ຫວຽດນາມ ​ແມ່ນທ້ອງຕະຫຼາດທີ່​ດຶງ​ດູດ ​ແລະ ສຳຄັນ​ສຳລັບບັນດາ​ວິ​ສາ​ຫະກິດ ​ແດນ​ມາກ ​ໃນ​ຂົງ​ເຂດ​ກະສິກຳ

	ກູ​ບາ​ ຜັນຂະຫຍາຍວີ​ຊາເອເລັກໂຕນິກໃໝ່​ ເພື່ອ​ດຶງ​ດູດ​ນັກ​ທ່ອງ​ທ່ຽວ
	ຊຸກຍູ້ການ​ເຊື່ອມ​ໂຍງ​ວິ​ສາ​ຫະກິດ​ຂະໜາດ​ກາງ ​ແລະ ນ້ອຍ​​ແຂວງ ຫາຍ​ຟ່ອງ ກັບ​ບັນດາ​ຄູ່​ຮ່ວມ​ມື​ ສິງກະ​ໂປ

ທ່ານ ລັດ​ຖະ​ມົນ​ຕີ​ກະ​ຊວງ​ສະ​ບຽງ​ອາ​ຫານ, ກະ​ສິ​ກຳ ແລະ ສິນໃນນ້ຳ ແດນ​ມາກ ພ້ອມກັນກັບກະຊວງ​ກະສິກຳ ​ແລະ ພັດທະນາ​ຊົນນະບົດ ຫວຽດນາມ ​ໄດ້​ລົງ​ນາມ​ໃນ​ບົດ​ບັນທຶກ​ຊ່ວຍ​ຈຳ​ເພື່ອ​ເພີ່ມ​ທະວີ​ການ​ຮ່ວມ​ມື.

ນັບແຕ່​ວັນ​ທີ 14-16 ພຶດສະພາ, ທ່ານ Jacob Jensen, ລັດ​ຖະ​ມົນ​ຕີ​ກະ​ຊວງ​ສະ​ບຽງ​ອາ​ຫານ, ກະ​ສິ​ກຳ ແລະ ສິນໃນນ້ຳ ແດນ​ມາກ ໄດ້​ນຳ​ໜ້າ​ຄະ​ນະ​ຜູ້​ແທນ​ຂັ້ນ​ສູງ​ໄປ​ຢ້ຽມ​ຢາມ ແລະ ເຮັດ​ວຽກ​ຢູ່​ ຫວຽດ​ນາມ. ຕາມ​ນັ້ນ​ແລ້ວ, ຄະນະ​ຜູ້​ແທນ​ລວມມີ​ບັນດາ​ວິ​ສາ​ຫະກິດ​ກະສິກຳ ​ແລະ ສະບຽງ​ອາຫານ ​ແດນ​ມາກ, ບັນດາ​ບໍລິສັດທີ່ກຳມະສິດ​ເຕັກ​ໂນ​ໂລ​ຢີ ແລະ know-how ທີ່​ກ້າວໜ້າໃນ​ການ​ຫັນ​ເປັນ​ສີຂຽວ ​ແລະ ພັດທະນາ​ແບບ​ຍືນ​ຍົງ.

ນີ້​ແມ່ນ​ບັນດາ​ບໍລິສັດ ​ແລະ ອົງການຜະລິດ​ທີ່ກຳມະສິດ​ບັນດາ​ມາດຕະຖານແຖວໜ້າ​ໃນ​ໂລກກ່ຽວກັບການຜະລິດ ​ແລະ ປຸງ​ແຕ່ງ​ສະບຽງ​ອາຫານ, ເກັບຮັກສາ, ຫັນການ​ນຳ​ໃຊ້​ຊັບພະຍາກອນ​ກະສິກຳ ​ແລະ ສະບຽງ​ອາຫານ, ເຕັກນິກ​ນ້ຳ ​ແລະ ການລະບາຍ​ນ້ຳເປັນຢ່າງດີທີ່ສຸດ… ເປົ້າໝາຍ​ຂອງ​ການ​ຢ້ຽມຢາມ​ຄັ້ງ​ນີ້ ​ແມ່ນ​ສຸມ​ໃສ່ເຂົ້າໃນການ​ຊຸກຍູ້​ການ​ເຈລະຈາ​ນະ​ໂຍບາຍ​ຂັ້ນ​ສູງ​ກັບ​ບັນດາ​ຄູ່​ຮ່ວມ​ມື​ ​ຫວຽດນາມ ກ່ຽວ​ກັບ​ການ​ຜະລິດ​ສະບຽງ​ອາຫານ​ແບບ​ຍືນ​ຍົງ ​ແລະ ພັດທະນາບັນດາລະບົບສະໜອງຢ່າງ​ມີ​ປະສິດທິ​ຜົນ, ຊ່ວຍ​ປະ​ຢັດ​ຊັບ​ພະ​ຍາ​ກອນ​.

