ວົງການຮູບເງົາຫວຽດນາມຂະຫຍາຍໂອກາດການຮ່ວມມືຢູ່ໂຕກຽວ

ສ້າງຈຸດເຊື່ອມຕໍ່ໃຫ້ວົງການຮູບເງົາຫວຽດນາມຢູ່ໂຕກຽວ

ນີ້ແມ່ນປີທີສອງຕິດຕໍ່ກັນທີ່ VFDA ເຂົ້າຮ່ວມ TIFFCOM, ເຊິ່ງເປັນເຫດການທີ່ຈັດຂຶ້ນຄຽງຄູ່ກັບງານມະຫະກຳຮູບເງົາສາກົນໂຕກຽວຄັ້ງທີ 39 (TIFF 2026). ບູດວາງສະແດງຮູບເງົາຫວຽດນາມຕັ້ງຢູ່ຕຳແໜ່ງເລກທີ 2-01, ກາຍເປັນສະຖານທີ່ພົບປະ ແລະ ແລກປ່ຽນລະຫວ່າງຜູ້ສ້າງຮູບເງົາ, ວິສາຫະກິດຮູບເງົາຫວຽດນາມ ແລະ ຄູ່ຮ່ວມມືສາກົນ.

ໃນຖານະເປັນໜຶ່ງໃນບັນດາຕະຫຼາດເນື້ອຫາຊັ້ນນຳຂອງອາຊີ, TIFFCOM ໄດ້ເຕົ້າໂຮມບັນດາຜູ້ຜະລິດ, ໜ່ວຍງານຈັດຈຳໜ່າຍ, ນັກລົງທຶນ ແລະ ເຈົ້າຂອງລິຂະສິດຈາກຫຼາຍຕະຫຼາດ. ໃນປີ 2026, ເຫດການນີ້ມີໜ່ວຍງານວາງສະແດງ 322 ແຫ່ງ, ດຶງດູດຜູ້ເຂົ້າຮ່ວມເກືອບ 4.600 ຄົນ ຈາກ 46 ປະເທດ ແລະ ເຂດດິນແດນ.

ສືບຕໍ່ຈາກການເຂົ້າຮ່ວມຄັ້ງທຳອິດໃນປີ 2025, VFDA ໄດ້ລົງທຶນຈັດບູດວາງສະແດງໃນປີນີ້ໃຫ້ມີພື້ນທີ່ກວ້າງຂວາງ ແລະ ສວຍງາມກວ່າເກົ່າ, ມີເນື້ອໃນການຈັດສະແດງທີ່ຫຼາກຫຼາຍ ແລະ ຕັ້ງຢູ່ໃນຕຳແໜ່ງທີ່ສະດວກໃນເຂດໃຈກາງງານ, ບ່ອນທີ່ມີຫຼາຍອົງການຮູບເງົາ, ບໍລິສັດຜະລິດ ແລະ ຈັດຈຳໜ່າຍຮູບເງົາສາກົນ.

ຜ່ານຮູບພາບຂອງບັນດາຜົນງານ, ຂໍ້ມູນກ່ຽວກັບງານມະຫະກຳຮູບເງົາ ແລະ ບັນດາສະຖານທີ່ຖ່າຍທຳຮູບເງົາຢູ່ຫວຽດນາມ, ບູດວາງສະແດງໄດ້ສ້າງເງື່ອນໄຂໃຫ້ຜູ້ເຂົ້າຊົມສາມາດສຶກສາຮຽນຮູ້ ແລະ ແລກປ່ຽນໂດຍກົງກັບຜູ້ຕາງໜ້າວົງການຮູບເງົາຫວຽດນາມ ກ່ຽວກັບໂອກາດການຮ່ວມມື.

ພາບລວມຂອງບູດວາງສະແດງຮູບເງົາຫວຽດນາມ ທີ່ຕະຫຼາດເນື້ອຫາ TIFFCOM 2026.

