ຫວຽດນາມ - ສ.ເກົາຫຼີ ຂະຫຍາຍການຮ່ວມມືພັດທະນາ AI

ເວທີປາໄສ AI ແລະ ເຕັກໂນໂລຊີດິຈິຕອນ ຫວຽດນາມ - ສ.ເກົາຫຼີ 2026 ຈັດຂຶ້ນໃນຂອບຂອງສັບປະດາດິຈິຕອນສາກົນຫວຽດນາມ, ເພື່ອເພີ່ມທະວີການເຊື່ອມຕໍ່ລະຫວ່າງບັນດາອົງການຄຸ້ມຄອງ, ອົງການຄົ້ນຄວ້າ, ມະຫາວິທະຍາໄລ ແລະ ວິສາຫະກິດຂອງສອງປະເທດ, ຜ່ານນັ້ນຂະຫຍາຍການຮ່ວມມືສອງຝ່າຍໃນຂົງເຂດ AI ແລະ ເຕັກໂນໂລຊີດິຈິຕອນ.

ເຫດການນີ້ຈັດຂຶ້ນໂດຍການປະສານງານລະຫວ່າງກະຊວງວິທະຍາສາດ ແລະ ເຕັກໂນໂລຊີຂໍ້ມູນຂ່າວສານ ສ.ເກົາຫຼີ (MSIT), ກະຊວງການຕ່າງປະເທດ ສ.ເກົາຫຼີ (MOFA), ອົງການສົ່ງເສີມອຸດສາຫະກຳເຕັກໂນໂລຊີຂໍ້ມູນແຫ່ງຊາດ ສ.ເກົາຫຼີ (NIPA) ແລະ ກະຊວງວິທະຍາສາດ ແລະ ເຕັກໂນໂລຊີຫວຽດນາມ.

ບັນດາຜູ້ແທນເຂົ້າຮ່ວມເວທີປາໄສ AI ແລະ ເຕັກໂນໂລຊີດິຈິຕອນ ຫວຽດນາມ - ສ.ເກົາຫຼີ 2026.

ໃຫ້ບູລິມະສິດແກ່ການຄົ້ນຄວ້າຮ່ວມກັນ, ພັດທະນາໂຄງລ່າງພື້ນຖານ ແລະ ບຸກຄະລາກອນ AI

ກ່າວຄຳປາໄສໃນເວທີປາໄສ, ທ່ານ ເຈິ່ນ ຈຸງ ຕິ໊ງ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ເຫັນວ່າ ສາຍພົວພັນຄູ່ຮ່ວມມືຍຸດທະສາດຮອບດ້ານ ຫວຽດນາມ - ສ.ເກົາຫຼີ ໄດ້ສ້າງພື້ນຖານອັນເອື້ອອຳນວຍໃຫ້ສອງປະເທດສືບຕໍ່ເຮັດໃຫ້ການຮ່ວມມືດ້ານວິທະຍາສາດ, ເຕັກໂນໂລຊີ ແລະ ນະວັດຕະກຳ ມີຄວາມເລິກເຊິ່ງຍິ່ງຂຶ້ນ.

ຕາມທ່ານຮອງລັດຖະມົນຕີແລ້ວ, AI ກຳລັງສົ່ງຜົນກະທົບຢ່າງກວ້າງຂວາງ ແລະ ເລິກເຊິ່ງຕໍ່ຮູບແບບການຜະລິດ, ກິດຈະກຳການບໍລິຫານຈັດການ ແລະ ກາຍເປັນປັດໄຈສຳຄັນຕໍ່ຂີດຄວາມສາມາດໃນການແຂ່ງຂັນຂອງຊາດ. ໃນສະພາບການດັ່ງກ່າວ, ການຮ່ວມມືດ້ານເຕັກໂນໂລຊີລະຫວ່າງຫວຽດນາມ ແລະ ສ.ເກົາຫຼີ ຈຳເປັນຕ້ອງກ້າວເຂົ້າສູ່ໄລຍະໃໝ່, ໂດຍໃຫ້ຄວາມສຳຄັນກັບການຮ່ວມກັນຄົ້ນຄວ້າ, ພັດທະນາ ແລະ ສ້າງຄຸນຄ່າຮ່ວມກັນ.

