ຮ່າຕິ້ງ ແລະຄຳມ່ວນ ເພີ່ມທະວີການຮ່ວມມືຮອບດ້ານ

	ຮ່າຕິ້ງ, ບໍລິຄໍາໄຊ, ຄໍາມ່ວນ ເຊັນບົດບັນທຶກຊ່ວຍຈໍາວ່າດ້ວຍການປົກປັກຮັກສາອະທິປະໄຕຄວາມໝັ້ນຄົງຢູ່ເຂດຊາຍແດນ
	ທະຫານຊາຍແດນແຂວງ ຮ່າຕິ້ງ ເຈລະຈາກັບກອງບັນຊາການທະຫານ, ກອງບັນຊາການປ້ອງກັນຄວາມສະຫງົບແຂວງ ຄໍາມ່ວນ (ລາວ)

ຕອນບ່າຍວັນທີ 31 ຕຸລາ, ຄະນະປະຕິບັດງານແຂວງຄຳມ່ວນ (ສປປ ລາວ) ນໍາໂດຍສະຫາຍ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ ໄດ້ມາຢ້ຽມຢາມ ແລະເຮັດວຽກກັບແຂວງ ຮ່າຕິ້ງ.

ສະຫາຍ ເຈີ່ນເບົາຮ່າ ຮອງປະທານຄະນະກຳມະການປະຊາຊົນແຂວງຮ່າຕິ້ງ ພ້ອມດ້ວຍການນຳບັນດາພະແນກ, ອົງການທີ່ກ່ຽວຂ້ອງໄດ້ຕ້ອນຮັບ ແລະເຮັດວຽກກັບຄະນະປະຕິບັດງານ.

ກ່າວຄຳເຫັນທີ່ກອງປະຊຸມ, ສະຫາຍ ເຈີ່ນເບົາຮ່າ ເນັ້ນໜັກວ່າ: ຮ່າຕິ້ງ ຍາມໃດກໍ່ເອົາໃຈໃສ່ເປັນພິເສດເຖິງການປັບປຸງ, ຮັດແໜ້ນການພົວພັນມິດຕະພາບອັນຍິ່ງໃຫຍ່, ຄວາມສາມັກຄີແບບພິເສດ ແລະການຮ່ວມມືຮອບດ້ານກັບບັນດາທ້ອງຖິ່ນຂອງ ສປປ ລາວ. ພິເສດ, ຮ່າຕິ້ງ ຍາມໃດກໍ່ຮັກສາ, ເພີ່ມພູນຄູນສ້າງການພົວພັນຮ່ວມມືຮອບດ້ານກັບແຂວງຄຳມ່ວນ ແລະສະຫວັນນະເຂດ; ເປີດກວ້າງການຮ່ວມມືກັບນະຄອນຫຼວງວຽງຈັນ ແລະບັນດາແຂວງພາກເໜືອຂອງລາວ; ສຸມໃສ່ນໍາການພົວພັນລະຫວ່າງ ຮ່າຕິ້ງ ແລະອົງການການທູດຂອງ ສປປ ລາວ ປະຈຳຫວຽດນາມ ເຂົ້າສູ່ລວງເລິກ.

ການນຳແຂວງຮ່າຕິ້ງ ແລະແຂວງຄຳມ່ວນ ມອບຂອງຂວັນ ແລະຖ່າຍຮູບເປັນທີ່ລະນຶກ. ພາບ: Baohatinh.vn

ເພື່ອຊຸກຍູ້ການພົວພັນຮ່ວມມືຮອບດ້ານໃນໄລຍະຍາວນານ, ສະຫາຍ ເຈີ່ນເບົາຮ່າ ໄດ້ສະເໜີໃຫ້ແຂວງຄຳມ່ວນ ສືບຕໍ່ປະຕິບັດບັນດາສັນຍາ, ດຳລັດ, ຄຳສັ່ງຊີ້ນຳ ລະບຽບການຮ່ວມມືຢ່າງມີປະສິດທິຜົນ; ຮັກສາການປະຊຸມພົບປະ, ແລກປ່ຽນ ແລະສົມທົບກັນລະຫວ່າງສອງຝ່າຍ ເພື່ອແກ້ໄຂບັນດາບັນຫາເກີດຂຶ້ນຢ່າງທັນການ; ປະກອບສ່ວນຮັກສາຄວາມໝັ້ນຄົງດ້ານການເມືອງ, ຄວາມເປັນລະບຽບຮຽບຮ້ອຍທາງສັງຄົມຢູ່ເຂດຊາຍແດນ.

ສະຫາຍ ເຈີ່ນເບົາຮ່າ ກໍ່ສະເໜີໃຫ້ ສອງຝ່າຍສືບຕໍ່ຜັນຂະຫຍາຍບັນດານະໂຍບາຍບຸລິມະສິດກ່ຽວກັບການລົງທຶນພື້ນຖານໂຄງລ່າງໃຫ້ບັນດາເມືອງຊາຍແດນ; ສະເໜີໃຫ້ບັນດາອົງການທີ່ມີສິດອຳນາດລົງທຶນກໍ່ສ້າງ, ຍົກລະດັບພື້ນຖານໂຄງລ່າງຢູ່ເຂດດ່ານຊາຍແດນ. ແຂວງຄໍາມ່ວນ ສືບຕໍ່ສະເໜີບັນດາກະຊວງ, ຂະແໜງການຂອງລັດຖະບານລາວ ສົມທົບກັບຫວຽດນາມ ແລະ ໄທ ເພື່ອນໍາເສັ້ນທາງເລກ 8, ເສັ້ນທາງເລກ 12 ແລະເສັ້ນທາງ ເລກ 13 ເຂົ້າສັນຍາຂົນສົ່ງຂ້າມແດນຂອງບັນດາປະເທດອະນຸພາກພື້ນແມ່ນ້ຳຂອງເປີດກວ້າງໂດຍໄວ; ສ້າງເງື່ອນໄຂໃຫ້ບັນດາວິສາຫະກິດຮ່ວມມື.

ພ້ອມກັນນັ້ນ, ຮ່າຕິ້ງ ແລະ ຄຳມ່ວນ ຕ້ອງສືບຕໍ່ສະເໜີໃຫ້ນາຍົກລັດຖະມົນຕີສອງປະເທດ ປະຕິບັດເນື້ອໃນການຮ່ວມມືລົງທຶນພັດທະນາທ່າກຳປັ່ນ 1, 2, 3 ຂອງທ່າກຳປັ່ນ ວຸ້ງແອງ ຕາມອະນຸສັນຍາ, ສັນຍາທີ່ໄດ້ລົງນາມ; ເພີ່ມທະວີການເຄື່ອນໄຫວຮ່ວມມືຮອບດ້ານໃນທຸກຂົງເຂດ... ເພື່ອຮັດແໜ້ນຄວາມສາມັກຄີແບບພິເສດລະຫວ່າງແຂວງຮ່າຕິ້ງ ແລະແຂວງຄຳມ່ວນ ເວົ້າສະເພາະ, ຫວຽດນາມ ແລະ ສປປ ລາວ ເວົ້າລວມ.