| ຄວາມຈັບອົກຈັບໃຈຈາກງານບຸນຊ້າງ 2024 ຢູ່ລາວ | |
| ມີຫຼາຍກິດຈະກຳຕ້ອນຮັບປີໃໝ່ 2024 ຢູ່ຫວຽດນາມ |
ວັນທີ 5 ມັງກອນນີ້, ລັດຖະບານໄດ້ຈັດຕັ້ງກອງປະຊຸມຜ່ານທາງອອນລາຍທົ່ວປະເທດ ສະຫຼຸບວຽກງານປີ 2023 ແລະ ຜັນຂະຫຍາຍໜ້າທີ່ປີ 2024 ຂອງລັດຖະບານ ແລະ ອຳນາດການປົກຄອງທ້ອງຖິ່ນ. ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ເປັນປະທານກອງປະຊຸມ.
ເມື່ອເບິ່ງຄືນປີ 2023, ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ເນັ້ນໜັກວ່າ ກ່ຽວກັບສະພາບການສັງລວມທົ່ວໂລກ, ພາກພື້ນໄດ້ຜັນແປຢ່າງວ່ອງໄວ, ສັບສົນ, ຄາດເດົາໄດ້ຍາກ, ມີກາລະໂອກາດ, ຄວາມສະດວກ ແລະ ຫຍຸ້ງຍາກ, ສິ່ງທ້າທາຍສະຫຼັບຊັບຊ້ອນກັນໄປ, ແຕ່ມີຄວາມຫຍຸ້ງຍາກ, ສິ່ງທ້າທາຍຫຼາຍກວ່າ. ພາຍໃນປະເທດຫວຽດນາມ, ພື້ນເສດຖະກິດຕ້ອງຖືກ "ຜົນກະທົບຄວບຄູ່" ຂອງບັນດາປັດໄຈທີ່ບໍ່ດີຈາກພາຍນອກ ແລະ ຂໍ້ຈໍາກັດ, ສິ່ງທີ່ບໍ່ຄາດຄິດໃນຕົວທີ່ແກ່ຍາວມາເປັນເວລາຫຼາຍປີ ໄດ້ກາຍເປັນທີ່ຈະແຈ້ງກວ່າຫລັງຈາກໂລກລະບາດໂຄວິດ-19.
ໃນນັ້ນ, ປະເທດຫວຽດນາມ ເປັນປະເທດທີ່ກໍາລັງພັດທະນາ, ເລີ່ມຕົ້ນຈາກພື້ນຖານຕໍ່າ, ພື້ນຖານເສດຖະກິດພວມຢູ່ໃນການຫັນປ່ຽນ, ຂອບຂະໜາດຍັງຈຳກັດພໍສົມຄວນ, ມີລະດັບເປີດກວ້າງສູງ, ຄວາມຢືດຢຸ່ນ, ຄວາມສາມາດແກ່ງແຍ້ງຍັງຖືກຈຳກັດ - ແມ່ນແຕ່ການປ່ຽນແປງເລັກນ້ອຍຢູ່ພາຍນອກກໍສາມາດມີການກະທົບ, ສົ່ງຜົນກະທົບຕໍ່ພາຍໃນໄດ້.
