 |
| ຫ້ອງຮຽນພາສາຫວຽດສໍາລັບເດັກນ້ອຍຫວຽດນາມຢູ່ຕ່າງປະເທດ ແລະ ປະຊາຊົນລາວ ໂດຍທ່ານນາງ ຫງວຽນທິທູຮວຽນ ຂຶ້ນຫ້ອງທີ່ວັດ ເຟິດຕິກ, ນະຄອນຫຼວງວຽງຈັນ. (ພາບ: Do Ba Thanh/ TTXVN) |
ໃນຊຸມປີມໍ່ໆມານີ້, ການເຄື່ອນໄຫວໂຄສະນາພາສາຫວຽດນາມຢູ່ຕ່າງປະເທດ, ພິເສດແມ່ນຢູ່ລາວ, ໄດ້ເຫັນຄວາມມານະພະຍາຍາມຢ່າງບໍ່ຢຸດຢັ້ງຂອງ “ບັນດາຜູ້ຕາງໜ້າພາສາຫວຽດນາມ”, ຜູ້ມີຄວາມເມົາມົວຫຼົງໄຫຼ ແລະ ຄວາມຈິງໃຈກັບພາສາຫວຽດ, ພ້ອມກັນນັ້ນ ກໍກາຍເປັນຂົວເຊື່ອມຕໍ່ວັດທະນະທຳລະຫວ່າງປະຊາຊົນສອງປະເທດ.
ເນື່ອງໃນໂອກາດວັນເຊີດຊູພາສາຫວຽດໃນປະຊາຄົມຊາວຫວຽດນາມ ອາໄສຢູ່ຕ່າງປະເທດ (8 ກັນຍາ), ນາງ ຫງວຽນທິທູຮວຽນ - ຜູ້ຕາງໜ້າພາສາຫວຽດນາມ ປະຈຳ ປີ 2023 ໄດ້ແບ່ງປັນກັບນັກຂ່າວຂອງ TTXVN ຢູ່ນະຄອນຫຼວງວຽງຈັນ ກ່ຽວກັບຄວາມປະທັບໃຈທີ່ສຸດໃນໃຈນາງ ຄືການເຜີຍແຜ່ຄວາມຮັກແພງຕໍ່ພາສາຫວຽດນາມໃນຊຸມຊົນຢ່າງເຂັ້ມແຂງ.
ນາງ ທູຮວຽນເນັ້ນໜັກວ່າ: “ທຸກໆການເຄື່ອນໄຫວ, ທຸກຄວາມມານະພະຍາຍາມ, ບໍ່ວ່າຈະໜ້ອຍພຽງໃດກໍ່ສາມາດສ້າງຄວາມເຜີຍແຜ່ຢ່າງໃຫຍ່ຫຼວງ, ປະກອບສ່ວນເຂົ້າໃນການເຊື່ອມຕໍ່ວັດທະນະທຳ ແລະ ບຳລຸງສ້າງມິດຕະພາບທີ່ຍິ່ງໃຫຍ່ລະຫວ່າງ ຫວຽດນາມ - ລາວ.
ເຖິງຢ່າງໃດກໍຕາມ, ການເຜີຍແພ່ພາສາຫວຽດນາມຢູ່ລາວບໍ່ແມ່ນເມື່ອໃດກໍ່ງ່າຍ. ຕາມນາງ ທູຮວຽນ ແລ້ວ, ຄວາມຫຍຸ້ງຍາກທີ່ສຸດແມ່ນຂາດບັນດາເອກະສານການສອນທີ່ເໝາະສົມກັບຜູ້ຮຽນ. ເຖິງວ່າ ຫວຽດນາມ ແລະ ລາວ ແມ່ນຢູ່ໃກ້ກັບວັດທະນະທຳ ແລະ ປະຊາຊົນກໍ່ຕາມ, ແຕ່ລະບົບການຂຽນ ແລະ ວິທີການຜັນສຽງແມ່ນແຕກຕ່າງກັນຢ່າງສົມບູນ, ເຮັດໃຫ້ການເຂົ້າເຖິງໃນເບື້ອງຕົ້ນປະສົບອຸປະສັກຫຼາຍຢ່າງ.
