 | ພາສາຫວຽດນາມ ຢູ່ດິນ ລາວ: ເຊື່ອມຕໍ່ປະຊາຊົນ, ແບ່ງປັນວັດທະນະທຳ |
| ທ່ານນາຍົກລັດຖະມົນຕີ ຫວຽດນາມ: ນຳແຂວງ ຢຸນໜານ ແລະ ແຂວງ ລາວກາຍ ກາຍເປັນສູນເຊື່ອມຕໍ່ການຄ້າລະຫວ່າງຈີນ ກັບ ອາຊຽນ |
ການເດີນທາງຂ້າມຊາຍແດນ
ເລີ່ມເດີນທາງຈາກນະຄອນ ດົ່ງຮ່າ, ກວາງຈີ້, ລົດໄດ້ພາທ່ານ ລວນ ພ້ອມກັນກັບກຸ່ມເພື່ອນມິດຜ່ານທົ່ງນາທີ່ຂຽວອຸ່ມທຸ່ມ, ໄປຢຸດຢູ່ກຳແພງເມືອງເກົ່າ ກວາງຈີ້. ສະຖານທີ່ແຫ່ງນີ້ບໍ່ພຽງແຕ່ໂດດເດັ່ນດ້ວຍຄວາມງາມອັນເກົ່າແກ່ເທົ່ານັ້ນ ຫາກຍັງເປັນຂີດໝາຍເຫດການປະຫວັດສາດອັນເລິກເຊິ່ງອີກດ້ວຍ. "ຢືນຢູ່ກາງກຳແພງເມືອງເກົ່າ, ຟັງຜູ້ນຳທ່ຽວເລົ່າເຖິງການສູ້ຮົບອັນດຸເດືອດໃນເມື່ອກ່ອນ, ຂ້າພະເຈົ້າຮູ້ສຶກເອກອ້າງທະນົງໃຈຫຼາຍ, ແຕ່ກໍຮູ້ສຶກສະເທືອນໃຈ”, ທ່ານ ລວນ ກ່າວ.
ອອກຈາກ ກວາງຈີ້, ຄະນະໄດ້ສືບຕໍ່ເດີນທາງໄປຍັງ ລາວບາວ, ດ່ານຊາຍແດນສາກົນລະຫວ່າງ ຫວຽດນາມ ແລະ ລາວ. ຢູ່ທີ່ນີ້, ຂັ້ນຕອນການອອກໜັງສືອອກເມືອງແມ່ນໄວ ແລະ ເປັນມິດ.
ສະຫວັນນະເຂດ, ນະຄອນໃຫຍ່ອັນດັບສອງຂອງລາວ, ຕ້ອນຮັບຄະນະດ້ວຍຄວາມສະຫງົບ, ແຕກຕ່າງຢ່າງສິ້ນເຊີງຈາກຄວາມວຸ້ນວາຍຂອງບັນດາຕົວເມືອງ ຫວຽດນາມ. ຢູ່ທີ່ນີ້, ຄະນະໄດ້ໄປຢ້ຽມຢາມສວນສາທາລະນະພະຍານາກ ນາຄາ, ທາດ ອີຮັງ ບູຮານ ແລະ ວິທະຍາໄລສົງ.
 |
| ການເດີນທາງສຳຜັດຕົວຈິງສ້າງຄວາມປະທັບໃຈທີ່ບໍ່ອາດລືມໃນໃຈຂອງນັກທ່ອງທ່ຽວ. |
"ຄົນລາວ ເປັນຄົນມີນໍ້າໃຈເອື້ອເຟື້ອເພື່ອແຜ່ຫຼາຍ. ຂ້າພະເຈົ້າມັກເວລານັ່ງຢູ່ໃນຮ້ານອາຫານນ້ອຍໆ, ກິນເຂົ້າໜຽວປີ້ງໄກ່ ແລະ ລົມກັບຄົນທ້ອງຖິ່ນດ້ວຍພື້ນຖານພາສາລາວ ອັນໜ້ອຍໆຂອງຕົນ", ທ່ານ ລວນ ເລົ່າຄືນຢ່າງຕື່ນເຕັ້ນ.
