| ນັກຮຽນຮູ້ ອາກຊັງຕິນ ຍ້ອງຍໍຊົມເຊີຍໄຊນະນະວັນທີ 30 ເມສາ ຂອງ ຫວຽດນາມ | |
| ເຊື່ອມຕໍ່ຊາວຕ່າງປະເທດທີ່ດຳລົງຊີວິດ ແລະ ເຮັດວຽກຢູ່ແຂວງ ດົ່ງນາຍ |
ລາຍການ ໄດ້ດຳເນີນນັບແຕ່ວັນທີ 24 – 30 ເມສາ 2024 ດ້ວຍການເຂົ້າຮ່ວມຂອງຜູ້ແທນຊາວຫວຽດນາມ ອາໄສຢູ່ຕ່າງປະເທດເກືອບ 70 ຄົນທີ່ກັບມາຈາກ 22 ປະເທດ, ສະແດງຈິດໃຈອວ່າຍໜ້າເມືອຫາປະເທດຊາດ, ກັບມາເຂດແຄວ້ນອັນສັກສິດຂອງປະເທດຊາດ, ແບ່ງປັນຄວາມທຸກຍາກລຳບາກຂອງບັນດາທະຫານທີ່ປົກປັກຮັກສາອະທິປະໄຕໝູ່ເກາະບ້ານເກີດເມືອງນອນທັງເວັນທັງຄືນ.
ໃນການເດີນເຮືອປີນີ້, ບັນດາຜູ້ແທນຊາວຫວຽດນາມ ອາໄສຢູ່ຕ່າງປະເທດ ໄດ້ໄປຢ້ຽມຢາມ 5 ເກາະຄື: ຊິ່ງຕົນດົງ, ແລ່ນດາວ, ດ໋າດົງ, ດ໋າໄຕ, ເທດສະບານ ເຈື່ອງຊາ ແລະ ເຮືອນຍາມ DK-I/14 ຝຸກເຕີ່ນ. ທີ່ການຢ້ຽມຢາມ, ລະດົມກຳລັງໃຈໃຫ້ພະນັກງານ, ນັກຮົບ ແລະ ປະຊາຊົນຢູ່ບັນດາເກາະ ແລະ ເຮືອນຍາມ, ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ໄດ້ສະແດງຄວາມເປັນກຽດ, ພາກພູມໃຈ ເມື່ອໄດ້ໄປຢ້ຽມຢາມສ່ວນເຂດແຄວ້ນເລືອດເນື້ອຂອງປະເທດຊາດ; ໃຫ້ຄວາມນັບຖືຈິດໃຈພິລະອາດຫານຜ່ານຜ່າທຸກຄວາມຫຍຸ້ງຍາກ, ລຳບາກຍາກເຂັນຂອງກອງທັບ ແລະ ປະຊາຊົນຢູ່ບັນດາໝູ່ເກາະ ແລະ ເຮືອນຍາມ ເພື່ອສຳເລັດໜ້າທີ່ທີ່ໄດ້ຮັບການມອບໝາຍໃຫ້ເປັນຢ່າງດີ.
ໂດຍໄດ້ເຫັນປະຈັກຕາການດຳລົງຊີວິດຢູ່ໝູ່ເກາະ, ເຮືອນຍາມ; ພົບປະແລກປ່ຽນສີລະປະ ແລະ ຢ້ຽມຢາມໂຮງຮຽນ, ຄອບຄົວ ແລະ ບັນດາວັດຢູ່ເກາະ, ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ກໍສະແດງຄວາມປິຕິຊົມຊື່ນຍ້ອນເກາະ ແລະ ເຮືອນຍາມນັບມື້ນັບກາຍເປັນສີຂຽວ, ກວ້າງຂວາງ ແລະ ງາມຕາ, ຊີວິດການເປັນຢູ່ນັບມື້ນັບດີຂຶ້ນຍ້ອນການເບິ່ງແຍງດູແລຂອງພັກ ແລະ ລັດ, ການໜູນຊ່ວຍຂອງພີ່ນ້ອງຮ່ວມຊາດທົ່ວປະເທດ, ໃນນັ້ ນມີຊາວຫວຽດນາມ ຢູ່ຕ່າງປະເທດ.
