ວາດພາບພິທີໄຫວ້ບູຊາບັນພະບຸລຸດເຈົ້າຊີວິດຮຸ່ງ ແລະຈັດຮູບແຜນທີ່ຂອງຫວຽດນາມ ຢູ່ Osaka

ຍສໝ - ງານບຸນວັດທະນະທຳ ຫວຽດນາມ ປີ 2025 ຢູ່ Osaka ບໍ່ພຽງແຕ່ແມ່ນໂອກາດເພື່ອປົກປັກຮັກສາ ແລະ ເຜີຍແຜ່ວັດທະນະທຳ ຫວຽດນາມ ເທົ່ານັ້ນ, ຫາກຍັງແມ່ນຂົວເຊື່ອມຕໍ່ເພື່ອນຳພາບພົດປະເທດຊາດ ແລະ ປະຊາຊົນ ຫວຽດນາມ ເຂົ້າໃກ້ເພື່ອນມິດ ຍີ່ປຸ່ນ ກ່ວາອີກ.

	ປະຊາຄົມຊາວ ຫວຽດນາມ ຢູ່ Osaka (ຍີ່ປຸ່ນ) ສະເຫຼີມສະຫຼອງບຸນປີໃໝ່ປີມະເສັງ
	ລະດູບານໃໝ່ບ້ານເກີດເມືອງນອນ 2025: ບຸນປີໃໝ່ປະຈຳຊາດຂອງຫວຽດນາມ ຢູ່ Osaka, ເຊື່ອມຕໍ່ມິດຕະພາບຫວຽດນາມ - ຍີ່ປຸ່ນ

ຕອນບ່າຍວັນທີ 30 ມີນາ, ຢູ່ນະຄອນ Sakai, Osaka (ຍີ່ປຸ່ນ), ດ້ວຍການອຸປະຖຳຂອງສະຖານກົງສຸນໃຫຍ່ ຫວຽດນາມ ປະຈໍາ Osaka, ສະມາຄົມສົ່ງເສີມການຮ່ວມມືດ້ານເສດຖະກິດ ຫວຽດນາມ - ຍີ່ປຸ່ນ ໄດ້ຈັດຕັ້ງ “ງານບຸນວັດທະນະທໍາ ຫວຽດນາມ 2025”.

ວາດພາບພິທີໄຫວ້ບູຊາບັນພະບຸລຸດເຈົ້າຊີວິດຮຸ່ງ ແລະຈັດຮູບແຜນທີ່ຂອງຫວຽດນາມ ຢູ່ Osaka

ວາດພາບພິທີໄຫວ້ບູຊາບັນພະບຸລຸດເຈົ້າຊີວິດຮຸ່ງທີ່ງານບຸນວັດທະນະທໍາ ຫວຽດນາມ 2025 ຢູ່ Osaka. (ພາບ: ຫງວຽນຕວຽນ/ສຳນັກຂ່າວສານ ຫວຽດນາມ)

ເຂົ້າຮ່ວມເຫດການມີທ່ານຫົວໜ້າກົງສູນໃຫຍ່ ຫວຽດນາມ ປະຈຳ ຍີ່ປຸ່ນ ໂງ່ຈິ້ງຮ່າ; ຜູ້ຕາງໜ້ານະຄອນ Sakai, ຫົວໜ້າກົມການວັດທະນະທຳ ແລະ ການທ່ອງທ່ຽວນະຄອນ Sakai, ທ່ານ Yamasaki Hisaki; ປະທານສະມາຄົມຊາວຫວຽດນາມ ປະຈຳ ເຂດ Kansai, ທ່ານນາງ ເລເທື່ອງ; ປະທານສະມາຄົມສົ່ງເສີມການຮ່ວມມືດ້ານເສດຖະກິດຫວຽດນາມ - ຍີ່ປຸ່ນ, ທ່ານ ຫວູຮວ່າງດຶກ…; ພ້ອມກັບຊາວຫວຽດນາມ ອາໄສຢູ່ຕ່າງປະເທດ ແລະ ເພື່ອນມິດ ຍີ່ປຸ່ນ ເປັນຈຳນວນຫລວງຫລາຍ.