ຕາມ​ທ່ານ​ລັດຖະມົນຕີ Jacob Jensen ແລ້ວ, ຫວຽດນາມ ​ແລະ ​ແດນ​ມາກ ມີ​ການ​ພົວພັນ​ຮ່ວມ​ມື​ສອງຝ່າຍ​ໃນ​ໄລຍະ​ຍາວ ​ແລະ ແໜ້ນແຟ້ນ​ໃນ​ຂົງ​ເຂດ​ຄວາມ​ປອດ​ໄພ​ດ້ານ​ອາຫານ. ນັບ​ແຕ່​ປີ 2017 ​ເປັນ​ຕົ້ນ​ມາ, ​ໂຄງການ​ຮ່ວມ​ມື​ລະຫວ່າງ​ສອງ​ປະ​ເທດ​ ໄດ້​ສຸມ​ໃສ່​ເຂົ້າໃນຂົງເຂດ​ຄວາມ​ປອດ​ໄພ​ດ້ານ​ອາຫານ ​ແລະ ການ​ຜະລິດ​ຫົວອາຫານ​ສັດ. ໂຄງ​ການ​ດັ່ງ​ກ່າວ ຍັງ​ແມ່ນ​ອົງ​ປະ​ກອບ​ທີ່​ສໍາ​ຄັນ​ຂອງ​ສັນ​ຍາ​ຄູ່​ຮ່ວມ​ມື​ຍຸດ​ທະ​ສາດ​ສີ​ຂຽວ​, ເຊິ່ງ​ນາ​ຍົກ​ລັດ​ຖະ​ມົນ​ຕີ​ທັງ​ສອງ​ທ່ານໄດ້ເລີ່ມປະຕິບັດ​ໃນ​ເດືອນ​ພະ​ຈິກ 2023​. ໃນນັ້ນ, ຫວຽດນາມ ​ແລະ ​ແດນ​ມາກ ​ໃຫ້​ຄຳ​ໝັ້ນ​ສັນຍາ​ຊຸກຍູ້​ການ​ຫັນປ່ຽນ​ສີຂຽວ ​ແລະ ​ເຕີບ​ໂຕ​ສີ​ຂຽວ, ໜູນ​ຊ່ວຍ ຫວຽດນາມ ກໍ່ສ້າງ​ພື້ນຖານ​ເສດຖະກິດ​ສີຂຽວ​ ແລະ ​ເຮັດສຳ​ເລັດ​ຄຳ​ໝັ້ນ​ສັນຍາ​ບັນລຸ​ເປົ້າ​ໝາຍ​ການປ່ອຍອາຍພິດລົງເປັນ 0 ໃນ​ປີ 2050.

ເພື່ອພັດທະນາຂະແໜງການຜະລິດຫົວອາຫານສັດ ໂດຍຜ່ານການຍົກສູງຄວາມສາມາດຂອງພະນັກງານຂອງລັດ ແລະ ປັບປຸງຂອບເຂດກົດຫມາຍກ່ຽວກັບນຳໃຊ້ຢາສັດຕະວະແພດດ້ວຍຄວາມລະມັດລະວັງ.

​ໄລຍະ​ທີ 2 ​ແຕ່​ເດືອນ​ເມສາ 2020 ຫາ​ເດືອນ​ເມສາ 2024, ​ໂຄງການ​ຮ່ວມ​ມື ​ໄດ້​ສຸມ​ໃສ່ເຂົ້າໃນບັນດາ​ຂົງ​ເຂດຫຼັກ​ເຊັ່ນ: ຍົກສູງ​ຄວາມ​ສາມາດ​ຂອງພະນັກງານທ້ອງ​ຖິ່ນ​ໃນ​ທຸກຂັ້ນຕອນຂອງບັນດາລະບົບອາຫານ​ຈາກຟາມໄປຮອດ​ໂຕະກິນເຂົ້ົ້າ, ຕ້ານ​ການ​ຕ້ານ​ເຊື້ອ​ (AMR), ຄວບ​ຄຸມ​ກວດກາຫົວອາຫານ​ສັດ, ຊອກຫາຕົ້ນກຳເນີດ ແລະ ການເກັບອາຫານທີ່ບໍ່ປອດໄພຄືນ.

