ນີ້ແມ່ນຄຳຢືນຢັນຂອງທ່ານ Nicolai Prytz ເອກອັກຄະລັດຖະທູດ ເດນມາກ ປະຈຳ ຫວຽດນາມ ເມື່ອແບ່ງປັນກັບນັກຂ່າວກ່ຽວກັບຄວາມຕັດສິນໃຈສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວ ຫວຽດນາມ - ເດນມາກ ຫວ່າງແລ້ວນີ້ຂອງລັດຖະບານສອງປະເທດ.
ນັກຂ່າວ: ຮຽນທ່ານເອກອັກຄະລັດຖະທູດ, ຂໍຮຽນທ່ານແບ່ງປັນຄວາມໝາຍຂອງການສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວ ຫວຽດນາມ - ເດນມາກ ທີ່ມີຕໍ່ການຮ່ວມມືລະຫວ່າງສອງປະເທດ?
ທ່ານເອກອັກຄະລັດຖະທູດ Nicolai Prytz: ປະຈຸບັນ ເດນມາກ ແມ່ນໜຶ່ງໃນບັນດາປະເທດນຳໜ້າໃນຂະບວນການຫັນເປັນສີຂຽວ. ພວກຂ້າພະເຈົ້າເຂົ້າໃຈວ່າ ເພື່ອໃຫ້ບັນລຸໄດ້ສິ່ງດັ່ງກ່າວ, ພວກເຮົາຕ້ອງນຳເອົາແນວຄິດຫັນເປັນສີຂຽວເຂົ້າໃນທຸກຂົງເຂດຊີວິດ, ເສດຖະກິດ, ສັງຄົມ. ສະນັ້ນ, ເລື່ອງສອງປະເທດສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວ ຈະສ້າງເງື່ອນໄຂໃຫ້ແກ່ການຫັນປ່ຽນໄດ້ດຳເນີນໄປຢ່າງຄົບຊຸດ ນັບແຕ່ຂັ້ນລັດຖະບານຕະຫຼອດເຖິງກະຊວງ, ຂະແໜງການຕ່າງໆ ແລະ ວິສາຫະກິດຢູ່ຫວຽດນາມ.
 |
| ທ່ານ Nicolai Prytz ເອກອັກຄະລັດຖະທູດ ເດນມາກ ປະຈຳ ຫວຽດນາມ (ຢູ່ກາງ). ພາບ: vovworld.vn |
ກໍ່ຕ້ອງເວົ້າວ່າ ຫວຽດນາມ ແມ່ນປະເທດທີ 5 ໃນໂລກທີ່ ເດນມາກ ຕັດສິນໃຈສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວນີ້. ສະນັ້ນ, ພວກທ່ານສາມາດເຫັນໄດ້ຢ່າງຈະແຈ້ງຕໍ່ຄຳໝັ້ນສັນຍາ ແລະບຸລິມະສິດຂອງລັດຖະບານ ເດນມາກ ໃນການໜູນຊ່ວຍ ຫວຽດນາມ ຫັນເປັນສີຂຽວ. ໃນຊຸມປີຜ່ານມາ, ສາມາດເຫັນໄດ້ເຖິງຄວາມມານະພະຍາຍາມ ແລະຄຳໝັ້ນສັນຍາຂອງລັດຖະບານຫວຽດນາມ ໃນຂົງເຂດຫັນເປັນສີຂຽວ, ຈາກຄຳໝັ້ນສັນຍາທີ່ທ່ານນາຍົກລັດຖະມົນຕີ ຫວຽດນາມ ຟ້າມມິງຈິ໊ງ ໄດ້ໃຫ້ໄວ້ກັບ COP 26, ຕະຫຼອດຮອດການເຂົ້າຮ່ວມໂຄງການຫັນປ່ຽນພະລັງງາມຢ່າງຍຸດຕິທໍາ JETP; ຫຼືການອະນຸມັດການວາງແຜນຜັງໄຟຟ້າ 8. ນີ້ແມ່ນບັນດາຄໍາໝັ້ນສັນຍາທີ່ເຂັ້ມແຂງ ແລະມີຄວາມຕັ້ງຫວັງທີ່ສຸດ. ພວກຂ້າພະເຈົ້າ, ໃນຖານະເປັນຄູ່ຮ່ວມມືທີ່ມີມາແຕ່ດົນນານຂອງ ຫວຽດນາມ, ຫວັງວ່າ ເລື່ອງສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວລະຫວ່າງສອງປະເທດ ຈະສ້າງເງື່ອນໄຂສະດວກເພື່ອໃຫ້ພວກຂ້າພະເຈົ້າ ສືບຕໍ່ໜູນຊ່ວຍ ຫວຽດນາມ ບັນລຸເປົ້າໝາຍດັ່ງກ່າວ.
