 | ຊາວໜຸ່ມຊາວຫວຽດນາມ ອາໄສຢູ່ຕ່າງປະເທດ 120 ຄົນຊອກຮູ້ວັດທະນະທຳ ຊາວເຜົ່າຈຳ |
| ຊາວຫວຽດນາມ ອາໄສຢູ່ຕ່າງປະເທດ ປະກອບຄໍາເຫັນກ່ຽວກັບການກວດກາແຫຼ່ງທີ່ມາຂອງຜະລິດຕະພັນໃນການສົ່ງອອກ |
ເນື່ອງໃນໂອກາດນີ້, ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດ ຫວຽດນາມ, ຫົວໜ້າຄະນະກຳມະການແຫ່ງລັດກ່ຽວກັບ ຊາວຫວຽດນາມ ອາໄສຢູ່ຕ່າງປະເທດ ໄດ້ໃຫ້ສຳພາດຕໍ່ສື່ມວນຊົນ; ເນັ້ນໜັກເຖິງຈຸດໝາຍສ້າງພື້ນທີ່ເປີດເພື່ອໃຫ້ ຊາວຫວຽດນາມ ອາໄສຢູ່ຕ່າງປະເທດໄດ້ແບ່ງປັນຄວາມຄິດເຫັນ ແລະ ປະກອບສ່ວນເຂົ້າໃນຂະບວນການພັດທະນາຂອງປະເທດໃນສະພາບການໃໝ່.
 |
| ທ່ານນາງ ເລທິທູຮັ່ງ ຮອງລັດຖະມົນຕີກະຊວງການຕ່າງປະເທດ ຫວຽດນາມ. |
ຂໍຮຽນທ່ານນາງຮອງລັດຖະມົນຕີແບ່ງປັນກ່ຽວກັບວຽກງານການຈັດຕັ້ງ “ກອງປະຊຸມ ຊາວຫວຽດນາມ ອາໄສຢູ່ຕ່າງປະເທດທົ່ວໂລກ ຄັ້ງທີ 4”, “ເວທີປາໄສປັນຍາຊົນ ແລະ ນັກຊ່ຽວຊານ ຫວຽດນາມ ຢູ່ຕ່າງປະເທດ ປີ 2024” (ກອງປະຊຸມ ແລະ ເວທີປາໄສ) ເຖິງປະຈຸບັນ ແລະ ຈິດໃຈເຂົ້າຮ່ວມ, ຕອບສະໜອງຂອງ ຊາວຫວຽດນາມ ອາໄສຢູ່ຕ່າງປະເທດ ສຳລັບເຫດການນີ້?
ມາຮອດປະຈຸບັນ, ວຽກງານຈັດຕັ້ງກອງປະຊຸມ ແລະ ເວທີປາໄສໄດ້ສຳເລັດແລ້ວ. ແຕ່ຕົ້ນປີ 2024, ກະຊວງການຕ່າງປະເທດໄດ້ສົມທົບກັນຢ່າງແໜ້ນແຟ້ນກັບບັນດາຄະນະ, ກະຊວງ, ຂະແໜງການ ແລະ ອົງການຈັດຕັ້ງການເມືອງ - ສັງຄົມທີ່ກ່ຽວຂ້ອງ ເພື່ອຜັນຂະຫຍາຍແຜນການຈັດຕັ້ງ, ຮັບປະກັນໃຫ້ທຸກຂັ້ນຕອນຂອງການຈັດຕັ້ງປະຕິບັດໄດ້ໄປຕາມກຳນົດເວລາ ແລະ ບັນລຸປະສິດທິຜົນສູງສຸດ. ໃນຕະຫຼອດຂະບວນວິວັດຂອງການກະກຽມ, ພວກຂ້າພະເຈົ້າຍາມໃດກໍໄດ້ຮັບຄວາມເອົາໃຈໃສ່ ແລະ ຊີ້ນຳໂດຍກົງຂອງການນຳຂອງພັກ, ລັດ, ລັດຖະບານ, ສະພາແຫ່ງຊາດ, ລັດຖະມົນຕີກະຊວງການຕ່າງປະເທດ ແລະ ການຮ່ວມເດີນທາງຂອງບັນດາຄະນະ, ກະຊວງ, ຂະແໜງການ ແລະ ທ້ອງຖິ່ນ.
