ນະຄອນໂຮ່ຈີມິນ ຈັດພິທີໄວ້ອາໄລ ແລະ ຝັງອັດຖິວິລະຊົນທະຫານເສຍສະຫຼະ 731 ຊຸດ

ກິດຈະກຳນີ້ສະແດງເຖິງຄວາມຮູ້ບຸນຄຸນຢ່າງເລິກເຊິ່ງຂອງພັກ, ລັດ, ກອງທັບ ແລະ ປະຊາຊົນ ຕໍ່ບັນດາວິລະຊົນທະຫານເສຍສະຫຼະ ທີ່ໄດ້ອຸທິດຊີວິດເພື່ອພາລະກິດປົດປ່ອຍຊາດ ແລະ ທ້ອນໂຮມປະເທດຊາດ.

ເຂົ້າຮ່ວມພິທີມີບັນດາສະຫາຍອະດີດກຳມະການກົມການເມືອງ ປະກອບມີ: ທ່ານ ຫງວຽນ ມິງ ຈຽດ, ອະດີດປະທານປະເທດ; ທ່ານ ເຈືອງ ເຕິນ ຊາງ, ອະດີດປະທານປະເທດ; ທ່ານ ຫງວຽນ ເຕິນ ຢຸງ, ອະດີດນາຍົກລັດຖະມົນຕີ; ທ່ານນາງ ຫງວຽນ ທິ ກິມ ເງິນ, ອະດີດປະທານສະພາແຫ່ງຊາດ ແລະ ທ່ານ ເລ ຮົ່ງ ແອັງ, ອະດີດຜູ້ປະຈຳການຄະນະເລຂາທິການສູນກາງພັກ.

ບັນດາອະດີດນັກຮົບສົ່ງອັດຖິຂອງບັນດາວິລະຊົນທະຫານເສຍສະຫຼະ ໄປສູ່ບ່ອນພັກຜ່ອນອັນສະຫງົບສຸດທ້າຍ.

ພ້ອມກັນນັ້ນ ຍັງມີສະຫາຍ ພົນເອກ ຫງວຽນ ຈ້ອງ ເຫງັຍ, ກຳມະການກົມການເມືອງ, ເລຂາທິການສູນກາງພັກ, ຫົວໜ້າກົມໃຫຍ່ການເມືອງກອງທັບປະຊາຊົນຫວຽດນາມ; ສະຫາຍ ເຈິ່ນ ລືວ ກວາງ, ກຳມະການກົມການເມືອງ, ເລຂາຄະນະພັກນະຄອນໂຮ່ຈີມິນ; ສະຫາຍນາງ ຟ້າມ ທິ ແທງ ຈ່າ, ເລຂາທິການສູນກາງພັກ, ຮອງນາຍົກລັດຖະມົນຕີ, ຫົວໜ້າຄະນະຊີ້ນຳແຫ່ງຊາດກ່ຽວກັບການຄົ້ນຫາ, ເກັບກູ້ ແລະ ກຳນົດຕົວຕົນອັດຖິວິລະຊົນທະຫານເສຍສະຫຼະ.

ພິທີຍັງມີການເຂົ້າຮ່ວມຂອງບັນດາສະຫາຍອະດີດການນຳພັກ, ລັດ, ແນວໂຮມປິຕຸພູມຫວຽດນາມ; ອະດີດກຳມະການກົມການເມືອງ, ອະດີດກຳມະການຄະນະເລຂາທິການ; ບັນດາສະຫາຍກຳມະການ ແລະ ອະດີດກຳມະການສູນກາງພັກ; ການນຳ ແລະ ອະດີດການນຳບັນດາຄະນະ, ກະຊວງ, ຂະແໜງການ ແລະ ອົງການສູນກາງ; ຜູ້ຕາງໜ້າບັນດາໜ່ວຍກຳລັງປະກອບອາວຸດ ແລະ ປະຊາຊົນນະຄອນໂຮ່ຈີມິນຈຳນວນຫຼວງຫຼາຍ.

ກ່ອນຈະດຳເນີນພິທີເຄົາລົບ, ໄວ້ອາໄລ ແລະ ຝັງອັດຖິ, ທ່ານ ເລ ມິງ ຮຶງ, ນາຍົກລັດຖະມົນຕີ ໄດ້ເປັນປະທານພິທີຖວາຍດອກໄມ້ ແລະ ຈູດທູບລະນຶກເຖິງອະດີດເລຂາທິການໃຫຍ່ ເຈິ່ນ ຟູ ແລະ ບັນດາວິລະຊົນທະຫານເສຍສະຫຼະ ທີ່ສວນວັດທະນະທຳ ເລ ທິ ຣຽງ.

