ນັກຂ່າວ VNA ປະຈຳ ລາວ ໄດ້ມີການແລກປ່ຽນຕໍ່ທ່ານ ທອງສະຫວັນ ພົມວິຫານ, ສະມາຊິກຄະນະກຳມະການສູນກາງພັກ ແລະ ລັດຖະມົນຕີກະຊວງການຕ່າງປະເທດລາວ ກ່ຽວກັບຜົນງານການພັດທະນາທີ່ໂດດເດັ່ນຂອງລາວ ແລະ ການປະກອບສ່ວນທີ່ສຳຄັນ, ຈິງໃຈ ແລະ ຈົງຮັກພັກດີຂອງຫວຽດນາມ ຕໍ່ພາລະກິດການສ້າງສາ ແລະ ພັດທະນາລາວ ໃນໄລຍະເຄິ່ງສະຕະວັດທີ່ຜ່ານມາ.
ການແລກປ່ຽນໄດ້ຈັດຂຶ້ນໃນໂອກາດທີ່ ທ່ານ ໂຕເລີມ ເລຂາທິການໃຫຍ່ຄະນະກຳມະການສູນກາງພັກກອມມູນິດຫວຽດນາມ ພ້ອມກັບພັນລະຍາ ແລະ ຄະນະຜູ້ແທນຂັ້ນສູງຂອງຫວຽດນາມ ເດີນທາງມາຢ້ຽມຢາມທາງລັດຖະກິດຢູ່ລາວ, ເຂົ້າຮ່ວມງານສະເຫຼີມສະຫຼອງ 50 ປີ ວັນຊາດຂອງສາທາລະນະລັດປະຊາທິປະໄຕປະຊາຊົນລາວ; ແລະ ເປັນປະທານຮ່ວມໃນກອງປະຊຸມຂັ້ນສູງລະຫວ່າງພັກກອມມູນິດຫວຽດນາມ ແລະ ພັກປະຊາຊົນປະຕິວັດລາວ ແຕ່ວັນທີ 1 ຫາ 2 ທັນວາ 2025.
ທ່ານລັດຖະມົນຕີ ທອງສະຫວັນ ພົມວິຫານ ກ່າວວ່າ ຮອດປີ 2025, ລາວຈະສະເຫຼີມສະຫຼອງ 50 ປີ ນັບຕັ້ງແຕ່ການປະກາດສ້າງຕັ້ງປະເທດ (ວັນທີ 2 ທັນວາ 1975). ຫ້າທົດສະວັດບໍ່ແມ່ນເວລາດົນນານ, ແຕ່ຖ້າພວກເຮົາຫວນຄືນຈຸດເລີ່ມຕົ້ນຂອງປີ 1975 - ເມື່ອປະເທດຍັງທຸກຍາກ, ພື້ນຖານໂຄງລ່າງຍັງບໍ່ທັນພັດທະນາ, ອຸດສາຫະກຳຍັງບໍ່ທັນໄດ້ສ້າງຕັ້ງຂຶ້ນ, ແລະອັດຕາການບໍ່ຮູ້ໜັງສືແມ່ນຢູ່ໃນບັນດາອັນດັບສູງສຸດໃນພາກພື້ນ - ຜົນສຳເລັດທີ່ລາວບັນລຸໄດ້ໃນປະຈຸບັນແມ່ນມະຫາສານ.
 |
| ທ່ານ ທອງສະຫວັນ ພົມວິຫານ ລັດຖະມົນຕີການຕ່າງປະເທດລາວ ໃຫ້ສໍາພາດ. (ພາບ: Xuan Tu/VNA) |
ໃນໄລຍະ 50 ປີຜ່ານມາ, ໂດຍສະເພາະຫຼັງຈາກ 40 ກວ່າປີຂອງການຈັດຕັ້ງປະຕິບັດຂະບວນການປັບປຸງ, ປະເທດລາວໄດ້ແກ້ໄຂບັນຫາຫຍຸ້ງຍາກຫຼາຍຢ່າງ, ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງໃຫ້ດີຂຶ້ນຢ່າງຫຼວງຫຼາຍ. ການສຶກສາແມ່ນໜຶ່ງໃນຈຸດສະຫວ່າງ, ອັດຕາການບໍ່ຮູ້ໜັງສື ເຊິ່ງເຄີຍກວມເອົາ 70% ຂອງປະຊາກອນ, ປະຈຸບັນໄດ້ຖືກລົບລ້າງໂດຍພື້ນຖານແລ້ວ; ການສຶກສາໄດ້ກາຍເປັນພື້ນຖານສຳລັບການພັດທະນາປະເທດຊາດ.