ກ່ຽວກັບການຕອບສະໜອງ ແລະ ການເຂົ້າຮ່ວມຂອງປະຊາຄົມ ຊາວຫວຽດນາມ ຢູ່ຕ່າງປະເທດ, ພວກຂ້າພະເຈົ້າຮູ້ສຶກຕື່ນເຕັ້ນທີ່ໄດ້ຮັບຄວາມສົນໃຈ ແລະ ລົງທະບຽນເຂົ້າຮ່ວມຂອງຜູ້ແທນ 500 ກວ່າຄົນທີ່ມາຈາກ 43 ປະເທດ ແລະ ເຂດແຄ້ວນ. ນີ້ແມ່ນຕົວເລກທີ່ປະທັບໃຈ, ລື່ນກາຍຄວາມຄາດໝາຍເບື້ອງຕົ້ນ, ສະແດງໃຫ້ເຫັນຄວາມສົນໃຈ ແລະ ຄວາມຮັບຜິດຊອບຢ່າງເລິກເຊິ່ງຂອງ ຊາວຫວຽດນາມ ອາໄສຢູ່ຕ່າງປະເທດໃນເຫດການນີ້.
ຂ້າພະເຈົ້າເຊື່ອໝັ້ນວ່າ ດ້ວຍການກະກຽມຢ່າງຮອບຄອບ ແລະ ການຕອບສະໜອງຢ່າງຕັ້ງໜ້າຈາກພາຍໃນປະເທດ ແລະ ພິເສດແມ່ນ ຊາວຫວຽດນາມ ຢູ່ຕ່າງປະເທດໃນທົ່ວໂລກ, ກອງປະຊຸມ ແລະ ເວທີປາໄສຄັ້ງນີ້ຈະບັນລຸຜົນສຳເລັດ, ສ້າງບັນດາຜົນກະທົບທີ່ຕັ້ງໜ້າ ແລະ ຍືນຍາວໃຫ້ແກ່ວຽກງານ ຊາວຫວຽດນາມ ຢູ່ຕ່າງປະເທດ ກໍ່ຄືຂະບວນການພັດທະນາຂອງປະເທດຊາດ.
ໂດຍໄດ້ຈັດຂຶ້ນໃນ ປີ 2024 - ເປັນປີບັນພັບໃນການຈັດຕັ້ງປະຕິບັດໜ້າທີ່ ມະຕິກອງປະຊຸມໃຫຍ່ ຄັ້ງທີ 13 ຂອງພັກ, ທ່ານນາງຮອງລັດຖະມົນຕີສາມາດແບ່ງປັນຈຸດປະສົງ ແລະ ຄວາມໝາຍຂອງກອງປະຊຸມ ແລະ ເວທີປາໄສຄັ້ງນີ້ໄດ້ບໍ່?
ຈຸດປະສົງຕົ້ນຕໍຂອງເຫດການຄັ້ງນີ້ແມ່ນ ສ້າງເວທີປາໄສດ້ວຍພື້ນທີ່ເປີດເພື່ອໃຫ້ ຊາວຫວຽດນາມ ອາໄສຢູ່ຕ່າງປະເທດໃນທົ່ວໂລກໄດ້ມີໂອກາດພົບປະ, ແລກປ່ຽນ, ແບ່ງປັນຄວາມຄິດເຫັນ ແລະ ປະກອບສ່ວນຍິ່ງຫຼາຍກໍ່ຍິ່ງດີເຂົ້າໃນຂະບວນການພັດທະນາປະເທດຊາດ. ນີ້ບໍ່ພຽງແຕ່ແມ່ນບ່ອນຮັບຟັງບັນດາຄຳຄິດເຫັນທີ່ກະຕືລືລົ້ນຂອງປະຊາຄົມ ຊາວຫວຽດນາມ ຢູ່ຕ່າງປະເທດເທົ່ານັ້ນ, ຫາກຍັງແມ່ນໂອກາດເພື່ອໃຫ້ບັນດາອົງການພາຍໃນປະເທດໄດ້ຮັບຄຳຄິດເຫັນ ແລະ ຂໍ້ສະເໜີທີ່ມີຄຸນຄ່າເພື່ອຮັບໃຊ້ໃຫ້ແກ່ວຽກງານວາງແຜນກຳນົດນະໂຍບາຍ ແລະ ກໍ່ສ້າງຍຸດທະສາດການພັດທະນາແບບຍືນຍົງໃນໄລຍະຈະມາເຖິງ.