ນັກຂ່າວ: ພາຍຫຼັງສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວແລ້ວ, ສອງຝ່າຍຈະຜັນຂະຫຍາຍການເຄື່ອນໄຫວຮ່ວມມືໃນຂົງເຂດນີ້ຄືແນວໃດ, ຮຽນທ່ານເອກອັກຄະລັດຖະທູດ?
ທ່ານເອກອັກຄະລັດຖະທູດ Nicolai Prytz: ດ້ວຍການພົວພັນຄູ່ຮ່ວມມືນີ້, ສອງຝ່າຍຈະສຸມໃສ່ 3 ລະດັບຕົ້ນຕໍ. ທີໜຶ່ງແມ່ນການພົວພັນດ້ານການເມືອງ, ເພີ່ມທະວີການພົບປະ ແລະ ແລກປ່ຽນຄະນະຜູ້ແທນຂັ້ນສູງກ່ຽວກັບບັນດາໂຄງການທີ່ແນໃສ່ຮັບມືກັບການປ່ຽນແປງຂອງດິນຟ້າອາກາດ ແລະການເຕີບໂຕສີຂຽວ.
ທີສອງແມ່ນເພີ່ມທະວີການຮ່ວມມືລະຫວ່າງສອງລັດຖະບານໃນຂະແໜງການທີ່ພວມຜັນຂະຫຍາຍຈຳນວນໜຶ່ງ. ສອງຝ່າຍກໍ່ຈະແລກປ່ຽນເພື່ອຊອກຫາທັດສະນະ ແລະຄຳໝັ້ນສັນຍາລວມ ເພື່ອຍົກອອກຢູ່ກອງປະຊຸມ COP28 ທີ່ຈະມາເຖິງນີ້. ນອກຈາກນັ້ນ, ເດນມາກ ແລະຫວຽດນາມ ກໍ່ແມ່ນສະມາຊິກຂອງໂຄງການແລກປ່ຽນພະລັງງານຢ່າງຍຸດຕິທຳ JETP ແລະ ພວກເຮົາຈະສືບຕໍ່ຮ່ວມມືກັນຢ່າງແໜ້ນແຟ້ນໃນຂອບເຂດນີ້.
ທີສາມ, ກ່ຽວກັບດ້ານເສດຖະກິດ, ສອງຝ່າຍກໍ່ຈະຮ່ວມກັນມືຍົກອອກບັນດານະໂຍບາຍ, ກອບນິຕິກໍາ ທີ່ເໝາະສົມເພື່ອສົ່ງເສີມການລົງທຶນສີຂຽວຈາກພາກເອກະຊົນ. ພວກຂ້າພະເຈົ້າກໍ່ຈະຊອກຫາບັນດາຂົງເຂດໃໝ່ເພື່ອເພີ່ມທະວີການຮ່ວມມື, ບັນດາຂົງເຂດທີ່ ເດນມາກ ມີປະສົບການຫຼາຍ ແລະຫວຽດນາມ ກໍ່ກຳລັງມີຄວາມຕ້ອງການພັດທະນາ.
ນັກຂ່າວ: ສະນັ້ນ, ເລື່ອງສ້າງຕັ້ງການພົວພັນຄູ່ຮ່ວມມືຍຸດທະສາດສີຂຽວ ຈະເປີດກາລະໂອກາດຮ່ວມມືໃຫ້ ຫວຽດນາມ ແລະເດນມາກ ໃນໄລຍະຈະມາເຖິງຄືແນວໃດ, ຮຽນທ່ານເອກອັກຄະລັດຖະທູດ?
