ຕອນບ່າຍວັນທີ 22 ກຸມພາ, ກະຊວງປ້ອງກັນປະເທດຫວຽດນາມ ໄດ້ມອບຂໍ້ຕົກລົງຂອງປະທານປະເທດໃຫ້ແກ່ນາຍທະຫານ 4 ສະຫາຍທີ່ຈະໄປປະຕິບັດໜ້າທີ່ຮັກສາສັນຕິພາບ ສປຊ ຢູ່ຄະນະປະຕິບັດງານ ສາທາລະນະລັດ ອາຟະລິກາກາງ, ສ ຊູດັງໃຕ້ ແລະຄະນະປະຕິບັດງານຄວາມໝັ້ນຄົງຊົ່ວຄາວຢູ່ເຂດ Abyei (UNISFA).
 |
| ທ່ານພົນໂທ ຮວ່າງຊວນຈ໊ຽນ ມອບໝາຍໜ້າທີ່ໃຫ້ນາຍທະຫານ. ພາບ: mod.gov.vn |
ທ່ານພົນໂທ ຮວ່າງຊວນຈ໊ຽນ ກໍາມະການສູນກາງພັກ, ຮອງລັດຖະມົນຕີກະຊວງປ້ອງກັນປະເທດຫວຽດນາມ, ຫົວໜ້າໜ່ວຍປະຕິບັດງານລະຫວ່າງຂະແໜງການ, ຫົວໜ້າຄະນະຊີ້ນໍາກະຊວງປ້ອງກັນປະເທດກ່ຽວກັບການເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ເປັນປະທານ ແລະກ່າວຄຳເຫັນມອບໝາຍໜ້າທີ່ໃຫ້ນາຍທະຫານ 4 ສະຫາຍ.
ທ່ານພົນໂທ ຮວ່າງຊວນຈ໊ຽນ ຮຽກຮ້ອງໃຫ້ນາຍທະຫານ 4 ສະຫາຍທີ່ໄປປະຕິບັດໜ້າທີ່ຢູ່ບໍລິເວນຫ່າງໄກ, ມີຄວາມສ່ຽງຫຼາຍ, ຄວນຊາບຊຶມ ແລະປະຕິບັດຕາມທັດສະນະ, ແນວທາງການພົວພັນຕ່າງປະເທດຂອງພັກ, ລັດ ແລະກອງທັບຢ່າງເຂັ້ມງວດ; ປະຕິບັດລະບຽບວິໄນຂອງກອງທັບ, ຂໍ້ກໍານົດຂອງສະຫະປະຊາຊາດ, ກົດໝາຍຂອງປະເທດປະຈໍາຖິ່ນ, ຄຳແນະນໍາຂອງອົງການທີ່ກ່ຽວຂ້ອງ ແລະກົມຮັກສາສັນຕິພາບຫວຽດນາມ; ຮັບປະກັນຄວາມປອດໄພຢ່າງເຂັດຂາດກ່ຽວກັບຊີວິດ ແລະວັດຖຸອຸປະກອນ; ເສີມຂະຫຍາຍມູນເຊື້ອກອງທັບ ແລະກໍາລັງທະຫານໝວກເບເລສີຂຽວຫວຽດນາມ, ສະແດງໃຫ້ເຫັນຄຸນທາດ, ຄວາມສາມາດດ້ານວິຊາສະເພາະ, ແຜ່ຂະຫຍາຍຮູບພາບປະເທດຊາດ ແລະຊາວຫວຽດນາມ, ກອງທັບປະຊາຊົນຫວຽດນາມ ໃນເວທີສາກົນ; ຍົກສູງນ້ຳໃຈສາມັກຄີພາຍໃນ, ນ້ຳໃຈສາມັກຄີລະຫວ່າງທະຫານ-ປະຊາຊົນໃນບໍລິເວນທີ່ຜັນຂະຫຍາຍ, ແກ້ໄຂທຸກຄວາມຫຍຸ້ງຍາກ ເພື່ອປະຕິບັດສໍາເລັດໜ້າທີ່ໃຫ້ເປັນຢ່າງດີ.
ທ່ານພົນໂທ ຮວ່າງຊວນຈ໊ຽນ ເຊື່ອໝັ້ນວ່າ ດ້ວຍຄວາມສາມັກຄີ ແລະຄວາມມານະພະຍາຍາມສູງ, ນາຍທະຫານ 4 ສະຫາຍຈະປະຕິບັດໜ້າທີ່ເຂົ້າຮ່ວມການເຄື່ອນໄຫວຮັກສາສັນຕິພາບ ສປຊ ເຊິ່ງພັກ, ລັດ ແລະກອງທັບມອບໝາຍໃຫ້ໄດ້ເປັນຢ່າງດີ.
ບູນມີ