 |
| ຊາວຫວຽດນາມ ອາໄສຢູ່ຕ່າງປະເທດ ມອບຂອງຂວັນໃຫ້ພະນັກງານ, ນັກຮົບເຮືອນຍາມ DK-I/14. |
ພິເສດ, ບັນດາຜູ້ແທນຊາວຫວຽດນາມ ອາໄສຢູ່ຕ່າງປະເທດ ໄດ້ເຂົ້າຮ່ວມພິທີສະເຫຼີມສະຫຼອງບັນດານັກຮົບວິລະຊົນທີ່ເສຍສະຫຼະຊີວິດ ເພື່ອປົກປັກຮັກສາໝູ່ເກາະຂອງບ້ານເກີດເມືອງນອນ, ເຂົ້າຮ່ວມພິິທີມິດຕິງ ແລະ ແຫ່ຂະບວນສະເຫຼີມສະຫຼອງ 49 ປີແຫ່ງວັນປົດປ່ອຍໝູ່ເກາະ ເຈື່ອງຊາ ຢູ່ເທດສະບານ ເຈື່ອງຊາ; ເຂົ້າຮ່ວມພິທີເຄົາລົບທຸງ, ພິທີຖະຫວາຍທູບທຽນ, ຖະຫວາຍດອກໄມ້ຢູ່ອະນຸສາວະລີບັນດາວິລະຊົນ ແລະ ນັກຮົບທີ່ສະຫຼະຊີວິດເພື່ອຊາດ ແລະ ອະນຸສາວະລີປະທານ ໂຮ່ຈິມິນ ຢູ່ໝູ່ເກາະ.
ກ່າວຄຳເຫັນທີ່ການພົບປະຢູ່ເທດສະບານ ເຈື່ອງຊາ, ທ່ານນາງ ກ່າວຮົງວິງ - ກຳມະການຄະນະບໍລິຫານງານສະມາຄົມຊາວຫວຽດນາມ, ຮອງປະທານສະມາຄົມແມ່ຍິງ ຫວຽດນາມ ປະຈຳ ໂປໂລຍ, ສະມາຊິກຄະນະຕິດຕໍ່ຊາວຫວຽດນາມ ອາໄສຢູ່ ເອີລົບ ເພື່ອທະເລ, ໝູ່ເກາະ ຫວຽດນາມ - ມີຄວາມຮູ້ສຶກຕື້ນຕັນໃຈໃຫ້ຮູ້ວ່າ ນີ້ແມ່ນຄັ້ງທີ 2 ທີ່ທ່ານໂຊກດີມີໂອກາດໄດ້ມາຢ້ຽມຢາມ ເຈື່ອງຊາ ແລະ ເຮືອນຍາມ DK-I. ທ່ານນາງ ວິງ ໄດ້ສະແດງຄວາມປິຕິຊົມຊື່ນເມື່ອໄດ້ເຫັນປະຈັກຕາການພັດທະນາໃນທຸກດ້ານຢູ່ທີ່ນີ້. “ການປ່ຽນແປງນີ້ ສະແດງໃຫ້ເຫັນຄວາມຕັດສິນໃຈອັນໃຫຍ່ຫຼວງຂອງພັກ, ລັດ, ທົ່ວປວງຊົນ, ທົ່ວກອງທັບໃນການຢັ້ງຢືນອະທິປະໄຕຜືນແຜ່ນດິນອັນສັກສິດຂອງປະເທດຊາດ”, ທ່ານນາງ ວິງ ກ່າວ.
ທ່ານນາງແບ່ງປັນວ່າ ພາຍຫຼັງການຢ້ຽມຢາມ ເຈື່ອງຊາ ແຕ່ປີ 2012 ມາຮອດປະຈຸບັນ, ຊາວຫວຽດນາມ ອາໄສຢູ່ຕ່າງປະເທດ ໃນທົ່ວໂລກ ໄດ້ມີບັນດາການເຄື່ອນໄຫວຢ່າງແທດຈິງຄື: ສ້າງຕັ້ງສະໂມສອນ ຮ່ວາງຊາ - ເຈື່ອງຊາ, ສະໂມສອນຄົນຮັກທະເລ, ໝູ່ເກາະຫວຽດນາມ, ກອງທຶນເພື່ອເຈື່ອງຊາ, ຈັດຕັ້ງການສຳມະນາວິທະຍາສາດຫລາຍຄັ້ງ ແລະ ງານວາງສະແດງກ່ຽວກັບໝູ່ເກາະ ຫວຽດນາມ ເພື່ອສະໜັບສະໜູນ, ເຜີຍແຜ່ຄວາມຮັກແພງທະເລ, ໝູ່ເກາະຕໍ່ປະຊາຄົມຊາວຫວຽດນາມ ໃນທົ່ວໂລກ ແລະ ເພື່ອນມິດສາກົນ. ທ່ານນາງ ວິງ ຢືນຢັນວ່າ ຊາວຫວຽດນາມ ອາໄສຢູ່ຕ່າງປະເທດແຕ່ລະຄົນ, ພາຍຫຼັງກັບຄືນໄປປະເທດ, ຈະສືບຕໍ່ເສີມຂະຫຍາຍບົດບາດຂອງຕົນໃນການເຄື່ອນໄຫວມຸ່ງໄປເຖິງ ເຈື່ອງຊາ ທີ່ຮັກແພງ.