ພື້ນຖານໂຄງລ່າງ ແລະ ອຸດສາຫະກຳໄດ້ມີຄວາມກ້າວໜ້າຢ່າງຫຼວງຫຼາຍ. ໃນຊຸມປີຕົ້ນໆ, ເກືອບບໍ່ມີເສັ້ນທາງປູຢາງ, ລວມທັງທາງຫຼວງແຫ່ງຊາດເລກທີ 13 ທີ່ແລ່ນຜ່ານທົ່ວປະເທດ.
ມາຮອດປະຈຸບັນ, ລະບົບເສັ້ນທາງເຊື່ອມຕໍ່ພາກເໜືອ ແລະ ພາກໃຕ້, ບັນດາເສັ້ນທາງລະຫວ່າງແຂວງ ແລະ ລະຫວ່າງເມືອງ ໄດ້ຮັບການລົງທຶນຢ່າງຫຼວງຫຼາຍ; ອັດຕາການໃຊ້ໄຟຟ້າຂອງປະຊາຊົນໄດ້ເພີ່ມຂຶ້ນເກືອບທົ່ວປະເທດ. ນີ້ແມ່ນຫຼັກຖານທີ່ຊັດເຈນຂອງການພັດທະນາຂອງລາວ.
ໃນຂົງເຂດການຕ່າງປະເທດ, ລາວໄດ້ສ້າງສາຍພົວພັນກັບຫຼາຍກວ່າ 140 ປະເທດ ແລະ ມີອົງການຜູ້ຕາງໜ້າຢູ່ຕ່າງປະເທດຫຼາຍກວ່າ 40 ແຫ່ງ.
ເມື່ອທຽບກັບປີ 1975, ຮູບໜ້າການພົວພັນຕ່າງປະເທດຂອງລາວໄດ້ປ່ຽນແປງຢ່າງຮອບດ້ານ. ເຖິງແມ່ນວ່າປະເທດຍັງປະເຊີນກັບຄວາມຫຍຸ້ງຍາກຫຼາຍຢ່າງ, ໃນນັ້ນ ລວມທັງຄວາມຜັນແປ ທາງດ້ານເສດຖະກິດ ແລະ ການເງິນ, ແຕ່ລາວ ກຳລັງພະຍາຍາມຜ່ານຜ່າເພື່ອກ້າວໄປສູ່ການພັດທະນາແບບຍືນຍົງ.
ໃນໂອກາດວັນຊາດຄົບຮອບ 50 ປີ, ທ່ານລັດຖະມົນຕີການຕ່າງປະເທດລາວ ຍັງໄດ້ສະແດງຄວາມຂອບໃຈຢ່າງເລິກເຊິ່ງຕໍ່ເພື່ອນມິດສາກົນ, ໂດຍສະເພາະແມ່ນຫວຽດນາມ - ປະເທດທີ່ຢືນຢູ່ຄຽງຂ້າງລາວສະເໝີ, ທີ່ໄດ້ໃຫ້ການຊ່ວຍເຫຼືອຢ່າງຈິງໃຈ ແລະ ມີຄວາມໝາຍແກ່ລາວຕັ້ງແຕ່ຊຸມປີຕົ້ນໆຂອງການສ້າງຕັ້ງປະເທດ, ປະກອບສ່ວນສຳຄັນເຂົ້າໃນການກໍ່ສ້າງ ແລະ ພັດທະນາລາວ.
