ຕາມສຳນັກຂ່າວສານຫວຽດນາມ ທີ່ໄດ້ນຳສະເໜີຂ່າວຈາກລາຊະອານາຈັກແດນມາກແລ້ວ, ທີ່ການພົບປະ, ທ່ານຮອງປະທານປະເທດ ນາງ ຫວໍທິແອັງຊັວນ ຢືນຢັນວ່າ ລັດ ຫວຽດນາມ ໄດ້ມີຄວາມເຄົາລົບນັບຖື, ຮັບຮູ້ ແລະ ຕີລາຄາສູງການປະກອບຂອງສະມາຄົມມິດຕະພາບ ແດນມາກ - ຫວຽດນາມ ໃນຕະຫຼອດ 45 ປີຜ່ານມາສຳຫຼັບການພັດທະນາຢ່າງຕັ້ງໜ້າ ແລະ ແທດຈິງຂອງການພົວພັນຄູ່ຮ່ວມມືຮອບດ້ານ ຫວຽດນາມ - ແດນມາກ.
 |
| ທ່ານຮອງປະທານປະເທດ ນາງ ຫວໍທິແອັງຊັວນ ຕ້ອນຮັບປະທານສະມາຄົມມິດຕະພາບ ແດນມາກ - ຫວຽດນາມ ນາງ Trine Glue Doan. (ພາບ: ອານດັງ/TTXVN) |
ທ່ານຮອງປະທານປະເທດ ຕີລາຄາວ່າ ນັບແຕ່ສ້າງຕັ້ງມາ, ສະມາຄົມຍາມໃດກໍ່ສະໜັບສະໜູນຊ່ວຍຫວຽດນາມ ຢ່າງສຸດອົກສຸດໃຈໃນຂະບວນການສ້າງສາ ແລະ ພັດທະນາປະເທດຊາດ, ພິເສດແມ່ນໃນໄລຍະທີ່ຫວຍດນາມມີຄວາມຫຍຸ້ງຍາກພາຍຫຼັງສົງຄາມ, ປະກອບສ່ວນຊຸກຍູ້ເຜີຍແຜ່ພາບພົດປະເທດຊາດ ແລະ ປະຊາຊົນ ຫວຽດນາມ ຢູ່ ແດນມາກ; ເພີ່ມທະວີສາຍພົວພັນມິດຕະພາບລະຫວ່າງປະຊາຊົນສອງປະເທດ.
ທ່ານຮອງປະທານປະເທດ ນາງ ຫວໍທິແອັງຊັວນ ໄດ້ສະແດງຄວາມຕື້ນຕັນໃຈຕໍ່ຄວາມຮັກແພງທີ່ພິເສດຂອງສະມາຄົມມິດຕະພາບມອບໃຫ້ແກ່ ຫວຽດນາມ ແລະ ປາດຖະໜາວ່າ ສະມາຄົມຈະສືບຕໍ່ຄວາມສະໜັບສະໜູນອັນລ້ຳຄ່າໃຫ້ ຫວຽດນາມ, ປະກອບສ່ວນຊຸກຍູ້ບັນດາທິດທາງພັດທະນາຮ່ວມຂອງ 2 ປະເທດ, ຂົນຂວາຍແຫຼ່ງກຳລັງໃຫ້ບັນດາໂຄງການໜູນຊ່ວຍບັນດາຂົງເຂດທີ່ຍັງມີຄວາມຫຍຸ້ງຍາກຂອງຫວຽດນາມ.
ທ່ານປະທານສະມາຄົມມິດຕະພາບແດນມາກ - ຫວຽດນາມ ນາງ Trine Glue Doan ໄດ້ສະແດງຄວາມຂອບໃຈການຮັບຮູ້ຂອງລັດ ຫວຽດນາມ ແລະ ທ່ານຮອງປະທານປະເທດ ນາງ ຫວໍທິແອັງຊັວນ ໃນການປະກອບສ່ວນຂອງສະມາຄົມ. ທ່ານນາງ Trine Glue Doan ໃຫ້ຮູ້ວ່າ: ສະມາຄົມມີສະມາຊິກເປັນຈຳນວນຫຼວງຫຼາຍ ແລະ ໄດ້ຮັບການສະໜັບສະໜູນຈາກຫຼາຍຄົນ. ແຕ່ລະປີ, ສະມາຄົມໄດ້ຈັດຕັ້ງຫຼາຍເຫດການປະຊາຄົມເພື່ອແບ່ງປັນຂໍ້ມູນກ່ຽວກັບຫວຽດນາມ, ສ້າງກອງທຶນ ແລະ ໜູນຊ່ວຍການປະຕິບັດບັນດາໂຄງການພັດທະນາຢູ່ຫວຽດນາມ. ທ່ານປະທານສະມາຄົມມິດຕະພາບແດນມາກ - ຫວຽດນາມ ຢືນຢັນຈະສືບຕໍ່ປະຕິບັດບັນດາຄະຕິທຳ ແລະ ຈຸດປະສົງຂອງສະມາຄົມ, ມານະພະຍາຍາມກວ່າອີກເພື່ອໜູນຊ່ວຍປະຊາຊົນ ຫວຽດນາມ, ເພີ່ມທະວີການພົວພັນຮ່ວມມືກັບບັນດາສະມາຄົມມິດຕະພາບ ຊູແອັດ - ຫວຽດນາມ, ນອກແວ - ຫວຽດນາມ ເພື່ອສ້າງພາບພົດປະເທດຫວຽດນາມ ຢູ່ສາມປະເທດ ເຂດ Scandinavian ໃຫ້ຈະແຈ້ງກວ່າ.
ດີງເລື້ອງ
