ພ້ອມຈິດພ້ອມໃຈກັນເພື່ອສ້າງແຫຼ່ງພະລັງງານໄຟຟ້າຢູ່ກາງທະເລອັນກວ້າງໃຫ່ຍ
ໃນການຢ້ຽມຢາມ, ເພື່ອໃຫ້ກໍາລັງໃຈທະຫານ ແລະ ປະຊາຊົນຢູ່ໝູ່ເກາະ ເຈື່ອງຊາ ໃນທ້າຍເດືອນ ພຶດສະພາ ທີ່ຜ່ານມາ, ຄະນະປະຕິບັດງານເລກທີ 14 ຮູ້ສຶກດີໃຈເປັນຢ່າງຍິ່ງທີ່ໄດ້ຮັບຂ່າວວ່າຢູ່ຈຸດເກາະ ດາດົງ A, ແຫຼ່ງຈ່າຍໄຟຟ້າໄຕ້ແສງສະຫວ່າງເພື່ອຮັບໃຊ້ພະນັກງານ, ນັກຮົບໄດ້ມີຄວາມເປັນປົກກະຕິ ແລະ ລຸລ່ວງ.
ພົນເອກ ຫງວຽນຊຸຍແຂງ, ຫົວໜ້າຜູ້ບັນຊາການເກາະ ດາດົງ A ກ່າວວ່າ: ແຕ່ປີ 2021, ລະບົບແຜງພະລັງງານແສງຕາເວັນ ແລະ ລະບົບໝໍ້ໄຟແຫ່ງໃໝ່ໄດ້ຮັບການຕິດຕັ້ງ ແລະ ຮັບປະກັນການຕອບສະໜອງການຈ່າຍໄຟຟ້າ ໂດຍລັດວິສາຫະກິດໄຟຟ້າພາກໃຕ້ (EVNSPC) ປະມານ 1.000 ກິໂລວັດ/ເດືອນ.
 |
| ການນໍາກຸ່ມບໍລິສັດໄຟຟ້າຫວຽດນາມ ແລະ ລັດວິສາຫະກິດໄຟຟ້າພາກໃຕ້ ໄດ້ສຳຫຼວດ, ກວດກາລະບົບແຜງພະລັງງານແສງຕາເວັນຢູ່ເກາະ ດາດົງ B. |
ໃນເງື່ອນໄຂທີ່ມີແສງແດດສະໝໍ່າສະເໝີ, ໄຟຟ້າໃຊ້ໄດ້ຕະຫຼອດ 24 ຊົ່ວໂມງ ເພື່ອຮັບໃຊ້ເຂົ້າໃນວຽກງານ ແລະ ເຄື່ອນໄຫວໃນຊີວິດປະຈຳວັນຂອງພະນັກງານ, ນັກຮົບ; ໃນສະພາບອາກາດທີ່ມີຝົນຕົກຫນັກ, ເຖິງແສງແດດມີໜ້ອຍແຕ່ພະລັງງານທີ່ເກັບໄວ້ໃນຫມໍ້ໄຟຍັງສາມາດຮັບປະກັນການສະຫນອງພະລັງງານເປັນເວລາສາມເຖິງເຈັດມື້.
ຄຽງຄູ່ກັບໝູ່ເກາະ ດາດົງ A, ເກາະເຈື່ອງຊາໃຫ່ຍ, ແທ່ນຂຸດເຈາະ DK ຈຳນວນໜຶ່ງ ແລະ ໝູ່ເກາະອື່ນໆອີກຫຼາຍແຫ່ງ ປະຈຸບັນມີການເຂົ້າເຖິງແຫຼ່ງໄຟຟ້າຈາກແຫຼ່ງແບັດຕາລີ່ແຜງພະລັງງານແສງຕາເວັນ ແລະ ພະລັງງານແຮງລົມຂ້ອນຄ້າງພຽງພໍ, ຕອບສະໜອງຄວາມຮຽກຮ້ອງຕ້ອງການໃນຊີວິດປະຈຳວັນ, ວຽກງານຂອງກອງທັບ ແລະ ປະຊາຊົນຢູ່ເກາະໂດຍສະເລ່ຍ 20 ຊົ່ວໂມງ/ມື້.