ທ່ານລັດຖະມົນຕີກະຊວງການຕ່າງປະເທດລາວ ໄດ້ສະແດງຄວາມປິຕິຍິນດີເປັນພິເສດເມື່ອຝ່າຍລາວ ໄດ້ຕ້ອນຮັບທ່ານເລຂາທິການໃຫຍ່ ໂຕເລີມ ມາຢ້ຽມຢາມທາງລັດຖະກິດ. ນີ້ແມ່ນການຢ້ຽມຢາມລາວຄັ້ງທຳອິດຂອງທ່ານເລຂາທິການໃຫຍ່ ໂຕເລີມ ໃນຖານະເປັນເລຂາທິການໃຫຍ່ພັກກອມມູນິດຫວຽດນາມ. ການຢ້ຽມຢາມຄັ້ງນີ້ຈະມີຄວາມໝາຍສຳຄັນເປັນພິເສດ, ປະກອບສ່ວນເຂົ້າໃນການສົ່ງເສີມສາຍພົວພັນພິເສດລະຫວ່າງສອງພັກ, ສອງລັດ ແລະ ປະຊາຊົນສອງຊາດ - ສາຍພົວພັນທີ່ສ້າງຂຶ້ນມາຕັ້ງແຕ່ສົງຄາມຕໍ່ຕ້ານເພື່ອກູ້ຊາດເປັນເວລາຫຼາຍປີ.
ທ່ານລັດຖະມົນຕີ ທອງສະຫວັນ ເນັ້ນໜັກວ່າ ທັງສອງຝ່າຍມີຕົ້ນກຳເນີດມາຈາກພັກກອມມູນິດອິນດູຈີນ ແລະ ມີອຸດົມການດຽວກັນໃນການຕໍ່ສູ້ເພື່ອເອກະລາດຂອງຊາດ. ສອງປະເທດໄດ້ຕໍ່ສູ້ຮ່ວມກັນຕໍ່ຕ້ານສັດຕູຮ່ວມ ແລະ ບັນລຸໄຊຊະນະທາງປະຫວັດສາດໃນປີ 1975.
ດັ່ງນັ້ນ, ສາຍພົວພັນລາວ-ຫວຽດນາມ ຈຶ່ງເປັນສາຍພົວພັນພິເສດ, ສ້າງຂຶ້ນດ້ວຍເລືອດເນື້ອ ແລະ ກະດູກຂອງຫຼາຍລຸ້ນຄົນ.
ການຢ້ຽມຢາມລາວ ຂອງທ່ານເລຂາທິການໃຫຍ່ ໂຕເລີມ ດຳເນີນໄປໃນສະພາບການທີ່ສອງປະເທດກຳລັງກະກຽມໃຫ້ແກ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກປະຊາຊົນປະຕິວັດລາວ ແລະ ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 14 ຂອງພັກກອມມູນິດຫວຽດນາມ.
ໃນການຢ້ຽມຢາມຄັ້ງນີ້, ທ່ານເລຂາທິການໃຫຍ່ ໂຕເລີມ ຈະໄດ້ເຂົ້າຮ່ວມງານສະເຫຼີມສະຫຼອງວັນຊາດລາວຄົບຮອບ 50 ປີ - ເຊິ່ງເປັນເຫດການທີ່ສຳຄັນ, ເຊິ່ງເປັນການສະເຫຼີມສະຫຼອງຜົນສຳເລັດທີ່ລາວບັນລຸໄດ້ໃນໄລຍະເຄິ່ງສະຕະວັດຜ່ານມາ, ລວມທັງການສະໜັບສະໜູນ ແລະ ການປະກອບສ່ວນທີ່ສຳຄັນຂອງຫວຽດນາມ.
ໃນສະພາບການຂອງການພັດທະນາພາກພື້ນ ແລະ ທົ່ວໂລກທີ່ສັບສົນ ເຊິ່ງສົ່ງຜົນກະທົບຕໍ່ເສດຖະກິດ ແລະ ການເມືອງໂລກ, ການເພີ່ມທະວີການຮ່ວມມື, ການເຊື່ອມຕໍ່ ແລະ ການເຊື່ອມໂຍງ ແມ່ນທ່າອ່ຽງທີ່ຫຼີກລ່ຽງບໍ່ໄດ້.
ຕາມທ່ານລັດຖະມົນຕີກະຊວງການຕ່າງປະເທດລາວ, ໃນການຢ້ຽມຢາມຄັ້ງນີ້, ລາວ ແລະ ຫວຽດນາມ ຈະສືບຕໍ່ສົ່ງເສີມມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານ, ພ້ອມທັງສຶກສາທິດທາງການຮ່ວມມືຍຸດທະສາດເພື່ອການພັດທະນາແບບຍືນຍົງຮ່ວມກັນໃນອະນາຄົດ.
