 |
ພາບປະກອບ
ມາດຕະການທີ1 ລ້າງມືດ້ວຍສະບູ ແລະ ນ້ຳສະອາດ ຫລື ໃຊ້ ເອລກໍຮໍ(ທາດເຫລົ້າ) ເພື່ອໃຫ້ມືມີຄວາມສະອາດເປັນປະຈຳ. ມາດຕະການທີ 2, ໃຊ້ຜ້າປິດຄຸມປາກ ແລະ ດັງ ໃນເວລາເກີດອາການໄອ ຫລື ຈາມ ດ້ວຍເຈ້ຍອະນາໄມແລ້ວຖິ້ມລົງ ຖັງຂີ້ເຫຍື້ອ ມີຝາປິດ ແລະ ເຮັດຄວາມສະອາດມື ເປັນຢ່າງດີ. ມາດຕະການທີ3 ຮັກສາໄລຍະຫ່າງຈາກຕົນເອງ ແລະ ຜູ້ອື່ນຢ່າງໜ້ອຍ 1 ແມັດ ໂດຍສະເພາະ ຜູ້ທີ່ມີອາການໄອ, ຈາມ ແລະ ມີໄຂ້. ມາດຕະການທີ4 ຫລີກລ້ຽງການໃຊ້ມືສຳພັດດວງຕາ, ດັງ ແລະ ປາກ ເນື່ອງຈາກ ຈະເປັນການສົ່ງຜ່ານເຊື້ອພະຍາດ ຈາກພື້ນຜີວເຂົ້າສູ່ຮ່າງກາຍ ຫາກມືປົນເປື້ອນເຊື້ອພະຍາດຕ່າງໆ.ມາດຕະການທີ 5 ແຈ້ງໜ່ວຍງານສາທາລະນະສຸກ ຫາກເຄີຍເດີນທາງໄປຍັງພື້ນທີ່ ມີການລາຍງານການລະບາດຂອງເຊື້ອພະຍາດ ໃນຈີນ ຫລື ຫາກຕິດຕໍ່ໃກ້ຊິດກັບບຸກຄົນ ທີ່ເດີນທາງມາຈາກຈີນ ແລະ ມີອາການຂອງພະຍາດ ລະບົບທາງ ເດີນຫາຍໃຈ. ມາດຕະການທີ 6 ຫາກມີອາການຂອງພະຍາດ ດັ່ງກ່າວ ໃນລະດັບບໍ່ຮຸນແຮງ ແລະ ບໍ່ມີປະຫວັດ ເດີນທາງໄປຈີນ ຫລື ພັກອາໄສຢູ່ຈີນ ຕ້ອງຮັກສາສຸຂະອະນາໄມ ລະບົບທາງເດີນຫາຍໃຈ ແລະ ຕ້ອງພັກຜ່ອນ ຢູ່ໃນທີ່ພັກອາໄສ ຈົນກວ່າ ຈະມີອາການດີຂຶ້ນປົກກະຕິ ຫາກເປັນໄປໄດ້. ມາດຕະການທີ 7 ຕ້ອງຮັກສາສຸຂະອະນາໄມຂັ້ນພື້ນຖານ ຫາກເດີນທາງໄປຕະຫລາດຂາຍສັດ ທີ່ຍັງມີຊີວິດ, ຕະຫລາດສົດ ຫລື ຕະຫລາດ ຂາຍຜະລິດຕະພັນສັດ ແລະ ມາດຕະການທີ 8 ແມ່ນຫລີກລ້ຽງ ການບໍລິໂພກ ຜະລິດຕະພັນສັດ ທີ່ຍັງດິບ ຫລື ບໍ່ໄດ້ປຸງແຕ່ງ ໃຫ້ສຸກພຽງພໍ ຈັດການຊີ້ນສັດ, ນົມ ຫລື ເຄື່ອງໃນສັດ ທີ່ຍັງດິບ ດ້ວຍຄວາມລະມັດລະວັງ ເພື່ອຫລີກລ້ຽງ ການປົນເປື້ອນ ຂ້າມອາຫານ ທີ່ຍັງບໍ່ປຸງແຕ່ງສຸກ ແລະ ປຸງແຕ່ງອາຫານ ດ້ວຍຄວາມປອດໄພ.