ຫວນຄືນສະໄໝເມື່ອຫຼາຍປີກ່ອນ, ທ່ານ ພົນເອກ ກາວວັນເຊີນ ຮອງຫົວໜ້າພະລາທິການ ເຫຼົ່າທັບ ກ່າວວ່າ: “ປີ 1997-1998, ເມື່ອຂ້າພະເຈົ້າເຮັດວຽກຢູ່ໃນເກາະແມ່ນຍັງບໍ່ມີໄຟຟ້າໃຊ້.
ນັບແຕ່ປີ 2017, ກຸ່ມບໍລິສັດໄຟຟ້າຫວຽດນາມ (EVN) ໄດ້ຮັບການລົງທຶນດ້ານໄຟຟ້າຢູ່ເທິງບັນດາໝູ່ເກາະ, ສະພາບການສະໜອງໄຟຟ້າໄດ້ມີຜົນສໍາເລັດຢ່າງຕັ້ງໜ້າ, ປະກອບຍົກສູງການດໍາລົງຊີວິດຂອງກອງທັບ ແລະ ປະຊາຊົນຢູ່ໃນເກາະ. ນີ້ແມ່ນນະໂຍບາຍທີ່ຖືກຕ້ອງ, ໝັ້ນຄົງ, ຍືນຍົງທີ່ຫົວໜ່ວຍຕ່າງໆທີ່ກໍາລັງປະຕິບັດຢູ່.
ດ້ວຍເປົ້າໝາຍທີ່ຕັ້ງໄວ້ສໍາລັບການຕອບສະໜອງໄຟຟ້າໃນປີຕໍ່ໆໄປ ແລະ ໃນໄລຍະຍາວ, ພວກເຮົາເຊື່ອ ໝັ້ນວ່າ EVN ແລະ ບັນດາຫົວໜ່ວຍ, ກອງທັບ ແລະ ປະຊາຊົນຢູ່ເທິງເກາະຈະສາມາດເຂົ້າເຖິງແຫຼ່ງໄຟຟ້າທີ່ໝັ້ນຄົງໃນໄວໆນີ້ ແລະ ລຸລ່ວງກວ່າຖ້າປຽບໃສ່ປະຈຸບັນ”.
ພ້ອມກັນເຂົ້າຮ່ວມຄະນະສຳຫຼວດ ແລະ ຕີລາຄາວຽກງານສະໜອງໄຟຟ້າຢູ່ເທິງໝູ່ເກາະຈຳນວນໜຶ່ງທີ່ຂຶ້ນກັບໝູ່ເກາະ ເຈື່ອງຊາ, ໄປເຖິງເກາະຈຸດໃດ, ທ່ານ ຫວໍຮວ່າງຕ໋ວນ ຮອງຫົວໜ້າກົມເຕັກນິກ, ບໍລິສັດໄຟຟ້າ ນິງທັວນ (ຂຶ້ນກັບ EVNSPC) ກໍ່ກວດກາ, ບັນທຶກບັນຫາຕ່າງໆທີ່ຕ້ອງເອົາໃຈໃສ່ຢ່າງຮອບຄອບ ແລະ ແລກປ່ຽນເພື່ອລາຍງານຕໍ່ຂັ້ນເທິງ.
ນອກນີ້ ທ່ານກໍ່ຍັງໄດ້ປຶກສາຫາລືຢ່າງຮອບຄອບ ກັບບັນດາພະນັກງານທີ່ໄດ້ຖືກມອບໝາຍໜ້າທີ່ບໍາລຸງຮັກສາ, ຄຸ້ມຄອງຮັກສາອຸປະກອນໄຟຟ້າຕ່າງໆທີ່ຢູ່ເທິງເກາະ ເພື່ອເຮັດໃຫ້ການນຳໃຊ້ວັດຖຸສິ່ງຂອງມີປະສິດທິຜົນຫຼາຍຂຶ້ນກວ່າເກົ່າ.
