| ໜ່ວຍສະມາຄົມມິດຕະພາບ ຫວຽດນາມ - ລາວ ເຂດລວມໝູ່ 79 – 81 ລີນາມເດ໊ ເປີດນຳໃຊ້ຫ້ອງມູນເຊື້ອ | |
| ສປປ ລາວ ຍັງບໍ່ພົບກໍລະນີຜູ້ຕິດເຊື້ອໂຄວິດ-19 ເພີ່ມຂຶ້ນໃໝ່ ນັບເປັນເວລາ 79 ມື້ແລ້ວ |
ໂດຍມຸ່ງໄປເຖິງສະເຫຼີມສະຫຼອງ 79 ປີແຫ່ງວັນສ້າງຕັ້ງກອງທັບປະຊາຊົນຫວຽດນາມ ແລະ 34 ປີແຫ່ງວັນບຸນທົ່ວປວງຊົນປ້ອງກັນຊາດ, ກໍາລັງຫວຽດນາມ ທີ່ເຂົ້າຮ່ວມບັນດາການເຄື່ອນໄຫວຮັກສາສັນຕິພາບຂອງສະຫະປະຊາຊາດ ຢູ່ຄະນະປະຕິບັດງານປ້ອງກັນຄວາມສະຫງົບຊົ່ວຄາວ ສປຊ ຢູ່ Abyei (UNISFA) ໄດ້ຈັດຕັ້ງການເຄື່ອນໄຫວທີ່ມີຄວາມໝາຍຫຼາຍຢ່າງ ເພື່ອໜູນຊ່ວຍປະຊາຄົມທ້ອງຖິ່ນຢູ່ Abyei.
 |
| ກໍາລັງຮັກສາສັນຕີພາບຫວຽດນາມ ຈັດການກວດ, ປິ່ນປົວພະຍາດ, ແຈກຢາຍຢຸກຢາໂດຍບໍ່ເສຍຄ່າໃຫ້ພະນັກງານ, ລັດຖະກອນທ້ອງຖິ່ນ. ພາບ: baophapluat.vn |
ກໍາລັງຫວຽດນາມ ໄດ້ສົມທົບກັບອຳນາດການປົກຄອງທ້ອງຖິ່ນຈັດຕັ້ງການກວດພະຍາດ, ແຈກຢາຍຢາໂດຍບໍ່ເສຍຄ່າໃຫ້ແກ່ພະນັກງານ, ລັດຖະກອນຂອງກະຊວງສຶກສາ, ກະຊວງສາທາລະນະສຸກ, ກະຊວງການເງິນ... ຢູ່ເຂດໃຈກາງ Abyei. ການເຄື່ອນໄຫວດັ່ງກ່າວ ໄດ້ປະສົບຜົນສໍາເລັດ ແລະມີປະສິດທິຜົນໂດຍມີພະນັກງານ, ລັດຖະກອນຂອງບັນດາອົງການອໍານາດການປົກຄອງທ້ອງຖິ່ນເກືອບ 250 ຄົນລົງທະບຽນກວດພະຍາດ, ໃນນັ້ນ ມີທ່ານລັດຖະມົນຕີກະຊວງສາທາລະນະສຸກ ແລະເຈົ້າຄອງເຂດ Abyei.
ຄຽງຂ້າງບັນດາການເຄື່ອນໄຫວກວດ, ປິ່ນປົວພະຍາດ, ກອງຊ່າງແສງຫວຽດນາມ ກໍ່ໄດ້ໜູນຊ່ວຍປັບປຸງ, ຍົກລະດັບພື້ນຖານດ້ານວັດຖຸ ແລະໂຄງລ່າງຢູ່ Abyei. ກອງຊ່າງແສງໄດ້ຈັດສົ່ງກໍາລັງໄປສຳຫຼວດ, ສ້ອມແປງ, ສ້າງເສັ້ນທາງຢູ່ເຂດບໍລິຫານ ແລະບັນດາເຂດຊຸມຊົນເພື່ອໃຫ້ພະນັກງານອໍານາດການປົກຄອງທ້ອງຖິ່ນ ແລະປະຊາຊົນສາມາດໄປມາໄດ້ຢ່າງສະດວກ.
ໃນໄລຍະຈະມາເຖິງ, ກໍ່ໃນຂອບເຂດການເຄື່ອນໄຫວສະເຫຼີມສະຫຼອງເດືອນທັນວາ, ຄາດວ່າວັນທີ 22 ທັນວາ, ຢູ່ຖານທີ່ໝັ້ນ Highway, ກອງຊ່າງແສງຫວຽດນາມ ຈະຈັດຕັ້ງການແຂ່ງຂັນກິລາມິດຕະພາບ ໂດຍມີການເຂົ້າຮ່ວມຂອງບັນດາກົມກອງເພື່ອນ, ບັນດາອົງການຄະນະປະຕິບັດງານຄື: ແລ່ນໄລຍະທາງ 5.000 ແມັດຊາຍ; 3.000 ແມັດຍິງ..., ຜ່ານນັ້ນ ກໍ່ປະກອບສ່ວນຍົກສູງສຸຂະພາບ, ລະດົມນ້ຳໃຈສາມັກຄີ, ສະໜັບສະໜູນເຊິ່ງກັນ ແລະກັນຂອງກຳລັງຮັກສາສັນຕິພາບຂອງອົງການສະຫະປະຊາຊາດ ຢູ່ຄະນະປະຕິບັດງານ UNISFA.
ບູນມີ