ເຫດການນີ້ສະແດງໃຫ້ເຫັນຄວາມເອົາໃຈໃສ່ຢ່າງເລິກເຊິ່ງຂອງພັກ ແລະ ລັດຖະບານທີ່ມີຕໍ່ກັບປະຊາຄົມ ຊາວຫວຽດນາມ ຢູ່ຕ່າງປະເທດ, ຢັ້ງຢືນບົດບາດ ແລະ ຄວາມສຳຄັນຂອງ ຊາວຫວຽດນາມ ອາໄສຢູ່ຕ່າງປະເທດໃນວຽກງານສ້າງສາ ແລະ ພັດທະນາປະເທດຊາດ. ພ້ອມກັນນັ້ນ, ກໍ່ເນັ້ນໜັກເຖິງນ້ຳໃຈມະຫາສາມັກຄີທົ່ວປວງຊົນທັງຊາດ, ສົ່ງເສີມ ແລະ ເສີມຂະຫຍາຍການປະກອບສ່ວນຂອງ ຊາວຫວຽດນາມ ອາໄສຢູ່ຕ່າງປະເທດເຂົ້າໃນການພັດທະນາເສດຖະກິດ - ສັງຄົມຂອງປະເທດຢ່າງເຂັ້ມແຂງ.
ກອງປະຊຸມ ແລະ ເວທີປາໄສຄັ້ງນີ້ບໍ່ພຽງແຕ່ມີຄວາມໝາຍເຊື່ອມໂຍງປະຊາຄົມເທົ່ານັ້ນ ຫາກຍັງໄດ້ປະກອບສ່ວນສຳຄັນເຂົ້າໃນການປະຕິບັດບັນດາຈຸດໝາຍຍຸດທະສາດຂອງພັກ ແລະ ລັດຖະບານ, ມຸ່ງໄປເຖິງການພັດທະນາແບບຍືນຍົງ ແລະ ວັດທະນາຖາວອນຂອງປະເທດຊາດໃນໄລຍະຈະມາເຖິງ.
ຂໍຮຽນທ່ານນາງຮອງລັດຖະມົນຕີ ແບ່ງປັນກ່ຽວກັບຈຸດສຸມ ແລະ ຈຸດໃຫມ່ຂອງກອງປະຊຸມ ແລະ ເວທີປາໄສຄັ້ງນີ້?
ໂຄງການໄດ້ຮັບຄວາມເອົາໃຈໃສ່ຈາກບັນດາການນຳພັກ ແລະ ລັດ; ດຶງດູດການເຂົ້າຮ່ວມຂອງຫຼາຍຄະນະ, ກະຊວງ, ຂະແໜງການ, ອົງການຈັດຕັ້ງການເມືອງ - ສັງຄົມ, ທ້ອງຖິ່ນ, ວິສາຫະກິດ… ບໍ່ພຽງແຕ່ໃນບົດບາດເປັນຜູ້ແທນເຂົ້າຮ່ວມເທົ່ານັ້ນ ຫາກຍັງຮ່ວມເດີນທາງ ຫຼື ເຂົ້າຮ່ວມໂດຍກົງເປັນປະທານບັນດາວາລະກອງປະຊຸມນຳອີກ.
ເຫດການຄັ້ງນີ້ມີຈຸດສຸມ ແລະ ຈຸດໃໝ່ຈຳນວນໜຶ່ງທີ່ເປັນໜ້າສົນໃຈ, ສ່ອງແສງໃຫ້ເຫັນເຖິງການພັດທະນາຢ່າງເຂັ້ມແຂງ ແລະ ບົດບາດນັບມື້ນັບສຳຄັນຂອງປະຊາຄົມ ຊາວຫວຽດນາມ ຢູ່ຕ່າງປະເທດ.