ກ່າວຄຳປາໄສທີ່ພິທີເປີດງານ, ທ່ານຫົວໜ້າກົງສູນໃຫຍ່ ຫວຽດນາມ ປະຈຳ Osaka ໂງ່ຈິ້ງຮ່າ ເນັ້ນໜັກວ່າ ປີ 2025 ແມ່ນປີທີ່ພິເສດສຳລັບປະຊາຊົນຫວຽດນາມ ດ້ວຍບັນດາພິທີສະເຫຼີມສະຫຼອງສຳຄັນຂອງປະເທດຊາດຄື ຄົບຮອບ 50 ປີແຫ່ງວັນປົດປ່ອຍພາກໃຕ້ ແລະ ໂຮມປະເທດຊາດເປັນເອກະພາບ (30 ເມສາ1975 – 30 ເມສາ 2025), ຄົບຮອບ 50 ປີແຫ່ງວັນຊາດຂອງຫວຽດນາມ (2 ກັນຍາ 1945)…

ໃນບັນຍາກາດນັ້ນ, ງານບຸນວັດທະນະທຳ ຫວຽດນາມ 2025 ຢູ່ Osaka ບໍ່ພຽງແຕ່ແມ່ນໂອກາດເພື່ອອະນຸລັກຮັກສາ ແລະ ເຜີຍແຜ່ວັດທະນະທຳ ຫວຽດນາມ ເທົ່ານັ້ນ ຫາກຍັງແມ່ນຂົວເຊື່ອມເພື່ອນຳພາບພົດຂອງປະເທດຊາດ ແລະ ປະຊາຊົນ ຫວຽດນາມ ເຂົ້າໃກ້ເພື່ອນມິດ ຍີ່ປຸ່ນ ກ່ວາອີກ.

ທ່ານ ໂງ່ຈິ້ງຮ່າ ເຊື່ອໝັ້ນວ່າ ນີ້ແມ່ນໂອກາດເພື່ອໃຫ້ປະຊາຄົມຊາວຫວຽດນາມ ຢູ່ Osaka ເວົ້າສະເພາະ ແລະ ທົ່ວປະເທດ ຍີ່ປຸ່ນ ເວົ້າລວມ ໄດ້ພົບປະ, ແລກປ່ຽນ, ເພີ່ມທະວີຄວາມສາມັກຄີ ແລະ ສະໜັບສະໜູນເຊິ່ງກັນ ແລະ ກັນໃນຂະບວນການເຊື່ອມໂຍງເຂົ້າກັບສັງຄົມຢູ່ປະເທດປະຈຳຖິ່ນ.

ທ່ານກົງສຸນໃຫຍ່ ພິນິດໄສວ່າ ສະມາຄົມສົ່ງເສີມການຮ່ວມມືດ້ານເສດຖະກິດ ຫວຽດນາມ - ຍີ່ປຸ່ນ ນອກຈາກເປັນຂົວເຊື່ອມຕໍ່ເສດຖະກິດລະຫວ່າງ 2 ປະເທດແລ້ວ ຍັງມີຄວາມຕັ້ງໜ້າໃນການຈັດຕັ້ງບັນດາການເຄື່ອນໄຫວໃຫ້ຊຸມຊົນ, ໃນນັ້ນ ມີການອະນຸລັກຮັກສາພາສາຫວຽດ ແລະ ແນະນຳ, ໂຄສະນາວັດທະນະທຳ ຫວຽດນາມ ຢູ່ ຍີ່ປຸ່ນ ເຊັ່ນ ການຈັດຕັ້ງບັນດາຊຸດຮຽນພາສາຫວຽດ ຫຼື ຈັດຕັ້ງບັນດາລາຍການວັດທະນະທຳໃຫ້ຊຸມຊົນ ແລະ ພິເສດແມ່ນງານບຸນວັດທະນະທຳ ຫວຽດນາມ ຢູ່ Osaka ເຕັມໄປດ້ວຍຄວາມໝາຍ ແລະ ຄວາມຮັກແພງ.

ທ່ານຫົວໜ້າກົງສູນໃຫຍ່ຫວຽດນາມ ປະຈຳ Osaka ໂງ່ຈິ້ງຮ່າ ກ່າວຄຳປາໄສພິທີໄຂງານບຸນວັດທະນະທຳ ຫວຽດນາມ ປີ 2025 ຢູ່ Osaka. (ພາບ: ຫງວຽນຕວຽນ/ສຳນັກຂ່າວສານຫວຽດນາມ)