ເພື່ອຜ່ານຜ່າສິ່ງທ້າທາຍນີ້, ນາງ ທູຮວຽນຕ້ອງສອນ, ຮຽບຮຽງ ແລະ ດັດແປງເອກະສານຕາມສະພາບຕົວຈິງຂອງຫ້ອງຮຽນ; ພ້ອມກັນນັ້ນ, ໝູນໃຊ້ການໜູນຊ່ວຍຂອງບັນດາຄູອາສາສະໝັກ ແລະ ເຊື່ອມຕໍ່ວັດທະນະທຳຂອງ 2 ປະເທດເພື່ອຊ່ວຍໃຫ້ຜູ້ຮຽນຮ້ສຶກໃກ້ຊິດ ແລະ ມີຄວາມສົນໃຈກ່ຽວກັບພາສາຫວຽດນາມກວ່າເກົ່າ.
ນາງ ທູຮວຽນ ໄດ້ສັງເກດເຫັນວ່າ ຄວາມສົນໃຈຂອງຊາວລາວສຳລັບພາສາຫວຽດນາມ ນັບມື້ນັບເພີ່ມຂຶ້ນ. ໃນເມື່ອກ່ອນ, ມີຫຼາຍຄົນຮຽນພາສາຫວຽດນາມ ພຽງແຕ່ເພື່ອສື່ສານ ຫຼື ເຮັດວຽກເທົ່ານັ້ນ, ແຕ່ປະຈຸບັນ, ໄວໜຸ່ມຫຼາຍຄົນຮຽນພາສາຫວຽດນາມ ດ້ວຍຄວາມສົນໃຈ ແລະ ຮັກແພງວັດທະນະທຳຫວຽດນາມ. ການເຂົ້າຮ່ວມຂອງບັນດາຄູອາສາສະໝັກນັບມື້ນັບຫຼວງຫຼາຍໄດ້ເຮັດໃຫ້ພາສາຫວຽດນາມມີຄວາມໃກ້ຊິດ ແລະ ເຜີຍແຜ່ໃນຊຸມຊົນ.
ໃນຂະນະນັ້ນ, ນາງ ລານນີ ລານນີ ເພັດນິນ, ຜູ້ຕາງໜ້າພາສາຫວຽດນາມ ປະຈຳ ປີ 2024 ໄດ້ປະຕິບັດຫຼາຍຂໍ້ລິເລີ່ມເພື່ອເຜີຍແຜ່ພາສາ ແລະ ວັດທະນະທຳ ຫວຽດນາມ.
ໂດຍເຫັນດີເຖິງຄວາມຕ້ອງການແຫຼ່ງຊັບພະຍາກອນມະນຸດທີ່ຮູ້ພາສາຫວຽດນາມ ໃນສະພາບການມີວິສາຫະກິດ ຫວຽດນາມ - ລາວ ຫຼາຍແຫ່ງ, ນາງ ລານນີໄດ້ສ້າງຕັ້ງສູນສອນພາສາຫວຽດນາມ, ສົມທົບກັບບັນດາຫ້ອງຮຽນໂດຍກົງ ແລະ ພື້ນຖານດີຈີຕອນຄື Facebook, TikTok, YouTube... ບັນດາວິດິໂອນີ້ໄດ້ດຶງດູດຜູ້ຕິດຕາມນັບພັນຄົນ, ກາຍເປັນຂົວເຊື່ອມຕໍ່ລະຫວ່າງພາສາ ແລະ ວັດທະນະທຳ ຫວຽດນາມ ກັບປະຊາຄົມຊາວລາວ.
