 |
ຜູ້ຕາງໜ້າບັນດາກະຊວງ, ຂະແໜງການກ່ຽວຂ້ອງ ແລະ20 ແຂວງຊາຍແດນຂອງຫວຽດນາມ ແລະລາວ ເຂົ້າຮ່ວມກອງປະຊຸມ. (ພາບ: nhandan.com.vn)
ທີ່ກອງປະຊຸມ, ສອງຝ່າຍໄດ້ສະແດງຄວາມຮັບຮູ້ລວມກ່ຽວກັບຄວາມສຳຄັນຂອງສາຍພົວພັນຮ່ວມມືຂອງບັນດາແຂວງຊາຍແດນຫວຽດນາມ-ລາວ ໃນຫຼາຍຂົງເຂດ, ໃນນັ້ນມີຂົງເຂດສາສະໜາ, ປະກອບສ່ວນປັບປຸງສາຍພົວພັນມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານລະຫວ່າງສອງພັກ, ສອງລັດຖະບານ ແລະປະຊາຊົນສອງປະເທດ..
ບັນດາຜູ້ແທນໃຫ້ຂໍ້ສັງເກດວ່າ: ສະພາບການສາສະໜາຢູ່ເຂດຊາຍແດນຂອງສອງປະເທດໂດຍພື້ນຖານແລ້ວແມ່ນມີຄວາມເປັນປົກກະຕິດີ; ຊີວິດການເຫຼື້ອມໃສເຊື່ອຖືສາສະໜາຂອງປະຊາຊົນຢູ່ເຂດຊາຍແດນໄດ້ຮັບການຮັບປະກັນຈາກອຳນາດການປົກຄອງທ້ອງຖິ່ນຂອງສອງຝ່າຍ ແລະສ້າງເງື່ອນໄຂສະດວກຕາມກຳນົດຂອງກົດໝາຍແຕ່ລະປະເທດ. ຜູ້ມີຍົດຖາບັນດາສັກ, ສາສະນິກກະຊົນ ບັນດາສາສະໜາຕ່າງໆໄດ້ຕັ້ງໜ້າເຂົ້າຮ່ວມບັນດາການເຄື່ອນໄຫວສັງຄົມ, ບັນດາຂະບວນການຂອງທ້ອງຖິ່ນ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ - ສັງຄົມ ຢູ່ທ້ອງຖິ່ນ, ຮັບປະກັນຄວາມໝັ້ນຄົງ, ຄວາມເປັນລະບຽບຮຽບຮ້ອຍຢູ່ເຂດຊາຍແດນ.
ກອງປະຊຸມຄັ້ງນີ້ແມ່ນເພື່ອແນໃສ່ແລກປ່ຽນກ່ຽວກັບສະພາບການທາງສາສາະໜາ, ບົດຮຽນໃນການແກ້ໄຂບັນດາບັນຫາກ່ຽວຂ້ອງເຖິງສາສະໜາລະຫວ່າງບັນດາແຂວງຕິດຈອດຊາຍແດນຂອງແຕ່ລະປະເທດ; ພ້ອມທັງວາງອອກບັນດາບັນຫາລວມເຊິ່ງຕ່າງຝ່າຍຕ່າງມີຄວາມສົນໃຈ ແລະເຫັນດີເປັນເອກະພາບຕໍ່ບັນດາເນື້ອໃນສົມທົບກັນ, ວິທີການແກ້ໄຂ, ແນໃສ່ ຍົກສູງປະສິດທິຜົນວຽກງານຄຸ້ມຄອງຂອງລັດກ່ຽວກັບສາສະໜາຢູ່ເຂດຊາຍແດນ, ປະກອບສ່ວນກໍ່ສ້າງເຂດຊາຍແດນແຫ່ງສັນຕິພາບ, ສະຖຽນລະພາບ ແລະພັດທະນາ.
（ແຫຼ່ງຂໍ້ມູນ： ແສງເດືອນ/ກປ.ອອນໄລ）
