 |
ບັນຍາກາດກອງປະຊຸມປືກສາຫາລືຂອງສອງແຂວງ ຫວົພັນ ແລະ ແທັງຫວ໋າ.
ໃນກອງປະຊຸມພົບປະແລກປ່ຽນບົດຮຽນລະຫວ່າງສະຫະພັນກຳມະບານແຂວງຫົວພັນ ສປປລາວ ແລະ ສະມາພັນກຳມະບານແຂວງແທັງຮວ່າ ສສ ຫວຽດນາມ ໄດ້ຈັດຂຶ້ນໃນຕອນເຊົ້າຂອງວັນທີ 6 ພະຈິກ 2018 ທີ່ຫ້ອງປະຊຸມຫ້ອງວ່າການປົກຄອງແຂວງຫົວພັນ ຊຶ່ງຝ່າຍຫົວພັນນຳໂດຍສະຫາຍ ພອນສານ ວິໄລເມັ້ງ ຄະນະບໍລິຫານງານສູນກາງສະຫະພັນກຳມະບານລາວ ປະທານສະຫະພັນກຳມະບານແຂວງຫົວພັນ, ຝ່າຍແຂວງແທັງຮວ່ານຳໂດຍສະຫາຍ ໂງໂຕນເຕີ້ນ ກຳມະການພັກແຂວງປະທານສະມາພັນກຳມະບານແຂວງ ພ້ອມດ້ວຍຄະນະທີ່ກ່ຽວຂ້ອງຈາກສອງແຂວງເຂົ້າຮ່ວມນຳ.
 |
ການນຳທັງສອງແຂວງຮ່ວມຖ່າຍຮູບເປັນທີ່ລະນຶກ.
ພິທີພົບປະກັນຄັ້ງນີ້ທັງສອງແຂວງໄດ້ພັດປ່ຽນກັນລາຍງານສະພາບການທີ່ພົ້ນເດັ່ນ, ຂໍ້ສະດວກ, ຂໍ້ຫຍຸ້ງຍາກຢູ່ໃນຂົງເຂດວຽກງານກຳມະບານຂອງຕົນໃຫ້ກັນ ແລະ ກັນຊາບ ເພື່ອເປັນບ່ອນອິງໃນການ ຈັດຕັ້ງປະຕິບັດບົດບັນທຶກຊ່ວຍຈຳທີ່ທັງສອງຝ່າຍທີ່ໄດ້ເຊັນຮ່ວມກັນ ໂດຍໄດ້ເອກະພາບວ່າທັງສອງແຂວງຕ້ອງໄດ້ພັດປ່ຽນກັນເປັນເຈົ້າພາບ ປີ 1 ຕ້ອງໄດ້ຈັດງານພົບປະກັນປີລະຄັ້ງ. ຈຸດປະສົງກໍ່ເພື່ອເປັນການເພີ່ມທະວີຄວາມສາມັກຄີຮັກແພງແບບພິເສດການຮ່ວມມືຮອບດ້ານສະຫວ່າງລາວຫວຽດນາມ ເວົ້າລວມເວົ້າສະເພາະແມ່ນແຂວງຫົວພັນ - ແຂວງແທັງຮວ່າໃຫ້ນັບມື້ມີການຂະຫຍາຍຕົວ ແລະ ແໜ້ນແຟ້ນຍິງໆຂຶ້ນ.
 |
ສະຫະພັນກຳມະບານແຂວງ ແທັງ ຫວ໋າ ມອບເງິນສະໜັກສະໜູນ ສະຫະພັນກຳມະບານ ແຂວງ ຫົວພັນ.
ໂອກາດດຽວກັນນີ້ສະມາພັນກຳມະບານແຂວງແທັງຮວ໋າຍັງໄດ້ນຳເອົາເງິນຈຳນວນ 150 ລ້ານດົງມອບໃຫ້ສະຫະພັນກຳມະບານແຂວງຫົວພັນ ເພື່ອປະກອບສ່ວນສ້າງເຮືອນຢູ່ໃຫ້ແກ່ສະມາຊິກກຳມະບານ, ກຳມະກອນຜູ້ທຸກຍາກ ແລະ ຍັງໄດ້ມອບເງິນຈຳນວນ 20 ລ້ານດົງໃຫ້ສະຫະພັນກຳມະບານແຂວງຫົວພັນເພື່ອນຳໃຊ້ເຂົ້າໃນວຽກງານຕື່ມອີກ.
（ແຫຼ່ງຂໍ້ມູນ： ຂ່າວຫົວພັນ）
