| ສື່ມວນຊົນ ອາກຊັງຕິນ: ໄຊຊະນະດ້ຽນບຽນຝູ ມີຄວາມໝາຍປະຫວັດສາດອັນຍິ່ງໃຫຍ່ | |
| ໄຂງານວາງສະແດງສະເຫຼີມສະຫຼອງ 70 ປີແຫ່ງວັນໄຊຊະນະ ດ້ຽນບຽນຝູ (7 ພຶດສະພາ 1954-7 ພຶດສະພາ 2024) |
ນັ້ນແມ່ນທ່ານເອກອັກຄະລັດຖະທູດຫວຽດນາມ ປະຈຳລາວ ຫງວຽນບ໋າຮຸ່ງ ໃຫ້ສຳພາດຕໍ່ນັກຂ່າວເນື່ອງໃນໂອກາດສະເຫຼີມສະຫຼອງ 70 ປີແຫ່ງວັນໄຊຊະນະດ້ຽນບຽນຝູ (7/5/1954 – 7/5/2024). ນີ້ແມ່ນເນື້ອໃນສໍາພາດ:
ຂໍຮຽນທ່ານເອກອັກຄະລັດຖະທູດ, ໄຊຊະນະດ້ຽນບຽນຝູ ມີຄວາມໝາຍປະຫວັດສາດໃນພາລະກິດຕໍ່ສູ້ປົດປ່ອຍຊາດຂອງຫວຽດນາມ ແລະລາວ. ຕາມທ່ານເອກອັກຄະລັດຖະທູດແລ້ວ, ຈາກບົດຮຽນປະຫວັດສາດ, ພວກເຮົາຕ້ອງເຮັດຫຍັງແດ່ເພື່ອເສີມຂະຫຍາຍ ກໍ່ຄືໝູນໃຊ້ມູນເຊື້ອນີ້ເຂົ້າໃນພາລະກິດພັດທະນາປະເທດຊາດ ແລະເພີ່ມພູນຄູນສ້າງການພົວພັນລະຫວ່າງຫວຽດນາມ - ລາວ?
ທ່ານເອກອັກຄະລັດຖະທູດ ຫງວຽນບ໋າຮຸ່ງ: ອາດເວົ້າໄດ້ວ່າ ໄຊຊະນະດ້ຽນບຽນຝູ ມີຄວາມໝາຍປະຫວັດສາດທີ່ສໍາຄັນໃນພາລະກິດຕໍ່ສູ້ປົດປ່ອຍຊາດຂອງ 3 ປະເທດອິນດູຈີນ ເວົ້າລວມ ແລະຂອງ 2 ປະເທດຫວຽດນາມ ແລະລາວ ເວົ້າສະເພາະ. ຂ້າພະເຈົ້າ ຖືວ່າ, ບົດຮຽນປະຫວັດສາດແຫ່ງມູນເຊື້ອມິດຕະພາບ, ຄວາມສາມັກຄີລະຫວ່າງປະຊາຊົນ 3 ປະເທດອິນດູຈີນ, ພິເສດແມ່ນຫວຽດນາມ - ລາວ ໃນໄຊຊະນະດ້ຽນບຽນຝູ ຍັງຄົງຮັກສາຄຸນຄ່າເດີມໄວ້ໄດ້ເຖິງປະຈຸບັນ.
