ວັນທີ 25 ກຸມພາ, ຄະນະຕິດປະສານງານທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ ຢູ່ລາວ ແຂວງເຊີນລາ ໄດ້ສົມທົບກັບບັນດາໂຮງຮຽນ ຄື: ມະຫາວິທະຍາໄລ ໄຕບັກ, ວິທະຍາໄລ ເຊີນລາ, ວິທະຍາໄລການແພດເຊີນລາ ຈັດຕັ້ງການພົບປະສັງສັນກັບນັກສຶກສາລາວ ໃນຕົ້ນບຸນປີໃໝ່ປີມະໂລງ 2024 ແລະຕ້ອນຮັບບຸນປີໃໝ່ 2567 ຂອງ ສປປ ລາວ.
ເຂົ້າຮ່ວມມີການນຳກອງບັນຊາການທະຫານແຂວງ, ທະຫານປ້ອງກັນຊາຍແດນແຂວງ, ອະດີດນັກຮົບອາສາສະໝັກ, ນັກຊ່ຽວຊານການທະຫານຫວຽດນາມ ຢູ່ລາວ 150 ທ່ານ ແລະພະນັກງານ, ນັກຮຽນ, ນັກສຶກສາລາວ 60 ຄົນທີ່ພວມຮ່ຳຮຽນຢູ່ບັນດາໂຮງຮຽນວິຊາຊີບແຂວງ ເຊີນລາ.
 |
| ຜູ້ຕາງໜ້າຄະນະປະສານງານ ມອບຂອງຂວັນໃຫ້ນັກສຶກສາລາວ ທີ່ພວມຮໍ່າຮຽນຢູ່ແຂວງເຊີນລາ. ພາບ: baosola.org.vn |
ລາຍການຮ່ວມມືຮອບດ້ານລະຫວ່າງແຂວງເຊີນລາ ແລະ 9 ແຂວງພາກເໜືອຂອງລາວ ໄດ້ຮັບການຜັນຂະຫຍາຍຢ່າງຮອບດ້ານໃນຂົງເຂດກະສິກຳ, ການສຶກສາ - ກໍ່ສ້າງ, ສາທາລະນະສຸກ, ວັດທະນະທຳ, ກິລາ ແລະການທ່ອງທ່ຽວ, ການປ້ອງກັນຊາດ-ປ້ອງກັນຄວາມສະຫງົບ; ໃນນັ້ນ, ການກໍ່ສ້າງຊັບພະຍາກອນມະນຸດແມ່ນເນື້ອໃນການຮ່ວມມືທີ່ສຳຄັນ, ມີລັກສະນະຍຸດທະສາດອັນຍາວນານ, ນຳມາເຊິ່ງໝາກຜົນຕົວຈິງຫຼາຍຢ່າງ. ແຂວງເຊີນລາ ຍາມໃດກໍ່ສ້າງເງື່ອນໄຂສະດວກດ້ານຈິດໃຈ, ວັດຖຸໃຫ້ບັນດານັກຄົ້ນຄວ້າ, ນັກສຶກສາຕ່າງປະເທດທີ່ຮ່ຳຮຽນຢູ່ທ້ອງຖິ່ນ.
ການພົບປະໄດ້ລະດົມກໍາລັງໃຈ, ສົ່ງເສີມນັກສຶກສາລາວ ທີ່ພວມຮ່ຳຮຽນຢູ່ແຂວງເຊີນລາ, ປະກອບສ່ວນໂຄສະນາເຜີຍແຜ່, ສຶກສາ, ຍົກສູງຄວາມຮັບຮູ້ໃຫ້ປະຊາຊົນ, ເປັນຕົ້ນແມ່ນລຸ້ນໜຸ່ມຂອງສອງປະເທດກ່ຽວກັບຄວາມໝາຍ, ຄວາມສຳຄັນຂອງມູນເຊື້ອສາມັກຄີ, ການຮ່ວມສຳພັນສູ້ຮົບ ແລະການຮ່ວມມືຮອບດ້ານລະຫວ່າງສອງປະເທດ, ເພື່ອພ້ອມກັນປົກປັກຮັກສາ, ປັບປຸງ ແລະເພີ່ມພູນຄູນສ້າງສາຍພົວພັນແບບພິເສດລາວ - ຫວຽດນາມ, ຫວຽດນາມ - ລາວ ໃຫ້ຂຽວສົດງົດງາມ, ໝັ້ນຄົງຂະໜົງແກ່ນໄປຊົ່ວກາລະນານ.
ການນຳມະຫາວິທະຍາໄລ ໄຕບັກ ໄດ້ຂອບອົກຂອບໃຈຄະນະປະສານງານທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ ທີ່ໄດ້ເອົາໃຈໃສ່ຢ້ຽມຢາມຖາມຂ່າວ, ລະດົມກໍາລັງໃຈນັກສຶກສາລາວທີ່ພວມຮໍ່າຮຽນຢູ່ແຂວງເຊີນລາ. ພ້ອມທັງສົ່ງຄໍາອວຍພອນໃຫ້ບັນດາສະຫາຍອະດີດທະຫານອາສາສະໝັກ, ນັກຊ່ຽວຊານການທະຫານຫວຽດນາມ ຢູ່ລາວ ຈົ່ງມີສຸຂະພາບເຂັ້ມແຂງ, ສືບຕໍ່ເຊື່ອມຈອດການພົວພັນມິດຕະພາບ, ການຮ່ວມມືລະຫວ່າງຫວຽດນາມ - ລາວ ໃຫ້ນັບມື້ນັບເຂົ້າສູ່ລວງເລິກ.
ເນື່ອງໃນໂອກາດຕົ້ນລະດູບານໃໝ່ ປີມະໂລງ ແລະກະກຽມຕ້ອນຮັບບຸນປີໃໝ່ລາວ 2567, ຄະນະປະສານງານທະຫານອາສາສະໝັກ ແລະນັກຊ່ຽວຊານການທະຫານຫວຽດນາມ ຢູ່ລາວ ແຂວງ ເຊີນລາ ໄດ້ມອບຂອງຂວັນ ແລະສົ່ງຄຳອວຍພອນອັນດີງາມເຖິງປະຊາຄົມນັກສຶກສາລາວ ທີ່ພວມຮໍ່າຮຽນຢູ່ ເຊີນລາ.
ບູນມີ
