 |
ງານມະຫາກຳບຸນຊ້າງ ທີ່ແຂວງໄຊຍະບູລີ ປະຈຳປີ 2019. (ພາບ: ທະນູທອງ)
ໃນງານມະຫາກຳບຸນຊ້າງໃນຄັ້ງນີ້, ກໍມີຫລາຍກິດຈະກຳ ເປັນຕົ້ນ ການບາສີສູ່ຂວັນ ແລະ ສູດມຸງຄຸນໃຫ້ພອນຊ້າງ, ສະແດງຊ້າງຄຳຮູ້, ຈັດບຸບເຟ່ຊ້າງ, ຊົມຊ້າງອາບນ້ຳ ແລະ ອື່ນໆ ໂດຍສະເພາະ ກິດຈະກຳໃຫ້ບໍລິການຂີ່ຊ້າງ ເຊິ່ງມວນຊົນໃຫ້ຄວາມສົນໃຈ ເປັນຈຳນວນຫລວງຫລາຍ, ບາງຄົນກໍ່ຂຶ້ນຂີ່, ຖ່າຍຮູບຮ່ວມກັບຊ້າງ, ປ້ອນອາຫານຊ້າງ ແລະ ອື່ນໆ.
ຕາມການບອກເລົ່າຂອງຄວານຊ້າງ ໃຫ້ຮູ້ວ່າ: ການບໍລິການຂີ່ຊ້າງເປັນກິດຈະກຳໜຶ່ງ ທີ່ມວນຊົນທັງພາຍໃນ ແລະ ຕ່າງປະເທດໃຫ້ຄວາມສົນໃຈເປັນພິເສດ ເຊິ່ງການບໍລິການຂີ່ຊ້າງຖ້ຽວໜຶ່ງ ແມ່ນ 20.000 ກີບຕໍ່ຄົນ (ເດັກນ້ອຍ 10 ພັນກີບ) ໃນໄລຍະທາງ ຫລື ໃຊ້ເວລາປະມານ 15 ນາທີ, ເຊິ່ງກິດຈະກຳນີ້ ແມ່ນກິດຈະກຳເສີມກ່ອນ ແລະ ຫລັງການເຂົ້າຮ່ວມພິທີເປີດງານມະຫາກຳບຸນຊ້າງ ແລະ ກໍເຫັນວ່າໄດ້ຮັບຄວາມສົນໃຈ ຈາກມວນຊົນທັງພາຍໃນ ແລະ ຕ່າງປະເທດເປັນຢ່າງດີ ເພາະ ປະຊາຊົນປັດຈຸບັນ ຈະບໍ່ໄດ້ຄ່ອຍເຫັນຊ້າງຕົວເປັນໆ ສ່ວນຫລາຍກໍແມ່ນໄດ້ເຫັນໃນໂທລະພາບ ແລະ ການເລົ່າປາກຕໍ່ປາກເທົ່ານັ້ນ. ນອກນັ້ນ, ການສະແດງຊ້າງຄຳຮູ້ ກໍເປັນກິດຈະກຳໜຶ່ງທີ່ມວນຊົນ ທັງພາຍໃນ ແລະ ຕ່າງປະເທດໃຫ້ຄວາມ ສົນໃຈເປັນ ພິເສດເຊັ່ນດຽວກັນ.
（ແຫຼ່ງຂໍ້ມູນ： ທະນູທອງ/ຂປລ）
