 |
ທີ່ການຕ້ອນຮັບ, ທ່ານ ເຈິ່ນ ແທັງເໝິ໋ນ ສະແດງຄວາມຍິນດີຕ້ອນຮັບ ຄະນະຜູ້ແທນລະດັບສູງຂອງ ອົງການແນວລາວສ້າງຊາດ ທີ່ໄດ້ມາຢ້ຽມຢາມແລະ ເຮັດວຽກຢູ່່ ສສ ຫວຽດນາມ. ສະຫາຍ ເຈິ່ນ ແທັງເໝິ໋ນ ຍັງໄດ້ສະແດງຄວາມຊົມເຊີຍຕໍ່ກັບບັນດາຜົນງານທີ່ ປະເທດລາວ ບັນລຸໄດ້ໃນປີ 2018 ໃນທຸກໆຂົງເຂດ ເປັນຕົ້ນແມ່ນ ວຽກງານປ້ອງກັນຊາດ, ປ້ອງກັນຄວາມສະຫງົບ, ການເມືອງ, ເສດຖະກິດ-ສັງຄົມ, ວັດທະນະທຳ-ສັງຄົມ, ການສຶກສາ ແລະ ບຳລຸງສ້າງ, ຍ້ອນແນວນັ້ນຈິ່ງເຮັດໃຫ້ ຊີວິດການເປັນຢູ່ຂອງປະຊາຊົນນັບມື້ນັບໄດ້ຮັບການປັບປຸງ, ບົດບາດ ແລະ ທີ່ຕັ້ງຂອງ ສປປ ລາວ ນັບມື້ນັບໄດ້ຮັບການຍົກລະດັບຂື້ນໃນພູມມິພາກ ແລະ ສາກົນ.
ສະຫາຍ ເຈິ່ນ ແທັງເໝິ໋ນ ຍັງສະແດງຄວາມດີໃຈ ຕໍ່ກັບບາດກ້າວການພັດທະນາ ຂອງ ສາຍພົວພັນມິດຕະພາບ ອັນເກົ່າແກ່, ຄວາມສາມັກຄີພິເສດ ແລະ ຮ່ວມມືຮອບດ້ານຫວຽດນາມ-ລາວ, ຜ່ານການແລກປ່ຽນ ຄະນະຂັ້ນສູງ, ບັນດາການເຊັນສັນຍາລົງນາມ ລະຫວ່າງສອງຝ່າຍ. ພິເສດ ແມ່ນ ການມາຢ້ຽມຢາມມິດຕະພາບ ແລະ ການຮ່ວມມື ລະຫວ່າງ ອົງການແນວໂຮມ ທັງສອງ ນັບມື້ນັບປະກົດຜົນເປັນຈິງ ແລະ ມີປະສິດທິຜົນ ປະກອບສ່ວນປັບປຸງ ແລະ ເພີ່ມທະວີສາຍພົວພັນມິດຕະພາບອັນເກົ່າແກ່, ຄວາມສາມັກຄີພິເສດ ແລະ ຮ່ວມມືຮອບດ້ານ ຫວຽດນາມ-ລາວ.
ອີງໃສ່ຜົນຂອງການພົບປະແລກປ່ຽນ ລະຫ່ວາງ ອົງການແນວໂຮມທັງສອງ, ສະຫາຍ ເຈີ່ນ ແທັງເໝີ໋ນ ໄດ້ກ່າວວ່າ: ໃນອານາຄົດ ອົງການແນວໂຮມ ຂອງສອງປະເທດ ຈະເພີ່ມທະວີຮ່ວມມື ດ້ວຍຫຼາຍເນື້ອໃນຕົວຈິງ, ແທດເໝາະ ເພື່ອປະກອບສ່ວນໃນການຊຸກຍູ້ມູນເຊື້ອແຫ່ງສາຍພົວພັນມິດຕະພາບ, ຄວາມສາມັກຄີພິເສດ ແລະ ຮ່ວມມື ຮອບດ້ານຫວຽດນາມ-ລາວ ໃຫ້ດີຂື້ນກວ່າເກົ່າ.
ຕ່າງໜ້າຄະນະຜູ້ແທນຂັ້ນສູງຂອງ ແນວໂຮມສ້າງຊາດລາວ, ສະຫາຍ ຄຳໃບ ດຳລັດ ສະແດງຄວາມຂອບອົກຂອບໃຈຕໍ່ການຕ້ອນຮັບອັນອົບອຸ່ນ ແລະ ໄມຕີຈິດ ຂອງສະຫາຍ ເຈີ່ນ ແທັງເໝີ໋ນ ມອບໃຫ້ຄະນະຄັ້ງນີ້. ສະຫາຍ ຄຳໃບ ດຳລັດ ກໍ່ໄດ້ກ່າວລາຍງານບັນດາຜົນງານອັນພົ້ນເດັ່ນຂອງ ແນວລາວສ້າງຊາດລາວ ໃນປີ 2018, ພິເສດແມ່ນການຜັນຂະຫຍາຍເນື້ອໃນ ບົດບັນທືກຂອງກອງປະຊຸມ ກໍ່ສ້າງເສັ້ນຊາຍແດນ ລາວ-ຫວຽດນາມ ສັນຕິພາບ, ມິດຕະພາບ, ຮ່ວມມືຮ່ວມພັດທະນາ.
ສະຫາຍ ຄຳໃບ ດຳລັດ ຢັ້ງຢືນວ່າ: ຈາກຜົນສຳເລັດຂອງບົດບັນທືກຊ່ວຍຈຳ ແລະ ເນື້ອໃນແຜນການທີ່ໄດ້ວາງອອກ ຂອງ ກອງປະຊຸມເຈລະຈາ ລະຫວ່າງ ຄະນະຜູ້ແທນ ກຳມະການສູນກາງ ແນວໂຮມຊາດຫວຽດນາມ ແລະ ຄະນະຜູ້ແທນ ກຳມະການສູນກາງ ແນວລາວສ້າງຊາດ, ທັງສອງອົງການໄດ້ສືບຕໍ່ຜັນຂະຫຍາຍຈັດຕັ້ງປະຕິບັດ ຢ່າງມີປະສິດທິຜົນ ສັນຍາການຮ່ວມມືທີ່ໄດ້ລົງນາມຮ່ວມ, ເພີ່ມທະວີການຮ່ວມມື, ຖອດຖອນບົດຮຽນ ກ່ຽວກັບ ວຽກງານແນວໂຮມ(ແນວລາວສ້າງຊາດ) ຈາກນັ້ນມັນໄດ້ປະກອບສ່ວນຊຸກຍູ້ສາຍພົວພັນມິດຕະພາບ, ສາມັກຄີພິເສດ ລາວ-ຫວຽດນາມ ນັບມື້ນັບໄດ້ຮັບການພັດທະນາ ຂື້ນສູ່ລະດັບໃໝ່, ເພື່ອຜົນປະໂຫຍດຂອງປະຊາຊົນຂອງແຕ່ລະປະເທດ, ເພື່ອສັນຕິພາບ, ສະຖຽນລະພາບ, ການຮ່ວມມື ແລະ ພັດທະນາ ຂອງຂົງເຂດພາກພື້ນ ແລະ ສາກົນ.
（ຫັດທະບູນ）