ໃນຕອນຄໍ່າ, ພິທີບາສີສູ່ຂວັນ ແລະ ການຟ້ອນອັນອ່ອນຊ້ອຍໃນການຟ້ອນລຳວົງ ໄດ້ສ້າງຄວາມປະທັບໃຈຢ່າງເລິກເຊິ່ງຢູ່ໃນໃຈຂອງນັກທ່ອງທ່ຽວ. ຕອນເຊົ້າມື້ຕໍ່ມາ, ຄະນະໄດ້ສືບຕໍ່ເດີນທາງຂ້າມຂົວມິດຕະພາບ ລາວ-ໄທ ແຫ່ງທີ 2 ໄປສູ່ແຂວງ ມຸກດາຫານ (ປະເທດໄທ), ເຊິ່ງເປັນບ່ອນແມ່ນໍ້າຂອງ ຄ້າຍຄືເສັ້ນໄໝອ່ອນທີ່ແບ່ງສອງປະເທດ. ຢູ່ທີ່ນີ້, ນັກທ່ອງທ່ຽວສາມາດຊົມວິວທັດສະນີຍະພາບຂອງສອງຝັ່ງແມ່ນ້ຳຂອງຈາກທາດແກ້ວ ມຸກດາຫານ.
ໜຶ່ງໃນບັນດາຈຸດທີ່ໜ້າຈົດຈຳທີ່ສຸດແມ່ນການຢ້ຽມຢາມ ນະຄອນພະນົມ, ບ່ອນທີ່ຄະນະໄດ້ໄປຖະຫວາຍທູບທຽນຢູ່ອະນຸສາວະລີ ປະທານໂຮ່ຈິມິນ, ພ້ອມກັນນັ້ນ ກໍ່ຊອກຮູ້ກ່ຽວກັບໄລຍະທີ່ລຸງໂຮ່ ເຄື່ອນໄຫວຢູ່ບ້ານນາໂຊກ. ບັນດາສະມາຊິກໃນຄະນະຂອງທ່ານ ລວນ ຮູ້ສຶກເຖິງຢ່່າງຈະແຈ້ງຄວາມຮັກແພງ ແລະ ຄວາມເຄົາລົບນັບຖືທີ່ປະຊາຊົນໄທ ມີຕໍ່ປະທານໂຮ່ຈິມິນ. ເຮືອນທີ່ລຸງໂຮ່ ເຄີຍດຳລົງຊີວິດໄດ້ຮັບການຮັກສາໄວ້ຢ່າງລະມັດລະວັງ, ອ້ອມຮອບໄປດ້ວຍໝູ່ບ້ານທີ່ເປັນມິດ, ມີບັນດາຮູບແຕ້ມທີ່ເລົ່າເລື່ອງປະຫວັດສາດທີ່ມີຄງາມຕື້ນຕັນໃຈ.
ອາຫານແມ່ນຈຸດເດັ່ນທີ່ບໍ່ສາມາດຫຼົງລືມໄດ້ຂອງການເດີນທາງນີ້. ໃນຕອນເຊົ້າຢູ່ປະເທດໄທ, ຄະນະໄດ້ກິນອາຫານພື້ນເມືອງເຊັ່ນ: ຜັດໄທ ແລະ ປາປີ້ງໃສ່ເກືອທີ່ມີລົດຊາດເຂັ້ມຂຸ້ນ, ເຜັດຮ້ອນ.
ອາຫານທ່ຽງແມ່ນເຂົ້າຫນຽວ, ປາປີ້ງ ແລະ ຕຳໝາກຫຸ່ງ - ບັນດາອາຫານພື້ນບ້ານທຳມະດາແຕ່ເຮັດໃຫ້ຄວາມຮູ້ສຶກໃກ້ຊິດ. ໃນຕອນຄ່ຳ, ເມື່ອກັບຄືນ ດົ່ງຮ່າ, ຄະນະທັງໝົດລ້ວນແຕ່ໄດ້ຊິມອາຫານທີ່ອຸດົມສົມບູນດ້ວຍລົດຊາດພາກກາງ ຫວຽດນາມ ເຊັ່ນ: ຕົ້ມປາເຄັມ, ຜັກບົ້ງຂົ້ວໃສ່ຜັກທຽມ ແລະ ແກງປູນາ. "ອາຫານແຕ່ລະເຍື່ອງລ້ວນແຕ່ມີລົດຊາດຂອງແຕ່ລະປະເທດ, ໄດ້ສະແດງໃຫ້ເຫັນເຖິງມູນເຊື້ອວັດທະນະທຳທ້ອງຖິ່ນຢ່າງຈະແຈ້ງ", ທ່ານ ລວນ ໃຫ້ຄຳເຫັນ.