ທ່ານ ໂຮ່ຖາຍອຽນຄາ ຮອງຜູ້ອຳນວຍການບໍລິສັດໄຟຟ້າ ນິງທັວນ ກໍານົດວ່າ: ຄະນະໄປເຮັດວຽກຢູ່ເກາະ ເຈື່ອງຊາ ຄັ້ງນີ້ໄດ້ສຳຫຼວດ ແລະ ຈັບຈຸດທີ່ຕັ້ງຕາມຈຸດຕ່າງໆທີ່ສາມາດຕິດຕັ້ງແຜງພະລັງງານແສງຕາເວັນໃໝ່ຕື່ມ ຢູ່ເທິງຫລັງຄາ ເພື່ອຍົກສູງປະສິດທິພາບການສະໜອງໄຟຟ້າ. ພ້ອມກັນນັ້ນ, ກໍ່ກວດກາ ແລະ ຕີລາຄາສະພາບການປະຈຸບັນຂອງບັນດາພື້ນຖານໂຄງລ່າງທີ່ໄດ້ຕິດຕັ້ງ ເພື່ອຜັນຂະຫຍາຍບັນດາໂຄງການລົງທຶນໃນໄລຍະທີ່ຈະມາເຖິງໃຫ້ມີປະສິດທິຜົນ.
ດ້ວຍສະພາບອາກາດທີ່ຮ້າຍແຮງຂອງໝູ່ເກາະ ແລະ ໄລຍະຫ່າງທາງດ້ານພູມສາດ ດັ່ງນັ້ນການເຄື່ອນໄຫວສຳຫຼວດຕ້ອງໄດ້ດຳເນີນໄປຢ່າງລະອຽດລະອໍ, ບໍ່ດັ່ງນັ້ນການກໍ່ສ້າງ, ການຕິດຕັ້ງ, ການຂົນສົ່ງຢູ່ເກາະຈະເກີດຄວາມຫຍຸ້ງຍາກ ແລະ ຂາດແຄນ, ສົ່ງຜົນສະທ້ອນເຖິງຄວາມຄືບໜ້າ ແລະ ຄຸນນະພາບຂອງໂຄງການ.
ທ່ານ ບຸ່ຍກວັກຮວານ ຮອງຜູ້ອຳນວຍການໃຫຍ່ EVNSPC ຢືນຢັນວ່າ: ເຖິງຮູ້ວ່າຈະປະສົບກັບຄວາມຫຍຸ້ງຍາກຫຼາຍດ້ານກໍ່ຕາມ ແຕ່ເປົ້າໝາຍຂອງກົມກອງແມ່ນມີຄວາມຕັ້ງໃຈເພື່ອຮັບປະກັນການກໍ່ສ້າງ, ພື້ນຖານໂຄງລ່າງກ່ຽວກັບໄຟຟ້າບັນລຸປະສິດທິພາບສູງສຸດ ເພື່ອຮັບໃຊ້ການດໍາລົງຊີວິດ, ການດຳລົງຊີວິດປະຈໍາວັນ, ອອກແຮງງານຮຽນຮູ້ຂອງກອງທັບ ແລະ ປະຊາຊົນ ຢູ່ບັນດາຈຸດໝູ່ເກາະ, ແທ່ນຂຸດເຈາະ...
ມຸ່ງໄປສູ່ເປົ້າຫມາຍທີ່ໃຫຍ່ກວ່າ
ເພື່ອໃຫ້ເກາະ ເຈື່ອງຊາ ມີແສງສະຫວ່າງ, ແຕ່ປີ 2011 – 2012, ລະບົບພະລັງງານໄຟຟ້າສະອາດ ໄດ້ຮັບການລົງທຶນ ໂດຍກຸ່ມບໍລິສັດນ້ຳມັນອາຍແກັສ ຫວຽດນາມ (Petrovietnam) ຢູ່ບັນດາໝູ່ເກາະ, ຢູ່ແທ່ນຂຸດເຈາະ... ໄດ້ປັບປຸງຊີວິດການເປັນຢູ່, ການດໍາລົງຊີວິດຂອງກອງທັບ ແລະ ປະຊາຊົນຢູ່ໃນເກາະ. ເຖິງຢ່າງໃດກໍ່ຕາມ, ດ້ວຍລັກສະນະສະພາບອາກາດທີ່ປ່ຽນແປງຮ້າຍແຮງ, ເມື່ອເວລາຜ່ານໄປ, ອຸປະກອນຫຼາຍຢ່າງ, ພື້ນຖານໂຄງລ່າງສະຫນອງໄຟຟ້າກໍ່ໄດ້ຊຸດໂຊມ ແລະ ເປ່ເພ.