ເພື່ອເສີມຂະຫຍາຍມູນເຊື້ອນີ້, ພວກເຮົາຕ້ອງສືບຕໍ່ເສີມຂະຫຍາຍບັນດາບົດຮຽນ, ຈິດໃຈຕັດສິນໃຈຕໍ່ສູ້, ຍາດເອົາໄຊຊະນະຂອງບັ້ນຮົບດ້ຽນບຽນຝູ, ກໍ່ຄືການຮ່ວມສໍາພັນສູ້ຮົບ ຫວຽດນາມ-ລາວ. ກ່ອນອື່ນໝົດ, 2 ປະເທດຄວນສຸມໃສ່ບັນດາບຸລິມະສິດ ຄື:
ທີໜຶ່ງ, ໃນພາລະກິດພັດທະນາຂອງແຕ່ລະປະເທດ, ຕ້ອງເຊີດຊູນ້ຳໃຈຮັກຊາດ, ຈິດໃຈເອກະລາດ, ເປັນເຈົ້າຕົນເອງ, ເຊີດຊູຊາດ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ, ບໍ່ຍອມເປັນປະເທດທຸກຍາກ ແລະຫຼ້າຫຼັງ, ຕັດສິນໃຈຜ່ານຜ່າສິ່ງທ້າທາຍ, ເສີມຂະຫຍາຍສະຕິປັນຍາປະດິດຄິດສ້າງ, ກ້າຄິດກ້າເຮັດ, ຍາມໃດກໍ່ນຳທິດສະດີຕິດພັນກັບພຶດຕິກໍາຕົວຈິງ, ຊາບຊຶມທັດສະນະຖືພຶດຕິກໍາຕົວຈິງເປັນມາດຕະຖານຂອງສັດຈະທໍາ, ຍາມໃດກໍ່ຕິດແທດກັບພຶດຕິກໍາຕົວຈິງ, ວິເຄາະການພັດທະນາໃໝ່ຂອງສະພາບການໂລກ ແລະພາຍໃນປະເທດຢ່າງຖືກຕ້ອງເພື່ອຈາກນັ້ນ ກໍສະຫຼຸບພຶດຕິກໍາຕົວຈິງ, ພັດທະນາທິດສະດີຢ່າງມີຫົວຄິດປະດິດສ້າງ.
 |
| ທ່ານເອກອັກຄະລັດຖະທູດຫວຽດນາມ ປະຈຳລາວ ຫງວຽນບ໋າຮຸ່ງ |
ທີສອງ, ດ້ວຍການພົວພັນ ຫວຽດນາມ - ລາວ, ສືບຕໍ່ນໍາການພົວພັນດ້ານການເມືອງເຂົ້າສູ່ລວງເລິກ, ປະຕິບັດບັນດາຂໍ້ຕົກລົງຂັ້ນສູງເປັນຢ່າງດີ, ພິເສດແມ່ນຕ້ອງສືບຕໍ່ຮັກສາ ແລະຍົກສູງປະສິດທິຜົນບັນດາກົນໄກຮ່ວມມືລະຫວ່າງການນຳຂັ້ນສູງ 2 ປະເທດ; ເຊື່ອມຊຶມ ແລະຍົກສູງຄວາມຮັບຮູ້ລວມກ່ຽວກັບຄວາມສຳຄັນຂອງການພົວພັນແບບພິເສດ ຫວຽດນາມ - ລາວ ໃນໝູ່ປະຊາຊົນທຸກຊັ້ນວັນນະຂອງ 2 ປະເທດ.
ເມື່ອຫວນຄືນໄລຍະທາງທີ່ໄດ້ຜ່ານໄປ, ພວກເຮົາຍາມໃດກໍ່ເອກອ້າງທະນົງໃຈຕໍ່ຄວາມມານະພະຍາຍາມອັນໃຫຍ່ຫຼວງຂອງຫຼາຍລຸ້ນຄົນໃນການສ້າງສາປະເທດຊາດ, ເພີ່ມພູນຄູນສ້າງໃຫ້ສາຍພົວພັນມິດຕະພາບຫວຽດນາມ - ລາວ ໃຫ້ນັບມື້ນັບເກີດດອກອອກຜົນຢ່າງບໍ່ຢຸດຢັ້ງ, ນໍາສາຍພົວພັນນີ້ກາຍເປັນແບບຢ່າງ, ສັດຊື່ບໍລິສຸດ, ບໍລິສຸດຜຸດຜ່ອງ ແລະເປັນແບບຢ່າງໜຶ່ງດຽວຢູ່ໃນໂລກ.
ດ້ວຍຄວາມເອົາໃຈໃສ່ຊີ້ນຳຢ່າງໃກ້ຊິດຂອງການນຳຂັ້ນສູງ 2 ພັກ, 2 ປະເທດ, ພ້ອມກັບຄວາມມານະພະຍາຍາມຂອງບັນດາກະຊວງ, ຂະແໜງການ, ອົງການຈັດຕັ້ງສູນກາງ ແລະທ້ອງຖິ່ນ, ບັນດາວິສາຫະກິດ, ພວກເຮົາມີພື້ນຖານຢ່າງພຽງພໍເພື່ອຮັກສາຄວາມໄວ້ເນື້ອເຊື່ອໃຈຕໍ່ອະນາຄົດອັນສົດໃສຂອງແຕ່ລະປະເທດ ກໍ່ຄືສາຍພົວພັນສາມັກຄີແບບພິເສດຫວຽດນາມ - ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.
