| ສະຖານທູດລາວ ປະຈໍາ ແບນຊິກ, ກຳປູເຈຍ ອວຍພອນວັນຊາດຫວຽດນາມ ວັນທີ 2 ກັນຍາ | |
| ແບນຊິກ ຊຸກຍູ້ການຮ່ວມມືໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຢູ່ຫວຽດນາມ |
ສະໂມສອນມໍລະດົກຊຸດເສື້ອຍາວຫວຽດນາມ ຢູ່ປະເທດ ແບນຊິກ ໄດ້ໄຂຂຶ້ນຢ່າງເປັນທາງການ ໃນວັນທີ 7 ກັນຍາ ຢູ່ໃນສະຖານທີສະຫງ່າຜ່າເຜີຍຂອງສະຖານທູດ ຫວຽດນາມ ປະຈຳ ແບນຊິກ.
ເຫດການດັ່ງກ່າວໄດ້ຈັດຂຶ້ນພາຍໃຕ້ການໜູນຊ່ວຍຂອງສະຖານທູດ ຫວຽດນາມ ປະຈຳ ແບນຊິກ ແລະ ສະຫະສະມາຄົມຄົນ ຫວຽດນາມ ປະຈຳ ແບນຊິກ (UGVB). ນີ້ກໍ່ແມ່ນໜຶ່ງໃນບັນດາການເຄື່ອນໄຫວຂອງ UGVB ເພື່ອສະເຫຼີມສະຫຼອງ 79 ປີແຫ່ງວັນສະຖາປະນາ ສາທາລະນະລັດ ສັງຄົມນິຍົມ ຫວຽດນາມ (2 ກັນຍາ 1945), 70 ປີ ແຫ່ງວັນປົດປ່ອຍນະຄອນຫຼວງ ຮ່າໂນ້ຍ (10 ຕຸລາ 1954), ພ້ອມກັນນັ້ນ, ກໍ່ຕອບສະໜອງວັນມໍລະດົກວັດທະນະທຳ ຫວຽດນາມ 23 ພະຈິກ ແລະ ເຊີດຊູບັນດາຄຸນຄ່າວັດທະນະທຳພື້ນເມືອງ, ເຊື່ອມໂຍງເຂົ້າກັບປະຊາຄົມທີ່ຮັກຊຸດເສື້ອຍາວຂອງແມ່ຍິງ ຫວຽດນາມ.
ທີ່ການກ່າວຄຳເຫັນທີ່ພິທີ, ທ່ານ ຫງວຽນວັນຖ້າວ ເອກອັກຄະລັດຖະທູດ ຫວຽດນາມ ປະຈຳລາຊະອານາຈັກ ແບນຊິກ ໄດ້ເນັ້ນໜັກເຖິງບົດບາດສຳຄັນຂອງຊຸດເສື້ອຍາວຂອງແມ່ຍິງ ຫວຽດນາມ ໃນການໂຄສະນາພາບພົດປະເທດຊາດ ແລະ ປະຊາຊົນ ຫວຽດນາມ. ທ່ານເອກອັກຄະລັດຖະທູດ ກ່າວວ່າ: ຊຸດເສື້ອຍາວຂອງແມ່ຍິງ ຫວຽດນາມ ບໍ່ພຽງແຕ່ແມ່ນເຄື່ອງນຸ່ງອາພອນເທົ່ານັ້ນ, ແຕ່ຫາກຍັງແມ່ນເຄື່ອງສິລະປະ, ເປັນສັນຍາລັກແຫ່ງຄວາມງາມ ແລະ ຄວາມລະອຽດອອ່ນຂອງແມ່ຍິງ ຫວຽດນາມ. ການສ້າງຕັ້ງສະໂມສອນມໍລະດົກຊຸດເສື້ອຍາວຂອງແມ່ຍິງ ຫວຽດນາມ ຢູ່ປະເທດ ແບນຊິກ ແມ່ນຫົວຄິດປະດິດສ້າງທີ່ມີຄວາມໝາຍ, ປະກອບສ່ວນນຳພາບພົດຂອງ ຊຸດເສື້ອຍາວຂອງແມ່ຍິງ ຫວຽດນາມ ໃຫ້ໃກ້ຊິດກັບເພື່ອນມິດສາກົນຫຼາຍຂຶ້ນ.
