| ຫວຽດນາມ ຈັດສົ່ງນາຍທະຫານຕື່ມອີກ 4 ສະຫາຍ ໄປເຂົ້າຮ່ວມວຽກງານປົກປັກຮັກສາສັນຕິພາບ ສປຊ | |
| ແນວລາວສ້າງຊາດແຂວງຫົວພັນ ຢ້ຽມຢາມ ແລະ ອວຍພອນປີໃໝ່ແນວໂຮມປະເທດຊາດຫວຽດນາມ ແຂວງເຊີນລາ |
ກວາງບິ່ງ-ຈໍາປາສັກ ຈະເພີ່ມທະວີການຮ່ວມມືໃນທຸກຂົງເຂດ
ຕອນບ່າຍວັນທີ 1 ເມສານີ້, ຄະນະປະຕິບັດງານຂອງແຂວງ ກວາງບິ່ງ ໄດ້ໄປຢ້ຽມຢາມ, ອວຍພອນປີໃໝ່ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ຈຳປາສັກ (ລາວ) ເນື່ອງໃນໂອກາດບຸນປີໃໝ່ລາວ. ເນື່ອງໃນໂອກາດນີ້, ຕາງໜ້າອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ກວາງບິ່ງ, ສະຫາຍຮອງເລຂາຜູ້ປະຈຳຄະນະພັກແຂວງ ເຈີ່ນຫາຍເຈົາ ໄດ້ອວຍພອນອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ຈຳປາສັກ ຕ້ອນຮັບບຸນປີໃໝ່ທີ່ເຕັມໄປດ້ວຍຄວາມມ່ວນຊື່ນ, ອົບອຸ່ນ ແລະ ມີແຕ່ຄວາມຈະເລີນຮຸ່ງເຮືອງ. ຂໍອວຍພອນສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງສອງປະເທດ ຫວຽດນາມ-ລາວ ເວົ້າລວມ ແລະ 2 ແຂວງ ກວາງບິ່ງ ແລະ ຈຳປາສັກ ເວົ້າສະເພາະ ໃຫ້ນັບມື້ນັບແໜ້ນແຟ້ນກ່ວາອີກ.
 |
| ກວາງບິ່ງ ມອບເງິນ 200 ລ້ານດົ່ງໃຫ້ອຳນາດການປົກຄອງ ແລະ ປະຊາຊົນແຂວງ ຈໍາປາສັກ. ພາບ: ໜັງສືພິມ ກວາງບິ່ງ |
ສະຫາຍ ເຈີ່ນຫາຍເຈົາ ເນັ້ນໜັກວ່າ ດ້ວຍບັນດາຜົນງານດີເດັ່ນທີ່ແຂວງ ກວາງບິ່ງ ບັນລຸໄດ້ໃນປີ 2023ນັ້ນ ກໍມີຄວາມເອົາໃຈໃສ່, ຮ່ວມເດີນທາງຂອງອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ຈຳປາສັກ ໃນຫຼາຍຂົງເຂດ. ອຳນາດການປົກຄອງແຂວງ ຈຳປາສັກ ກໍໄດ້ສ້າງທຸກເງື່ອນໄຂສະດວກໃຫ້ພົນລະເມືອງ ຫວຽດນາມ ເວົ້າລວມ, ພົນລະເມືອງ ກວາງບິ່ງ ເວົ້າສະເພາະ ທີ່ດຳລົງຊີວິດ ແລະ ເຮັດວຽກຢູ່ແຂວງ ຈຳປາສັກ. ສະຫາຍ ເຈົາ ກໍຫວັງວ່າ ໃນໄລຍະຈະມາເຖິງ, ກວາງບິ່ງ ແລະ ຈໍາປາສັກ ຈະເພີ່ມທະວີການພົວພັນມິດຕະພາບ ແລະ ການຮ່ວມມືໃນບັນດາຂົງເຂດກ່ວາອີກ.