ນັກຂ່າວ: ຂໍຮຽນທ່ານເອກອັກຄະລັດຖະທູດ, ໄຊຊະນະດ້ຽນບຽນຝູ ມີຄວາມໝາຍສໍາຄັນແນວໃດຕໍ່ການສຶກສາຮຸ່ນໜຸ່ມໃນປະຈຸບັນ?
ທ່ານເອກອັກຄະລັດຖະທູດ ຫງວຽນບ໋າຮຸ່ງ: ອາດຢັ້ງຢືນໄດ້ວ່າ ເຖິງວ່າ 70 ປີໄດ້ຜ່ານໄປແລ້ວກໍ່ຕາມ, ແຕ່ໄຊຊະນະດ້ຽນບຽນຝູ ຍັງຄົງຮັກສາຄຸນຄ່າເດີມໃນການສຶກສາປະຊາຊົນ, ພິເສດແມ່ນຮຸ່ນໜຸ່ມ. ນັ້ນແມ່ນຄວາມໝາຍຂອງສົງຄາມທົ່ວປວງຊົນ, ຮອບດ້ານ, ສ້າງກໍາລັງແຮງສັງລວມອັນໃຫຍ່ຫຼວງ, ທັບມ້າງກົງຈັກສົງຄາມຂະໜາດໃຫຍ່ຂອງກຳລັງຮຸກຮານ; ຄວາມໝາຍຂອງການເສີມຂະຫຍາຍຈິດໃຈຮັກຊາດ, ເຈດຈໍານົງຕັດສິນໃຈຕໍ່ສູ້, ຍາດເອົາໄຊຊະນະຂອງທົ່ວພັກ, ທົ່ວກອງທັບ ແລະທົ່ວປວງຊົນ; ກ່ຽວກັບການເສີມຂະຫຍາຍຈິດໃຈເອກະລາດ, ເປັນເຈົ້າຕົນເອງ, ກຸ້ມຕົນເອງ, ສ້າງຄວາມເຂັ້ມແຂງດ້ວຍຕົນເອງ ແລະມີຫົວຄິດປະດິດສ້າງ, ກຳນົດໃນແນວທາງປະຕິວັດ, ແນວທາງ ແລະສິລະປະການທະຫານຕໍ່ສູ້; ກ່ຽວກັບການເສີມຂະຫຍາຍກຳລັງແຮງຂອງກຸ່ມກ້ອນມະຫາສາມັກຄີທົ່ວປວງຊົນທັງຊາດ, ເຊິ່ງແກ່ນສານແມ່ນສຳພັນທະມິດຊົນຊັ້ນພົນລະເມືອງ - ຊາວກະສິກອນ - ປັນຍາຊົນ.
ໄຊຊະນະດ້ຽນບຽນຝູ ບໍ່ພຽງແຕ່ນຳມາເຊິ່ງຄຸນຄ່າອັນໃຫຍ່ຫຼວງໃນການຕໍ່ສູ້ປົດປ່ອຍຊາດເທົ່ານັ້ນ, ຫາກຍັງມີຄວາມໝາຍອັນເລິກເຊິ່ງໃນພາລະກິດແຫ່ງການສ້າງສາ ແລະປົກປັກຮັກສາປະເທດຊາດໃນປະຈຸບັນ ແລະໃນອະນາຄົດອີກດ້ວຍ. ຍ້ອນເຫດນັ້ນ, ປະຈຸບັນ, ເມື່ອເວົ້າເຖິງ ໄຊຊະນະດ້ຽນບຽນຝູ, ປະຊາຊົນຫວຽດນາມ ແຕ່ລະຄົນ ເວົ້າລວມ ແລະຮຸ່ນໜຸ່ມ ເວົ້າສະເພາະ ລ້ວນແຕ່ຮູ້ສຶກຕື້ນຕັນໃຈ ແລະເອກອ້າງທະນົງໃຈຕໍ່ໄຊຊະນະອັນພິລະອາດຫານ, ຈິດໃຈລຸກຮຶ້ຂຶ້ນຕໍ່ສູ້ຂອງພໍ່ແມ່ຂອງລຸ້ນພໍ່ລຸ້ນອ້າຍ, ຖືນີ້ແມ່ນໜຶ່ງໃນບັນດາກໍາລັງໜູນທາງຈິດໃຈອັນໃຫຍ່ຫຼວງເພື່ອຕັ້ງໜ້າຝຶກຝົນຫຼໍ່ຫຼອມ, ສູ້ຊົນ ແລະເຂົ້າຮ່ວມໂດຍກົງໃນການສ້າງສາ ແລະປົກປັກຮັກສາປະເທດຊາດຢ່າງເຂັ້ມແຂງ.