ປັດຈຸບັນ ສປປ ລາວ ກໍຄືກະຊວງສາທາລະນະສຸກ ພວມຄຸມເຂັ້ມເຝົ້າລະວັງ ໄວຣັດໂຄໂຣນາ ໂດຍສະເພາະ ຢູ່ຈຸດຜ່ານແດນຕ່າງໆ ໂດຍໄດ້ກັ່ນກອງ ແລະ ຕິດຕາມຢ່າງໃກ້ຊິດ ຕໍ່ບັນ ດາກຸ່ມຄົນທີ່ເດີນທາງໄປເຂດລະບາດ ແລະ ບັນດາກຸ່ມຄົນ ທີ່ເຂົ້າມາເຮັດວຽກຕາມສະຖານ ທີ່ຕ່າງໆ ໃນ ສປປ ລາວ. ພ້ອມດຽວກັນນັ້ນ, ໃນກໍລະນີມີນັກທ່ອງທ່ຽວ ທີ່ເຂົ້າມາທ່ຽວລາວ ພາຍຫລັງກັບປະເທດຈີນ (ພົບວ່າບຸກຄົນດັ່ງກ່າວ ຕິດເຊື້ອ) ກະຊວງສາທາລະນະສຸກ ກໍໄດ້ມີການຕິດຕາມ ຢ່າງໃກ້ຊິດ ທັງບຸກຄົນທີ່ເຮັດວຽກ ໃນການບໍລິການທ່ອງທ່ຽວ, ພະນັກງານຂັບລົດ, ຜູ້ບໍລິການໃນໂຮງແຮມ, ຮ້ານອາຫານ, ສະຖານທີ່ທ່ອງທ່ຽວ ແລະ ທຸກຄົນທີ່ມີການສຳຜັດ ຢູ່ແຂວງຫລວງພະບາງ, ຫລວງນໍ້າທາ ແລະ ແຂວງອຸດົມໄຊ ແມ່ນໄດ້ມີການຕິດຕາມຢ່າງໃກ້ຊິດ ແລະ ເຫັນວ່າທັງໝົດຍັງມີສຸຂະພາບແຂງແຮງດີ.
ເຖິງຢ່າງໃດກໍຕາມ ຮຽກຮ້ອງໃຫ້ປະຊາຊົນລາວບັນດາເຜົ່າ ເອົາໃຈໃສ່ເຝົ້າລະວັງພະຍາດນີ້ຢ່າງເຄັ່ງຄັດ ໂດຍການຫລີກລຽງການເດີນທາງ ໄປເຂດທີ່ມີການລະບາດ ຫລື ຊຸມຊົນແອອັດ, ຖ້າຈຳ ເປັນຈະໄປຕ້ອງຫລີກລຽງ ການສຳຜັດໃກ້ຊິດກັບຄົນ ທີ່ມີອາການຄ້າຍຄື ໄຂ້ຫວັດ ເຊັ່ນ: ໄຂ້, ໄອ, ເຈັບຄໍ ແລະ ຫາຍໃຈຍາກ, ພ້ອມກັນນັ້ນ, ຫາກທ່ານມີອາການຄ້າຍຄື ໄຂ້ຫວັດ ເຊັ່ນ: ໄຂ້, ໄອ, ເຈັບຄໍ ຫລື ຫາຍໃຈຍາກ ບວກກັບໄດ້ເດີນທາງໄປໃນເຂດ ທີ່ມີການລະບາດພາຍໃນ 14 ວັນກ່ອນເລີ່ມຕົ້ນເຈັບ ຫລື ສໍາຜັດໃກ້ຊິດກັບ ກໍລະນີທີ່ຖືກຢັ້ງຢືນ ຕິດເຊື້ອໄວຣັດ ກະລຸນາໄປພົບແພດໝໍ ທີ່ໃກ້ບ້ານທ່ານ ແລະ ແຈ້ງປະຫວັດການເດີນທາງຂອງທ່ານ ຖ້າໄດ້ໄປເຂດທີ່ມີ ການລະບາດພະຍາດດັ່ງ ກ່າວ ໃນໄລຍະ 14 ວັນກ່ອນມີອາການ ແລະ ຫລີກລ່ຽງການສຳຜັດສັດເປັນ ຫລື ຕາຍ.
（ໄຊພອນ）