ພາຍໃຕ້ຫົວຂໍ້ “ກ້າວຂ້າມການຮ່ວມມືດ້ານການຫັນປ່ຽນດິຈິຕອນ, ມຸ່ງສູ່ຍຸກແຫ່ງນະວັດຕະກຳ AI ສຳລັບທຸກຄົນ”, ເວທີປາໄສໄດ້ເນັ້ນໜັກເຖິງຄວາມຈຳເປັນໃນການນຳເອົາຜົນສຳເລັດດ້ານປັນຍາປະດິດເຂົ້າສູ່ການນຳໃຊ້ຕົວຈິງ, ສ້າງໂອກາດການພັດທະນາເພີ່ມຂຶ້ນ ແລະ ນຳມາເຊິ່ງຜົນປະໂຫຍດໃຫ້ແກ່ປະຊາຊົນ ແລະ ວິສາຫະກິດຂອງສອງປະເທດ.

ຫວຽດນາມກຳນົດໃຫ້ AI ເປັນເຕັກໂນໂລຊີຍຸດທະສາດ, ມີບົດບາດຊຸກຍູ້ການປ່ຽນໃໝ່ຮູບແບບການເຕີບໂຕ, ຍົກສູງຜະລິດຕະພາບ ແລະ ຂີດຄວາມສາມາດໃນການແຂ່ງຂັນຂອງເສດຖະກິດ. ຄຽງຄູ່ກັບການຂະຫຍາຍການຮ່ວມມືສາກົນ, ຫວຽດນາມໃຫ້ຄວາມສຳຄັນກັບການຮັບເອົາຄວາມຮູ້, ເຕັກໂນໂລຊີ ແລະ ຊັບພະຍາກອນຈາກທົ່ວໂລກ ເພື່ອເສີມສ້າງຂີດຄວາມສາມາດພາຍໃນ, ຄ່ອຍໆເປັນເຈົ້າຂອງເຕັກໂນໂລຊີ ແລະ ເຂົ້າຮ່ວມຢ່າງເລິກເຊິ່ງຍິ່ງຂຶ້ນໃນຕ່ອງໂສ້ມູນຄ່າ AI ສາກົນ.

ບົນພື້ນຖານດັ່ງກ່າວ, ທ່ານຮອງລັດຖະມົນຕີ ເຈິ່ນ ຈຸງ ຕິ໊ງ ໄດ້ສະເໜີ 3 ຂົງເຂດການຮ່ວມມືບູລິມະສິດ.

ກ່ອນອື່ນໝົດ, ສອງປະເທດຈຳເປັນຕ້ອງເພີ່ມທະວີການຄົ້ນຄວ້າ, ພັດທະນາ ແລະ ນຳໃຊ້ AI, ໂດຍສະເພາະບັນດາໂມເດວ AI ພື້ນຖານ, ໂມເດວພາສາຂະໜາດໃຫຍ່ ແລະ ບັນດາວິທີແກ້ໄຂທີ່ຮັບໃຊ້ການຜະລິດ, ການດຳເນີນທຸລະກິດ ແລະ ການບໍລິການ. ບັນດາໂຄງການຮ່ວມມືຕ້ອງເຊື່ອມໂຍງກັບຄວາມຕ້ອງການຕົວຈິງ, ມຸ່ງໄປສູ່ການພັດທະນາຜະລິດຕະພັນທີ່ສາມາດນຳອອກສູ່ຕະຫຼາດໃນເຊີງການຄ້າ, ພ້ອມທັງຍົກສູງຂີດຄວາມສາມາດໃນການເປັນເຈົ້າຂອງເຕັກໂນໂລຊີ.

ຄຽງຄູ່ກັບການຄົ້ນຄວ້າ ແລະ ນຳໃຊ້, ສອງຝ່າຍຈຳເປັນຕ້ອງປະສານງານກັນໃນການສ້າງໂຄງລ່າງພື້ນຖານຂໍ້ມູນ, ຍົກສູງຂີດຄວາມສາມາດດ້ານການປະມວນຜົນ, ພັດທະນາໂຄງລ່າງພື້ນຖານສຳລັບການທົດລອງ ແລະ ເຕັກໂນໂລຊີເຄິ່ງຊັກນຳໄຟຟ້າເພື່ອຮັບໃຊ້ AI. ການລົງທຶນ, ເຊື່ອມຕໍ່ ແລະ ນຳໃຊ້ຊັບພະຍາກອນເຫຼົ່ານີ້ຢ່າງມີປະສິດທິຜົນ ຈະຊ່ວຍໃຫ້ວິສາຫະກິດ ແລະ ອົງການຄົ້ນຄວ້າມີເງື່ອນໄຂເຂົ້າເຖິງໂຄງລ່າງພື້ນຖານເຕັກໂນໂລຊີຫຼາຍຂຶ້ນ.