ທ່ານລັດຖະມົນຕີ ທອງສະຫວັນ ພົມວິຫານ ຢືນຢັນວ່າ ນັບຕັ້ງແຕ່ລາວ ແລະ ຫວຽດນາມ ສ້າງຕັ້ງສາຍພົວພັນທາງການທູດໃນປີ 1962, ສອງປະເທດໄດ້ຢືນຢູ່ຄຽງຂ້າງກັນໃນການຕໍ່ສູ້ເພື່ອເອກະລາດ ແລະ ໃນການສ້າງສາ ແລະ ພັດທະນາປະເທດຊາດ. ການລົງນາມໃນສົນທິສັນຍາມິດຕະພາບ ແລະ ການຮ່ວມມືໃນປີ 1977 ເປັນຂີດໝາຍທາງກົດໝາຍທີ່ສຳຄັນ, ເຮັດໃຫ້ສາຍພົວພັນລະຫວ່າງສອງປະເທດເປັນແບບຢ່າງ ແລະ ຫາຍາກໃນໂລກ.
ໃນສະພາບການໂລກທີ່ມີການປ່ຽນແປງຢ່າງວ່ອງໄວໃນປະຈຸບັນ, ການສືບຕໍ່ຮັດແໜ້ນ, ບຳລຸງສ້າງ ແລະ ພັດທະນາສາຍພົວພັນພິເສດ ລາວ-ຫວຽດນາມ ແລະ ຫວຽດນາມ-ລາວ ແມ່ນມີຄວາມສຳຄັນຍິ່ງຂຶ້ນ, ນຳເອົາຜົນປະໂຫຍດຕົວຈິງມາສູ່ປະຊາຊົນສອງປະເທດ, ປະກອບສ່ວນເຂົ້າໃນສັນຕິພາບ, ສະຖຽນລະພາບ ແລະ ການພັດທະນາໃນພາກພື້ນ ແລະ ໃນໂລກ.
 | ລັດຖະມົນຕີກະຊວງການຕ່າງປະເທດລາວ: "ອາຊຽນ ແມ່ນອົງການຈັດຕັ້ງພາກພື້ນທີ່ປະສົບຜົນສຳເລັດດ້ວຍຜົນງານທີ່ໂດດເດ່ັນຫຼາຍຢ່າງ" ຍສໝ - ພາຍຫຼັງເຂົ້າເປັນສະມາຊິກ ອາຊຽນ ເປັນເວລາ 23 ປີ, ລາວ ບັນລຸໄດ້ຜົນງານ ແລະ ຜົນປະໂຫຍດຫຼາຍຢ່າງ ຜ່ານການເຂົ້າຮ່ວມບັນດາວິວັດທະນາການລວມຂອງ ອາຊຽນ ຢ່າງຄົບຖ້ວນ ແລະ ຕັ້ງໜ້າ ບົນຈິດໃຈມີຄວາມຮັບຜິດຊອບສູງ, ສິ່ງດັ່ງກ່າວ ໄດ້ປະກອບສ່ວນຫຼາຍພໍສົມຄວນເຂົ້າໃນການພັດທະນາເສດຖະກິດສັງຄົມຂອງ ລາວ. |
 | ຮອງລັດຖະມົນຕີກະຊວງການຕ່າງປະເທດລາວ ຕ້ອນຮັບການເຂົ້າຢ້ຽມຂ່ຳນັບ ແລະຍື່ນຈົດໝາຍແຕ່ງຕັ້ງຂອງກົງສຸນໃຫຍ່ແຫ່ງ ສສ.ຫວຽດນາມ ໃນວັນທີ 3 ຕຸລາ 2018 ທີ່ກະຊວງການຕ່າງປະເທດ, ທ່ານນາງ ຄຳເພົາ ເອີນທະວັນ ຮອງລັດຖະມົນຕີກະຊວງການຕ່າງປະເທດ ໄດ້ໃຫ້ການຕ້ອນຮັບການເຂົ້າຢ້ຽມຂ່ຳນັບ ແລະຍື່ນຈົດໝາຍແຕ່ງຕັ້ງຂອງ ທ່ານ ບຸ່ຍເທ້ຢຸ້ງ ກົງສຸນໃຫຍ່ ແຫ່ງ ສສ.ຫວຽດນາມ ປະຈຳແຂວງຈຳປາສັກ ແລະຮັບຜິດຊອບບັນດາແຂວງພາກໃຕ້ ຂອງ ສປປ ລາວ. |
ແທັງຮັ່ງ