ທ່ານນາຍົກລັດຖະມົນຕີ ສະເໜີທີ່ກອງປະຊຸມວ່າ, ບັນດາຜູ້ແທນໄຈ້ແຍກ, ຕີລາຄາສະຖານະການສະພາບການໃນປີ 2023 ແລະ ການສົ່ງຜົນກະທົບ, ຜົນສະທ້ອນຕໍ່ປະເທດຫວຽດນາມ ຢ່າງເລິກເຊິ່ງກ່ວາ; ວຽກງານການນຳພາ, ຊີ້ນຳ, ບໍລິຫານ, ພິເສດແມ່ນບັນດາຈຸດໃໝ່ໃນການຊີ້ນຳ, ບໍລິຫານປີ 2023 ແນໃສ່ “ຫັນປ່ຽນທ່າ, ຫັນປ່ຽນສະພາບ" ເພື່ອໃຫ້ໄດ້ຮັບໝາກຜົນທີ່ຮອບດ້ານໃນທຸກຂົງເຂດ; ວຽກງານເກັບກຳສະພາບການ ແລະ ຕອບສະໜອງນະໂຍບາຍ; ຮັບຟັງຄຳເຫັນຂອງບັນດານັກຊ່ຽວຊານ, ນັກວິທະຍາສາດ, ປະຊາຄົມວິສາຫະກິດ, ປະຊາຊົນ, ບັນດາອົງການຈັດຕັ້ງສາກົນ; ການຈັດຕັ້ງກອງປະຊຸມ ແລະ ອອກຫຼາຍລັດຖະນະໂຍບາຍຢ່າງທັນການ; ການສ້າງ 5 ໜ່ວຍປະຕິບັດງານການປ່ອຍເງິນການລົງທຶນສາທາລະນະ ແລະ 26 ໜ່ວຍປະຕິບັດງານໄປຍັງບັນດາທ້ອງຖິ່ນ ໄດ້ປະກອບສ່ວນແກ້ໄຂຄວາມຫຍຸ້ງຍາກ ແລະ ສິ່ງກີດຂວາງ...
 |
| ທ່ານນາຍົກລັດຖະມົນຕີ ຫວຽດນາມ ຟ້າມມິງຈິງ ກ່າວຄຳປາໄສທີ່ກອງປະຊຸມ |
ທ່ານນາຍົກລັດຖະມົນຕີຖືວ່າ ສະພາບເສດຖະກິດ-ສັງຄົມ ປີ 2023 ຈະສືບຕໍ່ມີທ່າອ່ຽງຟື້ນຕົວໃນທາງບວກ, ເດືອນໜ້າຈະດີຂຶ້ນກວ່າເດືອນກ່ອນ, ໄຕມາດຕໍ່ໄປຈະສູງກວ່າໄຕມາດກ່ອນ, ໂດຍພື້ນຖານບັນລຸໄດ້ເປົ້າໝາຍໂດຍສັງເຂບທີ່ວາງອອກແມ່ນຮັກສາເສດຖະກິດມະຫາພາກເປັນປົກກະຕິ, ຄວບຄຸມໄພເງິນເຟີ້, ຊຸກຍູ້ການເຕີບໂຕ, ຮັບປະກັນຄວາມດຸ່ນດ່ຽງທີ່ສຳຄັນຂອງເສດຖະກິດ; ຄວາມສະຫງົບປອດໄພສັງຄົມ ແລະ ຊີວິດການເປັນຢູ່ຂອງປະຊາຊົນໄດ້ຮັບການປັບປຸງ; ການປ້ອງກັນ, ຕ້ານການສໍ້ລາດບັງຫຼວງ, ປະກົດການຫຍໍ້ທໍ້ໄດ້ຮັບການຍູ້ໃຫ້ຖອຍໄປ; ການປ້ອງກັນຊາດ, ປ້ອງກັນຄວາມສະຫງົບໄດ້ຮັບການປັບປຸງ, ເພີ່ມທະວີ; ການຕ່າງປະເທດ, ການເຊື່ອມໂຍງເຂົ້າກັບສາກົນ ບັນລຸໄດ້ບັນດາໝາກຜົນຢ່າງຮອບດ້ານ, ພົ້ນເດັ່ນ; ອິດທິພົນ, ທີ່ຕັ້ງຂອງປະເທດ ແລະ ຄວາມໄວ້ເນື້ອເຊື່ອໃຈຂອງປະຊາຊົນທີ່ມີຕໍ່ພັກ, ລັດ ກໍ່ໄດ້ຮັບການປັບປຸງ, ຍົກສູງຂຶ້ນ.