ທິດທາງທີສາມແມ່ນການພັດທະນາຊັບພະຍາກອນມະນຸດ ຜ່ານບັນດາໂຄງການແລກປ່ຽນຊ່ຽວຊານ, ການຄົ້ນຄວ້າຮ່ວມກັນ, ການຝຶກອົບຮົມວິສະວະກອນ ແລະ ການຍົກສູງທັກສະການນຳໃຊ້ AI ໃຫ້ແກ່ຜູ້ອອກແຮງງານ. ກິດຈະກຳຝຶກອົບຮົມຕ້ອງເຊື່ອມໂຍງກັບການຄົ້ນຄວ້າ ແລະ ການນຳເຕັກໂນໂລຊີໄປປະຕິບັດໃຊ້ ເພື່ອຕອບສະໜອງຄວາມຕ້ອງການຕົວຈິງ.

ທ່ານຮອງລັດຖະມົນຕີ ເຈິ່ນ ຈຸງ ຕິ໊ງ ຍັງໄດ້ສະເໜີໃຫ້ວິສາຫະກິດຫວຽດນາມ ແລະ ສ.ເກົາຫຼີ ເປັນເຈົ້າການກຳນົດຄວາມຕ້ອງການຮ່ວມມື, ເຊື່ອມຕໍ່ຄູ່ຮ່ວມມື ແລະ ລົງທຶນໃນບັນດາໂຄງການທີ່ເປັນຮູບປະທຳ. ຜ່ານນັ້ນ, ຜົນການຄົ້ນຄວ້າສາມາດຖືກຫັນເປັນຜະລິດຕະພັນ ແລະ ການບໍລິການທີ່ມີຂີດຄວາມສາມາດໃນການແຂ່ງຂັນ, ປະກອບສ່ວນຂະຫຍາຍຕະຫຼາດ ແລະ ນຳມາເຊິ່ງຜົນປະໂຫຍດອັນແທ້ຈິງໃຫ້ແກ່ສອງຝ່າຍ.

ທ່ານ ເຈິ່ນ ຈຸງ ຕິ໊ງ, ຮອງລັດຖະມົນຕີກະຊວງວິທະຍາສາດ ແລະ ເຕັກໂນໂລຊີ ກ່າວຄຳປາໄສໃນເວທີປາໄສ AI ແລະ ເຕັກໂນໂລຊີດິຈິຕອນ ຫວຽດນາມ - ສ.ເກົາຫຼີ 2026.

ຈາກການເຊື່ອມຕໍ່ດ້ານເຕັກໂນໂລຊີ ສູ່ການດຳເນີນໂຄງການຮ່ວມກັນ

ແລກປ່ຽນຄຳເຫັນໃນເວທີປາໄສ, ທ່ານ Kim Deuk-jung, ຮອງປະທານບໍລິຫານ NIPA ໄດ້ຕີລາຄາວ່າ ການຮ່ວມມືດ້ານເຕັກໂນໂລຊີດິຈິຕອນລະຫວ່າງຫວຽດນາມ ແລະ ສ.ເກົາຫຼີ ໃນໄລຍະຜ່ານມາໄດ້ບັນລຸຜົນສຳເລັດໃນຫຼາຍຂົງເຂດ, ໂດຍສະເພາະດ້ານຊອບແວ ແລະ ເຕັກໂນໂລຊີຂໍ້ມູນ ແລະ ການສື່ສານ (ICT).

ຕາມທ່ານແລ້ວ, ໃນໄລຍະຕໍ່ໄປ, ສອງປະເທດຈຳເປັນຕ້ອງສືບຕໍ່ຂະຫຍາຍການຮ່ວມມືໄປສູ່ຂົງເຂດໃໝ່ໆ ລວມມີ ເຕັກໂນໂລຊີເຄິ່ງຊັກນຳໄຟຟ້າ, ໂຄງລ່າງພື້ນຖານຂໍ້ມູນ, ປັນຍາປະດິດ ແລະ ການຫັນປ່ຽນດິຈິຕອນ.

ທ່ານ Kim Deuk-jung ໄດ້ຕີລາຄາສູງຕໍ່ການທີ່ລັດຖະບານຫວຽດນາມປະກາດຍຸດທະສາດແຫ່ງຊາດສະບັບໃໝ່ກ່ຽວກັບ AI ໃນເດືອນສິງຫາ 2026. ທ່ານເຫັນວ່າ ການປະສົມປະສານຈຸດແຂງດ້ານເຕັກໂນໂລຊີ AI, ICT ແລະ ປະສົບການພັດທະນາອຸດສາຫະກຳຂອງ ສ.ເກົາຫຼີ ກັບວິໄສທັດດ້ານ AI, ລະບົບນິເວດອຸດສາຫະກຳທີ່ມີຄວາມຄ່ອງຕົວ ແລະ ທ່າແຮງຕະຫຼາດຂອງຫວຽດນາມ ຈະເປີດໂອກາດການຮ່ວມມືຫຼາຍດ້ານ ບົນພື້ນຖານການສົ່ງເສີມຈຸດແຂງທີ່ສາມາດເສີມໜູນກັນຂອງແຕ່ລະຝ່າຍ.

