ທີ່ວາລະປະຊຸມ, ທ່ານເລຂາທິການໃຫຍ່ ສປຊ António Guterres ແລະ ຜູ້ຕາງໜ້າບັນດາປະເທດ ໄດ້ຕີລາຄາສູງບົດບາດ ແລະ ການປະກອບສ່ວນທີ່ສຳຄັນຂອງບັນດາປະເທດ ອາຟຣິກາ ຢູ່ ສປຊ; ເນັ້ນໜັກວ່າ ອາຟຣິກາ ມີຄວາມສາມາດບົ່ມຊ້ອນອັນໃຫຍ່ຫຼວງ, ແຕ່ຍັງປະເຊີນໜ້າກັບສິ່ງທ້າທາຍຫຼາຍຢ່າງ, ພິເສດແມ່ນການປະທະກັນ, ການກໍ່ການຮ້າຍ, ການແຜ່ລະບາດ, ການປ່ຽນແປງຂອງດິນຟ້າອາກາດ ແລະ ບັນຫາທີ່ເກີດຈາກສິ່ງທີ່ບໍ່ຄາດຄິດໃນລະບົບການປົກຄອງ ແລະ ການເງິນທົ່ວໂລກ.
 |
| ທ່ານເອກອັກຄະລັດຖະທູດ ດັ້ງຮວ່າງຢາງ ກ່າວຄຳປາໄສທີ່ວາລະປະຊຸມເປີດກ່ຽວກັບຫົວຂໍ້ “ ເພີ່ມທະວີບົດບາດຂອງ ອາຟຣິກາ ໃນການແກ້ໄຂບັນດາສິ່ງທ້າທາຍດ້ານຄວາມໝັ້ນຄົງ ແລະ ການພັດທະນາທົ່ວໂລກ”. (ພາບ: ຄະນະຜູ້ແທນຫວຽດນາມ ປະຈຳ ສປຊ) |
ບັນດາຜູ້ແທນ ໄດ້ຍົກອອກຫຼາຍຂໍ້ສະເໜີການຮ່ວມມື ເພື່ອຊຸກຍູ້ສັນຕິພາບ, ຄວາມຈະເລີນຮຸ່ງເຮືອງຢູ່ ອາຟຣິກາ ແລະ ໜູນຊ່ວຍບັນດາປະເທດໃນທະວີບນີ້ເສີມຂະຫຍາຍບົດບາດກວ່າອີກ, ປະກອບສ່ວນຕໍ່ກັບຄວາມໝັ້ນຄົງ ແລະ ການພັດທະນາຂອງໂລກ.
ກ່າວຄຳປາໄສທີ່ກອງປະຊຸມ, ທ່ານເອກອັກຄະລັດຖະທູດ ດັ້ງຮວ່າງຢາງ, ຫົວໜ້າຄະນະຜູ້ປະຈຳການ ຫວຽດນາມ ປະຈຳ ສປຊ ຢືນຢັນວ່າ ເພື່ອແກ້ໄຂບັນດາບັນຫາທົ່ວໂລກ ແມ່ນບໍ່ສາມາດມອງຂ້າມບົດບາດ, ສຽງເວົ້າຂອງບັນດາປະເທດ ອາຟຣິກາ. ບົນຈິດໃຈນັ້ນ, ທ່ານເອກອັກຄະລັດຖະທູດ ໄດ້ເນັ້ນໜັກເຖິງ 3 ເນື້ອໃນ.
ທີໜຶ່ງ, ແມ່ນປະເທດຢຶດໝັ້ນການສະໜັບສະໜູນການປະຕິຮູບສະພາຄວາມໝັ້ນຄົງສະຫະປະຊາຊາດຢ່າງຮອບດ້ານ, ຫວຽດນາມ ເຊື່ອໝັ້ນວ່າ ຕ້ອງເພີ່ມຈຳນວນທີ່ນັ່ງຢູ່ສະພາຄວາມໝັ້ນຄົງ ເປີດກ້ວາງໃຫ້ແກ່ບັນດາປະເທດ ອາຟຣິກາ ເພື່ອຮັບປະກັນສຽງເວົ້າຂອງບັນດາປະເທດ ອາຟຣິກາ ໄດ້ຮັບການຮັບຟັງ ແລະ ເຄົາລົບ, ພິເສດແມ່ນກ່ຽວກັບບັນດາບັນຫາທີ່ກ່ຽວຂ້ອງກັບທະວີບນີ້.