 |
ພະນັກງານ, ວິສະວະກອນອຸດສາຫະກຳໄຟຟ້າພາກໃຕ້ ສຳຫຼວດການຕິດຕັ້ງລະບົບພະລັງງານສະອາດຢູ່ເກາະ ຊອງຕື໋ໄຕ.
ມາຮອດປີ 2017, EVN ໄດ້ຮັບເອົາລະບົບພະລັງງານແສງຕາເວັນທັງຫມົດຢ່າງເປັນທາງການ ເຊິ່ງໄດ້ຜ່ານໄລຍະການໃຊ້ງານເທິງເກາະ ແລະ ແທ່ນຂຸດເຈາະ DK1 ແລ້ວ.
“ພວກຂ້າພະເຈົ້າຍັງຄົງຈື່ຄວາມທຸກຍາກລຳບາກຂອງກອງທັບ ແລະ ປະຊາຊົນຢູ່ເທິງເກາະໃນລະດູຮ້ອນເມື່ອກ່ອນອາກາດຮ້ອນອົບເອົ້າ. ຍ້ອນບໍ່ມີໄຟຟ້າດັ່ງນັ້ນອຸປະກອນເຮັດຄວາມເຢັນຈິ່ງໃຊ້ງານບໍ່ໄດ້. ຄາບເຂົ້າທຸກຄາບ, ການນອນຫຼັບຂອງພະນັກງານ, ນັກຮົບ ແລະ ປະຊາຊົນຢູ່ເທິງເກາະລ້ວນແຕ່ກາຍເປັນເລື່ອງທີ່ອິດເມື່ອຍຫຼາຍພາຍໃຕ້ສະພາບອາກາດອັນໂຫດຮ້າຍຂອງ ເຈື່ອງຊາ. ແຫຼ່ງພະລັງງານໄຟຟ້າທີ່ຈໍາກັດໃນເວລານັ້ນ ກໍ່ຕ້ອງມີຄວາມສົມດູນເພື່ອນໍາໃຊ້ສໍາລັບຈຸດປະສົງທີ່ຈໍາເປັນອື່ນໆ,” ທ່ານ ໂຮ່ຖາຍອຽນຄາ ກ່າວ.
ໂດຍໄດ້ເຫັນກັບຕາເຖິງຄວາມຫຍຸ້ງຍາກ, ລຳບາກຂອງກອງທັບ ແລະ ປະຊາຊົນຢູ່ເທິງເກາະ, ຍິ່ງເຮັດໃຫ້ກຸ່ມພະນັກງານ, ກໍາມະກອນ ແລະ ພາລະກອນ, ຜູ້ອອກແຮງງານຂອງ EVN ຕັດສິນໃຈນຳເອົາແຫຼ່ງໄຟຟ້າມາສູ່ໝູ່ເກາະເຈື່ອງຊາ ນັບມື້ນັບຫຼາຍ ແລະ ໄວກ່ວາອີກ.
ໃນການກັບຄືນມາຄັ້ງນີ້, ເຫັນໄດ້ເຖິງຄວາມປ່ຽນແປງອັນໃຫຍ່ຫຼວງຂອງໝູ່ເກາະຈຸດຕ່າງໆ, ໃນນັ້ນມີແຫຼ່ງຈ່າຍໄຟຟ້າ, ບັນດາສະມາຊິກໃນຄະນະເຮັດວຽກກໍ່ຮູ້ສຶກດີໃຈກັບຄວາມຜາສຸກຂອງກອງທັບ ແລະ ປະຊາຊົນຢູ່ເທິງເກາະ.