ທ່ານ Jacob Jensen ​ແລະ ບັນດາ​ວິ​ສາ​ຫະກິດ ​ແດນ​ມາກ ປາດ​ຖະໜາ​ຢາກ​ຮ່ວມ​ມື​ກັບ​ບັນດາ​ວິ​ສາ​ຫະກິດ ຫວຽດນາມ ເພື່ອພັດທະນາຂະແໜງການ​ສະບຽງ​ອາຫານ​ແບບ​ຍືນ​ຍົງ.

ເພື່ອຕໍ່ກຳນົດໂຄງການຮ່ວມມືຂ້າງເທິງ, ວັນທີ 14 ພຶດສະພາ, ທ່ານລັດຖະມົນຕີ Jacob Jensen ໄດ້ລົງນາມໃນບົດ​ບັນທຶກ​ຊ່ວຍຈຳ (MOU) ກັບທ່ານລັດຖະມົນຕີ MARD. ເປົ້າໝາຍໃນ​ຊຸມ​ປີ​ຈະ​ມາ​ເຖິງ, ​ໂຄງການ​ຮ່ວມ​ມື ຈະ​ເພີ່ມ​ທະວີ​ສຸມ​ໃສ່ການ​ຊຸກຍູ້​ການ​ຫັນປ່ຽນ​ສີຂຽວ​ໃນການຜະລິດ​ກະສິກຳ ​ແລະ ສະບຽງ​ອາຫານ, ມຸ່ງ​ໄປ​ເຖິງ​ການ​ກໍ່ສ້າງ​ລະບົບ​ສະບຽງ​ອາຫານ​ແບບ​ຍືນ​ຍົງ ​ແລະ ມີຄວາມສາມາດຕ້ານບັນດາຜົນກະທົບພາຍນອກກ່ວາອີກ.

ທ່ານລັດຖະມົນຕີ Jacob Jensen ໃຫ້ຮູ້ວ່າ "ໃນຂະບວນການປະຕິບັດການຫັນປ່ຽນສີຂຽວ ແລະ ການຜະລິດສະບຽງອາຫານແບບຍືນຍົງ, ແດນມາກ ໄດ້ພັດທະນາບັນດາມາດຕະຖານ ແລະ ວິທີເຂົ້າເຖິງຢ່າງເຂັ້ມແຂງ, ປະດິດສ້າງໃຫ້ແກ່ບັນດາລະບົບມູນຄ່າທັງໝົດ, ຊ່ວຍເພີ່ມສະມັດຕະພາການຜະລິດ ແລະ ປັບປຸງຄຸນນະພາບຜະລິດຕະພັນ, ພ້ອມທັງກໍ່ຫຼຸດຜ່ອນການຊົມໃຊ້ນໍ້າ ແລະ ພະລັງງານ. ພວກ​ຂ້າ​ພະ​ເຈົ້າ​ ​ຫວັງ​ວ່າ​ຈະ​ໄດ້ແບ່ງປັນບັນ​ດາ​ປະ​ສົບ​ການ​ນີ້ ແລະ ສົ່ງແຮງບັນດານໃຈໃຫ້ການ​ຮ່ວມ​ມື​ຢ່າງ​ເລິກ​ເຊິ່ງ​ກັບ​ບັນ​ດາ​ຄູ່​ຮ່ວມ​ມື ​ຫວຽດ​ນາມ”.

ໃນການຢ້ຽມຢາມຄັ້ງນີ້, ທ່ານລັດຖະມົນຕີ Jacob Jensen ຍັງໄດ້ແບ່ງປັນກ່ຽວກັບການຕ້ານຢາຕ້ານເຊື້ອ (AMR) ໃນຂົງເຂດກະສິກຳ ແລະ ການລ້ຽງສັດນ້ຳ, ເຊິ່ງປະຈຸບັນ ແມ່ນໄພຂົ່ມຂູ່ໃຫຍ່ຕໍ່ສຸຂະພາບຂອງປະຊາຊົນ ແລະ ສຸຂະພາບຂອງມະນຸດ. ນີ້ກໍ່​ແມ່ນ​ເນື້ອ​ໃນ​ທີ່​ສຳຄັນ​ຂອງ​ໂຄງການ​ຮ່ວມ​ມື​ຂະ​ແໜງ​ການ​ຍຸດ​ທະ​ສາດ​ກ່ຽວ​ກັບ​ອາຫານ (SSC Food).