ທ່ານນາງ ເລເທື່ອງ ປະທານສະມາຄົມຊາວຫວຽດນາມ ປະຈຳ ເຂດ Kansai ໃຫ້ຮູ້ວ່າ ງານບຸນວັດທະນະທຳ ຫວຽດນາມ ປີ 2025 ມີຫຼາຍການເຄື່ອນໄຫວທີ່ດີເດັ່ນພິເສດຄື ສະທ້ອນໃຫ້ເຫັນຄືນພິທີໄຫວ້ບູຊາບັນພະບຸລຸດເຈົ້າຊີວິດຮຸ່ງ ຄັ້ງທີ 8 ຢູ່ Osaka, ມ້ຽນຮູບແຜນທີ່ຂອງຫວຽດນາມ ດ້ວຍຜູ້ເຂົ້າຮ່ວມນັບຮ້ອຍຄົນ, ສະແດງຊຸດອາພອນພື້ນເມືອງ, ບັນດາລາຍການສິລະປະດ້ວຍການເຂົ້າຮ່ວມສະແດງຂອງບັນດາສິລະປິນທີ່ມີຊື່ສຽງຢູ່ພາຍໃນປະເທດ; ບັນດາພື້ນທີ່ໂຄສະນາ, ແນະນຳຜະລິດຕະພັນ ຫວຽດນາມ, ພື້ນທີ່ອາຫານ, ບັນດາການລະຫຼິ້ນພື້ນເມືອງ...

ຕາງໜ້າໃຫ້ນະຄອນ Sakai, ຫົວໜ້າກົມການວັດທະນະທຳ ແລະ ການທ່ອງທ່ຽວນະຄອນ Sakai, ທ່ານ Yamasaki Hisaki ຕາງໜ້າໃຫ້ເຈົ້າຄອງນະຄອນ Sakai ໄດ້ສະແດງຄວາມຍິນດີຕ້ອນຮັບຢ່າງສຸດອົກ ສຸດໃຈ ງານບຸນວັດທະນະທຳ ຫວຽດນາມ ປີ 2025 ຢູ່ Osaka, ພ້ອມກັນນັ້ນ ກໍ່ສົ່ງຄຳຂອບໃຈກົງສຸນໃຫຍ່ຫວຽດນາມ ປະຈຳ Osaka, ບັນດາສະມາຄົມຄະນະ ແລະ ຊາວຫວຽດນາມ ອາໄສຢູ່ ຍີ່ປຸ່ນ ທີ່ມານະພະຍາຍາມໃຫ້ເຫດການວັດທະນະທຳທີ່ມີຄວາມໝາຍນີ້.

ທ່ານປາດຖະໜາວ່າ ຜ່ານງານບຸນວັດທະນະທຳ ຫວຽດນາມ 2025 ຢູ່ Osaka, ປະຊາຊົນ ຍີ່ປຸ່ນ ຈະມີໂອກາດໄດ້ຮັບຮູ້ກ່ຽວກັບວັດທະນະທຳ ແລະ ຄວາມດຶງດູດຂອງ ຫວຽດນາມ ຢ່າງເລິກເຊິ່ງ, ປະກອບສ່ວນເຮັດໃຫ້ສາຍພົວພັນມິດຕະພາບລະຫວ່າງ ຫວຽດນາມ ແລະ ນະຄອນ Sakai, ກໍ່ຄືລະຫວ່າງຫວຽດນາມ ແລະ ຍີ່ປຸ່ນ ໃຫ້ເລິກເຊິ່ງກ່ວາອີກ.

ຜູ້ຕາງໜ້ານະຄອນ Sakai, ຫົວໜ້າກົມການວັດທະນະທຳ ແລະ ການທ່ອງທ່ຽວນະຄອນ Sakai, ທ່ານ Yamasaki Hisaki ກ່າວຄຳປາໄສທີ່ງານບຸນວັດທະນະທຳ ຫວຽດນາມ 2025 ຢູ່ Osaka. (ພາບ: ຊວນຢາວ/ສຳນັກຂ່າວສານ ຫວຽດນາມ)

ນາງ ຫງວຽນທິເຮືອງ, ເປັນອາສາສະໝັກທີ່ງານບຸນວັດທະນະທຳ ຫວຽດນາມ 2025 ຢູ່ Osaka, ໄດ້ສະແດງຄວາມພາກພູມໃຈທີ່ໄດ້ປະກອບສ່ວນກຳລັງແຮງເຂົ້າໃນເຫດການວັດທະນະທຳຢ່າງມີຄວາມໝາຍຂອງຊາວຫວຽດນາມ ຢູ່ Osaka.

