 |
ກອງປະຊຸມ ປຶກສາຫາລື ເພື່ອເປັນເອກະພາບດ້ວຍເນື້ອໃນ ແລະ ພິທີການ ໃນການຈັດງານ ສັບປະດາວັດທະນະທຳ-ທ່ອງທ່ຽວເຊີນລາ ປີ 2018 .
ຜ່ານການປຶກສາຫາລືທັງສອງຝ່າຍໄດ້ເຫັນດີເປັນເອກະພາບ ຕໍ່ບັນດາຄຳສະເໜີຂອງສອງຝ່າຍນັບທັງສະຖານທີ່, ພິທີການ ແລະ ເວລາ, ສ່ວນດ້ານເນື້ອໃນນັ້ນ ທັງສອງຝ່າຍຈະນຳເອົາໄປພິຈາລະນາ ແລະ ນຳສະເໜີຂັ້ນເທິງອີກເທື່ອໜຶ່ງ. ຄາດຄະເນການຈັດງານສັບປະດາ ວັດທະນະທຳ-ທ່ອງທ່ຽວເຊີນລາ ປີ 2018 ຈະດຳເນີນເປັນເວລາ 4 ວັນ, ໂດຍຈະກຳນົດເອົາທ້າຍເດືອນຕຸລາ ຫລື ຕົ້ນເດືອນພະຈິກ ປີ 2018, ສະຖານທີ່ແມ່ນຢູ່ຫໍວັດທະນະທຳແຂວງຫົວພັນ ແລະ ສວນສາທາລະນະມິດຕະພາບຫົວພັນ-ກວ້າງນິງ ເທສະບານເມືອງຊຳເໜືອ.
ພາຍໃນງານຈະຈັດໃຫ້ມີການເຄື່ອນໄຫວວັດທະນະທຳ ເປັນຕົ້ນ ການສະແດງວັດທະນະທຳຊຸມຊົນຂອງເຜົ່າຕ່າງໆ ແລະ ຊົມການສະແດງແລກປ່ຽນ ສິນລະປະ-ວັນນະຄະດີ, ເປີດຫ້ອງວາງສະແດງເພື່ອນຳສະເໜີ ແລະ ໂຄສະນາຜະລິດຕະພັນວັດທະນະທຳ-ທ່ອງທ່ຽວ ວາງສະແດງຮູບພາບກ່ຽວກັບ ການທ່ອງທ່ຽວແຂວງເຊິນລາ, ຮູບພາບຄຸນຄ່າວັດທະນະທຳຊົນເຜົ່າ, ຮູບພາບການພັດທະນາເສດຖະກິດ-ສັງຄົມຂອງແຂວງ ແລະ ຮູບພາບການເຄື່ອນໄຫວຮ່ວມມືສອງຝ່າຍລາວ-ຫວຽດນາມ.
（ແຫຼ່ງຂໍ້ມູນ： ຂປລ）