ກ່ອນອື່ນໝົດ, ຈຸດສຸມຂອງກອງປະຊຸມແມ່ນເພື່ອຮັບຟັງ ແລະ ຮັບເອົາຄຳຄິດເຫັນປະກອບສ່ວນຈາກ ຊາວຫວຽດນາມ ອາໄສຢູ່ຕ່າງປະເທດກ່ຽວກັບບັນດາບັນຫາພັດທະນາປະເທດຊາດ, ພິເສດແມ່ນໃນສະພາບການໂລກາພິວັດ ແລະ ຜົນສະທ້ອນຂອງການປະຕິວັດການອຸດສາຫະກຳ ຄັ້ງທີ 4 ຢ່າງແຮງໃນທຸກຂົງເຂດ. ພວກຂ້າພະເຈົ້າໄດ້ສະຫຼະເວລາຫຼາຍ ເພື່ອໃຫ້ປະຊາຊົນມີໂອກາດກ່າວຄຳປາໄສ, ແບ່ງປັນຄວາມຄິດເຫັນ, ສະເໜີຄວາມເຫັນໃຫ້ແກ່ການພັດທະນາບ້ານເກີດເມືອງນອນຢ່າງໝັ້ນຄົງ; ພ້ອມກັນນັ້ນ ກໍ່ແກ້ໄຂບັນດາບັນຫາທີ່ປະຊາຄົມພວມປະເຊີນໜ້າ.
ຈຸດໃໝ່ອີກອັນໜຶ່ງ, ນັ້ນແມ່ນເປັນຄັ້ງທຳອິດທີ່ ສະມາຄົມ ຊາວຫວຽດນາມ ຢູ່ຕ່າງປະເທດຈຳນວນໜຶ່ງໄດ້ເຂົ້າຮ່ວມກັບບັນດາອົງການພາຍໃນປະເທດເປັນເຈົ້າພາບ/ປະທານບັນດາວາລະກອງປະຊຸມຫົວເລື່ອງໃນຂົງເຂດເຕັກໂນໂລຊີສູງຄື: ທາດເຄິ່ງຊັກນຳໄຟຟ້າ ແລະ ປັນຍາປະດິດ. ສິ່ງດັ່ງກ່າວໄດ້ສະແດງໃຫ້ເຫັນບົດບາດເປັນເຈົ້າການ, ຕັ້ງໜ້າ ກໍ່ຄືເປັນການເຕີບໂຕ ແລະ ບົດບາດທີ່ນັບມື້ນັບສຳຄັນຂອງ ຊາວຫວຽດນາມ ອາໄສຢູ່ຕ່າງປະເທດ ບໍ່ພຽງແຕ່ຢູ່ບ່ອນທີ່ເຂົາເຈົ້າດຳລົງຊີວິດເທົ່ານັ້ນ, ຫາກຍັງສຳລັບການພັດທະນາຂອງບ້ານເກີດເມືອງນອນອີກດ້ວຍ.
ທ່ານຮອງລັດຖະມົນຕີສາມາດແບ່ງປັນຄວາມຄາດຫວັງສໍາລັບໝາກຜົນໄດ້ຮັບຂອງກອງປະຊຸມ ແລະ ເວທີປາໄສຄັ້ງນີ້ໄດ້ບໍ່, ຮຽນທ່ານ?