ທ່ານ ຮວິ່ງກົງໝີ ປະທານ UGVB ກ່າວວ່າ: ສະໂມສອນມໍລະດົກ ຊຸດເສື້ອຍາວຂອງແມ່ຍິງ ຫວຽດນາມ ແບນຊິກ ໄດ້ກຳເນີດຂຶ້ນດ້ວຍເປົ້າໝາຍເຊື່ອມໂຍງປະຊາຄົມຄົນຫວຽດນາມ ຢູ່ ແບນຊິກ. ພ້ອມກັນນັ້ນ, ກໍ່ເຜີຍແຜ່ຊຸດເສື້ອຍາວຂອງແມ່ຍິງ ຫວຽດນາມ ໃຫ້ກັບເພື່ອນມິດສາກົນ. ທ່ານໄດ້ເນັ້ນໜັກເຖິງຄວາມປາດຖະໜາທີ່ຢາກສ້າງພື້ນທີ່ວັດທະນະທຳ, ບ່ອນທີ່ຜູ້ຄົນສາມາດຮ່ຳຮຽນຊອກຮູ້ນຳກັນ, ຄົ້ນພົບ ແລະ ຊື່ນຊົມຄຸນຄ່າຊຸດເສື້ອຍາວຂອງແມ່ຍິງ ຫວຽດນາມ.
ທ່ານນາງ Audrey Lhoest - ຮອງເຈົ້າເມືອງ Ixelles, ເປັນເມືອງໜຶ່ງທີ່ມີຄົນ ຫວຽດນາມ ດໍາລົງຊີວິດຢູ່ຢ່າງໜາແໜ້ນ ແລະ ຮ່ຳຮຽນ, ໄດ້ສະແດງຄວາມນິຍົມຕໍ່ຄວາມງາມຂອງຊຸດເສື້ອຍາວຂອງແມ່ຍິງ ຫວຽດນາມ ແລະ ຄວາມໝາຍຂອງເຫດການ. “ນີ້ແມ່ນການເຄື່ອນໄຫວວັດທະນະທໍາທີ່ມີຄວາມໝາຍຫຼາຍ, ປະກອບສ່ວນເຮັດໃຫ້ຊີວິດໃນຊຸມຊົນຢູ່ Ixelles ອຸດົມສົມບູນຍິ່ງຂຶ້ນ.
ໃນບັນຍາກາດອັນສະຫງ່າຂອງພິທີ, ຄົນ ຫວຽດນາມ ຫຼາຍຄົນທີ່ໄກເຂດແຄ້ວນ ກໍ່ບໍ່ອາດກັ້ນຄວາມຕື້ນຕັນໃຈໄດ້ເມື່ອພ້ອມກັນນຸ່ງຊຸດເສື້ອຍາວຂອງແມ່ຍິງ ຫວຽດນາມ ພື້ນເມືອງ. ທ່ານ ນາງ ດ່າວທູຮັ່ງ ຜູ້ລິເລີ່ມແນວຄິດສ້າງຕັ້ງສະໂມສອນ ກ່າວວ່າ: ນີ້ຈະແມ່ນຂົວຕໍ່ໃຫ້ຄົນ ຫວຽດນາມ ຮ່ວມກັນປົກປັກຮັກສາ, ເສີມຂະຫຍາຍບັນດາຄຸນຄ່າວັດທະນະທຳພື້ນເມືອງຂອງຊາດ, ສ້າງປະຊາຄົມຮັກຊຸດເສື້ອຍາວຂອງແມ່ຍິງ ຫວຽດນາມ, ບ່ອນທີ່ທຸກຄົນສາມາດເອກອ້າງທະນົງໃຈກ່ຽວກັບຕົ້ນກໍາເນີດຂອງຕົນ ແລະ ຍິ່ງໄປກວ່ານັ້ນ, ພວກຂ້າພະເຈົ້າຈະພ້ອມກັນມຸ່ງໄປເຖິງຈຸດໝາຍອັນສູງສົ່ງຂອງການຈົດທະບຽນມໍລະດົກວັດທະນະທຳບໍ່ເປັນວັດຖຸຂອງອົງການ UNESCO.