ທ່ານນາຍົກລັດຖະມົນຕີ ໄດ້ສະເໜີທີ່ກອງປະຊຸມໄຈ້ແຍກ, ປະກອບຄຳຄິດຄຳເຫັນກ່ຽວກັບການຕີລາຄາທົ່ວໄປຂ້າງເທິງ, ພິເສດແມ່ນການໄຈ້ແຍກບັນດາເຫດຜົນຂອງຜົນສຳເລັດໃນສະພາບການທີ່ປະສົບກັບຄວາມຫຍຸ້ງຍາກຫຼາຍຢ່າງ, ພິເສດແມ່ນການບໍລິຫານນະໂຍບາຍເງິນຕາ ແລະ ນະໂຍບາຍປີການເງິນ, ອັດຕາແລກປ່ຽນ, ອັດຕາດອກເບ້ຍ, ສິນເຊື່ອ; ຄວບຄຸມການຂາດດຸນງົບປະມານແຫ່ງລັດ, ໜີ້ສາທາລະນະ, ໜີ້ຕ່າງປະເທດຂອງຊາດໃຫ້ຕ່ຳກວ່າເກນເຕືອນໄພ.
ພ້ອມກັນນັ້ນ, ກໍ່ໄຈ້ແຍກບົດຮຽນເພື່ອບັນລຸບາງຄາດໝາຍສຳຄັນໃຫ້ບັນລຸໄດ້ລະດັບສູງສຸດໃນຫຼາຍປີຜ່ານມາເຊັ່ນ ທຶນ FDI ທີ່ໄດ້ປະຕິບັດ, ການປ່ອຍເງິນລົງທຶນສາທາລະນະ, ເກີນດຸນ, ລາຍຮັບງົບປະມານແຫ່ງລັດ, ວຽກງານວາງແຜນການ, ການຜະລິດກະສິກຳ... ລະອຽດ: FDI ທີ່ໄດ້ປະຕິບັດບັນລຸ 23,18 ຕື້ USD, ການປ່ອຍເງິນລົງທຶນຂອງລັດ ຄາດຄະເນບັນລຸ 95% ຂອງແຜນການ, ຕົວເລກແທ້ຈິງແມ່ນສູງກວ່າ 146 ພັນຕື້ດົ່ງ; ລາຍຮັບງົບປະມານແຫ່ງລັດ ລື່ນກາຍ 8.2% ຂອງການຄາດຄະເນ...
ຕາມທ່ານນາຍົກລັດຖະມົນຕີແລ້ວ, ຈາກຕົວຈິງວຽກງານການນຳພາ, ຄຸ້ມຄອງ ແລະ ທິດທາງບໍລິຫານ ສາມາດຢັ້ງຢືນໄດ້ວ່າ: ບັນລຸໄດ້ບັນດາໝາກຜົນດັ່ງກ່າວແມ່ນຍ້ອນທິດທາງທີ່ໃກ້ຊິດ, ເລິກເຊິ່ງ ແລະ ທັນການຂອງສູນກາງ, ເຊິ່ງໂດຍກົງ ແລະ ເປັນປະຈຳແມ່ນກົມການເມືອງ ແລະ ຄະນະເລຂາທິການ; ໂດຍທ່ານເລຂາທິການໃຫຍ່ ຫງວຽນຟຸຈ້ອງ ເປັນຫົວໜ້າ; ການເປັນເຈົ້າການ, ຕັ້ງໜ້າ, ການຮ່ວມເດີນທາງຂອງສະພາແຫ່ງຊາດ ແລະ ບັນດາອົງການໃນລະບົບການເມືອງ; ການຊີ້ນຳບໍລິຫານຢ່າງຂ້ຽວຂາດ, ເປັນເຈົ້າການ, ທັນການ, ແທດຈິງ ແລະ ມີປະສິດທິຜົນຂອງລັດຖະບານ, ທຸກຂັ້ນ, ຂະແໜງການ, ທ້ອງຖິ່ນ; ການສະໜັບສະໜູນ ແລະ ການມີສ່ວນຮ່ວມຢ່າງຫ້າວຫັນຂອງປະຊາຊົນ ແລະ ປະຊາຄົມວິສາຫະກິດ; ການຮ່ວມມື ແລະ ການຊ່ວຍເຫຼືອຈາກເພື່ອນມິດສາກົນ. ສະເໜີໃຫ້ກອງປະຊຸມໄຈ້ແຍກ ແລະ ເຮັດແຈ້ງບັນດາປັດໄຈດັ່ງກ່າວ ເພື່ອສືບຕໍ່ດຳເນີນໄປຢ່າງຕັ້ງໜ້າ ແລະ ມີປະສິດທິຜົນໃນປີ 2024.
