ຂະຫຍາຍຊ່ອງທາງການຈຳໜ່າຍສິນຄ້າສາກົນ ໃຫ້ແກ່ສິນຄ້າຫວຽດນາມ

ຢູ່ທີ່ວາລະເຮັດວຽກດັ່ງກ່າວ, ທ່ານ Paul ເລ ໃຫ້ຮູ້ວ່າ Central Retail ພວມປະສານງານກຽມຈັດຕັ້ງ ສັບປະດາສິນຄ້າຫວຽດນາມ ຢູ່ ໄທ ຄັ້ງທີ 8, ເຊິ່ງຄາດວ່າມີຂຶ້ນໃນກາງເດືອນກັນຍາ ປີ 2026 ຢູ່ທີ່ ສູນການຄ້າ CentralWorld, ບາງກອກ.

ໃນຖານະເປັນການເຄື່ອນໄຫວສົ່ງເສີມການຄ້າທີ່ຈັດຂຶ້ນເປັນປະຈຳປີ, ສັບປະດາສິນຄ້າຫວຽດນາມ ຢູ່ ໄທ ມຸ່ງໄປສູ່ການແນະນຳພາບພົດ, ເຄື່ອງໝາຍການຄ້າ ແລະ ຄຸນນະພາບຜະລິດຕະພັນຫວຽດນາມ ເຖິງຜູ້ບໍລິໂພກປະເທດເຈົ້າພາບ. ໂຄງການທັງສ້າງໂອກາດໃຫ້ບັນດາວິສາຫະກິດຫວຽດນາມ ເຂົ້າເຖິງຕະຫຼາດ, ເຊື່ອມໂຍງກັບບັນດາຄູ່ຮ່ວມມື ແລະ ຂະຫຍາຍລະບົບຈຳໜ່າຍຢູ່ ໄທ ເທື່ອລະກ້າວ.

ຄຽງຂ້າງການເຄື່ອນໄຫວນີ້, Central Retail ຈະສືບຕໍ່ຮ່ວມເດີນທາງຄຽງຄູ່ກັບ ກະຊວງອຸດສາຫະກຳ ແລະ ການຄ້າ ຢູ່ທີ່ Vietnam International Sourcing 2026 (VIS 2026), ເຊິ່ງຈະຈັດຂຶ້ນຕັ້ງແຕ່ວັນທີ 3-5 ກັນຍາ ປີ 2026 ຢູ່ທີ່ ສູນງານມະຫາກຳ ແລະ ງານນິທັດສະການ ໄຊງ່ອນ (SECC), ນະຄອນໂຮ່ຈີມິນ.

ທ່ານນາງ ຟານທິຖັງ ຮອງຣັດຖະມົນຕີກະຊວງອຸດສາຫະກຳ ແລະ ການຄ້າ (ທີສອງຈາກຂວາຫາຊ້າຍ) ຕ້ອນຮັບທ່ານ Paul ເລ, ຮອງປະທານຮັບຜິດຊອບວຽກງານສົ່ງເສີມການຄ້າ ແລະ ການສົ່ງອອກ ຂອງກຸ່ມບໍລິສັດ Central Retail (ທີສອງຈາກຊ້າຍຫາຂວາ).

ໂດຍຜ່ານ VIS 2026 (Vietnam International Sourcing 2026), Central Retail ຄາດວ່າຈະເຂົ້າຮ່ວມບັນດາການເຄື່ອນໄຫວເຊື່ອມໂຍງການຄ້າ, ຊອກຫາແຫຼ່ງສະໜອງ, ໂດຍຜ່ານນັ້ນ ຊຸກຍູ້ໂອກາດໃນການນຳເອົາຜະລິດຕະພັນຂອງວິສາຫະກິດຫວຽດນາມ ເຂົ້າສູ່ລະບົບຈຳໜ່າຍຂອງກຸ່ມບໍລິສັດ ແລະ ເຂົ້າເຖິງບັນດາຕະຫຼາດສາກົນ.