ຕາມການຕີລາຄາຂອງບັນດາ​ວິ​ສາ​ຫະກິດ ​ແດນ​ມາກ ​ແລ້ວ, ຫວຽດນາມ ​ແມ່ນ​ຈຸດປາຍທາງທີ່​ດຶງ​ດູດ ​ແລະ ທ້ອງຕະຫຼາດ​ທີ່ສຳຄັນ​ຕໍ່​ບັນດາ​ບໍລິສັດ ແດນ​ມາກ​ ໃນ​ຂົງ​ເຂດ​ກະສິກຳ. ປະຈຸ​ບັນ, ​ແດນ​ມາກ ​ແມ່ນ​ໜຶ່ງ​ໃນ​ບັນດາ​ປະ​ເທດ EU ​ທີ່​ມີ​ລະດັບ​ສົ່ງ​ອອກສະເລ່ຍ​ຕໍ່​ຫົວ​ຄົນສູງ​ສຸດໄປຍັງ ຫວຽດນາມ. ໃນນັ້ນ, ຂົງເຂດກະ​ສິ​ກຳ​ສະ​ບຽງ​ອາ​ຫານ​​ກວມ​ເອົາ​ປະ​ມານ​ເຄິ່ງ​ໜຶ່ງ​ຂອງ​ຍອດ​ວົງ​ເງິນ​ສົ່ງ​ອອກ​ຂອງ​ ແດນ​ມາກ ​ໄປ​ຍັງ ຫວຽດ​ນາມ.

ໃນການໄປ​ຢ້ຽມ​ຢາມ ແລະ ເຮັດ​ວຽກ​ຢູ່​ ຫວຽດ​ນາມ, ວັນ​ທີ 14 ພຶດສະພາ, ທ່ານ ລັດ​ຖະ​ມົນ​ຕີ​ກະ​ຊວງ​ສະ​ບຽງ​ອາ​ຫານ, ກະ​ສິ​ກຳ ແລະ ສິນໃນນ້ຳ ແດນ​ມາກ ແລະ MARD ໄດ້​ມີ​ການ​ເຈ​ລະ​ຈາ​ສອງ​ຝ່າຍ.

​ໃນ 2 ວັນ​ຈະມາເຖິງ, ຄະນະ​ຜູ້​ແທນ​ວິ​ສາ​ຫະກິດ​ ແດນ​ມາກ​ ຈະ​ໄປ​ຢ້ຽມຢາມ Food Bank ຫວຽດນາມ, ​ແມ່ນ​ຄູ່​ຮ່ວມ​ມື​ສຳຄັນ​ໃນ​ຂົງ​ເຂດ​ຫຼຸດຜ່ອນ​ການ​ສູນ​ເສຍ ແລະ ຟຸ່ມເຟືອຍຂອງສະບຽງອາຫານ; ຟາມລ້ຽງປາປຶ່ງ ຢູ່ ຕ່ຽນຢາງ ແລະ ໂຮງງານຜະລິດຫົວອາຫານສັດນ້ຳຢູ່ ເບັ໋ນແຈ່, ເຊິ່ງແມ່ນສະຖານທີ່ບັນດາສະຖາບັນຄົ້ນຄວ້າ ແລະ ບໍລິສັດ ຫວຽດນາມ ແລະ ແດນມາກ ພວມຮ່ວມມື ເພື່ອເພີ່ມທະວີການນຳໃຊ້ເຕັກໂນໂລຢີ ແລະ ວິທີແກ້ໄຂສີຂຽວມຸ່ງໄປເຖິງການຜະລິດສິນໃນນ້ຳແບບຍືນຍົງຢູ່ ຫວຽດນາມ.

ນອກຈາກ​ນັ້ນ, ການສຳມະນາ “ການຜະລິດກະສິກຳ ​ແລະ ສະບຽງ​ອາຫານ​ແບບ​ຍືນ​ຍົງ: ​ເຕັກ​ໂນ​ໂລຢີ​ທີ່​ກ້າວໜ້າຂອງ ແດນມາກ ແລະ ກາ​ລະ​ໂອກາດ​ການ​ເງິນ” ກໍໄດ້ຈັດຂຶ້ນ​ໃນ​ວັນ​ທີ 16 ພຶດສະພາ​ ​ເພື່ອ​ໃຫ້​ບັນດາ​ອົງການ​ຄຸ້ມ​ຄອງ, ບັນດາ​ນັກວາງແຜນກຳນົດນະໂຍບາຍ ​ແລະ ວິ​ສາ​ຫະກິດຂອງ ແດນມາກ, ຫວຽດນາມ ​ໄດ້​ນັ່ງນຳກັນເພື່ອ​ປຶກສາ​ຫາລື, ແລກປ່ຽນ​ບັນດາ​ນະ​ໂຍບາຍ, ປະສົບການ, ຂໍ້ດີ, ຂໍ້ເສຍ, ເຕັກໂນໂລຢີ, ການເງິນ ແລະ ໂອກາດໃນການດຳເນີນທຸລະກິດນຳກັນ.