ເຊື່ອມຕໍ່ການພັດທະນາການທ່ອງທ່ຽວສາມປະເທດ
tour “ກິນເຂົ້າຢູ່ 3 ປະເທດໃນວັນດຽວ” ບໍ່ພຽງແຕ່ແມ່ນຜະລິດຕະພັນທ່ອງທ່ຽວທີ່ດຶງດູດໃຈເທົ່ານັ້ນ, ຫາກຍັງແມ່ນສັນຍາລັກແຫ່ງການເຊື່ອມໂຍງ ແລະ ການຮ່ວມມືລະຫວ່າງ 3 ປະເທດ ຫວຽດນາມ, ລາວ ແລະ ໄທ ບົນແລວເສດຖະກິດ ຕາເວັນອອກ - ຕາເວັນຕົກ (EWEC). ຕາມທ່ານ ຫງວຽນດຶກເຕີນ, ຜູ້ອຳນວຍການສູນສົ່ງເສີມການລົງທຶນ, ການຄ້າ ແລະ ການທ່ອງທ່ຽວ ແຂວງ ກວາງຈີ້ ແລ້ວ, ເສັ້ນທາງຂອງບັນດາປະເທດບົນ EWEC ແມ່ນແຫຼ່ງຊັບພະຍາກອນອັນລ້ຳຄ່າເພື່ອເຊື່ອມຕໍ່ ແລະ ພັດທະນາເປັນຜະລິດຕະພັນການທ່ອງທ່ຽວທີ່ເປັນເອກະລັກສະເພາະ.
ທ້າຍປີ 2023, ແຂວງ ກວາງຈີ້ ໄດ້ຈັດຕັ້ງລາຍການ Caravan ທ່ອງທ່ຽວ “ສີສັນກວາງຈີ້” ດ້ວຍການເຂົ້າຮ່ວມຂອງຫົວໜ່ວຍທ່ອງທ່ຽວ, ວິສາຫະກິດທ່ອງທ່ຽວ 80 ແຫ່ງຈາກ 3 ປະເທດ, ເພື່ອສົ່ງເສີມໂຄສະນາການທ່ອງທ່ຽວລະຫວ່າງ ຫວຽດນາມ, ລາວ ແລະ ໄທ.
ທີ່ກອງປະຊຸມພົບປະກັບຄະນະປະຕິບັດງານຂອງແຂວງ ມຸກດາຫານ (ໄທ) ໃນເດືອນສິງຫາ 2024, ທ່ານ ຮວ່າງນາມ, ຮອງປະທານຄະນະກຳມະການປະຊາຊົນແຂວງ ກວາງຈີ້ ໃຫ້ຮູ້ວ່າ tour ທ່ອງທ່ຽວກິນເຂົ້າຢູ່ 3 ປະເທດໃນວັນດຽວ ແມ່ນບັນລຸໄດ້ຄວາມມຸ່ງຫວັງເປັນເວລາດົນນານໃນແຜນທີ່ທ່ອງທ່ຽວ ແຕ່ມີໄລຍະໜຶ່ງທີ່ມິດໄປ.