ທ່ານເອກອັກຄະລັດຖະທູດ Nicolai Prytz: ເດນມາກ ໄດ້ເລີ່ມປະຕິບັດການຫັນເປັນສີຂຽວ ປະມານ 3 ທົດສະວັດຜ່ານມາ ແລະພວກຂ້າພະເຈົ້າໝັ້ນໃຈວ່າ ຈະເປັນໜຶ່ງໃນບັນດາປະເທດນຳໜ້າໃນຂະບວນການນີ້. ພວກເຮົາເຊື່ອໝັ້ນວ່າ ບາງມາດຕະການ ແລະວິທີເຮັດທີ່ດີທີ່ ເດນມາກ ກຳລັງປະຕິບັດຢູ່ຈະສາມາດຊ່ວຍຫວຽດນາມ ຊອກຫາມາດຕະການ ທີ່ເໝາະສົມທີ່ສຸດ.
ນອກຈາກນັ້ນ, ການພົວພັນຄູ່ຮ່ວມມືຍຸດທະສາດສີຂຽວ ກໍ່ຈະຊ່ວຍດຶງດູດວິສາຫະກິດ ເດນມາກ ມາລົງທຶນຢູ່ ຫວຽດນາມ ຕື່ມອີກ. ຂ້າພະເຈົ້າມີຄວາມເອກອ້າງທະນົງໃຈທີ່ສຸດທີ່ເຫັນວິສາຫະກິດຂອງ ເດນມາກ ມາລົງທຶນຢູ່ ຫວຽດນາມ, ບໍ່ພຽງແຕ່ເປັນການຜະລິດ ແລະສ້າງລາຍຮັບເທົ່ານັ້ນ, ຫາກຍັງເອົາໃຈໃສ່ເຖິງສິດຜົນປະໂຫຍດຂອງຜູ້ອອກແຮງງານຫຼາຍທີ່ສຸດ, ໄດ້ສ້າງວຽກເຮັດງານທໍາ ແລະປະກອບສ່ວນເຂົ້າໃນການພັດທະນາແບບຍືນຍົງ, ນຳມາເຊິ່ງຄຸນຄ່າແທດຈິງໃຫ້ແກ່ຫວຽດນາມ ອີກດ້ວຍ.
ຄຽງຂ້າງນັ້ນ, ຫວຽດນາມ ກໍ່ມີປະສົບການຫຼາຍຢ່າງໃນບາງຂົງເຂດທີ່ພວກຂ້າພະເຈົ້າສາມາດຮຽນຮູ້ໄດ້. ພວກຂ້າພະເຈົ້າເຫັນວ່າ ຄົນຫວຽດນາ ມີຄວາມຕັ້ງໃຈຮໍ່າຮຽນ, ດຸໝັ່ນ ແລະຍາມໃດກໍ່ຊອກຫາວິທີເຮັດທີ່ມີຫົວຄິດປະດິດສ້າງ. ບັນດານັກຊ່ຽວຊານ ເດນມາກ ເມື່ອມາຫວຽດນາມ, ເຂົາເຈົ້າກໍ່ປະຫຼາດໃຈຕໍ່ວິທີທີ່ຈັບໃຈ ເຊິ່ງຫວຽດນາມ ພວມຜັນຂະຫຍາຍ ແລະໄດ້ຮ່ຳຮຽນເອົາ ເພື່ອໝູນໃຊ້ຢູ່ປະເທດ ເດນມາກ. ສະນັ້ນ, ຕາມຄວາມຄິດເຫັນຂອງຂ້າພະເຈົ້າແລ້ວ, ແນ່ນອນວ່າການພົວພັນລະຫວ່າງສອງປະເທດຈະນັບມື້ນັບ ພັດທະນາ, ພິເສດແມ່ນໃນຂົງເຂດເສດຖະກິດສີຂຽວ.
ຂໍຂອບໃຈທ່ານເອກອັກຄະລັດຖະທູດ Nicolai Prytz!
ບູນມີ