ສັບປະດາສິນຄ້າຫວຽດນາມ ຢູ່ ໄທ ແລະ Vietnam International Sourcing 2026 ແມ່ນສອງການເຄື່ອນໄຫວສົ່ງເສີມການຄ້າຈຸດສຸມ ພາຍໃນຂອບເຂດການຮ່ວມມື ລະຫວ່າງ ກະຊວງອຸດສາຫະກຳ ແລະ ການຄ້າ ພ້ອມກັບ Central Retail. ບັນດາໂຄງການ ໄດ້ຮັບການຄາດຫວັງວ່າຈະປະກອບສ່ວນເພີ່ມທະວີການໂຄສະນາຜະລິດຕະພັນຫວຽດນາມ, ໜູນຊ່ວຍວິສາຫະກິດຂະຫຍາຍຕະຫຼາດສົ່ງອອກ ແລະ ເຊື່ອມໂຍງໂດຍກົງກັບບັນດານັກຈັດຊື້ສາກົນ.

ຢູ່ທີ່ວາລະເຮັດວຽກດັ່ງກ່າວ, ທ່ານ Paul ເລ ກໍໄດ້ແບ່ງປັນກ່ຽວກັບທິດທາງການພັດທະນາຂອງ Central Retail ຢູ່ທີ່ຫວຽດນາມ ດ້ວຍເປົ້າໝາຍ “ເພື່ອຫວຽດນາມ ທີ່ມັ່ງຄັ່ງຮັ່ງມີກວ່າເກົ່າ”. ຕາມນັ້ນແລ້ວ, ກຸ່ມບໍລິສັດໄດ້ກຳນົດທິດທາງສືບຕໍ່ຂະຫຍາຍການລົງທຶນ, ພັດທະນາລະບົບສູນການຄ້າ ແລະ ຊຸບເປີມາເກັດທີ່ທັນສະໄໝ ຢູ່ຫຼາຍທ້ອງຖິ່ນ.

ຄຽງຂ້າງການປະກອບສ່ວນພັດທະນາໂຄງຮ່າງພື້ນຖານການຄ້າ ແລະ ສ້າງວຽກເຮັດງານທຳເພີ່ມຕື່ມແລ້ວ, Central Retail ຈະສືບຕໍ່ໜູນຊ່ວຍຊາວນາ, ສະຫະກອນ ແລະ ວິສາຫະກິດຫວຽດນາມ ໃຫ້ນຳເອົາຜະລິດຕະພັນເຂົ້າສູ່ລະບົບຈຳໜ່າຍ, ໂດຍຜ່ານນັ້ນ ປະກອບສ່ວນຍົກສູງຄຸນຄ່າ ແລະ ຄວາມສາມາດໃນການແຂ່ງຂັນຂອງສິນຄ້າຫວຽດນາມ ຢູ່ທີ່ຕະຫຼາດພາຍໃນ ແລະ ສາກົນ.

ທ່ານນາງ ຮອງຣັດຖະມົນຕີ ຟານທິຖັງ ໄດ້ຕີຄ່າສູງຕໍ່ການຮ່ວມເດີນທາງ ແລະ ບັນດາການປະກອບສ່ວນຂອງ Central Retail ພາຍໃນຂະບວນການປະສານງານກັບ ກະຊວງອຸດສາຫະກຳ ແລະ ການຄ້າ ຜັນຂະຫຍາຍບັນດາໂຄງການສົ່ງເສີມການຄ້າ, ເຊື່ອມໂຍງການບໍລິໂພກສິນຄ້າຫວຽດນາມ ໃນໄລຍະຜ່ານມາ.

ທ່ານນາງ ຮອງຣັດຖະມົນຕີ ໄດ້ສະເໜີໃຫ້ Central Retail ສືບຕໍ່ຄົ້ນຄວ້າ, ຜັນຂະຫຍາຍບັນດາຄວາມຄິດປະດິດສ້າງໃໝ່ ແນໃສ່ເພີ່ມທະວີການໂຄສະນາ, ສ້າງເຄື່ອງໝາຍການຄ້າໃຫ້ແກ່ບັນດາມັດສິນຄ້າທີ່ມີທ່າແຮງຂອງຫວຽດນາມ ຢູ່ທີ່ຕະຫຼາດໂລກ.