ພິທີເປີດບູດວາງສະແດງໂດຍມີ ທ່ານນາງ ປອ. ໂງ ເຟືອງ ລານ, ປະທານ VFDA ເປັນປະທານ, ພ້ອມດ້ວຍການເຂົ້າຮ່ວມຂອງທ່ານ ຟ້າມ ກວາງ ຮຽວ, ເອກອັກຄະລັດຖະທູດວິສາມັນຜູ້ມີອຳນາດເຕັມຫວຽດນາມປະຈຳຍີ່ປຸ່ນ; ທ່ານ ດ່າວ ຈ້ອງ ດຶກ, ກຳມະການຄະນະປະຈຳພັກນະຄອນ, ຮອງປະທານຄະນະກຳມະການປະຊາຊົນນະຄອນຫາຍຟ່ອງ; ທ່ານນາງ ຫງວຽນ ທິ ແຮ້ງ, ກຳມະການຄະນະປະຈຳພັກແຂວງ, ຫົວໜ້າຄະນະໂຄສະນາສຶກສາອົບຮົມພັກແຂວງກວ໋າງນິງ; ພ້ອມດ້ວຍຜູ້ຕາງໜ້າບັນດາວິສາຫະກິດຮູບເງົາ, ຜູ້ສ້າງຮູບເງົາ ແລະ ຄູ່ຮ່ວມມືສາກົນ.

ກ່າວຄຳປາໄສໃນເຫດການ, ທ່ານນາງ ປອ. ໂງ ເຟືອງ ລານ ໄດ້ສະແດງຄວາມປາຖະໜາໃຫ້ວົງການຮູບເງົາຫວຽດນາມ ແລະ ພາບລັກຂອງປະເທດຫວຽດນາມ ໄດ້ຮັບການແນະນຳຢ່າງສະໝ່ຳສະເໝີໃນທຸກໆປີ ທີ່ງານມະຫະກຳຮູບເງົາສາກົນໂຕກຽວ ແລະ TIFFCOM.

ເພື່ອບັນລຸເປົ້າໝາຍນີ້, ສະມາຄົມໄດ້ເປັນເຈົ້າການເຊື່ອມຕໍ່ບັນດາທ້ອງຖິ່ນ, ວິສາຫະກິດ ແລະ ໜ່ວຍງານຮ່ວມສະໜັບສະໜູນ ເພື່ອລະດົມຊັບພະຍາກອນມາຮັກສາກິດຈະກຳສົ່ງເສີມຮູບເງົາ.

ຕາມທ່ານນາງ ໂງ ເຟືອງ ລານ ແລ້ວ, ບູດວາງສະແດງບໍ່ພຽງແຕ່ໂຄສະນາພາບລັກຂອງປະເທດເທົ່ານັ້ນ ແຕ່ຍັງມຸ່ງໄປສູ່ການເປັນ “ເຮືອນຮ່ວມ” ຂອງວົງການຮູບເງົາຫວຽດນາມຢູ່ໂຕກຽວ. ຢູ່ທີ່ນີ້, ບັນດາຜູ້ສ້າງຮູບເງົາ ແລະ ຜູ້ຜະລິດສາມາດແນະນຳຜົນງານ, ພົບປະຄູ່ຮ່ວມມື ແລະ ຊອກຫາໂອກາດການຮ່ວມມືສາກົນ.

ທ່ານນາງ ປອ. ໂງ ເຟືອງ ລານ, ປະທານ VFDA ແລກປ່ຽນກັບທ່ານນາງ Kaori Ikeda, ຜູ້ອຳນວຍການບໍລິຫານ TIFFCOM, ກ່ຽວກັບວຽກງານໂຄສະນາສົ່ງເສີມຮູບເງົາຫວຽດນາມ ແລະ ໂອກາດໃນການເຊື່ອມຕໍ່ກັບບັນດາຄູ່ຮ່ວມມືສາກົນ.

ສິ່ງສຳຄັນແມ່ນ ການຮັກສາບູດວາງສະແດງປະຈຳປີບໍ່ໄດ້ຂຶ້ນກັບວ່າຈະມີ ຫຼື ບໍ່ມີຜົນງານຮູບເງົາຫວຽດນາມຖືກຄັດເລືອກເຂົ້າສາຍໃນງານມະຫະກຳແຕ່ລະຄັ້ງ. ການປາກົດຕົວຢ່າງສະໝ່ຳສະເໝີຢູ່ TIFFCOM ປະກອບສ່ວນເພີ່ມການຮັບຮູ້ຕໍ່ວົງການຮູບເງົາຫວຽດນາມໃນເຄືອຂ່າຍວິຊາຊີບສາກົນ, ພ້ອມທັງຂະຫຍາຍໂອກາດເຂົ້າເຖິງຕະຫຼາດໃຫ້ແກ່ຜູ້ສ້າງຮູບເງົາຫຼາຍຮຸ່ນຄົນ.