ເພື່ອຫັນບັນດາທິດທາງເຫຼົ່ານີ້ໃຫ້ເປັນຈິງ, ໃນເດືອນເມສາ 2026, NIPA ໄດ້ລົງນາມໃນບົດບັນທຶກຄວາມເຂົ້າໃຈ (MOU) ກັບກົມອຸດສາຫະກຳເຕັກໂນໂລຊີຂໍ້ມູນ ສັງກັດກະຊວງວິທະຍາສາດ ແລະ ເຕັກໂນໂລຊີຫວຽດນາມ.

ຄາດວ່າໃນປີ 2027, NIPA ຈະສ້າງຕັ້ງສູນນະວັດຕະກຳ AI ສ.ເກົາຫຼີ ຢູ່ຫວຽດນາມ ເພື່ອຊຸກຍູ້ບັນດາກິດຈະກຳຮ່ວມມືສອງຝ່າຍ.

ທ່ານ Kim Deuk-jung ໄດ້ສະແດງຄວາມຄາດຫວັງວ່າ ສາຍພົວພັນຮ່ວມມືດ້ານເຕັກໂນໂລຊີລະຫວ່າງຫວຽດນາມ ແລະ ສ.ເກົາຫຼີ ຈະພັດທະນາກ້າວຂ້າມການແລກປ່ຽນຜະລິດຕະພັນ ແລະ ການຖ່າຍທອດເຕັກໂນໂລຊີແບບທຳມະດາ, ມຸ່ງໄປສູ່ການຮ່ວມກັນຝຶກອົບຮົມຊັບພະຍາກອນມະນຸດ ແລະ ພັດທະນາເຕັກໂນໂລຊີໃໝ່ໆ.

ມີທັດສະນະຄືກັນ, ທ່ານນາງ Lee Miyon, ເອກອັກຄະລັດຖະທູດ ສ.ເກົາຫຼີ ປະຈຳຫວຽດນາມ ເຫັນວ່າ ສອງປະເທດຈຳເປັນຕ້ອງຍົກສູງຄຸນນະພາບການຮ່ວມມື, ຄ່ອຍໆຫັນຈາກຮູບແບບທີ່ອີງໃສ່ການຜະລິດແບບດັ້ງເດີມເປັນຫຼັກ ໄປສູ່ການສຸມໃສ່ບັນດາຂະແໜງອຸດສາຫະກຳທັນສະໄໝ, ໃນນັ້ນມີ AI ແລະ ເຕັກໂນໂລຊີດິຈິຕອນ.

ທ່ານນາງເອກອັກຄະລັດຖະທູດໄດ້ສະເໜີໃຫ້ເພີ່ມທະວີບັນດາໂຄງການຄົ້ນຄວ້າຮ່ວມກັນໃນຂົງເຂດ AI ແລະ ເຄິ່ງຊັກນຳໄຟຟ້າ, ພ້ອມທັງໃຫ້ຄວາມສຳຄັນກັບການຫັນຜົນການຄົ້ນຄວ້າໃຫ້ກາຍເປັນຜະລິດຕະພັນ ແລະ ການບໍລິການທີ່ເປັນຮູບປະທຳຂອງວິສາຫະກິດສອງປະເທດ.

ຕາມທ່ານນາງ Lee Miyon ແລ້ວ, ຊັບພະຍາກອນມະນຸດມີບົດບາດສຳຄັນໃນຂະບວນການຮ່ວມມືນີ້. ດັ່ງນັ້ນ, ບັນດາມະຫາວິທະຍາໄລ, ສະຖາບັນຄົ້ນຄວ້າ ແລະ ວິສາຫະກິດ ຈຳເປັນຕ້ອງປະສານງານກັນຢ່າງໃກ້ຊິດຍິ່ງຂຶ້ນໃນການຝຶກອົບຮົມບຸກຄະລາກອນຄຸນນະພາບສູງ, ປະສົມປະສານການຮຽນຮູ້ ແລະ ການຝຶກປະຕິບັດ ໃຫ້ສອດຄ່ອງກັບຄວາມຕ້ອງການຕົວຈິງຂອງວິສາຫະກິດ.