ທີສອງ, ໃນສະພາບການເຄື່ອນໄຫວການຮັກສາສັນຕິພາບຢູ່ ອາຟຣິກາ ໃນຫວ່າງມໍ່ໆມານີ້ ປະສົບກັບຄວາມຫຍຸ້ງຍາກດ້ານພາວະວິໄສ ແລະ ອັດຕະວິໄສ, ຕ້ອງມີການກວດກາຄືນ ແລະ ຕີລາຄາຢ່າງຮອບດ້ານ ເພື່ອຍົກສູງປະສິດທິຜົນ ແລະ ຄວາມໄວ້ເນື້ອເຊື່ອໃຈຂອງບັນດາຄະນະປະຕິບັດງານ, ພ້ອມກັນນັ້ນ ກໍ່ຮັບປະກັນການເຄົາລົບອະທິປະໄຕຂອງປະເທດທີ່ຮັບ.
ທີສາມ, ເພື່ອຕອບສະໜອງຕໍ່ບັນດາສິ່ງທ້າທາຍຫຼາຍຮູບຫຼາຍແບບຢູ່ ອາຟຣິກາ, ຕ້ອງມີວິທີເຂົ້າເຖິງແບບສັງລວມ, ໃນນັ້ນ ບັນດາປະເທດ ອາຟຣິກາ ມີບົດບາດເປັນໃຈກາງ, ພ້ອມກັນນັ້ນ ກໍ່ບູລິມະສິດໃນການແກ້ໄຂຕົ້ນເຫດຂອງການປະທະກັນ ແລະ ສະພາບດ້ອຍພັດທະນາ.
ທ່ານເອກອັກຄະລັດຖະທູດ ດັ້ງຮ່ວາງຢາງ ຢືນຢັນວ່າ ຄວາມສາມັກຄີລະຫວ່າງ ຫວຽດນາມ ແລະ ບັນດາຊົນເຜົ່າ ອາຟຣິກາ ແມ່ນເກີດຈາກການຕໍ່ສູ້ລວມເພື່ອຍາດເອົາເອກະລາດ, ເສລີພາບ, ຫຼຸດພົ້ນຈາກລັດທິລ່າເມືອງຂຶ້ນ.
ໃນຊຸມປີຜ່ານມາ, ຫວຽດນາມ ໄດ້ເພີ່ມທະວີການພົວພັນມິດຕະພາບ, ການຮ່ວມມືທີ່ຕ່າງຝ່າຍຕ່າງມີຜົນປະໂຫຍດກັບຫຼາຍປະເທດ ອາຟຣິກາ ຢ່າງບໍ່ຢຸດຢັ້ງ ໂດຍຜ່ານບັນດາຊ່ອງທາງສອງຝ່າຍ, ຫຼາຍຝ່າຍ ກໍຄືການຮ່ວມມືສາມຝ່າຍ.
ຫວຽດນາມ ກໍ່ໄດ້ ແລະ ພວມເຂົ້າຮ່ວມບັນດາການເຄື່ອນໄຫວຮັກສາສັນຕິພາບຂອງສະຫະປະຊາຊາດຢ່າງຕັ້ງໜ້າ, ປະກອບສ່ວນຢ່າງແທດຈິງເຂົ້າໃນການຮັກສາສັນຕິພາບ, ຄວາມໝັ້ນຄົງ ແລະ ສ້າງສະພາບແວດລ້ອມແຫ່ງການພັດທະນາແບບຍືນຍົງຢູ່ ອາຟຣິກາ.
ມິງດຶກ