ນອກຈາກກິດຈະກຳໂຄສະນາແລ້ວ, ບູດວາງສະແດງຍັງເປັນສະຖານທີ່ແນະນຳບັນດາໂຄງການຮູບເງົາໃໝ່ຂອງຫວຽດນາມ. ໃນນັ້ນມີຮູບເງົາກາຕູນ “Lớp Học Mật Ngữ: Cuộc Đua Sao Chổi” (ຫ້ອງຮຽນລະຫັດລັບ: ການແຂ່ງຂັນດາວຫາງ) ທີ່ແນະນຳໂດຍຜູ້ຜະລິດ ເລືອງ ມິງ ຮັ່ງ, ກຳກັບໂດຍ ຫງວຽນ ຟີ ຟີ ແອັງ, ຮ່ວມຜະລິດກັບ Dee Dee Studio ແລະ ມີ CGV ເປັນຄູ່ຮ່ວມມືຍຸດທະສາດດ້ານການຈັດຈຳໜ່າຍ.

ຊຸກຍູ້ການຮ່ວມມືຜະລິດຮູບເງົາ ແລະ ໂຄສະນາສະຖານທີ່ຖ່າຍທຳ

ໃນມື້ເປີດບູດວາງສະແດງ, ບູດຮູບເງົາຫວຽດນາມໄດ້ຕ້ອນຮັບຜູ້ຜະລິດ, ວິສາຫະກິດດ້ານເນື້ອຫາ ແລະ ໜ່ວຍງານຈັດຈຳໜ່າຍຈຳນວນຫຼາຍ ຈາກຍີ່ປຸ່ນ ແລະ ຕະຫຼາດສາກົນອື່ນໆ.

ຄູ່ຮ່ວມມືຈຳນວນໜຶ່ງທີ່ໄດ້ມາສຶກສາ ແລະ ແລກປ່ຽນ ລວມມີ Gateway Entertainment, NTT DOCOMO Studio & Live (ຍີ່ປຸ່ນ) ແລະ TVB Limited (ຮົງກົງ).

ທີ່ TIFFCOM 2026, VFDA ສຸມໃສ່ແນະນຳ 3 ເນື້ອໃນຕົ້ນຕໍ ປະກອບມີ ງານມະຫະກຳຮູບເງົາອາຊີດ່ານັງຄັ້ງທີ V (DANAFF V), ຊຸດດັດຊະນີດຶງດູດຄະນະຖ່າຍທຳຮູບເງົາ (Production Attraction Index - PAI) ແລະ ລະບົບຮູບພາບສະຖານທີ່ຖ່າຍທຳຢູ່ກວ໋າງນິງ, ດ່ານັງ ແລະ ຫາຍຟ່ອງ.

ການເຂົ້າຮ່ວມໂດຍກົງຂອງຜູ້ນຳບັນດາທ້ອງຖິ່ນ ໄດ້ຊ່ວຍໃຫ້ການແນະນຳທິວທັດທຳມະຊາດເຊື່ອມໂຍງກັບການແລກປ່ຽນກ່ຽວກັບເງື່ອນໄຂການຈັດຕັ້ງຜະລິດຮູບເງົາຢູ່ຫວຽດນາມ. ຂະນະດຽວກັນ, DANAFF ມີບົດບາດເປັນຈຸດເຊື່ອມຕໍ່ທາງວິຊາຊີບ, ສ້າງເງື່ອນໄຂໃຫ້ຜູ້ສ້າງຮູບເງົາພາຍໃນປະເທດຮັກສາ ແລະ ຂະຫຍາຍສາຍພົວພັນກັບຄູ່ຮ່ວມມືສາກົນ.

ຄຽງຄູ່ກັບກິດຈະກຳຢູ່ບູດວາງສະແດງ, VFDA ໄດ້ຈັດກອງສຳມະນາ “ຮູບເງົາຫວຽດນາມໃນອາຊີທີ່ເຊື່ອມໂຍງກັນ: ເອກະລັກທາງວັດທະນະທຳ, ຄວາມຄິດສ້າງສັນ ແລະ ການຮ່ວມມືສາກົນ” ໃນວັນທີ 29/10, ໂດຍມີບັນດາຜູ້ສ້າງຮູບເງົາ, ຜູ້ຜະລິດ ແລະ ຊ່ຽວຊານຈາກຫວຽດນາມ, ຍີ່ປຸ່ນ ແລະ ຫຼາຍປະເທດເຂົ້າຮ່ວມ.

ກອງສຳມະນາສຸມໃສ່ແລກປ່ຽນກ່ຽວກັບຄວາມສາມາດໃນການອະນຸລັກ ແລະ ສົ່ງເສີມເອກະລັກທາງວັດທະນະທຳໃນຜົນງານຮູບເງົາ, ພ້ອມທັງຊຸກຍູ້ການຮ່ວມມືພັດທະນາໂຄງການ, ການຮ່ວມຜະລິດ ແລະ ການເຂົ້າເຖິງຕະຫຼາດສາກົນ.