ບໍ່ຢຸດຢັ້ງຢູ່ນັ້ນ, ນາງ ລານນີ ຍັງໄດ້ຮຽບຮຽງປຶ້ມຮຽນພາສາຫວຽດນາມດ້ວຍຕົນເອງ ແບບສັ້ນ, ຈື່ຈຳໄດ້ງ່າຍກວ່າ 10 ຫົວ ໂດຍມີຄລິບການແນະນຳ, ຊ່ວຍໃຫ້ຜູ້ຮຽນເຂົ້າເຖິງຄວາມຮູ້ໄດ້ທຸກເວລາ, ທຸກບ່ອນ. ນາງໄດ້ເຂົ້າຮ່ວມແປພາສາ, ແນະນຳລາຍການສອງພາສາ ຫວຽດນາມ - ລາວ, ພ້ອມກັບບັນດາການເຄື່ອນໄຫວພົບປະແລກປ່ຽນໂດຍສະຖານທູດ ຫວຽດນາມ ປະຈຳ ລາວ ຈັດຕັ້ງ.
 |
| ນາງ ຫງວຽນທິທູຮວຽນ (ເບື້ອງຂວາ) ຊີ້ນຳນັກສຶກສາລາວຝຶກຊ້ອມຮ້ອງເພງຫວຽດນາມ. (ພາບ: Do Ba Thanh/ TTXVN) |
ແບ່ງປັນກ່ຽວກັບແຜນການທີ່ຈະມາເຖິງ, ນາງ ລານນີ ໃຫ້ຮູ້ວ່າ: ຈະເຂົ້າຮ່ວມຜະລິດລາຍການສອງພາສາ “LaoViet360” ຢູ່ຊ່ອງໂທລະພາບນະຄອນຫຼວງວຽງຈັນ (Vte9) ເພື່ອແນະນຳວັດທະນະທໍາ, ຮີດຄອງປະເພນີ, ສະຖານທີ່ທ່ອງທ່ຽວຂອງສອງປະເທດ, ພ້ອມທັງຊ່ວຍໃຫ້ຜູ້ຊົມໄດ້ຝຶກຟັງ, ອອກສຽງ, ຂະຫຍາຍຄໍາສັບພາສາຫວຽດນາມ ຜ່ານບັນດາສະຖານະການສື່ສານທີ່ຄຸ້ນເຄີຍ.
ຄຽງຂ້າງບັນດາການເຄື່ອນໄຫວພື້ນເມືອງ ແລະ ລາຍການໂທລະພາບ, ນາງ ລານນີ ຍັງມີແຜນການເປີດກວ້າງຫ້ອງຮຽນອອນໄລນ໌, ຈັດຕັ້ງການພົບປະແລກປ່ຽນວັດທະນະທຳ, ຜະລິດເນື້ອໃນດີຈີຕອນ ແລະ ເຊື່ອມຕໍ່ກັບບັນດາອົງການຈັດຕັ້ງການສຶກສາພ້ອມກັບປະຊາຄົມຊາວຫວຽດນາມ ຢູ່ລາວ, ສ້າງເຄືອຂ່າຍໜູນຊ່ວຍຢ່າງແຂງແຮງເພື່ອປົກປັກຮັກສາ ແລະ ເຜີຍແຜ່ຄວາມງາມຂອງພາສາຫວຽດນາມ.
ນາງແບ່ງປັນວ່າ ສິ່ງສຳຄັນທີ່ສຸດເມື່ອສອນພາສາຫວຽດນາມຢູ່ຕ່າງປະເທດແມ່ນຊ່ວຍໃຫ້ຜູ້ຮຽນຮູ້ສຶກວ່າພາສາຫວຽດນາມບໍ່ພຽງແຕ່ແມ່ນພາສາໜຶ່ງເທົ່ານັ້ນ, ຫາກຍັງແມ່ນວັດທະນະທຳທີ່ມີຊີວິດຊີວາ - ຕິດພັນກັບເລື່ອງລາວ, ດົນຕີ, ອາຫານ ແລະ ຊີວິດ.