“ໃນຈຸດເວລານີ້, ຕ້ອງຊຸກຍູ້ tour ນີ້ຢ່າງເຂັ້ມແຂງ ໂດຍຜ່ານການກຳນົດບັນດາອົງການທ່ອງທ່ຽວທີ່ມີຄວາມສາມາດບົ່ມຊ້ອນ, ສ້າງເງື່ອນໄຂໃຫ້ແຂກໂດຍສານເດີນທາງດ້ວຍລົດພວງມະໄລຂວາ. ພວກຂ້າພະເຈົ້າພວມພະຍາຍາມເພື່ອເປີດວຽກງານນີ້, ໄລຍະທາງພູມສາດທີ່ໃກ້ຊິດຫຼາຍ, ທ່າອ່ຽງທີ່ທັນສະໄຫມຂອງການເດີນທາງຂັບດ້ວຍຕົນເອງ. Tour ນີ້ແມ່ນເຫມາະສົມສໍາລັບຜູ້ທີ່ມີເວລາຫນ້ອຍ, ສາມາດເລືອກການສຳຜັດຕົວຈິງໃນ 2 ມື້", ທ່ານ ນາມ ກ່າວ.
| ແລວເສດຖະກິດ ຕາເວັນອອກ-ຕາເວັນຕົກ (EWEC) ແມ່ນແລວເສດຖະກິດຍາວ 1.450 ກິໂລແມັດ, ຜ່ານ 13 ແຂວງຂອງ 4 ປະເທດຄື: ມຽນມາ, ໄທ, ລາວ ແລະ ຫວຽດນາມ. ແລວເສດຖະກິດດັ່ງກ່າວແມ່ນເລີ່ມຈາກນະຄອນທ່າກຳປັ່ນ Mawlamyine (ລັດ Mon) ໄປເຖິງດ່ານຊາຍແດນ Myawaddy (ລັດ Kayin) ໃນເຂດຊາຍແດນມຽນມາ - ໄທ. ຢູ່ປະເທດໄທ, EWEC ໄດ້ເລີ່ມຈາກແມ່ສອດ, ແລ່ນຜ່ານ 7 ແຂວງຂອງປະເທດນີ້. ຢູ່ລາວ, ແລວທາງນີ້ ແລ່ນນັບແຕ່ແຂວງສະຫວັນນະເຂດ ຫາ ດ່ານຊາຍແດນ ແດນສະຫວັນ ແລະ ຢູ່ຫວຽດນາມ, ແລ່ນຈາກ ດ່ານຊາຍແດນ ລາວບາວ ຜ່ານແຂວງ ກວາງຈີ້, ເຫ້ວ ແລະ ນະຄອນດານັງ. |
 | ຕອບບຸນຄຸນຕໍ່ຮອຍຕີນຂອງທະຫານອາສາສະໝັກຫວຽດນາມ ຢູ່ປະເທດເພື່ອນລາວ ຍສໝ - ຕອນເຊົ້າວັນທີ 29 ຕຸລາ, ຢູ່ຮ່າໂນ້ຍ ໄດ້ດຳເນີນການພົບປະສັງສັນສະເຫຼີມສະຫຼອງ 75 ປີແຫ່ງວັນມູນເຊື້ອທະຫານອາສາສະໝັກ ແລະນັກຊ່ຽວຊານຫວຽດນາມ ຢູ່ ລາວ (30-10-1949 / 30-10-2024). |
 | ວັນວັດທະນະທຳຫວຽດນາມ ໄດ້ຈັດຂຶ້ນຄັ້ງທຳອິດຢູ່ ມົງໂກລີ ຍສໝ - ວັນວັດທະນະທຳຫວຽດນາມ ໄດ້ຈັດຂຶ້ນເປັນຄັ້ງທຳອິດຢູ່ ມົງໂກລີ ປະກອບສ່ວນຢ່າງສຳຄັນ, ເພີ່ມທະວີຄວາມເຂົ້າໃຈ, ນ້ຳໃຈມິດຕະພາບ ແລະ ການຮ່ວມມືອັນດີງາມລະຫວ່າງປະຊາຊົນສອງປະເທດ, ປະກອບສ່ວນພັດທະນາການພົວພັນຮ່ວມມືຄູ່ຮ່ວມມືຮອບດ້ານລະຫວ່າງ ຫວຽດນາມ - ມົງໂກລີ ທີ່ໄດ້ຮັບການສ້າງຕັ້ງໃນການໄປຢ້ຽມຢາມ ມົງໂກລີ ຂອງທ່ານເລຂາທິການໃຫຍ່, ປະທານປະເທດ ຫວຽດນາມ ໂຕເລີມ. |
ມີງດຶກ