ພາຍຫຼັງບັນດາກິດຈະກຳສົ່ງເສີມຢູ່ງານມະຫະກຳຮູບເງົາສາກົນປູຊານ, ການທີ່ VFDA ສືບຕໍ່ເຂົ້າຮ່ວມ TIFFCOM ເປັນປີທີສອງ ໄດ້ສະແດງໃຫ້ເຫັນທິດທາງໃນການຮັກສາການປາກົດຕົວຂອງວົງການຮູບເງົາຫວຽດນາມຢູ່ບັນດາເວທີສາກົນ, ບ່ອນທີ່ຜູ້ຜະລິດ, ໜ່ວຍງານຈັດຈຳໜ່າຍ ແລະ ຄູ່ຮ່ວມມືຊອກຫາໂອກາດການຮ່ວມມື.

ເຖິງແມ່ນວ່າບັນດາການເຊື່ອມຕໍ່ຢູ່ໃນເຫດການເຫຼົ່ານີ້ອາດຈະບໍ່ທັນນຳມາເຊິ່ງຜົນສຳເລັດໃນທັນທີ, ແຕ່ນີ້ແມ່ນພື້ນຖານໃຫ້ຜູ້ສ້າງຮູບເງົາຫວຽດນາມຄ່ອຍໆເຂົ້າເຖິງຕະຫຼາດໂລກ, ພ້ອມທັງດຶງດູດຄູ່ຮ່ວມມືສາກົນໃຫ້ມາຫວຽດນາມເພື່ອດຳເນີນບັນດາໂຄງການທີ່ເປັນຮູບປະທຳ.

ເປັນເຈົ້າການລະດົມຊັບພະຍາກອນເພື່ອສົ່ງເສີມຮູບເງົາໃນລະດັບສາກົນ

ຈຸດໜຶ່ງທີ່ໜ້າສົນໃຈໃນການເຄື່ອນໄຫວຂອງ VFDA ແມ່ນການເປັນເຈົ້າການ ແລະ ເພິ່ງພາຕົນເອງໃນການຈັດບັນດາໂຄງການໂຄສະນາຮູບເງົາ ແລະ ແນະນຳພາບລັກຂອງປະເທດ ແລະ ປະຊາຊົນຫວຽດນາມ ຢູ່ບັນດາເຫດການສາກົນທີ່ມີຊື່ສຽງ.

ໃນນັ້ນມີ ງານມະຫະກຳຮູບເງົາສາກົນປູຊານ (BIFF), ຕະຫຼາດຮູບເງົາ ແລະ ເນື້ອຫາອາຊີ (ACFM), ງານມະຫະກຳຮູບເງົາສາກົນໂຕກຽວ (TIFF) ແລະ ຕະຫຼາດຮູບເງົາ TIFFCOM.

ບັນດາໂຄງການທີ່ສະມາຄົມລິເລີ່ມ ແລະ ດຳເນີນການ ປະກອບມີ ການເປີດບູດວາງສະແດງຮູບເງົາຫວຽດນາມ, ການຈັດງານ Vietnam Night, ກອງສຳມະນາສະເພາະຂະແໜງການ ແລະ ບັນດາກິດຈະກຳເຊື່ອມຕໍ່ ແລະ ຮ່ວມມືສາກົນ.

ຜ່ານບັນດາໂຄງການເຫຼົ່ານີ້, ຜູ້ສ້າງຮູບເງົາຫວຽດນາມມີພື້ນທີ່ເພີ່ມຂຶ້ນໃນການແນະນຳໂຄງການ, ແລກປ່ຽນໂດຍກົງກັບຄູ່ຮ່ວມມື, ຊອກຫາຄວາມເປັນໄປໄດ້ໃນການຮ່ວມມືຜະລິດ, ຈັດຈຳໜ່າຍ ແລະ ຂະຫຍາຍຕະຫຼາດ.