 |
| ຄະນະປະຕິບັດງານຂອງຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ ແລະ ຜູ້ແທນຊາວຫວຽດນາມ ອາໄສຢູ່ຕ່າງປະເທດ ຖ່າຍຮູບທີ່ລະນຶກຢູ່ເທດສະບານ ເຈື່ອງຊາ. |
ທ່ານ ເຈີ່ນຖັງ, ຊາວຫວຽດນາມ ອາໄສຢູ່ອາເມລິກາ ໄດ້ແບ່ງປັນເລື່ອງທີ່ໄດ້ຮັບການສົ່ງແຮງບັນດານໃຈຈາກທະເລ, ໝູ່ເກາະຂອງບ້ານເກີດເມືອງນອນ, ໃນປີ 2013-2014, ທ່ານ ໄດ້ເກັບກຳແຜນທີ່ບູຮານຄະດີ ຮ່ວາງຊາ - ເຈື່ອງຊາ ແລະ ຈີນ 150 ແຜ່ນ, ແລະ ວາງສະແດງຢູ່ງານວາງສະແດງທຳອິດຢູ່ນະຄອນ ດານັງ ໃນເດືອນມັງກອນ ປີ 2014. ພາຍຫຼັງເຫດ ການນີ້, ກະຊວງຖະແຫຼງຂ່າວ ແລະ ການສື່ສານ ໄດ້ສັງລວມເອກະສານຂອງທ່ານ ແລະ ສະຖາບັນ ຫານໂນມ ເພື່ອສ້າງໂຄງການທະເລ, ໝູ່ເກາະ ຫວຽດນາມ ແລະ ຈັດຕັ້ງ 100 ງານວາງສະແດງທົ່ວປະເທດໃນປີ 2014 ແລະ 2015 ເພື່ອເຜີຍແຜ່ຄວາມພາກພູມໃຈຂອງບ້ານເກີດເມືອງນອນໃນໃຈປະຊາຊົນ. ໂດຍໄດ້ເຂົ້າຮ່ວມການເດີນທະເລຢ້ຽມຢາມ ເຈື່ອງຊາ ໃນປີນີ້, ທ່ານ ຖັງ ກໍສະແດງຄວາມຊົມຊື່ນ ແລະ ຕື້ນຕັນໃຈ, ເພາະວ່າ ສາມາດ “ໄປເພື່ອຮູ້ຄຸນຄ່າອັນສັກສິດຂອງປະເທດຊາດ, ໄປເພື່ອເບິ່ງທະເລ, ໝູ່ເກາະຂອງຫວຽດນາມ ສວຍງາມຄືແນວໃດ; ແລະສິ່ງທີ່ສຳຄັນທີ່ສຸດແມ່ນພວກເຮົາສາມາດເຫັນໄດ້ດ້ວຍຕາຕົນເອງເຖິງຄວາມຕັ້ງໝັ້ນ ແລະ ການລົງຕົວຈິງຊີວິດການເປັນຢູ່ຂອງກອງທັບເຮືອຫວຽດນາມ ໃນດ່ານໜ້າປົກປັກຮັກສາທະເລ, ໝູ່ເກາະ”.