ໃນຂອບຂອງເວທີປາໄສ, ບັນດາກອງປະຊຸມສະເພາະຫົວຂໍ້ໄດ້ແລກປ່ຽນປະສົບການກ່ຽວກັບການພັດທະນາໂມເດວ AI ທີ່ສາມາດເພິ່ງພາຕົນເອງ, ການສ້າງໂຄງລ່າງພື້ນຖານຂໍ້ມູນ, ສູນຂໍ້ມູນ AI, ການຍົກສູງຂີດຄວາມສາມາດດ້ານການປະມວນຜົນ ແລະ ການພັດທະນາເຕັກໂນໂລຊີເຄິ່ງຊັກນຳໄຟຟ້າເພື່ອຮັບໃຊ້ AI.

ໂຄງການຍັງມີບັນດາກິດຈະກຳແນະນຳເຕັກໂນໂລຊີ, ເຊື່ອມຕໍ່ທາງການຄ້າ, ນຳສະເໜີໂຄງການເພື່ອລະດົມທຶນ ແລະ ແນະນຳບັນດາວິທີແກ້ໄຂດ້ານນະວັດຕະກຳ.

ຜ່ານການເຊື່ອມຕໍ່ບັນດາອົງການຄຸ້ມຄອງ, ອົງການສະໜັບສະໜູນ, ສະຖາບັນຄົ້ນຄວ້າ, ມະຫາວິທະຍາໄລ ແລະ ປະຊາຄົມວິສາຫະກິດ, ເວທີປາໄສມຸ່ງໄປສູ່ການສ້າງບັນດາໂຄງການຮ່ວມມືທີ່ເປັນຮູບປະທຳ, ນຳເອົາເຕັກໂນໂລຊີເຂົ້າສູ່ການນຳໃຊ້ຕົວຈິງ, ພ້ອມທັງຄ່ອຍໆພັດທະນາລະບົບນິເວດ AI ແລະ ເຕັກໂນໂລຊີດິຈິຕອນຢູ່ຫວຽດນາມ ແລະ ສ.ເກົາຫຼີ.

ມອບຂອງຂວັນ 700 ຊຸດ ເພື່ອຊ່ວຍເຫຼືອຊຸມຊົນຊາວຫວຽດນາມຢູ່ ສ.ເກົາຫຼີ ຍສໝ - ວັນທີ 12/10, ທີ່ແຂວງຊຸງຊອງນາມໂດ (Chungnam), ສ.ເກົາຫຼີ, ສະມາຄົມຊາວຫວຽດນາມປະຈຳແຂວງ Chungnam ໄດ້ປະສານສົມທົບກັບບໍລິສັດ ONL Company Limited ຈັດໂຄງການມອບຂອງຂວັນ 700 ຊຸດ ລວມມູນຄ່າປະມານ 500 ລ້ານດົ່ງ, ພ້ອມທັງຊຸກຍູ້ການເຊື່ອມຕໍ່ລະຫວ່າງວິສາຫະກິດ ແລະ ບັນດາອົງການສັງຄົມ ເພື່ອເອົາໃຈໃສ່ດູແລຊີວິດການເປັນຢູ່ຂອງຊຸມຊົນຊາວຫວຽດນາມໃນທ້ອງຖິ່ນ.

ນັກສຶກສາຫວຽດນາມຢູ່ ສ.ເກົາຫຼີ ໄດ້ຮັບການຊ່ວຍເຫຼືອເພື່ອຍົກສູງຄວາມສາມາດໃນການຊອກຫາວຽກເຮັດ ຍສໝ - ໃນກອງສຳມະນາວິທະຍາສາດ “ການພັດທະນາ ແລະ ການຕັ້ງຖິ່ນຖານຂອງນັກສຶກສາຕ່າງປະເທດຢູ່ເຊອຸນ”, ບັນດາຊ່ຽວຊານ, ສະຖາບັນການສຶກສາ ແລະ ອົງການຊ່ວຍເຫຼືອຂອງນະຄອນເຊອຸນ (ສ.ເກົາຫຼີ) ໄດ້ປຶກສາຫາລືບັນດາວິທີແກ້ໄຂເພື່ອຊ່ວຍໃຫ້ນັກສຶກສາສາກົນ, ໃນນັ້ນມີນັກສຶກສາຫວຽດນາມ, ຍົກສູງລະດັບວິຊາຊີບ, ສະສົມປະສົບການ ແລະ ເປີດກວ້າງໂອກາດການເຮັດວຽກພາຍຫຼັງຮຽນຈົບ.