ພາສາຫວຽດນາມ ຢູ່ ລາວ ພວມຄ່ອຍໆກາຍເປັນພາສາບໍ່ພຽງສື່ສານເທົ່ານັ້ນ ຫາກຍັງແມ່ນພາຫະນະທີ່ເຊື່ອມໂຍງຄວາມຮັກແພງ, ເຜີຍແຜ່ວັດທະນະທຳ ແລະ ສະໜິດຕິດພັນກັບປະຊາຄົມ. ຍ້ອນຄວາມມານະພະຍາຍາມຂອງຜູ້ຕາງໜ້າພາສາຫວຽດນາມ, ພາສາ ແລະ ວັດທະນະທຳ ຫວຽດນາມ ນັບມື້ນັບໄດ້ຮັບຄວາມຮັກແພງ, ເຄົາລົບ ແລະ ສະໜິດສະໜົມກັບປະຊາຄົມຊາວລາວຫຼາຍກວ່າ.
ເຂົາເຈົ້າໄດ້ ແລະ ພວມພິສູດໃຫ້ເຫັນວ່າ, ດ້ວຍຄວາມເອກອ້າງທະນົງໃຈ ແລະ ມີຫົວຄິດປະດິດສ້າງ, ຜູ້ຕາງໜ້າພາສາຫວຽດນາມແຕ່ລະຄົນສາມາດປະກອບສ່ວນສ້າງການປ່ຽນແປງຢ່າງຕັ້ງໜ້າແລະ ເຮັດໃຫ້ພາສາຫວຽດນາມ ໃນໃຈເພື່ອນມິດສາກົນນັບມື້ນັບແໜ້ນແຟ້ນ ແລະ ເອື້ອມອອກກ່ວາອີກ.
 | ທ່ານເອກອັກຄະລັດຖະທູດຈີນ ຍ້ອງຍໍຜົນງານ ແລະ ເສັ້ນທາງພັດທະນາຂອງຫວຽດນາມ ຍສໝ - ເນື່ອງໃນໂອກາດຄົບຮອບ 80 ປີ ວັນຊາດຂອງປະເທດຫວຽດນາມ, ທ່ານເອກອັກຄະລັດຖະທູດຈີນ ແຮເວິຍ ໄດ້ມີການພົບປະກັບສື່ມວນຊົນ ໃນວັນທີ 28 ສິງຫາ. ທ່ານໄດ້ສົ່ງຄໍາອວຍພອນໄປຍັງ ພັກ, ລັດ ແລະ ປະຊາຊົນຫວຽດນາມ. ທ່ານໄດ້ຕີລາຄາສູງ ບັນດາຜົນສໍາເລັດອັນຍິ່ງໃຫຍ່ ທີ່ຫວຽດນາມໄດ້ບັນລຸ. ທ່ານໄດ້ຢືນຢັນ ຄວາມສຳພັນສອງຝ່າຍພວມເຂົ້າສູ່ໄລຍະການພັດທະນາໃໝ່, ຢ່າງເລິກຊຶ້ງ ແລະ ຮອບດ້ານ. |
 | ນ້ຳໃຈມິດຕະພາບອັນຍິ່ງໃຫຍ່ລະຫວ່າງຫວຽດນາມ ແລະ ລາວ ແມ່ນຊັບສິນອັນລ້ຳຄ່າຂອງສອງປະເທດ. ຍສໝ - ທ່ານຫົວໜ້າຄະນະພົວພັນຕ່າງປະເທດສູນກາງລາວ ຢືນຢັນວ່າ: ພິທີສະເຫຼີມສະຫຼອງ 80 ປີແຫ່ງວັນການປະຕິວັດເດືອນສິງຫາ ແລະ ວັນຊາດ 2 ກັນຍາ ບໍ່ພຽງແຕ່ແມ່ນຄວາມພາກພູມໃຈຂອງປະຊາຊົນຫວຽດນາມເທົ່ານັ້ນ ຫາກຍັງແມ່ນຄວາມຜາສຸກທົ່ວປວງຊົນຂອງປະຊາຊົນລາວ. |
ແທັງຮັ່ງ
