ລາວ-ຫວຽດນາມ ແລກປ່ຽນວັດທະນະທຳ ສິລະປະການສະແດງ

11:47 | 08/01/2020

ວັນທີ 6 ມັງກອນ 2020 ທີ່ໂຮງຮຽນສິລະປະແຫ່ງຊາດ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ຮ່ວມກັບສະມາຄົມຜູ້ສູງອາຍຸ ສສ ຫວຽດນາມ ໄດ້ຈັດການສະແດງສິລະປະວັດທະນະທຳຂອງຄະນະ 19 ພຶດສະພາ ສສ ຫວຽດນາມ ເພື່ອເປັນການແລກປ່ຽນວັດທະນະທຳ ທັງເປັນການຕ້ອນຮັບປີໃໝ່ສາກົນ ແລະ ປີໃໝ່ປະຈຳຊາດຫວຽດນາມທີ່ໝູນວຽນມາອີກຄັ້ງໜຶ່ງ ມີທ່ານ ບົວເງິນ ຊາພູວົງ ຮອງລັດຖະມົນຕີກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ທ່ານ ໂດ ຄັດ ທຽນ ຫົວໜ້າຄະນະສິລະປະ 19 ພຶດສະພາ ສສ ຫວຽດນາມ ພ້ອມດ້ວຍການນຳກະຊວງ ແລະ ພະນັກງານຈາກຂະແໜງການຕ່າງໆ ເຂົ້າຮ່ວມ.

ທ່ານ ດວງຈຳປີ ວຸທິສຸກ ຮອງຫົວໜ້າກົມສິລະປະການສະແດງ ກະຊວງຖະແຫຼງຂ່າວ ວັດທະນະທຳ ແລະ ທ່ອງທ່ຽວ ໄດ້ມີຄຳເຫັນສະແດງການຕ້ອນຮັບຄະນະສິລະປະ 19 ພຶດສະພາ ສສ ຫວຽດນາມທີ່ໄດ້ນຳເອົາ 17 ລາຍ ການສະແດງທີ່ເຕັມໄປດ້ວຍມູນເຊື້ອອັນເກົ່າແກ່ ແລະ ອຸດົມສົມບູນຂອງປະຊາຊົນຫວຽດນາມ ມາຮອດມາເຖິງປະຊາຊົນລາວ ເຊິ່ງເປັນການແລກປ່ຽນຮຽນຮູ້ວັດທະນະທຳຂອງກັນ ແລະ ກັນອີກຄັ້ງໜຶ່ງທີ່ສຳຄັນ ປະກອບສ່ວນເພີ່ມພູນຄູນສ້າງຄວາມສາມັກຄີອັນຍິ່ງໃຫຍ່ ມິດຕະພາບແບບພິເສດ ແລະ ການຮ່ວມມືຮອບດ້ານລະຫວ່າງປະຊາຊົນສອງຊາດ ໃຫ້ນັບມື້ແຕກດອກອອກຜົນຍິ່ງຂຶ້ນໄປ ທັງເປັນການແລກປ່ຽນຮຽນຮູ້ວັດທະນະທຳຂອງກັນ ແລະ ກັນອີກຄັ້ງໜຶ່ງທີ່ສຳຄັນ.

ລາວ ແລະ ຫວຽດນາມ ເຄີຍມີມູນເຊື້ອແຫ່ງຄວາມສາມັກຄີມິດຕະພາບແບບພິເສດມາໄດ້ຫຼາຍຍຸກຫຼາຍສະໄໝ ທີ່ເຄີຍອຸ້ມຊູຍູ້ໜູນເຊິ່ງກັນ ແລະ ກັນ ໃນການຕໍ່ສູ້ຍາດເອົາຄວາມເປັນເອກະລາດ ອິດສະຫຼະພາບມາສູ່ມາຕຸພູມຂອງຕົນ ກໍຄື ໃນການປົກປັກຮັກສາ ແລະ ສ້າງສາພັດທະນາປະເທດຊາດໃນປັດຈຸບັນ.

ນອກຈາກນີ້ ໃນຕອນຄ່ຳວັນທີ 7 ມັງກອນ 2020 ຄະນະສິລະປະ 19 ພຶດສະພາ ສສ ຫວຽດນາມ ຍັງໄດ້ສືບຕໍ່ສະແດງສິລະປະຢູ່ທີ່ສູນວັດທະນະທຳ ສສ ຫວຽດນາມ ປະຈຳລາວ ຫຼັງໃໝ່ (ເສັ້ນທາງ 450 ປີ) ຕື່ມອີກ.

（ແຫຼ່ງຂໍ້ມູນ： vientianemai.net）