ຈາກການເຫັນປະຈັກຕາໃນການປ່ຽນແປງຕ່າງໆນັ້ນ, ໂດຍໄດ້ປຶກສາແບບເປີດໃຈຮ່ວມກັບພະນັກງານ, ນັກຮົບເກາະ ດາດົງ, ທ່ານ ດິງເຖຟຸກ ສະມາຊິກສະພາສະມຊິກ EVN ກ່າວເປີດໃຈວ່າ: “ຊີວິດການເປັນຢູ່ເທິງໝູ່ເກາະຈຸດຕ່າງໆ ໄດ້ມີການປ່ຽນແປງຢ່າງແທ້ຈິງ, ປະກອບສ່ວນເຮັດໃຫ້ການດໍາລົງຊີວິດທາງດ້ານວັດຖຸ ແລະ ຈິດໃຈຂອງພະນັກງານ, ນັກຮົບຢູ່ເທິງບັນດາໝູ່ເກາະມີຄວາມໝັ້ນຄົງ. ເຖິງຢ່າງໃດກໍ່ຕາມ, ເມື່ອທຽບໃສ່ແຜ່ນດິນໃຫຍ່, ການດໍາລົງຊີວິດຂອງກອງທັບ ແລະ ປະຊາຊົນຢູ່ເທິງເກາະຍັງຄົງຫຍຸ້ງຍາກຢູ່. ພວກເຮົາໄດ້ແລກປ່ຽນກັນຫຼາຍຢ່າງກ່ຽວກັບບັນຫານັ້ນ, ໃນການເດີນທາງມາເຮັດວຽກຄັ້ງນີ້, ບັນດາອ້າຍນ້ອງໃນຂະແໜງໄຟຟ້າໄດ້ແລກປ່ຽນກັນຫຼາຍຢ່າງ ແລະ ມີຄວາມຫວັງຢາກຈະດໍາເນີນວຽກການນໍາເອົາໄຟຟ້າເຂົ້າມາສູ່ເກາະໃຫ້ມີຄວາມເປັນປົກກະຕິ ແລະ ໄວກວ່າເກົ່າ. ນີ້ກໍແມ່ນວິທີສະແດງໃຫ້ເຫັນເຖິງຄວາມຮັກທີ່ມີຕໍ່ບ້ານເກີດເມືອງນອນ, ຄວາມຮັກແພງທີ່ມີຕໍ່ໝູ່ເກາະທະເລ ແລະ ແບ່ງປັນຄວາມຫຍຸ້ງຍາກ, ລໍາບາກຕໍ່ກັບພະນັກງານ, ນັກຮົບທີ່ກໍາລັງເຮັດວຽກທັງກາງເວັນ ແລະ ກາງຄືນເຝົ້າຮັກສາໝູ່ເກາະທະເລທີ່ເປັນບ້ານເກີດເມືອງນອນຂອງຕົນ”.
ທຸກໆມື້ທີ່ພວກນ້ອງນັກຮຽນຂຶ້ນຫ້ອງຮຽນ, ທ່ານ ເລຊວນແຮ້ງ, ຄູສອນໂຮງຮຽນປະຖົມ ເຈື່ອງຊາໃຫ່ຍ ແບ່ງປັນວ່າ: “ແຫຼ່ງຈ່າຍໄຟຟ້າບໍ່ເປັນປົກກະຕິ ຈະສົ່ງຜົນກະທົບຕໍ່ການຮຽນ ແລະ ການເຄື່ອນໄຫວກິດຈະກໍາຂອງເດັກນ້ອຍຢ່າງຫຼວງຫຼາຍ. ຖ້າແຫຼ່ງຈ່າຍໄຟຟ້າມີຄວາມເປັນປົກກະຕິ, ນັກຮຽນເຂົ້າຫ້ອງຮຽນຄົບຖ້ວນຈະຊ່ວຍເຮັດໃຫ້ຂະບວນການຮໍ່າຮຽນມີຄວາມສະດວກສະບາຍຂຶ້ນຫຼາຍທີ່ສຸດ”.