ໃນຖານະເປັນອົງການສັງຄົມ - ວິຊາຊີບທີ່ດຳເນີນງານຢ່າງເປັນເອກະລາດ, VFDA ບໍ່ໄດ້ນຳໃຊ້ງົບປະມານຂອງລັດເພື່ອດຳເນີນບັນດາກິດຈະກຳສົ່ງເສີມທີ່ກ່າວມາຂ້າງເທິງ. ແທນທີ່ຈະເຮັດເຊັ່ນນັ້ນ, ສະມາຄົມໄດ້ເປັນເຈົ້າການລະດົມຊັບພະຍາກອນ, ເຊື່ອມຕໍ່ຄູ່ຮ່ວມມື ແລະ ຈັດບັນດາໂຄງການ ເພື່ອຮັກສາການປາກົດຕົວຂອງວົງການຮູບເງົາຫວຽດນາມຢູ່ບັນດາເວທີສາກົນ.

ບັນດາກິດຈະກຳຂອງ VFDA ຍັງໄດ້ຮັບການຊ່ວຍເຫຼືອຢ່າງຫ້າວຫັນຈາກບັນດາອົງການຕາງໜ້າທາງການທູດຂອງຫວຽດນາມຢູ່ຕ່າງປະເທດ.

ພ້ອມກັນນັ້ນ ຍັງມີການເຂົ້າຮ່ວມຂອງວິສາຫະກິດຜະລິດຮູບເງົາພາຍໃນປະເທດຫຼາຍແຫ່ງທີ່ມີຊື່ສຽງ ແລະ ເປັນສະມາຊິກຂອງສະມາຄົມ, ບັນດາຜູ້ຜະລິດ, ຊ່ຽວຊານ ແລະ ຄູ່ຮ່ວມມືດ້ານຮູບເງົາຂອງຫວຽດນາມ ແລະ ສາກົນ.

ຜ່ານການຮັກສາບັນດາກິດຈະກຳສົ່ງເສີມ, ໂຄສະນາ ແລະ ເຊື່ອມຕໍ່ທາງວິຊາຊີບ, VFDA ໄດ້ຄ່ອຍໆສົ່ງເສີມບົດບາດຂອງອົງການສັງຄົມ - ວິຊາຊີບ ໃນການນຳພາວົງການຮູບເງົາຫວຽດນາມເຂົ້າເຖິງຕະຫຼາດໂລກ, ຂະຫຍາຍເຄືອຂ່າຍການຮ່ວມມືສາກົນ, ໂຄສະນາພາບລັກຂອງປະເທດ ແລະ ສ້າງໂອກາດການພັດທະນາເພີ່ມຂຶ້ນໃຫ້ແກ່ວິສາຫະກິດ ແລະ ຜູ້ສ້າງຮູບເງົາຫວຽດນາມ.

ເພີ່ມທະວີການເຊື່ອມໂຍງ ແລະ ຊ່ວຍເຫຼືອແມ່ຍິງ ແລະ ເດັກນ້ອຍຫວຽດນາມຢູ່ຍີ່ປຸ່ນ ຍສໝ - ວັນທີ 22/10, ທີ່ໂອຊາກາ (ຍີ່ປຸ່ນ), ທ່ານ ຫງວຽນ ເຈື່ອງ ເຊີນ, ກົງສຸນໃຫຍ່ຫວຽດນາມ ໄດ້ຕ້ອນຮັບຄະນະຜູ້ແທນສູນຊ່ວຍເຫຼືອແມ່ຍິງເພື່ອການພັດທະນາ, ແລກປ່ຽນບັນດາມາດຕະການເພື່ອເພີ່ມທະວີການປະສານສົມທົບໃນການປົກປ້ອງແມ່ຍິງ ແລະ ເດັກນ້ອຍຫວຽດນາມ, ປ້ອງກັນ ແລະ ຕ້ານການຄ້າມະນຸດ ແລະ ຊຸກຍູ້ການຍົກຍ້າຍຖິ່ນຖານຢ່າງປອດໄພ.

ຊາວໜຸ່ມຫວຽດນາມເຊື່ອມຕໍ່ວັດທະນະທຳຫວຽດນາມ - ຍີ່ປຸ່ນ ຜ່ານດົນຕີ ຍສໝ - ວັນທີ 24/10 ຢູ່ຮ່າໂນ້ຍ, ການແຂ່ງຂັນຮອບຊິງຊະນະເລີດຂອງການປະກວດຮ້ອງເພງພາສາຍີ່ປຸ່ນ ສຳລັບນັກຮຽນ ແລະ ນັກສຶກສາ ຄັ້ງທີ 2 ໄດ້ຈັດຂຶ້ນ ໂດຍມີ 19 ລາຍການສະແດງທີ່ຄັດເລືອກຈາກປະມານ 100 ຜົນງານທີ່ສົ່ງເຂົ້າປະກວດຈາກທົ່ວປະເທດ.