ພວກຂ້າພະເຈົ້າມີຄວາມຄາດຫວັງສູງຕໍ່ໝາກຜົນໄດ້ຮັບຂອງກອງປະຊຸມ ແລະ ເວທີປາໄສຄັ້ງນີ້. ພວກຂ້າພະເຈົ້າຄາດຫວັງວ່າ ບັນດາວາລະກອງປະຊຸມປຶກສາຫາລື ແລະ ແລກປ່ຽນໃນງານດັ່ງກ່າວຈະນຳມາເຊິ່ງແນວຄວາມຄິດປະດິດສ້າງ, ວິທີການແກ້ໄຂໃໝ່ ແລະ ແທດຈິງ, ມີຄວາມສາມາດນຳໃຊ້ໄດ້ສູງ, ພິເສດແມ່ນໃນບັນດາຂົງເຂດທີ່ສຳຄັນເຊັ່ນ: ເຕັກໂນໂລຊີສູງ, ການພັດທະນາແບບຍືນຍົງ ແລະ ນະວັດຕະກຳ. ບັນດາການປະກອບສ່ວນດັ່ງກ່າວຈະແມ່ນແຫຼ່ງກຳລັງອັນລ້ຳຄ່າ ເພື່ອໜູນຊ່ວຍໃຫ້ແກ່ຂະບວນການພັດທະນາເສດຖະກິດ - ສັງຄົມຂອງປະເທດຊາດ, ພິເສດແມ່ນໃນສະພາບການໂລກາພິວັດ ແລະ ການປະຕິວັດອຸດສາຫະກຳ ຄັ້ງທີ 4 ທີ່ພວມດຳເນີນຢ່າງແຮງ.
ພວກຂ້າພະເຈົ້າກໍ່ຫວັງວ່າ ເຫດການດັ່ງກ່າວຈະປະກອບສ່ວນປັບປຸງ ແລະ ເປີດກວ້າງເຄືອຂ່າຍການເຊື່ອມຕໍ່ລະຫວ່າງນັກຊ່ຽວຊານ, ປັນຍາຊົນ, ນັກທຸລະກິດ ຫວຽດນາມ ຢູ່ຕ່າງປະເທດກັບບັນດາອົງການພາຍໃນປະເທດ. ໂດຍຜ່ານນັ້ນ, ຊາວຫວຽດນາມ ຢູ່ຕ່າງປະເທດຈະເຂົ້າຮ່ວມຢ່າງຕັ້ງໜ້າກວ່າອີກໃນບັນດາໂຄງການພັດທະນາປະເທດຊາດ, ຈາກນັ້ນ ກໍ່ຈະສ້າງປະຊາຄົມ ຊາວຫວຽດນາມ ຢູ່ຕ່າງປະເທດ ທີ່ນັບມື້ນັບສາມັກຄີ, ສະໜິດຕິດພັນ ແລະ ປະກອບສ່ວນຢ່າງຕັ້ງໜ້າກວ່າອີກໃຫ້ແກ່ບ້ານເກີດເມືອງນອນ.
ຂໍຂອບໃຈທ່ານຮອງລັດຖະມົນຕີ!
 | ຍສໝ - ນີ້ແມ່ນການແບ່ງປັນຂອງທ່ານ Peter ຮົ່ງ, ກຳມະການສູນກາງແນວໂຮມປະເທດຊາດ ຫວຽດນາມ, ປະທານສະມາຄົມນັກທຸລະກິດຊາວຫວຽດນາມ ອາໄສຢູ່ຕ່າງປະເທດ ກ່ຽວກັບທີ່ຕັ້ງຂອງປະເທດຊາດພາຍໃຕ້ການນຳພາຂອງ ສະຫາຍເລຂາທິການໃຫຍ່ ຫງວຽນຟູ໋ຈ້ອງ. |
 | ຍສໝ - ເນື່ອງໃນໂອກາດສະເຫຼີມສະຫຼອງ 49 ປີແຫ່ງວັນທ້ອນໂຮມປະເທດຊາດເປັນເອກະພາບ (30 ເມສາ 1975 – 30 ເມສາ 2024) ແລະ ປົດປ່ອຍໝູ່ເກາະ ເຈື່ອງຊາ (29 ເມສາ 1975), ຄົບຮອບ 69 ປີແຫ່ງວັນສ້າງຕັ້ງກອງທັບເຮືອປະຊາຊົນຫວຽດນາມ (7 ພຶດສະພາ 1955), ຄະນະກຳມະການແຫ່ງລັດກ່ຽວກັບຊາວຫວຽດນາມ ... |
ມິງດຶກ