ໂດຍຂອບໃຈຄວາມຮັກແພງອັນອົບອຸ່ນທີ່ການນຳແຂວງ ກວາງບິ່ງ ໄດ້ມອບໃຫ້ສຳລັບແຂວງ ຈຳປາສັກ, ສະຫາຍຮອງເລຂາຄະນະພັກແຂວງ, ປະທານສະພາປະຊາຊົນແຂວງ ຈຳປາສັກ ໄຊທອງ ໄຊດາວົງ ຢືນຢັນວ່າ ແຂວງ ຈຳປາສັກ ຍາມໃດກໍຈະຮ່ວມເດີນທາງກັບແຂວງ ກວາງບິ່ງ ໃນທຸກຂົງເຂດ. ພ້ອມກັນນັ້ນ, ກໍຫວັງວ່າ ໃນໄລຍະຈະມາເຖິງ, ແຂວງ ຈຳປາສັກ ຈະສືບຕໍ່ໄດ້ຮັບຄວາມເອົາໃຈໃສ່, ໜູນຊ່ວຍຂອງແຂວງ ກວາງບິ່ງ; ເພີ່ມທະວີການຮ່ວມມືຮອບດ້ານລະຫວ່າງສອງແຂວງ, ປະກອບສ່ວນເພີ່ມພູນຄູນສ້າງສາຍພົວພັນມິດຕະພາບແບບພິເສດລະຫວ່າງ ລາວ - ຫວຽດນາມ ເວົ້າລວມ, ແຂວງ ຈຳປາສັກ ແລະ ແຂວງ ກວາງບິ່ງ ເວົ້າສະເພາະ.
ການພົວພັນ ດົ່ງນາຍ - Kampong Thom ຈະສືບຕໍ່ໄດ້ຮັບການປັບປຸງ
ວັນທີ 1 ເມສານີ້, ຄະນະປະຕິບັດງານຂອງແຂວງ ດົ່ງນາຍ ໄດ້ໄປຢ້ຽມຢາມ, ອວຍພອນບຸນປີໃໝ່ຕາມຮີດຄອງປະເພນີຢູ່ແຂວງ Kampong Thom, ລາຊະອານາຈັກກຳປູເຈຍ. ຕາງໜ້າການນຳແຂວງ ດົ່ງນາຍ, ທ່ານປະທານສະພາປະຊາຊົນແຂວງ ດົ່ງນາຍ ໄທບາວ ໄດ້ສົ່ງຄຳອວຍພອນປີໃໝ່ອັນດີງາມທີ່ສຸດເຖິງ ທ່ານ Nguon Rattanak - ເຈົ້າແຂວງແຂວງ Kampong Thom ພ້ອມກັບບັນດາສະຫາຍ ຈົ່ງມີສຸຂະພາບເຂັ້ມແຂງ, ມີຄວາມຜາສຸກ ແລະ ປະສົບຜົນສຳເລັດໃນໜ້າທີ່, ເປົ້າໝາຍພັດທະນາເສດຖະກິດ - ສັງຄົມ ໃນປີ 2024. ຂໍອວຍພອນໃຫ້ປະຊາຊົນແຂວງ Kampong Thom, ລາຊະອານາຈັກກຳປູເຈຍ ນັບມື້ນັບມີຄວາມອີ່ມໜຳສຳລານ, ສົມບູນພູນສຸກ ແລະ ມີແຕ່ຄວາມຈະເລີນຮຸ່ງເຮືອງໃນປີໃໝ່ນີ້.