ພາຍຫຼັງພິທີໄວ້ອາໄລ, ອັດຖິວິລະຊົນທະຫານເສຍສະຫຼະ 731 ຊຸດ ໄດ້ຖືກເຄື່ອນຍ້າຍຈາກສວນວັດທະນະທຳ ເລ ທິ ຣຽງ ໄປຍັງສຸສານວິລະຊົນທະຫານເສຍສະຫຼະນະຄອນໂຮ່ຈີມິນ ເພື່ອດຳເນີນການຝັງອັດຖິ. ຕາມແຜນການ, ຂະບວນລົດຊຸດທຳອິດຄາດວ່າຈະອອກເດີນທາງໃນເວລາ 8 ໂມງ 45 ນາທີ; ການເຄື່ອນຍ້າຍຊຸດຕໍ່ໄປຈະສຳເລັດພາຍໃນວັນທີ 14/10.

ເສັ້ນທາງເຄື່ອນຍ້າຍອັດຖິບັນດາວິລະຊົນທະຫານເສຍສະຫຼະໄປສູ່ບ່ອນພັກຜ່ອນອັນສະຫງົບ ຈະຜ່ານບັນດາເສັ້ນທາງດັ່ງນີ້: ສວນວັດທະນະທຳ ເລ ທິ ຣຽງ - ເຈື່ອງ ເຊີນ - ກາກ ມ້າງ ທ້າງ ຕາມ - ວົງວຽນ ເຢິນ ຈູ - ກາກ ມ້າງ ທ້າງ ຕາມ - ດ້ຽນ ບຽນ ຟູ - ຂົວໄຊງ່ອນ - ຫວໍ ຫງວຽນ ຢາບ - ທາງດ່ວນຮ່າໂນ້ຍ, ກ່ອນຈະໄປຮອດສຸສານວິລະຊົນທະຫານເສຍສະຫຼະນະຄອນໂຮ່ຈີມິນ.

ພິທີໄວ້ອາໄລ ແລະ ຝັງອັດຖິວິລະຊົນທະຫານເສຍສະຫຼະ 731 ຊຸດ ແມ່ນກິດຈະກຳລະນຶກເຖິງ ແລະ ເຊີດຊູການເສຍສະຫຼະຂອງບັນດາຜູ້ທີ່ໄດ້ພີລະອາດຫານລົ້ມລົງເພື່ອເອກະລາດ ແລະ ເສລີພາບຂອງປິຕຸພູມ, ພ້ອມທັງສະແດງເຖິງຄຸນທຳ “ກິນເຂົ້າຄິດຮອດຄຸນນາ ກິນປາຄິດຮອດຄຸນນ້ຳ” ແລະ ຄວາມຮັບຜິດຊອບໃນການຮູ້ບຸນຄຸນຂອງບັນດາຄົນຮຸ່ນປັດຈຸບັນ.

ຂະບວນການ 500 ວັນ-ຄືນ ຄົ້ນຫາ ແລະ ຮວບຮວມອັດຖິວິລະຊົນໄດ້ 2.803 ຊຸດ ຍສໝ - ຮອດວັນທີ 23/9/2026, ບັນດາກຳລັງທີ່ເຂົ້າຮ່ວມຂະບວນການ 500 ວັນ-ຄືນ ໄດ້ຄົ້ນຫາ ແລະ ຮວບຮວມອັດຖິວິລະຊົນ 2.803 ຊຸດ ຢູ່ພາຍໃນປະເທດ, ລາວ ແລະ ກຳປູເຈຍ; ພ້ອມທັງເກັບຕົວຢ່າງຢູ່ຫຼຸມຝັງສົບວິລະຊົນ 199.908 ຫຼຸມ, ບັນລຸ 94,78% ຂອງຄວາມຄືບໜ້າ.

ຫາຍຟ່ອງ ຜັນຂະຫຍາຍການຊອກຫາອັດຖິນັກຮົບຜູ້ເສຍສະລະຊີວິດເພື່ອຊາດ ຢູ່ເຂດ ໝາຈີ່ ຍສໝ - ຕອນເຊົ້າວັນທີ 26/9 ທີ່ເຂດ ໝາຈີ່, ບ້ານ ມາຍເຊີນ, ຕາແສງ ຫວິງບ໋າວ, ນະຄອນ ຫາຍຟ່ອງ ໄດ້ຈັດພິທີຖະຫວາຍດອກໄມ້, ຖະຫວາຍທູບທຽນ ແລະ ຜັນຂະຫຍາຍວຽກງານຊອກຫາ, ເຕົ້າໂຮມອັດຖິນັກຮົບຜູ້ເສຍສະລະຊີວິດເພື່ອຊາດ, ສູ້ຊົນສຳເລັດກ່ອນວັນທີ 10/10/2026 ໃນຂອບ “ບັ້ນຮົບ 500 ທັງເວັນທັງຄືນ ຊຸກຍູ້ການຊອກຫາ, ເຕົ້າໂຮມ ແລະ ກຳນົດອັດຕະລັກອັດຖິນັກຮົບຜູ້ເສຍສະລະຊີວິດເພື່ອຊາດ”.