ຂຸດຄົ້ນ ແລະ ເກັບກູ້ອັດຖິວິລະຊົນເພີ່ມອີກ 4 ຊຸດ ຢູ່ສວນສາທາລະນະ ເລ ທິ ຣຽງ

ໃນວັນທີ 27/10, ກຳລັງພົນທີ່ປະຕິບັດໜ້າທີ່ໄດ້ຂຸດ ແລະ ຈັດການດິນຫຼາຍກວ່າ 620 ແມັດກ້ອນ ເພື່ອຂະຫຍາຍພື້ນທີ່ຄົ້ນຫາ. ກອງບັນຊາການທະຫານນະຄອນໂຮ່ຈີມິນ ໄດ້ລະດົມລົດຂຸດ 3 ຄັນ, ລົດດັມ 1 ຄັນ ແລະ ລົດບັນທຸກຂະໜາດ 3,5 ໂຕນ 2 ຄັນ ເພື່ອຮັບໃຊ້ການຂຸດ ແລະ ຂົນຍ້າຍດິນ.

ພະນັກງານ ແລະ ທະຫານ ໜ່ວຍເກັບກູ້ອັດຖິວິລະຊົນ ສັງກັດກອງບັນຊາການທະຫານນະຄອນໂຮ່ຈີມິນ ດຳເນີນການຄົ້ນຫາ ແລະ ເກັບກູ້ອັດຖິວິລະຊົນຢູ່ເຂດ B, ສວນສາທາລະນະ ເລ ທິ ຣຽງ.

ຜ່ານການຄົ້ນຫາ, ກຳລັງເຈົ້າໜ້າທີ່ໄດ້ຄົ້ນພົບ ແລະ ເກັບກູ້ອັດຖິວິລະຊົນເພີ່ມອີກ 4 ຊຸດ. ດັ່ງນັ້ນ, ໃນການຄົ້ນຫາຮອບທີສອງ ນັບແຕ່ວັນທີ 15/10 ຫາ 27/10, ໄດ້ເກັບກູ້ອັດຖິວິລະຊົນຈຳນວນ 115 ຊຸດ ຈາກບ່ອນຝັງສົບແຍກຕ່າງຫາກ, ໃນນັ້ນມີ 26 ຊຸດທີ່ພົບວັດຖຸຂອງຜູ້ເສຍຊີວິດຢູ່ນຳ.

ລວມຍອດນັບແຕ່ວັນທີ 23/6 ຫາສິ້ນສຸດວັນທີ 27/10, ບັນດາກຳລັງໄດ້ຄົ້ນຫາ ແລະ ເກັບກູ້ ອັດຖິວິລະຊົນ 846 ຊຸດ, ໃນນັ້ນມີ 333 ຊຸດທີ່ພົບວັດຖຸຂອງຜູ້ເສຍຊີວິດຢູ່ນຳ.

ໃນຈຳນວນອັດຖິທີ່ຄົ້ນພົບທັງໝົດ, ມີ 813 ຊຸດທີ່ເກັບກູ້ຈາກບ່ອນຝັງສົບແຍກຕ່າງຫາກ ແລະ ອັດຖິ 33 ຊຸດ ຢູ່ 8 ຈຸດຝັງສົບລວມໝູ່. ໃນນັ້ນ, ເຂດ A ມີຈຸດຝັງສົບລວມໝູ່ 2 ຈຸດ ແລະ ເຂດ B ມີ 6 ຈຸດ.

ກ່ອນໜ້ານີ້, ໃນການຄົ້ນຫາຮອບທຳອິດ, ກຳລັງເຈົ້າໜ້າທີ່ໄດ້ເກັບກູ້ອັດຖິວິລະຊົນ 731 ຊຸດ ແລະ ຈັດພິທີໄວ້ອາໄລ, ພິທີຝັງອັດຖິຕາມລະບຽບການ.

ປັດຈຸບັນ, ວຽກງານຄົ້ນຫາ ແລະ ເກັບກູ້ອັດຖິວິລະຊົນຢູ່ສວນສາທາລະນະ ເລ ທິ ຣຽງ ຍັງຄົງສືບຕໍ່ດຳເນີນຢູ່, ສະແດງເຖິງຄວາມຮັບຜິດຊອບ ແລະ ຄວາມຮູ້ບຸນຄຸນຕໍ່ບັນດາຜູ້ທີ່ໄດ້ເສຍສະຫຼະຊີວິດໃນພາລະກິດຕໍ່ສູ້ເພື່ອປົດປ່ອຍຊາດ, ສ້າງສາ ແລະ ປົກປັກຮັກສາປະເທດຊາດ.

ນະຄອນໂຮ່ຈີມິນ ຈັດພິທີໄວ້ອາໄລ ແລະ ຝັງອັດຖິວິລະຊົນທະຫານເສຍສະຫຼະ 731 ຊຸດ ຍສໝ - ຕອນເຊົ້າວັນທີ 14/10, ທີ່ສວນວັດທະນະທຳ ເລ ທິ ຣຽງ, ຄຸ້ມຮວ່າຮຶງ, ນະຄອນໂຮ່ຈີມິນ, ຄະນະພັກນະຄອນ, ສະພາປະຊາຊົນ, ຄະນະກຳມະການປະຊາຊົນ ແລະ ຄະນະກຳມະການແນວໂຮມປິຕຸພູມຫວຽດນາມ ນະຄອນໂຮ່ຈີມິນ ໄດ້ປະສານສົມທົບກັບຄະນະພັກ ແລະ ກອງບັນຊາການເຂດທະຫານທີ 7 ຈັດພິທີເຄົາລົບ, ໄວ້ອາໄລ ແລະ ຝັງອັດຖິວິລະຊົນທະຫານເສຍສະຫຼະ 731 ຊຸດ ທີ່ໄດ້ຄົ້ນຫາ ແລະ ເກັບກູ້ຢູ່ສະຖານທີ່ແຫ່ງນີ້ ຢ່າງສົມກຽດ. ທ່ານ ເລ ມິງ ຮຶງ, ນາຍົກລັດຖະມົນຕີ ພ້ອມດ້ວຍບັນດາການນຳ ແລະ ອະດີດການນຳພັກ, ລັດ ຫຼາຍທ່ານ ໄດ້ເຂົ້າຮ່ວມພິທີ.

ຄົ້ນພົບ ແລະ ເກັບກູ້ອັດຖິທະຫານເສຍສະຫຼະເພີ່ມອີກ 33 ຊຸດ ຢູ່ສວນສາທາລະນະ ເລ ທິ ຣຽງ ຍສໝ - ໃນລະຫວ່າງວັນທີ 15 - 17/10, ໜ່ວຍເກັບກູ້ອັດຖິທະຫານເສຍສະຫຼະ ສັງກັດກອງບັນຊາການທະຫານນະຄອນໂຮ່ຈີມິນ ຮ່ວມກັບບັນດາກຳລັງງານທີ່ກ່ຽວຂ້ອງ ໄດ້ຄົ້ນຫາ, ຄົ້ນພົບ ແລະ ເກັບກູ້ອັດຖິທະຫານເສຍສະຫຼະທີ່ຝັງແຍກກັນເປັນລາຍບຸກຄົນເພີ່ມອີກ 33 ຊຸດ ຢູ່ສວນສາທາລະນະ ເລ ທິ ຣຽງ, ໃນນັ້ນມີ 11 ຊຸດທີ່ພົບພ້ອມກັບວັດຖຸທີ່ຫຼົງເຫຼືອຢູ່.