ກອງປະຊຸມໄດ້ປຶກສາຫາລື, ປະກອບຄຳເຫັນໃສ່ໜ້າທີ່, ມາດຕະການແກ້ໄຂບັນຫາການເຊື່ອມຈອດກັນຢ່າງກົມກຽວ ລະຫວ່າງການພັດທະນາວັດທະນະທຳ, ສັງຄົມ ແລະ ເສດຖະກິດ; ພັດທະນາອຸດສາຫະກຳວັດທະນະທຳ, ຊຸກຍູ້ເຮືອນຢູ່ອາໄສສັງຄົມ ແລະ ເຮືອນຂອງກຳມະກອນ; ລະດົມ ແລະ ນຳໃຊ້ແຫຼ່ງຊັບພະຍາກອນຢ່າງມີປະສິດທິຜົນໃນການປົກປັກຮັກສາສິ່ງແວດລ້ອມ, ປ້ອງກັນໄພທຳມະຊາດ, ຮັບມືກັບການປ່ຽນແປງຂອງດິນຟ້າອາກາດ...; ມາດຕະການແກ້ໄຂເພື່ອສືບຕໍ່ຮັບປະກັນການປ້ອງກັນຊາດ, ປ້ອງກັນຄວາມສະຫງົບ; ເພີ່ມທະວີການພົວພັນຕ່າງປະເທດ, ການເຊື່ອມໂຍງສາກົນຢ່າງເລິກເຊິ່ງ, ແທດຈິງ ແລະ ມີປະສິດທິຜົນ...
ທີ່ກອງປະຊຸມ, ບັນດາຜູ້ແທນໄດ້ຮັບຟັງການລາຍງານກ່ຽວກັບສະພາບການເສດຖະກິດ - ສັງຄົມປີ 2023 ແລະ ທິດທາງ, ໜ້າທີ່, ມາດຕະການແກ້ໄຂໃນປີ 2024; ຫຼັງຈາກນັ້ນ, ບັນດາຜູ້ແທນຂັ້ນສູນກາງ ແລະ ທ້ອງຖິ່ນກໍ່ກ່າວຄຳປາໄສ, ສຸມໃສ່ຕີລາຄາຢ່າງພາວະວິໄສ, ເລິກເຊິ່ງ ແລະ ແທດຈິງ, ພິເສດແມ່ນການຊີ້ນຳ, ນຳພາ, ການບໍລິຫານຂອງບັນດາສະຫາຍໃນຂົງເຂດທີ່ແຕກຕ່າງກັນ. ບົນພື້ນຖານນັ້ນ, ກໍ່ເສີມຂະຫຍາຍບັນດາເປົ້າໝາຍ, ວຽກງານ ແລະ ມາດຕະການແກ້ໄຂ ເພື່ອຜັນຂະຫຍາຍໃນປີ 2024 ແລະ ຊຸມປີຕໍ່ໜ້າຢ່າງມີປະສິດທິຜົນກວ່າອີກ.
ມິງດຶກ