ທ່ານນາງ ຮອງຣັດຖະມົນຕີ ຟານທິຖັງ ໄດ້ສະແດງຄວາມເຊື່ອໝັ້ນວ່າ ກະຊວງອຸດສາຫະກຳ ແລະ ການຄ້າ ພ້ອມກັບ Central Retail ຈະສືບຕໍ່ປະສານງານຢ່າງແໜ້ນແຟ້ນ, ຈັດຕັ້ງ ສັບປະດາສິນຄ້າຫວຽດນາມ ຢູ່ ໄທ ຄັ້ງທີ 8 ແລະ Vietnam International Sourcing 2026 ໃຫ້ປະສົບຜົນສຳເລັດ. ໂດຍຜ່ານນັ້ນ, ສອງຝ່າຍຈະປະກອບສ່ວນຊຸກຍູ້ການສົ່ງອອກ, ຍົກສູງທີ່ຕັ້ງຂອງສິນຄ້າຫວຽດນາມ ຢູ່ທີ່ຕະຫຼາດສາກົນ, ທັງເພີ່ມທະວີການເຊື່ອມໂຍງທາງດ້ານເສດຖະກິດ, ການຄ້າ ລະຫວ່າງ ຫວຽດນາມ ແລະ ບັນດາຄູ່ຮ່ວມມືຕ່າງປະເທດ.

ເສີມຂະຫຍາຍແຫຼ່ງພະລັງຂອງຊຸມຊົນຄົນຫວຽດນາມ ຢູ່ ສ.ເກົາຫຼີ ຍສໝ - ຊຸມຊົນຄົນຫວຽດນາມ ຢູ່ ສ.ເກົາຫຼີ ໃນປັດຈຸບັນ ມີຊາວຫວຽດນາມຫຼາຍກວ່າ 350.000 ຄົນ ພວມດຳລົງຊີວິດ, ເຮັດວຽກ ແລະ ສຶກສາຮໍ່າຮຽນຢູ່ແຫ່ງນີ້, ພາຍໃນນັ້ນ ມີແມ່ຍິງຫວຽດນາມ (ເຈົ້າສາວຫວຽດ) ເກືອບ 100.000 ຄົນ ຢູ່ໃນບັນດາຄອບຄົວຫຼາຍວັດທະນະທຳ ແລະ ມີນັກສຶກສາຕ່າງປະເທດຫຼາຍກວ່າ 100.000 ຄົນ.

ຫວຽດນາມ ມຸ່ງໄປສູ່ Top 3 ອາຊຽນ ກ່ຽວກັບກຳລັງແຮງອ່ອນ ຍສໝ - ທ່ານຮອງນາຍົກລັດຖະມົນຕີ ຟ້າມທິແທັງຈ່າ ໄດ້ລົງນາມໃນຂໍ້ຕົກລົງສະບັບເລກທີ 1306/QĐ-TTg ອະນຸມັດຍຸດທະສາດວັດທະນະທຳຕ່າງປະເທດ ຮອດປີ 2030, ວິໄສທັດ ຮອດປີ 2045. ຍຸດທະສາດໄດ້ວາງເປົ້າໝາຍເສີມຂະຫຍາຍຄຸນຄ່າວັດທະນະທຳຫວຽດນາມ, ຍົກສູງກຳລັງແຮງອ່ອນ (Soft Power) ຂອງຊາດ, ເພີ່ມທະວີການໂຄສະນາພາບພົດປະເທດຊາດ, ຄົນຫວຽດນາມ ອອກສູ່ໂລກ ແລະ ຊຸກຍູ້ການເຊື່ອມໂຍງເຂົ້າກັບສາກົນທາງດ້ານວັດທະນະທຳ.