາ ແລະ ກູ້ເອົາອັດຖິນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ ໃນຊ່ວງສົງຄາມຕ່າງໆ ຍັງໄດ້ຮັບການດຳເນີນຢ່າງໃກ້ຊິດ ແລະ ມີປະສິດທິຜົນ.

ໃນລະດູແລ້ງ 2025-2026, ບັນດາຄະນະຄົ້ນຫາ ແລະ ກູ້ເອົາອັດຖິຂອງຫວຽດນາມ ໄດ້ຄົ້ນຫາ ແລະ ກູ້ເອົາອັດຖິນັກຮົບຜູ້ເສຍສະລະຊີວິດເພື່ອຊາດ ໄດ້ທັງໝົດ 173 ອັດຖິ. ຄະນະວຽກງານພິເສດລັດຖະບານ ແລະ ບັນດາຂັ້ນອຳນາດການປົກຄອງຂອງສອງປະເທດ ໄດ້ປະສານງານຢ່າງໃກ້ຊິດເປັນປະຈຳ ແລະ ທັນການແກ້ໄຂຄວາມຫຍຸ້ງຍາກຕ່າງໆ ໃນການຈັດຕັ້ງປະຕິບັດໜ້າທີ່ຄົ້ນຫາ, ກູ້ເອົາອັດຖິ ແລະ ສົ່ງອັດຖິກັບຄືນປະເທດ.

ຝ່າຍລາວ ໄດ້ໃຫ້ການຊ່ວຍເຫຼືອ ແລະ ສະໜັບສະໜູນບັນດາຄະນະຄົ້ນຫາ ແລະ ກູ້ເອົາອັດຖິຂອງຫວຽດນາມ ໃນທຸກກິດຈະກຳຢ່າງສະເໝີມາ; ພ້ອມທັງຕັ້ງໜ້າໂຄສະນາ ແລະ ລະດົມທຸກຊົນຊັ້ນປະຊາຊົນ ໃຫ້ສະໜອງຂໍ້ມູນກ່ຽວກັບສະຖານທີ່ຝັງສົບຂອງນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ ໃນຊ່ວງສົງຄາມຕ່າງໆ.

ທ່ານ ພົນໂທ ວົງສອນ ອິນປັນພິມ, ກຳມະການສູນກາງພັກ, ຮອງລັດຖະມົນຕີກະຊວງປ້ອງກັນຊາດ, ຫົວໜ້າກົມໃຫຍ່ການເມືອງ ກອງທັບປະຊາຊົນລາວ, ຫົວໜ້າຄະນະວຽກງານພິເສດລັດຖະບານລາວ ເຂົ້າຮ່ວມກອງປະຊຸມ. (ພາບ: ຊວນຄູ)

ສອງຝ່າຍເຫັນດີວ່າ ຄະນະວຽກງານພິເສດລັດຖະບານ ແລະ ບັນດາຂັ້ນອຳນາດການປົກຄອງຂອງສອງປະເທດ ຕ້ອງເພີ່ມທະວີການປະສານງານຢ່າງໃກ້ຊິດກວ່າເກົ່າ, ຊີ້ນຳຍູ້ແຮງວຽກງານໂຄສະນາ ແລະ ລະດົມທຸກຊົນຊັ້ນປະຊາຊົນຂອງສອງປະເທດ ໃຫ້ສະໜອງຂໍ້ມູນກ່ຽວກັບນັກຮົບຜູ້ເສຍສະລະຊີວິດເພື່ອຊາດ ແລະ ສຸສານຂອງນັກຮົບ, ເພື່ອຍົກສູງປະສິດທິຜົນວຽກງານຄົ້ນຫາ, ກູ້ເອົາອັດຖິ ແລະ ສົ່ງອັດຖິກັບຄືນປະເທດໃນໄລຍະຕໍ່ໄປ.

ໃນລະດູແລ້ງ 2026-2027, ສອງຝ່າຍເຫັນດີສືບຕໍ່ປະສານງານ ແລະ ຊີ້ນຳວຽກງານຄົ້ນຫາ, ກູ້ເອົາອັດຖິ ແລະ ສົ່ງອັດຖິກັບຄືນປະເທດ ຂອງນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ ໃນຊ່ວງສົງຄາມຕ່າງໆ. ພ້ອມທັງຍູ້ແຮງວຽກງານໂຄສະນາ ແລະ ລະດົມປະຊາຊົນຂອງສອງປະເທດ ໃຫ້ສະໜອງຂໍ້ມູນກ່ຽວກັບນັກຮົບຜູ້ເສຍສະລະຊີວິດເພື່ອຊາດ, ສຸສານຂອງນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ.