ແລະ ກໍ່ໃນມື້ສຸດທ້າຍທີ່ຢູ່ເທິງກຳປັ່ນເລກທີ 561 ກັບຄືນສູ່ແຜ່ນດິນ, ບັນດາຜູ້ແທນຊາວຫວຽດນາມ ອາໄສຢູ່ ອາຊີ ໃນຄະນະ ໄດ້ພົບປະເຈລະຈາກ່ຽວກັບການສ້າງຕັ້ງຄະນະຕິຕໍ່ຊາວຫວຽດນາມ ຢູ່ ອາຊີ - ປາຊີຟິກ ເພື່ອທະເລ, ໝູ່ເກາະ ຫວຽດນາມ.
ກ່ອນການຢ້ຽມຢາມ, ໂດຍຕອບສະໜອງຄຳຮຽກຮ້ອງຂອງຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ປະຊາຄົມຊາວຫວຽດນາມ ຢູ່ປະເທດຕ່າງໆ ໄດ້ປະກອບສ່ວນຢ່າງຕັ້ງໜ້າດ້ານງົບປະມານການໃຊ້ຈ່າຍເພື່ອໜູນຊ່ວຍໂຄງການ “ທົ່ວປະເທດເພື່ອ ເຈື່ອງຊາ” ແລະ ຂອງຂວັນເຊິ່ງແມ່ນບັນດາວັດຖຸສິ່ງຂອງທີ່ຈຳເປັນເພື່ອໜູນຊ່ວຍໃນການດຳລົງຊີວິດ, ວຽກງານຂອງກອງທັບ, ປະຊາຊົນເມືອງເກາະ ເຈື່ອງຊາ ແລະ ເຮືອນຍາມ DK-I. ຕາມນັ້ນແລ້ວ, ຍອດຈຳນວນເງິນ, ເຄື່ອງຂອງທີ່ໄດ້ຮັບການອຸປະຖຳໃນຄັ້ງນີ້ມີມູນຄ່າເກືອບ 1,6 ຕື້ດົ່ງ; ໃນນັ້ນ, ເກືອບ 850 ລ້ານດົ່ງໄດ້ໜູນຊ່ວຍໂຄງການ “ທົ່ວປະເທດເພື່ອເຈື່ອງຊາ” ແລະ ສິ່ງຂອງທີ່ຈຳເປັນໃນຊີວິດປະຈຳວັນ ລວມມູນຄ່າເກືອບ 750 ລ້ານດົ່ງໄດ້ມອບໃຫ້ເຂດໝູ່ເກາະ ແລະ ເຮືອນຍາມ DK-I/14 ໂດຍກົງ.
 |
| ທ່ານນາງ ຫງວຽນທິຢຸງ, ຊາວຫວຽດນາມ ອາໄສຢູ່ສາທາລະນະລັດເຊັກໂກ ໄດ້ໂອ້ລົມກັບບັນດາເດັກນ້ອຍຢູ່ ເຈື່ອງຊາ. |
ທ່ານ ຫງວຽນແມ້ງດົງ - ຮອງຫົວໜ້າຄະນະກຳມະການແຫ່ງລັດກ່ຽວກັບຊາວຫວຽດນາມ ອາໄສຢູ່ຕ່າງປະເທດ, ຫົວໜ້າຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດ ໃຫ້ຮູ້ວ່າ ໃນຊຸມປີມໍ່ໆມານີ້, ການຈັດຕັ້ງບັນດາຄະນະປະຕິບັດງານ ເພື່ອມາຢ້ຽມຢາມ ເຈື່ອງຊາ ແລະ ເຮືອນຍາມ DK-I ໄດ້ປະກອບສ່ວນສຳຄັນໃນການເຜີຍແຜ່ຄວາມຮັກແພງຕໍ່ບ້ານເກີດເມືອງນອນ, ທະເລ, ໝູ່ເກາະໃນປະຊາຄົມຊາວຫວຽດນາມ ອາໄສຢູ່ຕ່າງປະເທດ, ແມ່ນໂອກາດ ເພື່ອໃຫ້ພໍ່ແມ່ປະຊາຊົນຊາວຫວຽດນາມ ອາໄສຢູ່ຕ່າງປະເທດ ໄດ້ເຫັນປະຈັກຕາເຖິງຄວາມຕັດສິນໃຈ ແລະ ບັນດາຜົນງານຂອງພັກ ແລະ ລັດ ໃນການປົກປັກຮັກສາອະທິປະໄຕເຂດທະເລ, ໝູ່ເກາະອັນສັກສິດຂອງຫວຽດນາມ, ຜ່ານນັ້ນ ກໍ່ສືບຕໍ່ຢືນຢັນອະທິປະໄຕຂອງຫວຽດນາມ ສຳລັບໝູ່ເກາະ ເຈື່ອງຊາ ແລະ ຮ່ວາງຊາ.