 |
| ຄະນະປະຕິບັດງານຂອງແຂວງ ດົ່ງນາຍ ໄປຢ້ຽມຢາມ ແລະ ອວຍພອນບຸນປີໃໝ່ປະເພນີຢູ່ແຂວງ Kampong Thom, ລາຊະອານາຈັກກຳປູເຈຍ. ພາບ: ໜັງສືພິມ ດົ່ງນາຍ |
ທ່ານປະທານສະພາປະຊາຊົນແຂວງ ໄທບາວ ຢືນຢັນວ່າ ຫວຽດນາມ ແລະ ກຳປູເຈຍ ແມ່ນສອງປະເທດບ້ານໃກ້ເຮືອນຄຽງທີ່ໄດ້ຜ່ານຜ່າບັນດາຄວາມຫຍຸ້ງຍາກໃນປະຫວັດສາດ. ຜ່າຜ່າສິ່ງທົດສອບ, ທ້າທາຍ ແລະ ການຜັນປ່ຽນຂອງຍຸກສະໄໝ, ສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ ນັບມື້ນັບໄດ້ຮັບການເພີ່ມພູນຄູນສ້າງ ແລະ ກາຍເປັນຊັບສົມບັດລວມອັນລ້ຳຄ່າຂອງປະຊາຊົນສອງປະເທດ.
ທ່ານ ໄທບາວ ຢືນຢັນວ່າ ເພື່ອສືບຕໍ່ປັບປຸງ ແລະ ພັດທະນາສາຍພົວພັນມິດຕະພາບ, ຄວາມສາມັກຄີແບບພິເສດ ແລະ ການຮ່ວມມືຮອບດ້ານ ຫວຽດນາມ - ກຳປູເຈຍ ເວົ້າລວມ ແລະ ລະຫວ່າງແຂວງ ດົ່ງນາຍ ກັບບັນດາທ້ອງຖິ່ນ ກຳປູເຈຍ ເວົ້າສະເພາະ, ໃນໄລຍະທີ່ຜ່ານມາ, ອົງຄະນະພັກ, ອຳນາດການປົກຄອງ ແລະ ປະຊາຊົນແຂວງ ດົ່ງນາຍ ກໍໄດ້ ແລະ ພວມເພີ່ມພູນຄູນສ້າງສາຍພົວພັນມິດຕະພາບອັນດີງາມຢ່າງບໍ່ຢຸດຢັ້ງກັບແຂວງ Kampong Thom, ກຳປູເຈຍ ໃນຫຼາຍຂົງເຂດຄື ການທະຫານ, ສາທາລະນະສຸກ, ການສຶກສາ, ກະສິກຳ, ວັດທະນະທຳ, ກິລາ...
ທ່ານ Nguon Rattanak - ເຈົ້າແຂວງແຂວງ Kampong Thom ໄດ້ສົ່ງຄຳຂອບໃຈຢ່າງເລິກເຊິ່ງຕໍ່ຄວາມຮັກແພງອັນອົບອຸ່ນ, ຈິງໃຈຂອງຄະນະປະຕິບັດງານ ແລະ ແຂວງ ດົ່ງນາຍ. ທ່ານ Nguon Rattanak ກໍເຊື່ອໝັ້ນວ່າ ສາຍພົວພັນຖານບ້ານໃກ້ເຮືອນຄຽງມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານລະຫວ່າງ ຫວຽດນາມ - ກຳປູເຈຍ ເວົ້າລວມ ແລະ ແຂວງ ດົ່ງນາຍ ກັບແຂວງ Kampong Thom ເວົ້າສະເພາະ ຈະສືບຕໍ່ນັບມື້ນັບທີ່ໄດ້ຮັບການປັບປຸງ, ເສີມຂະຫຍາຍ ແລະ ຮັກສາຄວາມສາມັກຄີອັນດີງາມ, ເພີ່ມທະວີການຮ່ວມມືພັດທະນາໃນຫຼາຍຂົງເຂດ.
ເນື່ອງໃນໂອກາດນີ້, ຄະນະປະຕິບັດງານ ດົ່ງນາຍ ກໍໄດ້ມອບງົບປະມານການໃຊ້ຈ່າຍ 200 ລ້ານດົ່ງ ໃຫ້ແຂວງ Kampong Thom.
ມິງດຶກ