ຄະນະວຽກງານພິເສດ ແລະ ກອງບັນຊາການທະຫານຂັ້ນແຂວງຂອງສອງຝ່າຍ ຈະແລກປ່ຽນ ແລະ ຖອດຖອນບົດຮຽນເປັນປະຈຳ, ສຸມໃສ່ຊີ້ນຳຍູ້ແຮງວຽກງານຄົ້ນຫາ ແລະ ກູ້ເອົາອັດຖິນັກຮົບຢູ່ໃນພື້ນທີ່; ເພີ່ມທະວີການປະສານງານໃນການກວດກາ, ປະເມີນຜົນ, ຍ້ອງຍໍ ແລະ ມອບລາງວັນຢ່າງທັນການໃຫ້ແກ່ບັນດາອົງກອນ ແລະ ບຸກຄົນທີ່ມີຜົນງານດີເດັ່ນໃນການປະຕິບັດໜ້າທີ່ຄົ້ນຫາ ແລະ ກູ້ເອົາອັດຖິນັກຮົບ.

ພ້ອມກັນນັ້ນ, ສອງຝ່າຍຈະຊີ້ນຳອົງການປະຈຳຂອງແຕ່ລະຝ່າຍ ໃຫ້ຕັ້ງໜ້າໃຫ້ຄຳປຶກສາ ແລະ ສະເໜີເນື້ອໃນ ແລະ ມາດຕະການ ເພື່ອຍູ້ແຮງວຽກງານຄົ້ນຫາ ແລະ ກູ້ເອົາອັດຖິນັກຮົບ; ເພີ່ມທະວີການແລກປ່ຽນຄະນະ, ປະສານງານທົບທວນ ແລະ ເກັບກຳຂໍ້ມູນກ່ຽວກັບນັກຮົບອາສາສະໝັກ ແລະ ຊ່ຽວຊານຫວຽດນາມ ຜູ້ເສຍສະລະຊີວິດຢູ່ ລາວ; ສຳຫຼວດ, ກວດກາ ແລະ ປະເມີນຜົນການປະສານງານຂອງຄະນະວຽກງານພິເສດຂັ້ນທ້ອງຖິ່ນຂອງສອງຝ່າຍ.

ນອກຈາກນັ້ນ, ສອງຝ່າຍຈະປະສານງານຢ່າງໃກ້ຊິດ ແລະ ຊີ້ນຳບັນດາທ້ອງຖິ່ນທີ່ມີອະນຸສາວະລີ “ຄວາມສາມັກຄີພັນທະມິດການສູ້ຮົບ ຫວຽດນາມ-ລາວ” ທີ່ຫາກໍ່ສ້າງໃໝ່ ຫຼື ໄດ້ຮັບການບູລະນະ ໃຫ້ບໍລິຫານ ແລະ ນຳໃຊ້ຕາມລະບຽບການຂອງລັດ ແລະ ຮີດຄອງປະເພນີຂອງປະຊາຊົນລາວ; ຕັ້ງໜ້າໂຄສະນາກ່ຽວກັບຄວາມສາມັກຄີລະຫວ່າງກອງທັບ ແລະ ປະຊາຊົນຂອງສອງປະເທດ ຫວຽດນາມ-ລາວ; ຈັດຕ້ອນຮັບ ແລະ ອຳນວຍຄວາມສະດວກໃຫ້ແກ່ຄະນະຜູ້ແທນພາຍໃນ ແລະ ສາກົນ ທີ່ມາຢ້ຽມຢາມ ແລະ ສັກກາລະອະນຸສາວະລີ ເພື່ອປະກອບສ່ວນເສີມສ້າງສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ ລະຫວ່າງສອງພັກ, ສອງລັດ ແລະ ສອງປະຊາຊາດ ຫວຽດນາມ-ລາວ.

ອານຢາງ ຈັດພິທີຕ້ອນຮັບ ແລະ ໄວ້ອາໄລອັດຖິວິລະຊົນຜູ້ເສຍສະຫຼະຊີວິດເພື່ອຊາດ ທີ່ກັບຄືນມາຈາກ ກຳປູເຈຍ ຍສໝ - ອັດຖິຂອງທະຫານອາສາສະໝັກ ແລະ ຊ່ຽວຊານຫວຽດນາມ ທີ່ໄດ້ຮັບການຊອກຫາ ແລະ ຂຸດຄົ້ນກູ້ຊ່ວຍ ໂດຍກອງ K92 ຢູ່ພາຍໃນທ້ອງຖິ່ນດັ່ງກ່າວ ໃນຕະຫຼອດລະດູແລ້ງ ປີ 2025–2026 ເພື່ອສົ່ງກັບຄືນປະເທດຊາດ ແລະ ຈັດພິທີໄວ້ອາໄລ ພ້ອມທັງດຳເນີນພິທີຝັງສົບຢ່າງສົມກຽດ.

ເລັ່ງດ່ວນກວດກາອັດຕະລັກອັດຖິເສຍສະຫຼະຊີວິດເພື່ອຊາດ ດ້ວຍວິທີກວດຊິວະພັນ ຢູ່ ແຂວງ ເລິມດົ່ງ ຍສໝ - ແຂວງ ເລິມດົ່ງ ໄດ້ສຳເລັດການເກັບຕົວຢ່າງຊິວະພັນ ຢູ່ 9 ໃນຈຳນວນ 11 ປ່າຊ້າ.