ພ້ອມກັນນັ້ນ, ນີ້ກໍ່ແມ່ນໂອກາດເພື່ອໃຫ້ຊາວຫວຽດນາມ ອາໄສຢູ່ຕ່າງປະເທດຈາກຫຼາຍປະເທດໃນໂລກໄດ້ພົບປະ, ແລກປ່ຽນ, ຕິດພັນຊາວຫວຽດນາມ ອາໄສຢູ່ຕ່າງປະເທດນຳກັນ, ກັບປະຊາຊົນ, ພະນັກງານ, ນັກຮົບພາຍໃນປະເທດ, ປະກອບສ່ວນເພີ່ມທະວີກຸ່ມກ້ອນມະຫາສາມັກຄີທົ່ວປະເທດຊາດ, ຢືນຢັນຈິດໃຈມຸ່ງໄປເຖິງບ້ານເກີດເມືອງນອນ, ຮ່ວມມືກັບປະຊາຊົນພາຍໃນປະເທດໃນພາລະກິດແຫ່ງການສ້າງສາ, ປົກປັກຮັກສາ ແລະ ພັດທະນາບ້ານເກີດເມືອງນອນ ຫວຽດນາມ.
ການສ້າງຕັ້ງຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດ ໄປຢ້ຽມຢາມ ເຈື່ອງຊາ ແລະ ເຮືອນຍາມ DK-I ໄດ້ເປັນການຢືນຢັນນະໂຍບາຍສະເໝີຕົ້ນສະເໝີປາຍຂອງພັກ ແລະ ລັດ ໃນການຖືປະຊາຄົມຊາວຫວຽດນາມ ອາໄສຢູ່ຕ່າງປະເທດເປັນສ່ວນໜຶ່ງທີ່ບໍ່ສາມາດຕັດແຍກອອກຈາກປະເທດຫວຽດນາມ, ປະກອບສ່ວນເພີ່ມທະວີຄວາມສາມັກຄີໃຫຍ່ ແລະ ຄວາມປອງດອງຊາດ, ຊ່ວຍຍົກສູງຄວາມຮັບຜິດຊອບຂອງປະຊາຊົນພາຍໃນປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ ຮ່ວມມືກັນປະກອບສ່ວນເຂົ້າໃນວຽກງານຕໍ່ສູ້ປົກປັກຮັກສາອະທິປະໄຕເຂດທະເລ, ໝູ່ເກາະຂອງບ້ານເກີດເມືອງນອນ.
ກ່ອນໜ້ານັ້ນ, ວັນທີ 20 ເມສາ 2024, ຫຼາຍຄົນໃນຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດ ກໍ່ໄດ້ເຂົ້າຮ່ວມຄະນະຜູ້ແທນຊາວຫວຽດນາມ ອາໄສຢູ່ຕ່າງປະເທດ ໄປຖະຫວາຍທູບທຽນຢູ່ວິຫານ ຮຸ່ງ ເນື່ອງໃນໂອກາດວັນໄຫວ້ບູຊາບັນພະບຸລຸດເຈົ້າຊີວິດຮຸ່ງ (ວັນທີ 10 ເດືອນ 3 ຕາມປະຕິທີນຈັນທະຄະຕິ), ນຳເອົາເຫດການກາຍເປັນບັນດາການເຄື່ອນໄຫວກ່ຽວກັບແຫຼ່ງທີ່ມີຄວາມໝາຍທີ່ສຸດ, ຢືນຢັນນ້ຳໃຈມຸ່ງໄປເຖິງບ້ານເກີດເມືອງນອນ, ຕິດພັນເລືອດເນື້ອກັບກົກເຄົ້າເຫງົ້າກໍຂອງຊາດ, ປະກອບສ່ວນຍົກສູງຄວາມເອກອ້າງທະນົງໃຈ, ການເຊີດຊູຊາດຕົນຂອງພໍ່ແມ່່ປະຊາຊົນຫວຽດນາມ ທີ່ຫ່າງໄກຈາກປະເທດຊາດ.
ມິງດຶກ
