 |
ທ່ານນາງ ຄຳເພົາ ເອີນທະວັນ ຕ້ອນຮັບການເຂົ້າຢ້ຽມຂ່ຳນັບ ແລະຍື່ນຈົດໝາຍແຕ່ງຕັ້ງຂອງທ່ານ ບຸ່ຍເທ້ຢຸ້ງ. ພາບ: ຂ່າວສານປະເທດລາວ.
ໃນໂອກາດນີ້, ທ່ານນາງ ຄຳເພົາ ເອີນທະວັນ ໄດ້ສະແດງຄວາມຍິນດີຕ້ອນຮັບ ແລະຊົມເຊີຍຕໍ່ທ່ານ ບຸ່ຍເທ້ຢຸ້ງ ທີ່ໄດ້ຮັບແຕ່ງຕັ້ງໃຫ້ມາດຳລົງຕຳແໜ່ງເປັນກົງສຸນໃຫຍ່ ແຫ່ງ ສສ. ຫວຽດນາມ ປະຈຳແຂວງຈຳປາສັກ, ພ້ອມທັງສະແດງຄວາມເຊື່ອໝັ້ນວ່າພາຍໃນໄລຍະເວລາທີ່ທ່ານກົງສຸນໃຫຍ່ປະຕິບັດໜ້າທີການທູດຂອງຕົນຢູ່ ສປປ ລາວ, ຈະສືບຕໍ່ເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດກໍຄືປະຊາຊົນສອງຊາດລາວ-ຫວຽດນາມ. ພິເສດ, ແມ່ນການພົວພັນຮ່ວມມືລະຫວ່າງແຂວງຈຳປາສັກ ແລະບັນດາແຂວງພາກໃຕ້ຂອງລາວ ກັບບັນດາແຂວງຂອງຫວຽດນາມ ໃຫ້ມີປະສິດທິຜົນ ແລະງອກງາມຍິ່ງໆຂຶ້ນ, ໂດຍສະເພາະແມ່ນການຈັດຕັ້ງຜັນຂະຫຍາຍບັນດາຂໍ້ຕົກລົງຂອງການນຳຂັ້ນສູງຂອງສອງປະເທດ ເຊັ່ນ: ຂໍ້ຕົກລົງໃນກອງປະຊຸມຄັ້ງທີ 40 ຂອງຄະນະກຳມະການຮ່ວມມືສອງຝ່າຍລາວ-ຫວຽດນາມ, ຫວຽດນາມ-ລາວ, ການຊຸກຍູ້ບັນດາໂຄງການຮ່ວມມືຂອງສອງປະເທດຢູ່ບັນດາແຂວງທີ່ຕົນຮັບຜິດຊອບ ແລະດຶງດູດການລົງທຶນຂອງຫວຽດນາມ ມາສູ່ບັນດາແຂວງພາກໃຕ້ຂອງລາວ, ເອົາໃຈໃສ່ຮັດແໜ້ນການເຕົ້າໂຮມຄວາມສາມັກຄີລະຫວ່າງພີ່ນ້ອງຊາວຫວຽດນາມ ທີ່ອາໄສຢູ່ໃນບັນດາແຂວງພາກໃຕ້ຂອງລາວ ໃຫ້ດຳລົງຊີວິດຢ່າງມີຄວາມສຸກປະກອບສ່ວນເຂົ້າໃນການພັດທະນາຂອງບັນດາແຂວງພາກໃຕ້ເວົ້າສະເພາະ ກໍຄືເສີມຂະຫຍາຍການຮ່ວມມືສອງຝ່າຍ.
ໃນໂອກາດດັ່ງກ່າວ, ທ່ານນາງ ຄຳເພົາ ເອີນທະວັນ ໄດ້ສະແດງຄວາມຂອບໃຈຕໍ່ການຊ່ວຍເຫລືອຂອງພັກ, ລັດຖະບານ ແລະປະຊາຊົນຫວຽດນາມ ອ້າຍນ້ອງທີ່ໄດ້ໃຫ້ການຊ່ວຍເຫລືອ ສປປ ລາວ ເປັນຢ່າງດີຕະຫລອດມາ, ເຊິ່ງເປັນການປະກອບສ່ວນອັນສຳຄັນໃຫ້ແກ່ການພັດທະນາເສດຖະກິດ-ສັງຄົມຂອງແຂວງຈຳປາສັກ ແລະບັນດາແຂວງພາກໃຕ້ຂອງລາວ, ພິເສດແມ່ນການຊ່ວຍເຫລືອທີ່ທັນການ ແລະມີປະສິດທິຜົນຕໍ່ເຫດການອຸທົກກະໄພຢູ່ເມືອງສະໜາມໄຊ ແຂວງອັດຕະປື.
ໃນໂອກາດດຽວກັນ, ທ່ານ ບຸ່ຍເທ້ຢຸ້ງ ໄດ້ສະແດງຄວາມຂອບໃຈຕໍ່ທ່ານນາງ ຄຳເພົາ ເອີນທະວັນ ທີ່ໄດ້ໃຫ້ການຕ້ອນຮັບອັນອົບອຸ່ນ ແລະສະໜິດສະໜົມ, ພ້ອມທັງໃຫ້ຄຳໝັ້ນສັນຍາວ່າຕະຫລອດໄລຍະປະຕິບັດໜ້າທີ່ຂອງຕົນຢູ່ ສປປ ລາວ ຈະປະກອບສ່ວນຢ່າງສຸດຄວາມສາມາດເຂົ້າໃນການພັດທະນາຂອງບັນດາແຂວງພາກໃຕ້ຂອງລາວ ກໍຄືໃນການເສີມຂະຫຍາຍສາຍພົວພັນມິດຕະພາບ, ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງປະເທດໃຫ້ຈະເລີນງອກງາມຍິ່ງໆຂຶ້ນ.
（ແຫຼ່ງຂໍ້ມູນ： ກປ.ອອນໄລ）