ນັກຂ່າວ: ເນື່ອງໃນໂອກາດອັນສໍາຄັນນີ້, ທ່ານເອກອັກຄະລັດຖະທູດຢາກຝາກຝັງສິ່ງໃດແດ່ເຖິງປະຊາຊົນລາວ ແລະ ຫວຽດນາມ?
ທ່ານເອກອັກຄະລັດຖະທູດ ຫງວຽນບ໋າຮຸ່ງ: ການປະຕິວັດລາວ ແລະການປະຕິວັດຫວຽດນາມ ມີສາຍພົວພັນສະໜິດຕິດພັນກັນ. ພັກກອມມູນິດຫວຽດນາມ ແລະພັກປະຊາຊົນ ປະຕິວັດລາວ ມີຕົ້ນກຳເນີດດຽວກັນແມ່ນພັກກອມມູນິດອິນດູຈີນ ໃນເມື່ອກ່ອນ, ໄດ້ນຳພາການປະຕິວັດຂອງ 2 ປະເທດພວກເຮົາ ສຳເລັດພາລະກິດການຕໍ່ສູ້ປົດປ່ອຍຊາດ, ທ້ອນໂຮມປະເທດຊາດເປັນເອກະພາບຢູ່ແຕ່ລະປະເທດ ແລະປະຈຸບັນນີ້ ພວກເຮົາພວມສືບຕໍ່ກ້າວຂຶ້ນບົນເສັ້ນທາງກໍ່ສ້າງສັງຄົມນິຍົມ. ສອງປະເທດຫວຽດນາມ ແລະ ລາວ ພວມຢູ່ໃນວິວັດການພັດທະນາ ແລະ ເຊື່ອມໂຍງເຂົ້າກັບສາກົນ, ພວກເຮົາມີຄວາມສະດວກຫຼາຍຢ່າງທັງພາຍໃນປະເທດ ແລະສາກົນ. ເຖິງຢ່າງໃດກໍ່ຕາມ, ພວກເຮົາຍັງປະສົບກັບຄວາມຫຍຸ້ງຍາກ ແລະສິ່ງທ້າທາຍບໍ່ແມ່ນໜ້ອຍ.
ໃນສະພາບການນັ້ນ, ຂ້າພະເຈົ້າຫວັງວ່າ ປະຊາຊົນຫວຽດນາມ - ລາວ ຈະສືບຕໍ່ສືບທອດມູນເຊື້ອຂອງການຮ່ວມສຳພັນສູ້ຮົບແບບພິເສດ ຫວຽດນາມ - ລາວ, ຮັກສາຄວາມເຊື່ອໝັ້ນຕໍ່ການນຳພາຂອງສອງພັກ, ຄຽງບ່າຄຽງໄຫຼ່ກັນ, ໜູນຊ່ວຍ, ຊ່ວຍເຫຼືອເຊິ່ງກັນ ແລະກັນ, ເພີ່ມເຕີ່ມທ່າໄດ້ປຽບໃຫ້ກັນ ເພື່ອພ້ອມກັນພັດທະນາ.
ພິເສດ, ເສີມຂະຫຍາຍນ້ຳໃຈມິດຕະພາບ, ຄວາມສາມັກຄີລະຫວ່າງ 3 ປະເທດອິນດູຈີນ ໃນໄຊຊະນະດ້ຽນບຽນຝູ ແລະບັນດາໄຊຊະນະລວມອື່ນໆອີກ, ຫວຽດນາມ ແລະລາວ ຈະສືບຕໍ່ຮັກສາ ແລະພັດທະນາການພົວພັນຮ່ວມມືອັນດີງາມກັບປະເທດກຳປູເຈຍ ອ້າຍນ້ອງ ຢ່າງບໍ່ຢຸດຢັ້ງ, ປະກອບສ່ວນເຂົ້າໃນການຮັກສາສັນຕິພາບ, ສະຖຽນລະພາບ ແລະການຮ່ວມມືພັດທະນາໃນພາກພື້ນ ແລະໃນໂລກ.
ນັກຂ່າວ: ຂໍຂອບໃຈທ່ານເອກອັກຄະລັດຖະທູດ!
ຄຳຮຸ່ງ