ນາງໃຫ້ຮູ້ວ່າ ການເຄື່ອນໄຫວມ້ຽນຮູບແຜນທີ່ຫວຽດນາມ ຢູ່ Osaka ບໍ່ພຽງແຕ່ແມ່ນການຢັ້ງຢືນອະທິປະໄຕຂອງປະເທດ ຫວຽດນາມ ເທົ່ານັ້ນ, ຫາກຍັງແມ່ນນ້ຳໃຈຮັກແພງຂອງປະຊາຄົມຊາວ ຫວຽດນາມ ຢູ່ເຂດ Kansai ຍາມໃດກໍ່ມຸ່ງໄປເຖິງບ້ານເກີດເມືອງນອນ, ປະເທດຊາດ.

ພ້ອມກັບຈຸດພົ້ນເດັ່ນຂອງການເຄື່ອນໄຫວມ້ຽນຮູບແຜນທີ່ຫວຽດນາມ ແລະ ສະທ້ອນໃຫ້ເຫັນຄືນພິທີໄຫວ້ບູຊາບັນພະບຸລຸດເຈົ້າຊີວິດຮຸ່ງ, ງານບຸນຍັງໄດ້ນຳສະເໜີບັນດາລາຍການສະແດງຫຼາຍຢ່າງຄື ການສະແດງຊຸດເສື້ອຍາວດ້ວຍຜ້າບັ້ງ 100 ຊຸດ ແລະ ບັນດາລາຍການສະແດງດົນຕີທີ່ດີເດັ່ນພິເສດ.

ການສະແດງຊຸດເສື້ອຍາວດ້ວຍຜ້າບັ້ງ 100 ຊຸດທີ່ງານບຸນວັດທະນະທຳ ຫວຽດນາມ 2025 ຢູ່ Osaka (ພາບ: ຫງວຽນຕວຽນ/ສຳນັກຂ່າວສານ ຫວຽດນາມ)

ງານບຸນວັດທະນະທຳຫວຽດນາມ ຢູ່ Osaka 2025 ຖືກຈັດຕັ້ງດ້ວຍເປົ້າໝາຍມຸ່ງໄປເຖິງເຄົ້າກຳເນີດ, ປຸກລະດົມຄວາມເອກອ້າງທະນົງໃຈຂອງປະເທດຊາດ ແລະ ຊຸກຍູ້ຈິດໃຈຂອງຊາວຫວຽດນາມ ຢູ່ ຍີ່ປຸ່ນ ສາມັກຄີຮ່ວມກັນ, ພະຍາຍາມເຮັດວຽກ ແລະ ຮ່ຳຮຽນ ເພື່ອປະກອບສ່ວນສ້າງບ້ານເກີດເມືອງນອນນັບມື້ນັບຈະເລີນຮຸ່ງເຮືອງ.

ລາງວັນ "ຄວາມມັກແບບຍືນຍົງ" ແຜ່ຂະຫຍາຍຈິດໃຈຄວາມມານະພະຍາຍາມ, ອຸທິດສ່ວນໃຫ້ແກ່ໄວໜຸ່ມຫວຽດນາມ

ຍສໝ - ດ້ວຍຄວາມສົນໃຈ ແລະ ຕອບສະໜອງຢ່າງແຮງຈາກປະຊາຄົມ, ລາງວັນ “ຄວາມມັກແບບຍືນຍົງ" ໄດ້ບັນລຸຜົນສຳເລັດຫຼາຍຢ່າງໃນການຈັດຕັ້ງປີທຳອິດຂອງຕົນ, ຢັ້ງຢືນຄວາມໝາຍຂອງລາງວັນໃນການຮັບຮູ້ ແລະ ເຊີດຊູບັນດາລຸ້ນໜຸ່ມທີ່ມີພອນສະຫວັນ.

ທ່ານປະທານປະເທດ ເລືອງເກື່ອງ ພົບປະເຈລະຈາກັບທ່ານ ປະທານາທິບໍດີ ບຣາຊິນ

ຍສໝ - ໂດຍໄດ້ຮັບຄຳເຊີນຂອງທ່ານປະທານປະເທດ ເລືອງເກື່ອງ, ທ່ານປະທານນາທິບໍດີ ສາທາລະນະລັດສະຫະພັນ ບຣາຊິນ Luiz Inácio Lula da Silva ເປັນນຳໜ້າຄະນະຜູ້ແທນຂັ້ນສູງປະເທດສາທາລະນະລັດສະຫະພັນ ບຣາຊິນ ປະຕິບັດການໄປຢ້ຽມຢາມທາງລັດໄປຍັງ ຫວຽດນາມ ແຕ່ວັນທີ 27 – 29 ມີນາ 2025.

ແທັງຮັ່ງ