ພິທີເປີດຕົວສະໂມສອນມໍລະດົກຊຸດເສື້ອຍາວຂອງແມ່ຍິງ ຫວຽດນາມ ຢູ່ ແບນຊິກ ບໍ່ພຽງແຕ່ແມ່ນພິທີເປີດຕົວທີ່ຢ່າງດຽວເທົ່ານັ້ນ, ແຕ່ຍັງເປັນສານກ່ຽວກັບການເຊື່ອມຕໍ່ລະຫວ່າງ ອະດີດ ແລະ ປັດຈຸບັນ, ຊຸດເສື້ອຍາວຂອງແມ່ຍິງ ຫວຽດນາມ, ດ້ວຍຄວາມງົດງາມລະອຽດອ່ອນ ແລະ ຄຸນຄ່າທາງດ້ານວັດທະນະທຳອັນຢ່າງເລິກເຊິ່ງ ຈະສືບຕໍ່ໄປຄຽງຄູ່ໄປກັບຄົນ ຫວຽດນາມ ໃນທົ່ວໂລກ, ປະກອບສ່ວນໂຄສະນາພາບພົດຂອງປະເທດຊາດ ແລະ ປະຊາຊົນ ຫວຽດນາມ.
ຮູບພາບບາງສ່ວນໃນງານ:
 |
| ພິທີເປີດຕົວສະໂມສອນມໍລະດົກ ຊຸດເສື້ອຍາວຫວຽດນາມ ຢູ່ ແບນຊິກ (ພາບ: ກວິ່ງ Iris de Prelle). |
 |
| ພີ່ນ້ອງຊາວຫວຽດນາມ ອາໄສຢູ່ຕ່າງປະເທດ ເຂົ້າຮ່ວມລາຍການສະແດງທີ່ພິທີເປີດສະໂມສອນມໍລະດົກຊຸດເສື້ອຍາວ ຫວຽດນາມ ຢູ່ ແບນຊິກ (ພາບ: ກວິ່ງ Iris de Prelle). |
 |
 |
| ຊຸດເສື້ອຍາວ ຫວຽດນາມ ໄດ້ວາງສະແດງທີ່ພິທີເປີດຕົວສະໂມສອນມໍລະດົກຊຸດເສື້ອຍາວຫວຽດນາມ ຢູ່ ແບນຊິກ (ພາບ: ກວິ່ງ Iris de Prelle). |
 |
| ພື້ນທີ່ວາງສະແດງມໍລະດົກ ຊຸດເສື້ອຍາວຫວຽດນາມ ທີ່ພິທີເປີດຕົວສະໂມສອນມໍລະດົກ ຊຸດເສື້ອຍາວຂອງແມ່ຍິງ ຫວຽດນາມ ຢູ່ປະເທດ ແບນຊິກ |
 | ສະຖານທູດລາວ ປະຈໍາ ແບນຊິກ, ກຳປູເຈຍ ອວຍພອນວັນຊາດຫວຽດນາມ ວັນທີ 2 ກັນຍາ |
| ແບນຊິກ ຊຸກຍູ້ການຮ່ວມມືໜູນຊ່ວຍຜູ້ປະສົບເຄາະຮ້າຍຈາກທາດພິດສີສົ້ມຢູ່ຫວຽດນາມ |
ທອງມີ ສີຫາວົງ
