ຫວຽດນາມ-ຍີ່ປຸ່ນ ຊຸກຍູ້ການຮ່ວມມືໃນຂົງເຂດພະຍາກອນອຸຕຸນິຍົມອຸທົກກະສາດ

ຍສໝ - ຫວ່າງແລ້ວນີ້, ທີ່ສໍານັກງານນາຍົກລັດຖະມົນຕີ, ທ່ານ ເຈິ່ນຮົ່ງຮ່າ ຮອງນາຍົກລັດຖະມົນຕີຫວຽດນາມ ໄດ້ຕ້ອນຮັບຄະນະນັກຊ່ຽວຊານຍີ່ປຸ່ນ ກ່ຽວກັບຂົງເຂດພະຍາກອນອຸຕຸນິຍົມອຸທົກກະສາດ ນໍາໂດຍທ່ານ Hiroshi Fukada ອະດີດເອກອັກຄະລັດຖະທູດຍີ່ປຸ່ນ ປະຈໍາ ຫວຽດນາມ.

ທີ່ການພົບປະ, ທ່ານ ເຈິ່ນຮົ່ງຮ່າ ຕີລາຄາວ່າ ຍີ່ປຸ່ນ ມີຫຼາຍບົດຮຽນໃນການຮັບມືກັບການປ່ຽນແປງຂອງດິນຟ້າອາກາດ, ໃນນັ້ນ ຂະແໜງອຸຕຸນິຍົມອຸທົກກະສາດ ໄດ້ປະຕິບັດການພະຍາກອນດີທີ່ສຸດ, ກ່າວເຕືອນໄພທໍາມະຊາດແຕ່ຫົວທີ. ສະນັ້ນ, ຫວຽດນາມ ປາດຖະໜາວ່າ ຍີ່ປຸ່ນ ຈະຖ່າຍທອດເຕັກໂນໂລຢີ ແລະບັນດາມາດຕະການ, ຮັບມືກັບການປ່ຽນແປງຂອງດິນຟ້າອາກາດ, ໂດຍສະເພາະແມ່ນອຸຕຸນິຍົມ, ດິນເຊາະເຈື່ອນ, ນໍ້າຊຸ, ນໍ້າແກ່ງ... ທ່ານ ເຈິ່ນຮົ່ງຮ່າ ກໍ່ໃຫ້ຮູ້ວ່າ ຂະແໜງອຸຕຸນິຍົມອຸທົກກະສາດຫວຽດນາມ ໄດ້ຢັ້ງຢືນທີ່ຕັ້ງຂອງຕົນຢູ່ພາກພື້ນອາຊີຕາເວັນອອກສ່ຽງໃຕ້, ເມື່ອອົງການຈັດຕັ້ງອຸຕຸນິຍົມໂລກ (WMO) ຄັດເລືອກເປັນສູນໜູນຊ່ວຍການພະຍາກອນດິນຟ້າອາກາດທີ່ອັນຕະລາຍຢູ່ພາກພື້ນອາຊີຕາເວັນອອກສ່ຽງໃຕ້ (ສູນ RFSC ຮ່າໂນ້ຍ) ແລະສູນໜູນຊ່ວຍການພະຍາກອນພາກພື້ນອາຊີຕາເວັນອອກສ່ຽງໃຕ້ກ່ຽວກັບການເຕືອນນໍ້າແກ່ງ. ພາບ: ຈິ໊ງຝູ