ສ່ວນ ທ່ານ ພັນໂທ ເຈີ່ນກວາງຟູ, ຜູ້ບັນຊາການເກາະ ເຈື່ອງຊາ, ປະທານຄະນະກໍາມະການປະຊາຊົນນະຄອນ ເຈື່ອງຊາ ຢືນຢັນວ່າ: “ດ້ວຍຄວາມເອົາໃຈໃສ່ຂອງກອງບັນຊາການທະຫານເຮືອ, EVN, ກອງທັບ ແລະ ປະຊາຊົນຢູ່ທີ່ນີ້ ສາມາດຮັບຮູ້ໄດ້ເຖິງນໍ້າໃຈອັນໃຫຍ່ຫຼວງ, ໃນນັ້ນ, ແຫຼ່ງຈ່າຍໄຟຟ້າໄດ້ຮັບການສະໜອງຢ່າງໝັ້ນຄົງ ແມ່ນລ້ວນແຕ່ມີຄວາມສຳຄັນຫຼາຍຕໍ່ຊີວິດການເປັນຢູ່, ການຝຶກອົບຮົມ, ວຽກງານການແພດຂອງກອງທັບ ແລະ ປະຊາຊົນຢູ່ໃນເກາະໄດ້ຮັບປະສິດທິຜົນສູງສຸດ. ນອກຈາກນີ້ພວກເຮົາກໍ່ຍັງພະຍາຍາມປະສານສົມທົບກັບບັນດາຫນ່ວຍບໍລິການບໍາລຸງຮັກສາ ແລະ ຄຸ້ມຄອງຮັກສາເພື່ອເພີ່ມອາຍຸການໃຊ້ງານບັນດາອຸປະກອນທີ່ນໍາໃຊ້ເຂົ້າໃນການສະຫນອງໄຟຟ້າ.
ຕາມມະຕິເລກທີ 09-NQ/TW, ລົງວັນທີ 28 ມັງກອນ 2022 ຂອງກົມການເມືອງກ່ຽວກັບການກໍ່ສ້າງ ແລະ ການພັດທະນາແຂວງແຄ໋ງຮ່ວາ ຮອດປີ 2030, ດ້ວຍວິໄສທັດຮອດປີ 2045, ເມືອງເກາະເຈື່ອງຊາ ຈະກາຍເປັນໃຈກາງເສດຖະກິດ, ວັດທະນະທຳ, ສັງຄົມທາງທະເລ ທົ່ວປະເທດເທື່ອລະກ້າວ, ເປັນປ້ອມປະພານໃນເຂດທະເລ ແລະ ເປັນເກາະທີ່ສັກສິດຂອງຊາດ.
ເພື່ອບັນລຸເປົ້າຫມາຍດັ່ງກ່າວ, ການລົງທຶນແຫຼ່ງພະລັງງານທົດແທນຢ່າງຄົບຊຸດຢູ່ທີ່ນີ້ ແມ່ນຫນຶ່ງໃນໜ້າທີ່ທີ່ສໍາຄັນ.
ຮ່ວມເດີນທາງພ້ອມກັບບັນດາເປົ້າໝາຍລວມ ແລະ ຜັນຂະຫຍາຍວຽກງານການສະໜອງໄຟຟ້າໃຫ້ເຂດຊົນນະບົດ, ເຂດພູດອຍ ແລະ ເກາະທະເລຕາມເປົ້າໝາຍທີ່ລັດຖະບານວາງອອກ, EVN ນອກເໜືອຈາກວຽກຟື້ນຟູ, ປົກປັກຮັກສາ, ສ້ອມແປງລະບົບພື້ນຖານໂຄງລ່າງສະໜອງໄຟຟ້າທີ່ມີຢູ່ແລ້ວ, ໃນປີ 2024 ແລະ ຊຸມປີໃນຕໍ່ໜ້າຈະມີການລົງທຶນບັນດາໂຄງການກໍ່ສ້າງດັດແປງ, ສ້ອມແປງສະຖານີພະລັງງານສະອາດຢູ່ບັນດາເກາະຈຸດ ແລະ ແທ່ນຂຸດເຈາະ DK ເພື່ອແນໃສ່ເປົ້າໝາຍສະໜອງໄຟຟ້າໃຫ້ມີຄວາມເປັນປົກກະຕິແກ່ບັນດາໝູ່ເກາະ ແລະ ແທ່ນຂຸດເຈາະ DK.
ຄຳຮຸ່ງ
